ኤርማሳ ትምቢትያ
ገሉዋ
ትምቢትያ ኦድያ ኤርማስ፥ ክርስቶስ የለታናፐ ካሰ ላፑን ጼቱ ላይꬃ ዉርሰꬃንነ ኡሱፑንꬆ ጼቱ ላይꬃ ዶመꬃ ሄራን ደኤዳ። ኤርማስ ዳሮ ዎድያ ኦꬄዳ ባረ ኦሱዋን ኡንቱንቱ ኤቃ ጎይኑዋነ ኡንቱንቱ ናጋራ ኦሱዋ ጋሱዋን ጾሳ አሳ ቦላ ዎልቃማ ባሻይ ዪደ ደእያዋ ኡንቱንታ ምንሲደ ኤርሴዳ። ባረ ኦዴዳዌ ኡባይ ፖለቴዳዋ ፓጻ ደኢደ ባረ አይፍያን በኤዳ። ባብሎነ ካቲ ናቡካዳናጾር የሩሳላመ ኦይቂደ፥ ካታማነ ጌሻ ጎልያ ላሌዳ። ይሁዳ ካዉነ አሳፐካ ዳርያ ባጋይ ኦሞደቲደ ባብሎነ ቤዳ። ጉጂደካ ኤርማስ አሳይ ኦሞዱዋፐ ስማናዋነ እስራኤልያ ካዉተꬃይ ኤቃናዋ ካሰቲደ ኦዴዳ።
ኤርማሳ ማጻፋ ኦይዱ ከሲደ በአናዉ ዳንዳየቴ።
1. ናብያ ጼሳባ፥ እዮስያሳ፥ ዮኣቄማ፥ ዮኣኪናነ ሰደቅያሳ ካዉተꬃ ላይꬃቱዋን ይሁዳ አሳስነ ኡንቱንታ ካለꬅያዋንቶ ጾሳፐ ዬዳ ቃላ።
2. ሀናናዉ ኦደቴዳ ዱማ ዱማ ቃላቱዋነ ኤርማሳ ደኡዋን ፖለቴዳ ዋና ዋና የዎቱዋ ጉጂደ፥ ኤርማሳ ጻፍያ ባሩክ ጻፊደ ኦይቄዳ ቄር ዳዉታርያፐ ቤቴዳ ጹፈቱዋ።
3. ዱማ ዱማ አላጋ ቢታ አሳዉ ጾሳፐ ኦደቴዳ ትምቢትያ ቃላቱዋ።
4. የሩሳላመ ኦይቀꬃባነ አሳይ ኦሞደቲደ ባብሎነ ባናዋ ኦድያ ጉጆ ታርከቱዋ።
ኤርማስ ባረ አሳ ሎይꬅ ሲቅያነ ኡንቱንቱ ቦላ ባየꬃ ፕርዳ አꬃናዉ ሎይꬅ ዳሮ እጽያ አሳ። ትምቢትያ ኦድያ አሳ ግዲደ ኦꬃና ማላ ጾሳይ አ ጼሴዳ ድራዉ፥ ባረና ጋኬዳ መቱዋ ጋሱዋን እ ካዮቴዳ ምኖ ካዩ አ ማጻፋ ግዶን ዳሮ ሳኣን ጻፈት ኡቴዳ። ጾሳ ቃላይ አ ዎዛና ግዶን ታማዳን ጹግያ ድራዉ፥ ሄዋ ባሪደ ዎꬅ አጋናዉ ዳንዳይቤናዋ ቆንጭሴዳ።
ሀ ማጻፋን ጻፈቴዳ ትምቢትያ ኦዴዳ ዎልቃማ ዎልቃማ ቃላቱዋፐ እቱ እቱ መቱ ኩሜዳ ኤርማሳ ላይꬃፐ አꬊደ፥ ዎዛናን ጻፈተደ ድራዉ፥ ሀሳይስያ አስታማሪ ኮሸናን፥ ኡባ ገደ ናግያ ኦራꬃ ጫቁ ጾሳ አሳዉ እመትያ ዎዲ ያናዉ ደእያዋ ማላቲኖ (31:31-34)።
ሸምፓቱዋ ኡባቶ እመቴዳ ቃንꬃ ቆፋቱዋ
ጾሳይ ኤርማሳ ዶሬዳ 1:1-19
ጾሳይ ይሁዳነ እስራኤልያ አሳ ሙርያዋ 2:1—25:38
ኤርማስ ዎርዶ ናባቱዋ ኤቀቴዳ 26:1—29:32
ጾሳይ ባረ አሳ ባረንቱ ቢታዉ ዛራና 30:1—33:26
ኤርማሳ ዱማ ዱማ ኦሶቱዋ 34:1—38:28
የሩሳላመ ኩንደꬃነ ይሁዳን መቴዳ ሀኖታቱዋ 39:1—42:22
ኤርማስ ግብጼ ቤዳ 43:1—44:30
ባሮካዉ ኦደቴዳ ትምቢትያ 45:1-5
ናቢ ዱማ ዱማ አሳዉ ኦዴዳ ትምቢትያ 46:1—51:64
የሩሳላመ ኩንደꬃባዉ ኪተቴዳ ጉጃ ኦዱዋ 52:1-34
1
ጾሳይ ኤርማሳ ዶሬዳ
(1:1-19)
1 ቢንያማ ቢታን አናቶታ ካታማን ደእያ ቄሳቱ ዋፐ እቱዋ ግድያ ህልቂያ ናኣ ኤርማሳ ቃላይ ሀዋ። 2 አሞና ናአይ፥ ይሁዳ ካቲ እዮስያስ ካተቴዳ ታማነ ሄዘንꬆ ላይꬃን መꬍና ጎዳ ቃላይ ኤርማሳዉ ዬዳ። 2 ካታ. 22:3—23:27፤ 2 ኦዱዋ 34:8—35:19 3 ቃይ እዮስያሳ ናአይ፥ ይሁዳ ካቲ እዮአቄም ካተቴዳ ላይꬃቱዋን ጾሳ ቃላይ ኤርማሳዉ ዬዳ። ቃይካ እዮስያሳ ናአይ፥ ሰደቅያስ ካተትና፥ ታማነ እት ላይꬃ ጋካናዉ፥ ጾሳ ቃላይ ዳሮ ገደ አዉ ዬዳ። ሄ ላይꬅ እቼሻንꬃ አግናን የሩሳላመ አሳይ ኦሞደቲደ ቤዳ። 2 ካታ. 23:36—24:7፤ 25:21፤ 2 ኦዱዋ 36:5-8፤ 11:21
ኤርማስ ጼሰቴዳ
4 መꬍና ጎዳ ቃላይ ታኮ ሀዋዳን ያጊደ ዬዳ፤ 5 “ታን ኔና ነ አት ኡሉዋን አታናፐ ካሰ ኤራድ። ኔን ኡሉዋፐ የለታናፐ ካሰ ታን ኔና ጌሻደ ዱማያ ዎꬃድ። ቃይ ካዉተꬃቶ ትምቢትያ ኦድያዋ ኦꬃደ ኔና ሱንꬃድ” ያጌዳ።
6 ታን፥ “ሀእ ኡባ ሞድያ መꬍና ጎዳዉ፥ ታን ናኣ። ታን ዎት ሃሳይንቶካ ኤርከ” ያጋድ።
7 ሽን መꬍና ጎዳይ ታና ሀዋዳን ያጌዳ፤ “ ‘ታን ናኣ’ ጎፓ። ታን ኔና ኪትያ አሳ ኡባኮ ባ። ታን አዛዝያዋ ኡባካ ኦዳ። 8 ኡንቱንቶ ያዮፓ። አያዉ ጎፐ፥ ታን ኔና አሻናዉ ኔናና እትፐ ደአና። መꬍና ጎዳይ ሀዋ ኦዳድ” ያጌዳ።
9 መꬍና ጎዳይ ባረ ኩሽያ የዲደ፥ ታ ዶና ቦቼዳ። ያቲደ፥ “በአ፤ ታን ታ ቃላ ነ ዶናን ዎꬃድ። 10 ኔን ሾዳናዉነ ኮላናዉ፥ ꬋይሳናዉነ አꬃ የጋናዉ፥ ኬጻናዉነ ቶካናዉ፥ ደርያ አሳ ቦላነ ካዉተꬃቱዋ ቦላ ታን ሀች ኔና ሱንꬃድ” ያጌዳ።
11 መꬍና ጎዳ ቃላይ ታኮ ዪደ፥ “ኤርማሳ፥ ነዉ አያይ ቤቲ?” ያጌዳ።
ታን ዛራደ፥ “ላዉዝያ ግያ ምꬃፐ ከሴዳ ጋትማይ ቤቴ” ያጋድ።
12 መꬍና ጎዳይ ታና፥ “ኔን ልከ በኣዳ። አያዉ ጎፐ፥ ታንካ ታ ቃላይ ፖለትና፥ ሄዋዳን በአናዉ ናጋይ” ያጌዳ።
13 ላኤንꬁዋካ መꬍና ጎዳ ቃላይ ታኮ ዪደ፥ “ሀራባይ ቃይ አያይ ቤቲ?” ያጌዳ።
ታን ዛራደ፥ “እት ፐንትያ ጻሩ ሁጲሳ ባጋፐ ሃ ስሚደ፥ ኩንዳናዉ ማት ኡቴዳዌ ቤቴ” ያጋድ።
14 መꬍና ጎዳይ ታና፥ “ሁጲሳ ባጋፐ ባሻይ ፖꬊደ፥ ቢታን ደእያ አሳ ኡባ ቦላ ጉካና። 15 ታን ሁጲሳ ባጋ ካዉተꬃቱዋን ደእያ አሳ ኡባ ጼሳና ሀናይ። ታን መꬍና ጎዳይ ሀዋ ኦዳድ። ኡንቱንቱ ካተቱ ዪደ፥ የሩሳላመ ገልያ ፐንገቱዋን፥ ድርሳ ዩሹዋ ኡባንነ ይሁዳ ካታማቱዋ ኡባን ባረንቱ አራታቱዋ ዎꬃና። 16 ይሁዳ አሳይ ታና አጊደ፥ ሀራ ጾሳቶ ያርሺደነ ባረንቱ ኩሽያን ኡንቱንቱ ኦꬄዳባዉ ጎይኒደ፥ ኦꬄዳ ኡንቱንቱ ኢታተꬃ ኡባ ድራዉ፥ ታን ታ ፕርዳ ኡንቱንቱ ቦላ ኦዳና።
17 “ሽን ኔን ነ ሁጲያዉ ጊጋ! ደንዳ ኤቃደ፥ ታን ኔና አዛዝያዋ ኡባ ኡንቱንቶ ኦዳ። ኡንቱንቶ ያዮፓ። ኔን ኡንቱንቶ ያዮፐ፥ ታን ኔና ኡንቱንቱ ስንꬃን ጉጃ ያሽሳና። 18 ሀች ታን ኔና ሀ ቢታ ኡባ ቦላ፥ ይሁዳ ካተቱ ቦላ፥ ካፖቱዋ ቦላ፥ ቄሳቱ ዋ ቦላነ ሀ ቢታ አሳ ቦላ ግምበቴዳ ካታማዳን፥ ብራታ ቱሳዳንነ ናሃስያ ብራታን ድሬዳ ድርሳዳን ኦꬃደ ምንሳድ። 19 ኡንቱንቱ ኔናና ኦለታና። ሽን ታን አሻናዉ ኔናና እትፐ ደእያ ድራዉ፥ ኔና ጾንክኖ። መꬍና ጎዳይ ሀዋ ኦዳድ” ያጌዳ።