1 ኤፍሬማ አሳይ ኦላ ባናዉ ጼገቲደ፥ ዮርዳኖሳ ሻፋ ፕኒደ፥ ጻፎና ጌተትያ ካታማ ጋኬዳ ዎደ፥ ዮፍታሀ፥ “አሞናቱዋ ኦላናዉ ዛዋ ፕናደ ባደ፥ ኔናና ባናዳን አያዉ ኑና ጼሳበይኪ? ኑንካ ነ ጎልያ ነ ቦላ ታማን ጹጋና” ያጌድኖ።

2 ሄዋፐ ጉየ ዮፍታሄ ኡንቱንታ፤ “ታንነ ታ አሳይ አሞናቱዋና ሎይꬅ ዋቴዳ ዎደ፥ ታን ህንተንታ ጼሳድ፤ ሽን ህንተንቱ ታና ኡንቱቱፐ አሽበይክታ። 3 ህንተንቱ ታና አሸናዋ በኤዳ ዎደ፥ ዛዋ ፕናደ ታ ሸምፖ ቃረተናን አሞናቱዋ ኦላናዉ ባድ፤ መꬍና ጎዳይ ኡንቱንታ ታ ኩሽያን አꬂደ እሜዳ። ያትና፥ ህንተንቱ ሀቼ አያዉ ታና ኦላናዉ ዬድቴ?” ያጌዳ።

4 ሄዋፐ ጉይያን፥ ዮፍታሄ ጋላኣደ አሳ ኡባ ሺሺደ፥ ኤፍሬማ አሳና ኦለቴዳ፤ ጋላኣደ አሳቱ ጾኔድኖ። አያዉ ጎፐ፥ ኤፍሬማ አሳይ ካሰ ኡንቱንታ፥ “ህንተንቱ ጋላኣደን ደእያ አሳቱ ካሰ ኤፍሬማ ዛራቱዋፐነ ምናሰ ዛራቱዋፐ በቲደ ዬዳዋንታፐ አትና፥ ሀራቱዋ ግድክታ” ያግ ዎꬄዳ።

5 ኤፍሬማ አሳይ ባቃተናዳን፥ ዮርዳኖሳ ሻፋ ፕኑዋ ኡባ ጋላኣደቱ ኦይቄድኖ፤ ባቃታናዉ ኮይያ ኤፍሬማ አሳይ ኦንነ ፕናናዉ ኦችያ ዎደ ጋላኣደቱ፥ “ኔን ኤፍሬማ አሴ?” ያጊደ ኦችና፥ “ግድከ” ጎፐ፥ 6 “አነ፥ ‘ሽቦለቱዋ’ ጋ” ያጊኖ። ሽን እ፥ “ሽ” ግያ ፕዶልያ ሎይꬅ ጼጋናዉ ዳንዳየና ድራዉ፥ “ስቦለቱዋ” ያጌ። ሄ ዎደ ኦይቂደ፥ ዮርዳኖሳ ሻፋ ፕንያሳን ዎꬊኖ። ሄ ዎደ ያን ኤፍሬማ አሳፐ ኦይታማነ ላኡ ሻአ አሳይ ሀይቄዳ።

7 ዮፍታሄ እስራኤልያ አሳ ቦላን ዳናቲደ፥ ኡሱፑን ላይꬃ ፕርዴዳ። ሄዋፐ ጉይያን፥ ጋላኣድያ ዮፍታሄ ሀይቄዳ፤ ጋላኣደን ደእያ ባረ ካታማን ሞገቴዳ።

8 ዮፍታሄፐ ካሊደ፥ ቤተሌመ እብጻን እስራኤልያ አሳ ቦላ ፕርድያ ዳና ግዴዳ። 9 እብጻናዉ ሀታሙ አቱማዋ ናናይነ ሀታሙ ማጫ ናናይ ደኢኖ፤ እ ባረ ማጫ ናና ባረ ያራ ግደና አቱማ ናናቶ እሜዳ፤ ባረ አቱማ ናናቶካ ባረ ያራ ግደና ማጫ ናና ጊግሲደ አሄዳ። እብጻን እስራኤልያ ቦላ ላፑን ላይꬃ ዳናቲደ ፕርዴዳ። 10 ሄዋፐ ጉይያን ሀይቂደ፥ ቤተሌመ ካታማን ሞገቴዳ።

11 እብጻናፐ ካሊደ፥ ዛብሎንያ ኤሎን እስራኤልያ አሳ ቦላ ዳናቲደ፥ ታሙ ላይꬃ ፕርዴዳ። 12 ሄዋፐ ጉይያን ሀይቄዳ፤ ዛብሎና ጋድያን ደእያ አያሎና ካታማን ሞገቴዳ።

13 ኤሎናፐ ካሊደ፥ ህሌላ ናአይ አብዶን፥ ፕርኣቶና ግያ ሳን ደኤዳዌ፥ እስራኤልያ ቦላ ፕርድያ ዳና ግዴዳ። 14 አብዶናዉ ላፑን ታሙ ሀረቱዋ ቶግያ ኦይታሙ አቱማ ናናይነ ሀታሙ ናናቱዋ ናናይ ደኢኖ፤ አብዶን እስራኤልያ አሳ ቦላ ዳናቲደ፥ ሆስፑን ላይꬃ ፕርዴዳ። 15 ሄዋፐ ጉይያን፥ ህሌላ ናአይ አብዶን ሀይቄዳ፤ አማሌቃቱዋ ገዝያን ኤፍሬማ ጋድያን ደእያ ፕርኣቶናን ሞገቴዳ።