1 እስራኤልያ አሳይ መꬍና ጎዳ ስንꬃን ዛረꬂደ ኢታባ ኦꬄዳ። ሄዋ ድራዉ፥ መꬍና ጎዳይ ኡንቱንታ ሚድያማ አሳዉ አꬂደ እሜዳ። ላፑን ላይꬃ ኡንቱንታ ሞዴድኖ። 2 ምድያማ አሳይ እስራኤልያ አሳ ቦላ ምኔዳ፤ እስራኤልያ አሳይ ኡንቱንቱፐ አታናዉ ደርያ ቦላን ቆሰቲያሳ፥ ጎንጎሉዋነ ጌሱዋ ጊግሴዳ። 3 እስራኤልያ አሳይ ካꬃ ዘሬዳ ዎደ ኡባን፥ ሚድያማ አሳይ አማሌቃ አሳናነ አዋይ ዶልያ ባጋ ጋድያን ደእያ አሳና ዪደ ኡንቱንታ ኦሊኖ። 4 ኡንቱንቱ ሄ ጋድያን ዱንካኒደ፥ ጋዛ ካታማ ጋካናዉ፥ ጋድያ ኡባ ቦላን ዶሌዳባ ꬋይስኖ፤ ዶርሳ፥ መህያነ ሀርያ ላጊደ አፍያ ድራዉ፥ እስራኤልያ አሳዉ አያነ አሽክኖ። 5 ባረንቱ መህያነ ባረንቱ ዱንካንያ አኪደ፥ ቦሊ ይያዋዳን ጮራቲደ ዪኖ፤ ኡንቱንታነ ኡንቱንቱ ጋሎቱዋ ፓይዳናዉ ዳንዳየተና፤ ኡንቱንቱ ዪደ ጋድያ ባይዝኖ። 6 እስራኤልያ አሳይ ሚድያማ አሳ ጋሱዋን ካዉሼዳ፤ ያቲደ ማዱዋ ደማናዉ መꬍና ጎዳኮ ዋሴዳ።

7 ሚድያማ አሳ ጋሱዋን እስራኤልያ አሳይ መꬍና ጎዳኮ ዋሴዳ ዎደ፥ 8 መꬍና ጎዳይ ኡንቱንቱኮ እት ትምቢትያ ኦድያዋ ኪቴዳ። ትምቢትያ ኦድያዌ ኡንቱንታ፥ “መꬍና ጎዳይ እስራኤልያ ጾሳይ ሀዋዳን ያጌ፤ ‘ግብጼፐ፥ አይለተꬃ ጋድያፐ ታን ህንተንታ ከሳድ። 9 ታን ህንተንታ ግብጼ አሳ ኩሽያፐነ ኡቁንያ አሳ ኡባ ኩሽያፐ አሻድ፤ ህንተንቱ ስንꬃፐካ ኡቁንያ አሳ የደርሳደ፥ ኡንቱንቱ ጋድያ ህንተንቶ እማድ። 10 ያታደ ታን ህንተንታ፥ “ታን መꬍና ጎዳ ህንተንቱ ጾሳተነ፤ ህንተንቱ ኡንቱንቱ ጋድያ ላቴዳ አሞራዋናቱዋ ጾሳቶ ጎይኖፕተ” ያጋደ ኦዳድ። ሽን ህንተንቱ ታ ቃላ ስሰናን እጼድታ’ ያጌ” ያጌዳ።

11 ሄዋፐ ጉይያን፥ መꬍና ጎዳ ኪታንቻይ ኦፍራ ግያ ሳን ደእያ አብኤዘራ ያራ ዮኣሻ ዎላ ጋርሳን ኡቴዳ። ሄ ዎደ ዮኣሻ ናአይ ጌዶን ምድያማ አሳፐ ቆሰታናዉ ዎይንያ ኤሳ ጉምኢያሳን ዛርጋ ቡኬ። 12 ሄዋን መꬍና ጎዳ ኪታንቻይ አዉ ቤቲደ፥ “ላ ነኖ፥ ምኖ ኦላንቻዉ፥ መꬍና ጎዳይ ኔናና ደኤ” ያጌዳ።

13 ጌዶን አ፥ “ሀይ ታ ጎዳዉ! መꬍና ጎዳይ ኑናና ደእያዋ ግዶፐ፥ ሀ መቱ ኡባይ ያትና ኑና አያዉ ጋኬዴ? ኑ አዎቱ፥ ‘መꬍና ጎዳይ ኑና ግብጼ ጋድያፐ ከሴዳ’ ያጊደ ኑዉ ኦዴዳ ማላልስያ አ ኦሶቱ ኡባይ ሀቃን ደኢኖ? ሽን ሀእ መꬍና ጎዳይ ኑና ሙለ አጊደ፥ ሚድያማ አሳዉ አꬂደ እሜዳ” ያጌዳ።

14 ሄዋፐ ጉይያን መꬍና ጎዳይ አኮ ስሚደ፥ “ነዉ ደእያ ዎልቃን ባደ፥ እስራኤልያ አሳ ሚድያማ አሳ ኩሽያፐ አሻ። በአ፥ ኔና ኪትያዌ ታና” ያጌዳ።

15 ጌዶን፥ “አቤት መꬍና ጎዳዉ፥ ታን እስራኤልያ አሳ ዋታደ አሾ? ታ ያራይ ምናሰ ዛራቱዋ ኡባፐ አꬌዳ ላፋ፤ ታንካ ታ አዉዋ ሶ አሳ ኡባፐ ጉꬃ” ያጊደ ዛሬዳ።

16 መꬍና ጎዳይ፥ “ቱሙፐ ታን ኔናና ግዳና፤ እት አሳ ሾጭያዋዳን፥ ኔን ሚድያማ አሳ ሾጫደ ጾናና” ያጌዳ።

17 ጌዶን፥ “ኔን ታናን ናሸቴዳዋ ግዶፐ፥ ታናና ሃሳይያዌ ኔን ቱሙፐ ጾሳ ግድያዋ ታን ኤራና ማላ፥ ማላታ ታና በሳ። 18 ታን ጉየ ስማ ባደ፥ ነዉ እምያዋ አሀና ጋካናዉ፥ ሀያና ሀዋፐ ቦፓ” ያጌዳ።

መꬍና ጎዳይ፥ “ኔን ስማና ጋካናዉ፥ ታን ሀዋን ናጋና” ያጌዳ።

19 ጌዶን ባረ ሶ ገሊደ፥ ቦልትቦልታ ዴሻ ማራ ሹኪደ ካꬄዳ፤ እት ታሙ ኪሎ ግራመ ግድያ ꬊልያ አኪደ፥ እርሹዋ የገናን ኡክꬃ ኡኬዳ። አሹዋ ማሶፍያን ዎꬂደ፥ ጫባ ከርያን ትጌዳ፤ ኡባካ አኪደ አፊደ፥ ዎላ ጋርሳን ኡቴዳ ጾሳ ኪታንቻዉ ሺሼዳ። 20 ጾሳ ኪታንቻይ አ፥ “አሹዋነ እርሹ ገልቤና ኡክꬃ አካደ፥ ሀ ሹቻ ቦላ ዎꬃ፤ ጫባካ አ ቦላ ትጋ” ያጌዳ፤ ሄዋፐ ጉይያን ጌዶን ሄዋዳን ኦꬄዳ። 21 መꬍና ጎዳ ኪታንቻይ ባረ ኩሽያን ኦይቄዳ ጻምኣ ጼራን አሹዋካ እርሹ ገልቤና ኡክꬃ ቦቼዳ፤ ታማይ ሹቻ ግዶፐ ከሲደ፥ አሹዋካ እርሹ ገልቤና ኡክꬃ ሜዳ፤ ሄዋፐ ጉይያን፥ መꬍና ጎዳ ኪታንቻይ አ ስንꬃፐ ጌሜዳ።

22 ጌዶን በኤዳዌ መꬍና ጎዳ ኪታንቻ ግድያዋ አኬኬዳ ዎደ፥ “አየ አና! ኡባ ሞድያ መꬍና ጎዳዉ፥ ታን መꬍና ጎዳ ኪታንቻ ታ አይፍያን በኣድ!” ያጌዳ።

23 ሽን መꬍና ጎዳይ፥ “ሳሩ ነዉ ግዶ! ያዮፓ! ሀይቃካ” ያጌዳ። 24 ጌዶን መꬍና ጎዳዉ ያርሽያ ሳኣ ያን ጊግሲደ፥ ሄ ሳኣ መꬍና ጎዳይ ሳሮ ጾሳ ያጊደ ሱንꬄዳ። ሄ ያርሽያ ሳአይ አብኤዘራ ያራቱዋሳ ግድያ ኦፍራን ሀቼ ጋካናዉ ኤቂደ ደኤ።

25 ሄ ጋላስ ቃማ መꬍና ጎዳይ ጌዶና፥ “ነ አዉዋ ቦራ ላኤንꬁዋ፥ ላይꬃይ ላፑና ግዴዳዋ አካ። ነ አዉ ባኣላ ጌተትያ ኤቃዉ ያርሽያ ሳኣ ኮላ፤ አ ጋጻን ደእያ አሼሮ ጌተትያ ማጫ ጾሳቱ ምስልያካ ቃንጸሬꬃ የጋ። 26 ሀ ደርያ ሁጲያን መꬍና ጎዳዉ፥ ነ ጾሳዉ፥ ሹቻፐ ያርሽያ ሳኣ ሎይꬃደ ጊግሳ፤ ሄዋፐ ጉይያን፥ ኔን ቃንጸሬꬄዳ አሼሮ ጌተትያ ጾሳቱ ምስልያ ቆኡዋ ኤꬃደ፥ ላኤንꬆ ቦራ ኡባና ጹግያ ያርሹዋ ኡዳደ ያርሻ” ያጌዳ። 27 ጌዶን ባረ ቆማቱዋፐ ታማቱዋ አኪደ፥ መꬍና ጎዳይ አዉ ኦዴዳዋዳን ኦꬄዳ። ሽን እ ባረ አዉዋ ሶ አሳዉነ ካታማን ደእያ አሳዉ ያዬዳ ድራዉ፥ ሄዋ ጋላሳን ኦꬅያዋ አጊደ ቃማን ኦꬄዳ።

28 ዎንታ ጉራን ካታማ አሳይ ደንዴዳ ዎደ፥ ባኣላ ጌተትያ ኤቃዉ ያርሽያ ሳአይ ኮለት ክቼዳዋነ አ ላንቂያን ደእያ አሼር ምስሊ ቃንጸቲደ ዎꬌዳዋ በኤዳ። ቃይ ኡንቱንቱ ያርሽያ ሳአይ ጊጌዳዋነ አ ቦላ ላኤንꬆ ቦራይ ያርሸቴዳዋ በኤድኖ። 29 ባረንቱ ግዶን፥ “ላ ሀዋ ኦꬄዳዌ ኦኔ?” ያጊደ እቱ እቱዋ ኦቼድኖ። ኡንቱንቱ ዩይ ዩዪደ ኦቺደ፥ ሄዋ ኦꬄዳዌ ዮኣሻ ናኣ ጌዶና ግድያዋ ኤሬድኖ። 30 ሄዋፐ ጉይያን ካታማ አሳይ ዮኣሻ፥ “ባኣላ ጌተትያ ኤቃዉ ያርሽያ ሳኣ ኮሌዳ ድራዉነ አ ላንቂያን ደእያ አሼር ምስልያ ቃንጸረꬂደ የጌዳ ድራዉ፥ ኑን አ ዎꬋና ማላ፥ ነ ናኣ ሃ ከሳ” ያጌዳ።

31 ዮኣሽ ባረ ቦላን ደንዴዳ አሳ ኡባ፥ “ህንተንቱ ባኣላዉ ሞተቲቴ? ዎይ ህንተንቱ አ አሻናዉ አባካቴ? ህንተንቱ ግዶፐ አዉ ሞተትያ ኡራይ ደኦፐ፥ ሳአይ ዎንታናዉ እ ሀይቆ! ባኣል ጾሳ ግዶፐ፥ ባረ ያርሽያ ሳኣ ኮሌዳዋና እ ባረዉ ሞተቶ” ያጌዳ። 32 ያትና፥ ሄ ጋላስ ዮኣሽ፥ “ኮለቴዳዌ አዉ ያርሽያ ሳኣ ግዴዳ ድራዉ፥ አናና ባኣል ሞተቶ” ያጊደ ጌዶና ሱንꬃ የሩባኣላ ጊደ ሱንꬄዳ።

33 ሄዋፐ ጉይያን፥ ሚድያማ ጋድያ አሳይ፥ አማሌቃ ጋድያ አሳይነ አዋይ ዶልያ ባጋ ጋድያ አሳይ ኡባይ እትፐ ሺቂደ፥ ዮርዳኖሳ ሻፋ ፕኔድኖ፤ እዝራኤላ ግያ ዎምባን ዱንካኔድኖ። 34 ሄዋፐ ጉይያን፥ መꬍና ጎዳ አያናይ ጌዶና ቦላ ዎꬌዳ፤ አብኤዘራ ያራ ግድያ አሳይ ኡባይ ባረና ካላና ማላ፥ ኡንቱንታ ጼሳናዉ ማላካታ ፑኔዳ። 35 ምናሰ ዛራቱዋ ኡባዉ አሳ ኪቲደ፥ ባረና ካላና ማላ ኡንቱንታካ ጼስሴዳ። ቃይ አሴራ ዛረቶ፥ ዛብሎና ዛረቶነ ንፍታሌማ ዛረቶ አሳ ኪትና፥ ኡንቱንቱካ አናና ኦላ ባናዉ ከሴድኖ።

36 ሄዋፐ ጉይያን ጌዶን ጾሳ፥ “ታን እስራኤልያ አሳ አሻና ማላ፥ ኔን ታና ዶሬዳዋ ታዉ ኦዴዳዋ ግዶፐ፥ 37 በአ፥ ዛርጋ ቡክያ ኡዱማን ዶርሳ አጎዛ ታን ዎꬃና፤ ከተርሳይ ሄ ዶርሳ አጎዛ ጻላላን ደእና፥ ቢታ ኡባይ መላ ግዶፐ፥ ኔን ኦዴዳዋዳን፥ እስራኤልያ አሳ ኔን ታ ኩሽያን አሻናዋ ታን ኤራና” ያጌዳ። 38 እ ጌዳዋዳን ሀኔዳ። ዎንተꬃ ጋላስ ጉራ ጉራና ደንዲደ፥ ዶርሳ አጎዛ ጉምኤዳ ዎደ፥ እት ኩይጻሮ ግድያ ሃꬃይ አፐ ከሴዳ።

39 ያትና፥ ጌዶን ቃይካ ጾሳ፥ “ሀያና ሀንቀቶፓ! ታን ኔና ጉጃደካ እት ገደ ኦቻይ፤ ዶርሳ አጎዛ ቦላ ሀራ ማላታ በሳናዳን ታን ኔና ኦቻይ። ሀእ ቃይ ዶርሳ አጎዛይ መላ ግድና፥ ቢታይ እርጺደ ከተርሳታናዳን ኡዳርኪ” ያጌዳ። 40 ሄ ጋላስ ቃማ ጾሳይ ሄ ማላታ ኦꬄዳ። ዎንተꬃ ጋላስ ጉራ ዶርሳ አጎዛ መላ ግድና፥ ቢታ ኡባይ እርጺደ ከተርሳቴዳ።