1 ካሰ ካናነን አይ ኦላነ ኦለቲደ ሜዘትቤና እስራኤልያ አሳ ፓጫና ማላ፥ መꬍና ጎዳይ ሀ አሳቱዋ አሼዳ። 2 እ ሄዋ ኦꬄዳዌ፥ ሀዋፐ ካሰ ኦላ ኦለቲደ ሜዘትቤና እስራኤልያ የለታ ኦለትያ ሂላ ታማርሳናሳ። 3 ሄ አሳቱ ኦና ኦኔ ጎፐ፥ እቼሹ ፕልስጼማ ካታማቱዋ ሞድያ አሳቱዋ፥ ካናነቱዋ ኡባ፥ ሲዶና ካታማ አሳቱዋነ ባኣል-ሄርሞነ ጌተትያ ደርያፐ ዶሚደ፥ ሀማታ ፕኑዋ ጋካናዉ ልባኖሳ ደርያን ደእያ ሂዌቱዋ። 4 መꬍና ጎዳይ ሙሴ ባጋና ካሰ እስራኤልያ ማይዛ አሳ አዋቶ እሜዳ አዛዙዋ ኡንቱንቱ አዛዘትንቶ አዛዘተነንቶ ፓጭሳናዉ ኡንቱንታ አሼዳ። 5 ያትና፥ እስራኤልያ አሳይ ካናነቱዋና፥ ሂዌቱዋና፥ አሞረቱዋና፥ ፓርዘቱዋና፥ ሂተቱዋናነ ያቡሳቱዋና እትፐ ደኤዳ። 6 ኡንቱንቱ ማጫ ናና ባረንቶ አኬድኖ፤ ባረንቱ ማጫ ናናካ ኡንቱንቱ አቱማ ናናቶ እሜድኖ። ያቲደ ኡንቱንቱ ጾሳቶ ጎይኔድኖ።

7 እስራኤልያ አሳይ መꬍና ጎዳ ስንꬃን ኢታባ ኦꬄዳ። ኡንቱንቱ መꬍና ጎዳ ባረንቱ ጾሳ ዶጊደ፥ ባኣላነ አሼሮ ጌተትያ ጾሳቶ ጎይኔድኖ። 8 ሄዋ ድራዉ፥ መꬍና ጎዳ ሀንቁ እስራኤልያ አሳ ቦላ ኤጽ ከሴዳ፤ ያትና፥ መꬍና ጎዳይ ማስጰጾምያ ጋድያ ካትያ ኩሻን-ርሽአታይማ ኩሽያን ኡንቱንታ አꬂደ እሜዳ፤ ኡንቱንቱ አዉ ሆስፑን ላይꬃ ሞደቴድኖ።

9 ሽን እስራኤልያ አሳይ መꬍና ጎዳዉ ዋሴዳ ዎደ፥ ኡንቱንታ አሽያ ኡራ ኪቴዳ፤ እካ ካሌባ ቴፋ እሻ ቃናዛ ናኣ ኦትንኤላ ጌተቴ። 10 መꬍና ጎዳ አያናይ አ ቦላ ዎꬍና፥ እ እስራኤልያ ቦላ ፕርድያ ዳና ግዴዳ። ኦላ ኦለታናዉ ቤዳ፤ መꬍና ጎዳይ ማስጰጾምያ ጋድያ ካትያ ኩሻን-ርሽአታይማ አዉ አꬂደ እሜዳ፤ ኩሻን-ርሽአታይማ ጾኔዳ። 11 ያትና፥ ጋዲ ኦይታሙ ላይꬃ ዎፓ ደሜዳ። ሄዋፐ ጉይያን፥ ቃናዛ ናአይ ኦትንኤል ሀይቄዳ።

12 እስራኤልያ አሳይ ዛረꬂደካ መꬍና ጎዳ ስንꬃን ኢታባ ኦꬄዳ። መꬍና ጎዳ ስንꬃን ኡንቱንቱ ኢታባ ኦꬄዳ ድራዉ፥ መꬍና ጎዳይ ሞኣበ ካትያ ኤግሎን እስራኤልያ ቦላን ዎልቃማናዳን ኦꬄዳ። 13 ኤግሎን አሞናቱዋነ አማሌቃቱዋ ባረኮ ሺሽ ቢደ፥ እስራኤልያ አሳ ኦለቲደ ጾኔዳ፤ ዛምባ ካታማ ጌተትያ እያርኮ ካታማ ኦይቄዳ። 14 ያትና፥ እስራኤልያ አሳይ ሞኣበ ካትያ ኤግሎናዉ ታማነ ሆስፑን ላይꬃ ሞደቴዳ።

15 ሽን እስራኤልያ አሳይ መꬍና ጎዳዉ ዋሴዳ ዎደ፥ ኡንቱንታ አሽያ ኡራ ኪቴዳ፤ እካ ቢንያማ ዛርያፐ ጌራ ናኣ ኤሁዳ ጌተቴ፤ እ ሀድርሳ ኩሽያን ኦꬅያ አሳ። እስራኤልያ አሳይ ኤሁዳ ሞኣበ ካትያ ኤግሎናኮ ጊራና ኪቴዳ። 16 ኤሁድ ላኡ ባጋና ቃራቴዳ እት ዋꬋ ግዴዳ ማሻ ባረዉ ጊግሴዳ፤ ኡሸቻ ምይያ ባጋና ባረ ማዩዋ ግዶን ዳንጬዳ። 17 ሄዋፐ ጉይያን፥ ሞኣበ ካትያ ኤግሎናዉ ጊራ አክ አፊደ እሜዳ። ኤግሎን ሎይꬅ ኦርዶ አሳ። 18 ኤሁድ ጊራ ካትያዉ እሜዳዋፐ ጉይያን፥ ጊራ ቶኪደ ቤዳ አሳቱዋ ሞይዜዳ። 19 ሽን ኤሁድ ገልጋላ ማታን ደእያ ማሰቴዳ ሹቻቱዋ ማታፐ ኤግሎናኮ ጉየ ስም ቢደ፥ “ካትያዉ፥ ታን ነዉ ጹርያባይ ደኤ” ያጌዳ።

ካቲ፥ “ጮኡ ጋ!” ያጌዳ፤ ሄዋፐ ጉይያን አ ናግያዋንቱ ኡባይ ካረ ከሴድኖ።

20 ሄ ዎደ ካቲ ፖቅያን ደእያ እት ክፍልያን ባረካ ኡት ደእሽን፥ ኤሁድ አኮ ሺቂደ፥ “ጾሳይ ነዉ ኪቴዳባይ ደኤ” ያጌዳ። ካቲ ባረ ኡቴዳ ሳኣፐ ኤቄዳ፤ 21 ኤሁድ ባረ ሀድርሳ ኩሽያ የዲደ፥ ኡሸቻ ባጋ ምይያፐ ማሻ ሾዲደ፥ ካትያዉ ኡሉዋን ድርግንꬅ አጌዳ። 22 ያትና፥ ማሻዉ ቱቲ አተናን ኡሎ ግዶ ገልና፥ ሀንዳይ ካሜዳ። ኤሁድ ማሻ ካትያ ኡሉዋፐ ሾድቤና ድራዉ፥ ዞክያና ካንꬅ ከሴዳ። 23 ሄዋፐ ጉይያን ኤሁድ ካረ ከሲደ፥ ፖቅያን ደእያ ክፍልያ ፐንግያ ጎርዲደ፥ አ ቦላ ቁልፔዳ።

24 እ ብድጎዋፐ ጉይያን፥ ቆማቱ ዪደ፥ ፐንጊ ጎርደቴዳዋ በኤድኖ፤ ግዶ ክፍልያን ኡርቃ ሼሻዉ ኡተናን አገና ያጊደ ቆፔድኖ። 25 ኡንቱንቱ ናጉ ፖካና ጋካናዉ ሎይꬅ ናጌድኖ። ሽን ካቲ ፐንግያ ዶየናን እጽና፥ ቁልፕያ አኪደ ፐንግያ ዶዬድኖ፤ ባረንቱ ጎዳይ ሀይቂደ፥ ዉይግያን ኩንዴዳዋ በኤድኖ።

26 ኡንቱንቱ ናጊደ ጋምእ ደእሽን፥ ኤሁድ ከስ አኪደ፥ ማሰቴዳ ሹቻቱዋ አꬊደ፥ ሳኢራ ግያ ሳኣ ባቃቴዳ። 27 ኤፍሬማ ገዝያ ጋኬዳ ዎደ፥ እስራኤልያ አሳይ ኦላዉ ሺቃናዳን ማላካታ ፑኔዳ፤ አሳይ አ ካሊደ፥ ያፐ ዱገ ዎꬌዳ። 28 ኡንቱንታ፥ “ታና ካልተ፤ አያዉ ጎፐ፥ መꬍና ጎዳይ ህንተንቱ ሞርከቱዋ፥ ሞኣባቱዋ ህንተንቱ ኩሽያን አꬂደ እሜዳ” ያጌዳ። አ ካሊደ ዎꬊደ፥ ዮርዳኖሳ ሻፋ ፕንያ ሳአቱዋ ኦይቄድኖ፤ ሞኣበ አሳፐ እት ኡራይነ ሄዋና አናዳን ተኤድኖ። 29 ሄ ዎደ ሞኣበ አሳፐ ታሙ ሻአ ግድያ ዶረቴዳ ምኖ ኦላንቻቱዋ ዎꬌድኖ፤ እት አሳይነ ከስ አክ አትቤና። 30 ሄ ጋላስ ሞኣበ አሳይ እስራኤልያ አሳዉ ሞደቴዳ፤ ያትና ቢታይ ሆስፑን ታሙ ላይꬃ ዎፓ ደሜዳ።

31 ኤሁዳፐ ጉይያን፥ አናታ ናአይ ሻምጋር ደንዴዳ፤ ፕልስጼማ አሳፐ ኡሱፑን ጼቱዋ ቦራ ላግያ ዶቁዋን ዎꬊደ፥ እስራኤልያ አሳ አሼዳ።