1 መꬍና ጎዳ ኪታንቻይ ገልገላፐ ቦክማ ቢደ፥ እስራኤልያ አሳ ሀዋዳን ያጌዳ፤ “ታን ህንተንታ ግብጼፐ ከሳድ፤ በን ህንተንቱ ማይዛ አዋቶ እማና ጋደ ጫቄዳ ጋድያ ህንተንታ ገልሳድ። ህንተንታ ሀዋዳን ያጋድ፤ ‘ታን ህንተናና ጫቀቴዳ ጫቁዋ ኡባካ መንꬅከ፥ 2 ህንተንቱ ሀ ጋድያን ደእያ አሳቱዋና ቃላ ጫቁዋ ገሎፕተ፤ ኡንቱንቱ ያርሽያ ሳኣ ኮልተ’ ያጋድ፤ ሽን ህንተንቱ ታዉ አዛዘትበይክታ። አያዉ ሄዋዳን ሀኔድቴ?ከሳ 34:12-13፤ ዛረ. 7:2-5 3 ሄዋ ድራዉ፥ ታን ኡንቱንታ፥ ህንተንቱ ስንꬃፐ የደርስከ፤ ኡንቱንቱ ህንተንቶ ሞርከ ግዳና፤ ኡንቱንቱ ጾሳቱካ ህንተንቶ ጲረ ግዳና ያጋይ” ያጌዳ። 4 መꬍና ጎዳ ኪታንቻይ ሄዋ እስራኤልያ አሳዉ ኡባዉ ሃሳዬዳ ዎደ፥ አሳይ ባረ ቃላ ꬎቁ ኦꬂደ ዬኬዳ። 5 ያቲደ ሄ ሳኣ ቦክማ *ቦክማ፦ ሀ ሱንꬃ ብለꬃይ እብራዌꬁዋን፥ “ዬክያዋንታ” ግያዋ። ያጊደ ሱንꬄዳ፤ ሄዋን መꬍና ጎዳዉ ያርሹዋ ያርሼዳ።

6 ኢያሱ እስራኤልያ አሳ የዴዳዋፐ ጉይያን፥ አሳይ እቱ እቱ ባረና ሻክና ጋክያ ጋድያ አካናዉ ቤዳ። 7 ኢያሱ ደኡዋን ደኤዳ ላይꬃ ኡባን አሳይ መꬍና ጎዳዉ ኦꬄዳ፤ እ ሀይቄዳዋፐ ጉይያን፥ መꬍና ጎዳይ እስራኤልያ አሳዉ ኦꬄዳ ዎልቃማ ኦሱዋ ኡባ በኤዳ ጭማቱዋ ዎደ ኡባን መꬍና ጎዳዉ ኦꬅያዋ አግቤና።

8 መꬍና ጎዳ ቆማይ፥ ነዌ ናኣ ኢያሱ፥ ላይꬃይ ጼታነ ታሙዋ ግድና ሀይቄዳ፤ 9 ጋኣሻ ደርያፐ ሁጲሳ ባጋን፥ ኤፍሬማ ገዝያን፥ ትምናት-ሰራሀ ግያ ሳን ደእያ አ ላታ ጋድያን ሞጌድኖ። ኢያሳ 19:49-50 10 ሄ የለታ ኡባይ ሀይቂ ባረ ማይዛን ጋከቴዳዋፐ ጉይያን፥ መꬍና ጎዳ ዎይ እስራኤልያ አሳዉ እ ኦꬄዳዋ ኡባ ኤረና ሀራ የለታይ ደንዴዳ።

11 ሄዋፐ ጉይያን፥ እስራኤልያ አሳይ መꬍና ጎዳ ስንꬃን ኢታባ ኦꬄዳ፤ ባኣላ ጌተትያ ኤቃቶ ጎይኔድኖ። 12 ግብጼ ጋድያፐ ኡንቱንታ ከሴዳ መꬍና ጎዳ፥ ባረንቱ ማይዛ አዎቱዋ ጾሳ አግ ባሼድኖ፤ ባረንቱ ዩሹዋን ደእያ አሳቱዋ ኤቃቱዋኮ ስሚደ፥ ኡንቱንቶ ጎይኔድኖ፤ ሄዋን መꬍና ጎዳ ሀንቀꬄድኖ። 13 ቃይ አ አግ ባሺደ፥ ባኣላዉነ አስታሮታዉ ጎይኔድኖ። 14 ያትና፥ መꬍና ጎዳ ሀንቁ እስራኤልያ አሳ ቦላ ኤጽ ከሴዳ፤ ቦንቂያዋንቱ ቦንቃናዳን ኡንቱንታ በስ ባሼዳ፤ ኡንቱንቱ ዩሹዋን ደእያ ሞርከቶ ኡንቱንታ አꬂደ እሜዳ። ያትና፥ ኡንቱንቱ ባረንቱ ሞርከቱዋና ኤቀታናዉ ዳንዳይበይክኖ። 15 ኡንቱንቱ ኦለታናዉ ከሴዳ ዎደ ኡባን፥ መꬍና ጎዳይ ካሰ ኡንቱንቶ ጫቄዳዋዳን ኡንቱንቱ ጾነታና ማላ፥ እ ኡንቱንቱ ቦላ ደንዴዳ። ያትና፥ ኡንቱንቱ ሎይꬅ ዋየꬄድኖ።

16 ያትና፥ መꬍና ጎዳይ ዳናቱዋ ኡንቱንቶ ደንꬄዳ፤ ኡንቱንቱ እስራኤልያ አሳ ቦንቄዳዋንቱ ኩሽያፐ አሼድኖ። 17 ሽን እስራኤልያ አሳይ ፕርድያ ዳናቶ አዛዘትቤና፤ ኡንቱንቱ መꬍና ጎዳዉ አማነተናን እጼድኖ፤ ሀራ ጾሳቱዋኮ ስሚደ፥ ኡንቱንቶ ጎይኔድኖ። ኡንቱንቱ አዎቱ ሀመቴዳ ኦግያፐ ኤለካ ጉየ ስሜድኖ፤ ኡንቱንቱ ማይዛ አዎቱ ጾሳዉ አዛዘቴዳዋዳን፥ ኡንቱንቱ አዛዘትበይክኖ። 18 መꬍና ጎዳይ ኡንቱንቶ ፕርድያ ዳናቱዋ ደንꬄዳ ዎደ አዉደነ እ ሄ ፕርድያ ዳናቱዋና እትፐ ግዴዳ፤ ሄ ዳናይ ደኡዋን ደኤዳ ላይꬃ ኡባን ኡንቱንቱ ሞርከቱዋ ኩሽያፐ ኡንቱንታ አሼዳ። አያዉ ጎፐ፥ ኡቁናይነ ቱጋይ ዳርና፥ ኡንቱንቱ ዋስያዋ ስሲደ፥ መꬍና ጎዳይ ኡንቱንቶ ቃረቴዳ። 19 ሽን ፕርድያ ዳናይ ሀይቄዳዋፐ ጉይያን፥ አሳይ ጉየ ስሚደ፥ ካሰ ኡንቱንቱ አዎቱ ኦꬄዳ ኢታፐ አꬌዳ ኢታ ኦꬄድኖ፤ ኡንቱንቱ ሀራ ጾሳቱዋኮ ስሚደ፥ ኡንቱንቶ ጎይኔድኖ፤ ባረንቱ ኢታ ኦሱዋነ ደሻ ኦግያ አገናን እጼድኖ። 20 መꬍና ጎዳ ሀንቁ እስራኤልያ አሳ ቦላ ኤጽ ከሴዳ፤ ያትና፥ መꬍና ጎዳይ ሀዋዳን ያጌዳ፤ “ሀ አሳይ ታን ኡንቱንቱ ማይዛ አዋቶ ገሌዳ ጫቁዋ መንꬄዳ ድራዉነ ታዉ አዛዘተናን እጼዳ ድራዉ፥ 21 ሀቼፐ ዶምና፥ ኢያሱ ሀይቄዳ ዎደ ቢታ ቦላን አቴዳ ጋደ አሳቱዋፐ እቱዋነ ታን ኡንቱንቱ ስንꬃፐ የደርሳደ ከስከ። 22 ሀ እስራኤልያ አሳይ ካሰ ባረንቱ ማይዛ አዎቱዋዳን ታ ኦግያ ካልንቶ፥ ዎይ ካለነንቶ ፓጫናዉ፥ መꬍና ጎዳይ ሄ አቴዳ ጋደ አሳቱዋን ጎኤታና” ያጌዳ። 23 ሄዋ ድራዉ፥ መꬍና ጎዳይ ሄ ጋደ አሳቱ ከሰናን ጋምአናዳን ኦꬄዳ። እ ኡንቱንታ ኤለካ የደርሲደ ከስቤና፤ ኢያሱዉካ ኡንቱንታ አꬂደ እምቤና።