ካለꬅያዋንቱ ካለꬄዳ ድራዉ፥

ባረ ሁጲያ አꬂደ እሜዳ ድራዉ፥

መꬍና ጎዳ ጋላትተ!

ህንተንቶ ደርያ ሞድያዋንቶ፥ ሀይዝተ!

መꬍና ጎዳዉ እስራኤልያ ጾሳዉ

ጋላታ የꬃ የጻና።

ኔን ሰኢራ ደርያፐ ደንዴዳ ዎደ፥

ቢታይ ቃጼዳ።

ኤ፥ ሃꬃይ ሻረቱዋፐ ዱገ ሶሶቴዳ።

ሀራይ አትና፥ ሲና ደሪካ መꬍና ጎዳ

ያኤላ ዎደ ጫና መህያ ላግያ፥

ዛልአንቻቱ ሄ ቢታና አꬍበይክኖ።

ኦግያና ብያዋንቱካ ኦግያ አጊደ፥

ሎሱዋና ቤድኖ።

ታን ድቦራ፥ ታን እስራኤልያ አሳዉ፥

አቶ ግዳደ ደንዳና ጋካናዉ ኦንነ አትቤና።

ጋድያን ኦላይ ደንዴዳ።

እት ጎንዳሊ ዎይ እት ቶር ቤትቤና።

አሳ ግዶን ዶሲደ ባረንታ አꬂደ እሜዳዋንቱና ደኤ።

ህንተንቶ፥ ግላስያ ቦላን ኡቴዳዋንቶ፥

ኦግያና ሀመትያዋንቶ፥

ሀዋ ስስተ!

ቃይ እስራኤልያ ኦላንቻቱዋ ጽሎተꬃ ኦሱዋባ የጺኖ።

ካታማ ገልያ ፐንገቱዋኮ ዱገ ዎꬌዳ።

ቤጎታ! ቤጎታደ ማዝሙርያ የጻ።

ኔኖ፥ አብኖኣማ ናአዉ፥ ነ ኦሞዱዋ አካደ ያ።

ካፓቱዋኮ ዱገ ዎꬌድኖ።

ድቦርኮ ዬድኖ።

ኤፍሬማ አሳቱ ዬድኖ።

ካፓቱ ማክራ ዛራቱዋፐነ፥

ኤ፥ ይሳኮራ አሳይነ ባራቅካ ዬዳ፤

ኡንቱንቱ አ ጌዱዋ ካሊደ፥ ዛንጋራ ገሌድኖ።

ሽን ሮቤላ ዛራቱ ቆፋን ሻከቲደ፥

ያናዋ አጋናዋ ቃችበይክኖ።

ዶርሳቱዋ ሄምያዋንቱ እምቢልታ ስሳናዉ አቴድኖየ?

ሮቤላ ዛራቱ ቆፋን ሻከቲደ፥

ያናዋ አጋናዋ ቃችበይክኖ።

ዳና ዛራቱ ማርካባቱ ማታን አቴድኖ።

ሜድትራነ አባ ላንቂያን አቴድኖ።

ንፍታሌማ ዛራቱካ ኡንቱንቱዋዳን ኦላ ደምባን ባረንቱ ሸምፑዋ አꬂደ እሜድኖ።

ሄ ካናነ ካተቱ ያን ኦለቲደ፥

ኦሞዳናዉ አያ ብራነ ደምቤይክኖ።

ባረንቱ ዩይያ ዩሻን ኡንቱንቱ ስሳራና ኦለቴድኖ።

ኤረቴዳ ቂሾና ሻፋይ ኩንꬂደ፥

ሄ ካተቱዋ ሾኪደ አፌዳ።

ስንꬃዉ ጋልፋ።

ፓራቱ ባረንቱ ኮትያን ጋድያ ጊርሴድኖ።

‘መሮዛ ሸቂተ!

አያዉ ጎፐ፥ ኡንቱንቱ መꬍና ጎዳዉ ኤቃናዉ ይበይክኖ።

ያኤላ ማጫ አሳ ኡባፐ አንጀቴዳኖ ግዱ።

ማꬃ አዉ እማዱ።

ኡሸቻ ኩሽያን ኦሳንቻቱዋ ማርቴሉዋ ኦይቃዱ።

ሀይꬃ ካርያና ካንꬃ ከሳዱ።

እ ሄ እዝ ገድያ ማታን

ቦልቁ ጊደ ኩንዴዳ።

ሄ ኩንዴዳ ሳኣን ሀይቄዳ።

‘ታ ናኣ ፓራ ጋሪ አያዉ ጋምኤዴ?

ያጋደ ኦቻዱ።

ሽን እዛ ባረ ቆፋን ዛራ ዛራደካ ሀዋዳን ያጋዱ፤

እት እት ኦላንቻ እት እት ዎይ ላኡ ላኡ ዎዶራቱ ጋከናን አግክኖ።

ቃይ ታዉካ ቆꬍያን ጻጻናዉ፥

ጽልፍያን አሌቀቲደ ሎእያ ማዮቱዋ

ኡንቱንቱ አሀና ያጋዱ።

ሽን ነ ሲቃቱ ጉራ ዶልያ አዋዳን ጶልኖ፤

አዋይ ባረ ዎልቃን ከስያዋዳን” ያጌድኖ።