1 መꬍና ጎዳ ቃላይ ታዉ ዪደ፥ 2 “ባደ የሩሳላመ አሳ ሀይꬃን ሀዋዳን ያጋደ አዋያ፤ ‘ኔን ያላጋተꬃን ታዉ አይ ኬሻ አማነቴደንቶ፥ ቃይ ኔን ብሮ ምሽራን ደእያ ዎደ፥ ታና አይ ኬሻ ሲቄደንቶ፥ ታን ጾሳይ ሀሳያይ። ኔን ባዞ ግዱዋና፥ ዘረꬃይ ዘረት ኤረና ቢታና ታና ካላዳ። 3 ሄ ዎደ እስራኤሊ መꬍና ጎዳዉ ጌሻ። አዉ ባይራ ካꬃ ማላ፤ አፐ ሜዳ ኡባቱ ባይዛንቻ ግዲኖ። ያትና፥ ኡንቱንቱ ቦላ ኢታባይ ዬዳ። መꬍና ጎዳይ ሀዋ ኦዳድ’ ያጋ” ያጌ።

4 ህንተኖ፥ ያቆባ አሳቶ፥ እስራኤልያ ዛረቶ፥ ኡባይካ መꬍና ጎዳ ቃላ ስስተ! 5 መꬍና ጎዳይ ሀዋዳን ያጌ፤ “ካሰ ህንተ አዎቱ ታናን አይ ባይዙዋ ደሚደ፥ ታፐ ሃኪደ ቤድኖ? ኡንቱንቱ ፓና ኤቃቶ ጎይኒደ፥ ፓናባ ግዴድኖ። 6 ኡንቱንቱ፥ ‘ኑና ግብጼፐ ከሴዳዌ፥ መላ አፎ ግዴዳ ባዙዋና፥ ኮሻይነ ꬍጵ ጎ ꬉማይ ደእያ ቢታና፥ አይ አሳይነ አና ዎይ ደኤና ሳና ካለꬄዳ መꬍና ጎዳይ ሀቃን ደኢ?’ ያግበይክኖ። 7 ህንተ አፐ ቴራነ ሎኦባ ማና ማላ፥ ታን ህንተና ቱኤ ቢታዉ አሃድ፤ ሽን ህንተ ዪደ፥ ታ ቢታ ቱንሴድታነ ታ ላታ ኢሴድታ። 8 ቄሳቱ ካ፥ ‘መꬍና ጎዳይ ሀቃን ደኢ?’ ያግበይክኖ። ታ ህጊ ኡንቱንቱ ኩሽያን ደእያ አሳቱካ ታና ኤርበይክኖ። አሳ ሞድያዋንቱካ ታ ቦላ ማካሌድኖ። ትምቢትያ ኦድያዋንቱካ ባኣላ ሱንꬃን ትምቢትያ ኦዲደ፥ ፓና ኤቃቶ ጎይኔድኖ” ያጌ።

9 ቃይካ መꬍና ጎዳይ ሀዋዳን ያጌ፤ “ሄዋ ድራዉ፥ ታን ህንተና ብሮካ ሞታና፤ ህንተ ናናቱዋ ናናቱዋካ ሞታና። 10 አነ አዋይ ዶልያ ባጋ ቢደ፥ ቆጲሮሳ ግያ ሃꬃን ዶደቴዳ ቢታ ጼልተ። ዎይ አዋይ ዉልያ ባጋ ቄዳረ ግያ ቢታ አሳ ኪቲደ ጾሞስስተ። ያቲደ አነ ሀዋ ማላባይ ሀዋፐ ካሰ ባጋን ሀኔደንቶነ በእተ። 11 ኡንቱንቱ ቱሙ ጾሳቱዋ ግዳና ꬋዮፐነ፥ ደሪ ባረ ጾሳቱዋ ላምቤና። ሽን ታ አሳይ ታና ባረ ቦንቹዋ ፓና ኤቃቱዋን ላሜዳ” ያጌ።

12 ቃይካ መꬍና ጎዳይ ሀዋዳን ያጌ፤ “ሳሎቶ፥ ‘ፖራ!’ ጊተ፤ ዳጋሚደ ኮኮርተ! 13 አያዉ ጎፐ፥ ታ አሳይ ላኡ ኢታባቱዋ ኦꬄዳ፤ ሄዋንቱነ፥ ደኡዋ ሃꬃ ፑልቱዋ ታና አጌዳ፤ ሃꬃ ኦይቃናዉ ዳንዳየና፥ ጾኤት ድጌዳ ኦላ ባረዉ ቦኬዳ።

14 “እስራኤሊ ቆማነ ግደና፤ ሶን የለቴዳ አይለነ ግደና። ያትና፥ እ አያዉ ዶአይ ኦይቂያዋ ግዴዴ? 15 አ ሞርከቱ ጋሙዋዳን፥ አ ቦላን ጉዴድኖ። ኡንቱንቱ ባረንቱ ቃላ ꬎቁ ኦꬂደ ዳሬድኖ፤ ኡንቱንቱ አ ቢታ መላ ከሴድኖ፤ አ ካታማቱካ ላለቲደ፥ ደእያዋ ꬋዬድኖ። 16 ሄዋ ቦላካ መምፕሳነ ጻፍናሳ አሳቱ አ ሊጲያ ሜዴድኖ። 17 ኔኖ እስራኤልያዉ፥ እ ኔና ኦግያን ካለꬅሽን፥ መꬍና ጎዳ ነ ጾሳ አጌዳዋን ሀዋ ነ ቦላ አሄዳዌ ኔና ግድኪ? 18 ናይለ ሻፋፐ ሃꬃ ኡሻናዉ ግብጼ ብያዌ ኔና አያ ማዳኔ? ዎይ ኤፍራጺሳ ሻፋፐ ሃꬃ ኡሻናዉ አሶረ ቢታ ብያዌ ኔና አያ ጎአኔ? 19 ስም ነ ኢታተꬃይ ኔና ሙራና፤ ኔን ታና አጌዳዌ ነ ቦላ ፕርዳና” ያጌ።

መꬍና ጎዳይ፥ ኡባፐ ዎልቃማ ጾሳይ ሀዋዳን ያጌ፤ “ኔን ታና መꬍና ጎዳ ነ ጾሳ አጌዳዌ አይ ኬሻ ኢታነ ጫማ ግድንቶ፥ አነ ኤራነ በአ። ኔን ታዉ ያይያ ያሻይ ኔናን ባዋ።

20 “ታን ነ ሞርገ ምꬃ በን መንꬃድ፤ ነ ቃሹዋካ ዱꬃድ። ያትናካ፥ ‘ታን ነዉ ኦꬅከ’ ያጋዳ። ደርያ ኡባ ቦላነ ዳሻ ምꬃ ኡባ ጋርሳን ሻርሙጻዳን ግሳዳ። 21 ታን ኔና በርተ ዘረꬃፐ አካደ፥ ሎኦ ዎይንያ ቱራዳን ቶካድ። ያትና፥ ዋና ጉየ ስማደ፥ ዎራን ዶሌዳ፥ ባዬዳ ዎይንያ ቱራ ግዳዲ?” ያጌ።

22 ቃይካ ኡባ ሞድያ መꬍና ጎዳይ ሀዋዳን ያጌ፤ “ኔን ሀንጪጭያን ሜጨታንቶካ፥ ሳሙና ዳርሳደ ጎርፐታንቶካ፥ ነ ባይዙዋ ቅታይ ሀእካ ታ ስንꬃና። 23 ኔን ዋናደ፥ ‘ታን ቱናበይከ፤ ታን ባኣላ ኤቃቶ ጎይናናዉ ዎጻበይከ’ ጋናዉ ዳንዳያይ? አነ ኔን ዎምባን ሀኔዳዋ ጼላ፤ ኔን ኦꬄዳዋነ አኬካ። ኔን ያነ ሃነ ዎꬃ ጃምያ ጋላት ማላ። 24 ኔን ባዙዋ ሜዘቴዳ፥ ባረ ዚታ ዎደ ጫርኩዋ ስንገꬅያ ሀራት ማላ። አ ብራሳዉ ኤቃ ክችና፥ ኦን እዞ ተአናዉ ዳንዳዪ? እዞ ዚትያ አይ ዎዳላ ሀሪነ ዳቡረና፤ እ እዝ ጨገናን እዞ ደም አጌ። 25 ኔኖ፥ እስራኤልያ፥ ነ ጫማይ ዉራና ጋካናስነ ነ ኮኪ መላና ጋካናዉ፥ ሀራ ጾሳቱዋ ጌዱዋ ሀዋዳን ዎጾፓ። ሽን ኔን፥ ‘እጻዳ፤ ሄዌ ታና አይነ ማደና። አያዉ ጎፐ፥ ታን እማꬃ ጾሳቱዋ ሲቃ ድጋድ፤ ታን ኡንቱንቶ ጎእናና’ ያጋዳ።

26 “ካይሱ ኦይቀቴዳ ዎደ ዬላትያዋዳን፥ እስራኤልያ አሳይ ዬላቴ፤ ኡንቱንቱካ፥ ኡንቱንቱ ካተቱ፥ ኡንቱንቱ ካፓቱ፥ ኡንቱንቱ ቄሳቱ ነ ኡንቱንቱ ትምቢትያ ኦድያዋንቱ ኡባይ ዬላቲኖ። 27 ኡንቱንቱ ምꬃ፥ ‘ኔን ታ አዉዋ’ ያጊኖ፤ ቃይ ሹቻ፥ ‘ኔን ታና የላዳ’ ያጊኖ። ኡንቱንቱ ታዉ ባረንቱ ሶምኡዋ አጊደ፥ ባረንቱ ዞክያ ዛሬድኖ። ሽን ኡንቱንቱ መቶትያ ዎደ ታና፥ ‘ደንዳ! ኑና አሻ!’ ያጊኖ። 28 ሽን አነ፥ ህንተ ህንተዉ መꬌዳ ጾሳቱ ሀቃን ደእኖ? ህንተ መቶትያ ዎደ ህንተና አሻናዉ ዳንዳዮፐ፥ አነ ደንድኖ! ህንተኖ፥ ይሁዳ አሳቶ፥ ህንተ ጾሳቱ ህንተ ካታማቱዋ ኬሻ ጮራ” ያጌ።

29 መꬍና ጎዳይ ሀዋዳን ያጌ፤ “ህንተ ታናና አያዉ ሞተቲቴ? ህንተ ኡባይካ ታዉ ማካሌድታ። 30 ታን ህንተና ጮ መላ ሙራድ፤ ህንተ ባይበይክታ። ኮሻቴዳ ጋሙዋዳን፥ ህንተ ማሻይ ህንተ ትምቢትያ ኦድያዋንታ ም ድጌዳ” ያጌ።

31 ህንተኖ፥ ሀ ዎድያ የለታቶ፥ መꬍና ጎዳ ቃላ ስስተ! እ ሀዋዳን ያጌ፤ “ታን ህንተዉ፥ እስራኤላቶ ባዞ ማላ ዎይ ꬍጵ ጎ ꬉማ ቢታ ማላ ግዳድታየ? ያትና፥ አያዉ ታ አሳይ፥ ‘ኑን ኑ ሸንያዳን ባና፤ ላኤንꬆ ኡባካ ኔኮ ስሞኮ’ ያጊ? 32 ወዶራታ ባረ አሌቁዋ ዎይ ቡላቼትያና ባረ ቡላቻ ማዩዋ ዶጋይ? ሽን ታ አሳይ ታና ፓይዱ ባይና ጋላሳ ዶጌዳ። 33 ኔን ነ ላገꬃቶ ጌዱዋ ዎጽያዋ አያ ሜዘታዲ! ሎይꬅ ኢታ ማጫ አሳቱካ ነ ኦግያፐ ታማራናዉ ዳንዳዪኖ። 34 ቃይ መንꬂደ ገልሽና ኦይቄዳ አሳ ሱꬃን ግደናን፥ ጽሎ ህዬሳቱዋ ሱꬃ ꬋጩዋን ነ ማዩ ባይ ኡቴዳ።

“ኔን ሀዋ ኡባ ኦꬃደካ፥ 35 ‘ታን ጽሎ፤ ቱሙዋፐ ጾሳይ ታ ቦላ ሀንቀተና’ ያጋሳ። ኔን፥ ‘ታን ናጋራ ኦꬃበይከ’ ግያ ድራዉ፥ ታን ነ ቦላን ፕርዳና። 36 ያትና ኔን ነ ኦግያ ላማናዉ አያዉ ብቻራይ? ካሰ ኔና አሶረ ቢታይ ዬላዬዳዋዳን፥ ግብጼ ቢታይካ ዬላያና። 37 ኔን ሀዋፐካ ነ ሁጲያ ኦይቃደ ከሳና። አያዉ ጎፐ፥ መꬍና ጎዳይ ኔን አማነትያዋንታ እጼዳ። ኔን ኡንቱንቱን ማደታካ” ያጌ።