1 እስራኤልያ አሳይ መꬍና ጎዳ ስንꬃን ቃይካ ኢታባ ኦꬄዳ። ያትና፥ መꬍና ጎዳይ ኡንቱንታ ኦይታሙ ላይꬃዉ ፕልስጼማ አሳ ኩሽያን አꬂደ እሜዳ።

2 ሄ ዎደ ጾርአ ጌተትያ ካታማን ማኑሀ ጌተትያ እት ብታኒ ደኤ። እ ዳና ዛረ፤ አ ማቻታ ማንꬃቶ ግዴዳ ድራዉ፥ ናኣ የላበይኩ። 3 እት ጋላስ መꬍና ጎዳ ኪታንቻይ ሄ ማቻትዉ ቤቲደ፥ ሀዋዳን ያጌዳ፤ “በአ፥ ኔን ናኣ የላቤና ማንꬃቶ፤ ሽን ነዉ የሉ አታናዋ፤ ኔን አቱማ ናኣ የላና። 4 ሄዋ ድራዉ፥ ዎይንያ ኤሳ ዎይ ማꬆይያ ኡሻ ኡሸናዳንነ ቱናባ አያነ ሜናዳን ናገታ። 5 ነዉ የሉ አትና፥ ኔን አቱማ ናኣ የላና። ናአይ የለትያ ዎድያፐ ዶሚደ፥ ጾሳዉ ዱማቴዳ ናዝራዌ ግድያ ድራዉ፥ አ ብናና ኡባካ ሜዶፓ። እ እስራኤልያ ፕልስጼማ አሳ ኩሽያፐ አሻናዉ ዶማና” ያጌዳ። ፓይ. 6:1-5

6 ሄዋፐ ጉይያን ምሽራታ ባደ፥ ባረ አስናዉ ሀዋዳን ያጋደ ኦዳዱ፤ “ጾሳ አሳ እቱ ታኮ ዬዳ፤ አዉ ማላይካ ጾሳ ኪታንቻ ማላ ማላ ሎይꬅ ያሽያዋ። እ ሀቃፐ ዬደንቶካ ታን አ ኦቻበይከ፤ እካ ባረ ሱንꬃ ታዉ ኦድቤና። 7 ሽን እ ታና፥ ‘ነዉ የሉ አትና፥ ኔን አቱማ ናኣ የላና። ናአይ የለቶደፐ ዶሚደ ሀይቃና ጋካናዉ፥ ጾሳዉ ዱማቴዳ ናዝራዌ ግድያ ድራዉ፥ ዎይንያ ኤሳ ዎይ ማꬆይያ ኡሻ ኡሾፓ፤ አያነ ቱኔዳባ ሞፓ’ ያጌዳ” ያጋደ ኦዳዱ።

8 ሄዋፐ ጉይያን ማኑሄ፥ “አቤት መꬍና ጎዳዉ፥ ናአይ የለትያ ዎደ አያ ኦꬃናዉ ኮሽንቶ ኤርሳና ማላ፥ ኔን ካሰና ኪቴዳ ጾሳ አሳይ ኑኮ ስሚደ ያናዳን ኦꬃርኪ” ያጊደ ጾሳ ዎሴዳ።

9 መꬍና ጎዳይ ማኑሄ ዎሳ ስሴዳ። ማጫ ምሽራታ ጋደን ኡታ ደእሽን ላኤንꬁዋ ዬዳ፤ ሽን ሄ ዎደ እ አስናይ ማኑሄ እዝና ደኤና። 10 ማጫ ምሽራታ ኤለካ ባረ አስናኮ ባደ፥ “በአ፥ እን ጋላስ ታኮ ዬዳ ብታኒ ሀችካ ሀዋን ደኤ” ያጋዱ።

11 ሄዋፐ ጉየ ማኑሄ ኡቴዳ ሳፐ ደንዲደ፥ ባረ ማቻቶ ካሊደ ቤዳ፤ ጋኪደ፥ ብታንያ፥ “እን ታ ማቻትና ሃሳዬዳዌ ኔኔ?” ያጊደ ኦቼዳ።

ብታኒ፥ “ኤ ታና” ያጌዳ።

12 ሄዋፐ ጉየ ማኑሄ፥ “ኔን ኦዴዳ ቃላይ ፖለትያ ዎደ፥ የለታና ናኣ ደኦነ ኦሶ ዎጋይ አዬ?” ያጊደ አ ኦቼዳ።

13 ሄዋ ድራዉ መꬍና ጎዳ ኪታንቻይ፥ “ነ ማቻታ ታን ኦዴዳ ኡባባፐ ናገቱ። 14 ዎይንያ ቱራፐ ከስያባ አያነ ሙፑ፤ ዎይንያ ኤሳ ዎይ ማꬆይያ ኡሻ ኡሹፑ፤ አያነ ቱኔዳባ ሙፑ። ታን እዞ አዛዜዳዋ ኡባ ፖሉ” ያጊደ ዛሬዳ።

15 ማኑሄ ቃይ መꬍና ጎዳ ኪታንቻ፥ “ኑን ነዉ እት ያላጋ ዴሻ ሹኪደ ጊግሳናዉ፥ ሀያና ታካርኪ” ያጌዳ።

16 መꬍና ጎዳ ኪታንቻይ ዛሪደ፥ “ታን ታክንቶካ፥ ነ ቁማ ሚከ። ሽን ኔን ጹግያ ያርሹዋ ጊግሳና ኮዮፐ፥ መꬍና ጎዳዉ ያርሻናዉ ዳንዳያሳ” ያጌዳ። እ መꬍና ጎዳ ኪታንቻ ግድያዋ ማኑሄ ኤርቤና።

17 ማኑሄ ቃይካ ጾሳ ኪታንቻ፥ “ኔን ኦዴዳ ቃላይ ፖለትያ ዎደ፥ ኑን ኔና ቦንቻና ማላ፥ ነ ሱንꬃይ ኦኔ?” ያጌዳ።

18 ጾሳ ኪታንቻይ አ፥ “ታ ሱንꬃይ ማላልስያዋ ግድያ ድራዉ፥ ኔን ታ ሱንꬃ አያዉ ኦቻይ?” ያጊደ ዛሬዳ።

19 ሄዋፐ ጉየ ማኑሄ ሄ ዴሻነ አ ካꬃ ያርሹዋ አኪደ፥ ዛላ ቦላ መꬍና ጎዳዉ ያርሼዳ። ማኑሄነ አ ማቻታ ጼልሽን፥ መꬍና ጎዳይ ማላልስያባ ኦꬄዳ። 20 ያርሹዋ ያርሽያ ሳፐ ታማ ላጩ ፑደ ፖሎላትሽን፥ መꬍና ጎዳ ኪታንቻይ ታማ ላጩዋ ግዱዋና ሳሉዋ ከሴዳ። ማኑሄነ አ ማቻታ ሄዋ በኢደ፥ ዴሙዋ ሳኣ ጋꬂደ ጉፋኔድኖ።

21 መꬍና ጎዳ ኪታንቻይ ማኑሄዉነ አ ማቻትዉ ላኤንꬁዋ ቤተናን አግና፥ እ መꬍና ጎዳ ኪታንቻ ግዴዳዋ ማኑሄ ሄ ዎደ አኬኬዳ። 22 ማኑሄ ባረ ማቻቶ፥ “ኑን ጾሳ በኤዳ ድራዉ፥ ኑን ሀይቂያዌ ጌሻ” ያጌዳ።

23 ሽን አ ዛራደ፥ “መꬍና ጎዳይ ኑና ዎꬋናዉ ኮዬዳዋ ግድንቶ፥ ጹግያ ያርሹዋነ ካꬃ ያርሹዋ ኑ ኩሽያፐ አከና፥ ዎይ ሄ ኡባባ ኑና በሰና፥ ዎይ ሀዋ ኑ ኦደና” ያጋዱ።

24 ማጫ ምሽራታ አቱማ ናኣ የላደ ሳምሶና ጋደ ሱንꬃዱ። ናአይካ ድጬዳ፤ መꬍና ጎዳይካ አ አንጄዳ። 25 ናአይ ጾርአፐነ ኤሽታኦላፐ ግዱዋን ደእያ ዳና ሞꬃን ደእሽን፥ መꬍና ጎዳ አያናይ አ ደንꬁዋ ዶሜዳ።