1 የሩባኣላ ጌተትያ ጌዶንነ አናና ደእያ አሳይ ኡባይ ዎንታ ጉራን ደንድ ቢደ፥ ሀሮዳ ጌተትያ ፑልትያ ማታን ዱንካኔዳ። ሚድያማ ጋደ አሳቱካ ህንቱቱፐ ሁጲሳ ባጋና ሞረ ጌተትያ ደርያ ማታን ደእያ ዎምባ ግዶን ዱንካኔድኖ።

2 መꬍና ጎዳይ ጌዶና ሀዋዳን ያጌዳ፤ “ሚድያማ አሳ ታን ህንተንቱ ኩሽያን አꬃደ እማናዉ፥ ኔናና ደእያ አሳይ ዳሬዳ፤ እስራኤልያ አሳይ፥ ‘ኑ ዎልቃን አቴዶ’ ጊደ ታ ቦላ ጬቀተና ማላ፥ ምድያማ አሳ ታን ኡንቱንቶ አꬃደ እምከ። 3 ሄዋ ድራዉ፥ ሀእ አሳዉ፥ ‘ያሻን ኮኮርያ አሳይ ኦንነ ደኦፐ፥ ጋላኣደ ደርያፐ ስሚደ፥ ጉየ ባረ ሶ ባረ ሶ ቦ’ ያጋደ አዋያ” ያጌዳ። ያትና፥ ላታማነ ላኡ ሻአ አሳይ ጉየ ስሜዳ፤ ታሙ ሻአ አሳይ አቴዳ። ዛረ. 20:8

4 ሄዋፐ ጉይያን መꬍና ጎዳይ ጌዶና፥ “ሀእካ አሳይ ዳሬዳ። ኔን ኡንቱንታ ዱገ ሃꬃዉ አፋ፤ ታን ኡንቱንታ ነዉ ያን ሻካና። ታን፥ ‘ሀዌ ኔናና ቦ’ ግያዌ ኔናና ቦ፤ ታን፥ ‘ሀዌ ኔናና ቦፖ’ ግያዌ ቦፖ” ያጌዳ።

5 ያትና፥ ጌዶን አሳ ሃꬃኮ አፌዳ። መꬍና ጎዳይ ጌዶና፥ “ሀ አሳ ግዶፐ ጉልባቲደ ሃꬃ ኡሽያዋንታነ፥ ካናዳን ሃꬃ እንጻርሳን ላባጭ ላባጭ ኦꬂደ ኡሽያዋንታ ሻካ” ያጌዳ። 6 ባረንቱ ኩሽያን ሃꬃ ኮጰቲደ ላባጭ ኦꬂደ ኡሼዳዋንቱ ፓይዱ ሄዙ ጼታ፤ ሽን አቴዳዋንቱ ኡባይ ሃꬃ ኡሻናዉ ጉልባቴድኖ።

7 መꬍና ጎዳይ ጌዶና፥ “ባረንቱ ኩሽያን ሃꬃ ኤቁዋን ኮጰቲደ ላባጭ ኦꬄዳ ሄዙ ጼቱ አሳቱዋን ታን ህንተንታ አሻና፤ ሚድያማ አሳቱዋ ህንተንቶ አꬃደ እማና። ሽን አቴዳ አሳይ ኡባይ ባረ ሶ ባረ ሶ ስሞ” ያጌዳ። 8 ያትና፥ ጌዶን አሳቱዋ ሽንቃነ ማላካታ አኬዳ ሄዙ ጼቱ አሳቱዋ ባረናና አሺደ፥ የንኮ አሳ ኡባ ኡንቱንቱ ሶ ኡንቱንቱ ሶ የዴዳ። ሀ ኡባባይ ሀንያ ዎደ፥ ሚድያማ ኦላንቻቱ ኡንቱቱፐ ህርክ ባጋና ዎምባን ዱንካኒደ ኡቴድኖ።

9 ሄ ጋላስ ቃማን መꬍና ጎዳይ ጌዶና፥ “ታን ነዉ አꬃደ እሜዳ ድራዉ፥ ደንዳደ ኡንቱንቱ ዱንካኔዳ ሳኣን ኡንቱንቱና ኦላ ጋከታ። 10 ኔን ባደ ኦላናዉ ያዮፐ፥ ነ ቆማ ፑራ አካደ፥ ኡንቱንቱ ዱንካኔዳ ሳኣ ዱገ ባደ፥ 11 ኡንቱንቱ ግያዋ ስሳ። ሄዋፐ ጉይያን፥ ኔን ኡንቱንታ ኦላናዉ ምናና” ያጌዳ።

ጌዶንነ አ ቆማይ ፑር፥ ምድያማቱ ዱንካኔዳ ሳኣ ጋጻን ናግያ ኦላንቻቱዋኮ ቤድኖ። 12 ሄ ዎደ ቦልያዳን ጮራቴዳ ሚድያማ አሳይ፥ አማሌቃ አሳይነ አዋይ ዶልያ ባጋና ደእያ አሳይ ኡባይ ዎምባ ግዶን ዱንካኒደ ኡቴድኖ። ኡንቱቱ ጋሎቱ አባ ዶናን ደእያ ሻፍያዳን ፓይዳናዉ ዳንዳየተናዋንታ።

13 ጌዶን ያ ጋክያ ዎደ፥ እት ብታኒ ባረ አኩመቴዳ አኩሙዋ ባረ ላግያዉ ኦዴ፤ “ስሳ፥ ታን አኩሙዋ አኩመታድ። እት ባንጋ ኡክꬃይ ጎንዶረቲደ፥ ሚድያማቱ ዱንካኔዳ ሳኣ ዬዳ። ጋኪደ ዱንካንያ ዶምኤዳ፤ ዱንካኒ አꬍ ዎꬊደ ምጨቴዳ” ያጌዳ።

14 ሄዋፐ ጉየ አ ላጊ ዛሪደ፥ “ሄዌ እስራኤልያ ዮኣሻ ናኣ ጌዶና ማሻፐ አትና፥ ሀራባ ግደና። ጾሳይ ሚድያማነ ምድያማቱዋና ደእያ ኦላንቻቱዋ ኡባ ጌዶናዉ አꬂደ እሜዳ” ያጌዳ።

15 ጌዶን ሄ ኦዴዳ አኩሙዋነ አኩሙዋ ብርሸꬃ ስሴዳ ዎደ፥ ጉልባቲደ ጾሳዉ ጎይኔዳ። ሄዋፐ ጉይያን፥ እስራኤላቱ ዱንካኔዳ ሳኣ ጉየ ስሚደ፥ “ደንድተ! መꬍና ጎዳይ ሚድያማ ኦላንቻቱዋ ህንተንቱ ኩሽያን አꬂደ እሜዳ!” ያጌዳ። 16 ሄዙ ጼቱ አሳቱዋ ሄዙ ጭታን ሻኬዳ፤ ኡንቱንቶ ሁጲያን ሁጲያን እት እት ማላካታነ ግዶን ኤጽያ ጾምፒ ደእያ እት እት ጻሩዋ እሜዳ። 17 ኡንቱንታ፦ “ታኮ ሃ ጼሊደ፥ ታን ኦꬅያዋ ኦꬅተ። ታን ኡንቱንቱ ዱንካኔዳ ሳኣ ማታ ጋካደ ኦꬅያዋዳን፥ ህንተንቱካ ኦꬅተ። 18 ታንነ ታናና ደእያዋንቱ ኡባቱ ማላካታ ፑንያ ዎደ፥ ህንተንቱካ ኡንቱንቱ ዱንካኔዳ ሳኣ ዩይ አꬊደ፥ ህንተንቱ ማላካታ ፑኒደ፥ ‘መꬍና ጎዳዉነ ጌዶናዉ!’ ያጊደ ዋስተ” ያጌዳ።

19 ቃማዉ ግዶ ግሹዋ ግዳናዉ ጉꬃ አትደእሽን፥ ናግያ ኦላንቻቱ ላመቴዳዋፐ ጉይያን፥ ጌዶንነ አናና ደእያ ጼቱ አሳቱ ቢደ፥ ሚድያማቱ ዱንካኔዳ ሳኣ ማታ ጋኪደ ባረንቱ ማላካታ ፑኔድኖ፤ ባረንቱ ኦይቄዳ ጻሩዋ ኡባካ መንꬄድኖ። 20 ሀራ ባጋና ደእያ ላኡ ጭታቱካ ባረንቱ ማላካታ ፑኒደ፥ ጻሮቱዋካ መንꬄድኖ፤ ሀድርሳ ኩሽያን ኤጽያ ጾምፕያ፥ ኡሸቻ ኩሽያን ማላካታ ኦይቂደ ፑኒደ፥ “መꬍና ጎዳዉነ ጌዶናዉ ማሻን ኦለቴቶ!” ያጊደ ዋሴድኖ። 21 አሳይ ኡባይ ሚድያማቱ ዱንካኔዳ ሳኣ ዩሹዋን ባረ ሳኣን ሳኣን ኤቂደእሽን፥ ሚድያማ ኦላንቻቱ ኡባይ ዋሲደ ባቃቴድኖ። 22 ጌዶና አሳይ ሄዙ ጼቱ ማላካታ ፑኔዳ ዎደ፥ ሞርከቱዋ ኦላንቻቱ ባረንቱ ማሻን እቱ እቱዋ ዎꬋናዳን መꬍና ጎዳይ ኦꬄዳ፤ ያትና፥ አቴዳ ኦላንቻቱ ጽሬራኮ ስሚደ፥ ቤትሺጻ ጌተትያ ካታማ ጋካናዉ፥ ሄዋፐካ አꬊደ፥ ጻባታ ማታን ደእያ አቤል-ማሆላ ጋካናዉ ባቃቴድኖ።

23 ሄዋፐ ጉይያን ጌዶን፥ ንፍታሌማ ዛርያፐ፥ አሴራ ዛርያፐነ ምናሰ ዛራቱዋ ኡባፐ እስራኤልያ አሳ ጼሲደ ሺሽና፥ ኡንቱንቱ ሚድያማቱዋ የደርሴድኖ። 24 ኤፍሬማ ገዝያን ደእያ አሳ ኡባኮ ጌዶን አሳ ኪቲደ፥ “ሚድያማ አሳ ኦላናዉ ዱገ ዎꬍተ፤ ቤትባና ጋካናዉ ደእያ ዮርዳኖሳ ሻፋነ አን ገልያ ቄር ሻፋቱዋ ኡንቱቱፐ ካሰቲደ ኦይቂተ” ያጌዳ። ሄዋፐ ጉየ ኤፍሬማ አሳይ ኡባይ ጼገት ሺቂደ፥ ቤትባራ ጋካናዉ ዮርዳኖሳ ሻፋነ አን ገልያ ቄር ሻፋቱዋ ኦይቄዳ። 25 ኦሬባነ ዛኤባ ጌተትያ ሚድያማቱዋ ካፓቱዋ ላኡዋ ኦሞዴድኖ፤ ኦሬባ ኦሬባ ዛላ ግያ ሳን ዎꬌድኖ፤ ዛኤባ ቃይ ዛኤባ ዎይንያ ጉምእያ ሳኣ ግያ ሳኣን ዎꬌድኖ። ሄዋፐ ጉየና አቴዳ ሚድያማቱዋ የደርሲደ፥ ኦሬባ ቆꬍያነ ዛኤባ ቆꬍያ ሙጬድኖ፤ ኡንቱንቱ ጉገቱዋ ጌዶናኮ አሄድኖ። ሄ ዎደ ጌዶን ዮርዳኖሳ ሻፋፐ ሄፍንꬃ አዋይ ዶልያ ባጋና ደኤዳ።