1 ጉꬃ ታክሽን፥ ዛርጋ ጫክያ ዎደ፥ ሳምሶን ባረ ማቻቶ በአናዉ እት አንቃራ ዴሻ አኪደ ቤዳ፤ እ አዉዋ፥ “ታን ታ ማቻታ ደእያ ክፍልያ ገላናዉ ኮያድ” ያጌዳ።

ሽን እ ገለናዳን፥ እዝ አዉ ድጌዳ። 2 እዝ አዉ ሳምሶና፥ “ኔን እዞ ኡባ እጼዳዋ ማላትና፥ ነ ሚዝያዉ እማድ። ሽን እ ቴፋ ምቻታ ኢፐካ አꬋ ሎአ፤ እዝ ድራዉ እዞ አካ” ያጌዳ።

3 ሄዋፐ ጉየ ሳምሶን ኡንቱንቶ፥ “ሀእ ስም ፕልስጼማ ጋድያ አሳ ቦላ ታን ኢታባ ኦꬆፐ፥ ባይዛንቻ ግድከ” ያጌዳ። 4 ቢደ፥ ሄዙ ጼቱ ዎራካናቱዋ ኦይቂደ ላኡዋ ላኡዋ ዱፍያ እትፐ ጋꬂደ፥ ዱፈቱዋፐ ግዱዋን ዪጨቴዳ ጾምፕያ ዎꬂደ ቃቼዳ። 5 ሄዋፐ ጉይያን፥ ቃሸቴዳ ጾምፕያን ታማ ኦይꬂደ፥ ብሮ ጫከትቤና ፕልስጼማ አሳ ካꬃ ግዶ ዎራካናቱዋ የዴዳ፤ ጫከቴዳ ካꬃ፥ ኤቁዋን ደእያ ካꬃ፥ ዎይንያ ቱራቱዋነ ዎጋራ ጹጌዳ።

6 ፕልስጼማቱ፥ “ሀዋ ኦꬄዳዌ ኦኔ?” ያጊደ ኦቼድኖ።

ሽን አሳይ፥ “ሳምሶን ኦꬄዳ፤ አያዉ ጎፐ፥ ትምና አሳ ግድያ አ ቦሉ፥ አ ማቻቶ አ ሚዝያዉ እሜዳ ድራሳ” ያጌዳ። ፕልስጼማቱ ቢደ፥ ኦዉነ እ አዉዋ ታማን ጹጌድኖ።

7 ሳምሶን ኡንቱንቶ፥ “ህንተንቱ ሄዋ ኦꬄዳ ድራዉ፥ ሀሉዋ ከሰናን አግከ” ያጌዳ። 8 ኡንቱንታ ዎልቃማ ሾቻ ሾጪደ፥ ዳሮቱዋ ዎꬌዳ። ሄዋፐ ጉይያን ቢደ፥ ኤጻማ ጌተትያ ኮሽያን ደእያ ዛላ ጎንጎሉዋ ግዶን ጋምኤዳ።

9 ሄዋፐ ጉይያን፥ ፕልስጼማ አሳይ ዪደ፥ ይሁዳን ዱንካኒደ ሌሀ ጌተትያ ካታማ ኦሌዳ። 10 ይሁዳ አሳይ ኡንቱንታ፥ “አያዉ ኑና ኦላናዉ ዬድቴ?” ያጊደ ኦቼዳ።

ሽን ኡንቱንቱ፥ “ኑን ሳምሶና ኦይክ ቃቻናዉነ እ ኑ ቦላ ኦꬄዳዋዳን አ ቦላ ኦꬃናዉ ዬዶ” ያጊደ ዛሬድኖ። 11 ያትና፥ ይሁዳፐ ሄዙ ሻአ አሳቱ ኤጻማ ጌተትያ ሳኣን ደእያ ዛላ ጎንጎሉዋ ቢደ ሳምሶና፥ “ኑና ሞድያዋንቱ ፕልስጼማ አሳቱዋ ግድያዋ ኤርኪየ? ያትና፥ ኑ ቦላ ሀዋ አያ ኢታባ ኦꬃይ?” ያጌድኖ።

ሄዋፐ ጉየ እ ዛሪደ፥ “ኡንቱንቱ ታ ቦላ ኦꬄዳዋዳን፥ ታንካ ኡንቱንቱ ቦላ ኦꬃድ” ያጌዳ።

12 ኡንቱንቱካ ዛረꬂደ፥ “ኑን ሀዋ ዬዳዌ ኔና ቃቺደ፥ ፕልስጼማቶ አꬂደ እማናሳ” ያጌድኖ።

ሳምሶን ኡንቱንታ፥ “ህንተንቱ ህንተንቱ ሁጲያዉ ታና ዎናዳን ጫቂተ” ያጌዳ።

13 ኡንቱንቱ፥ “ኤኖ፥ ኑን ኔና ቃቺደ፥ ኡንቱንቶ አꬂደ እማናፐ አትና፥ ዎꬎኮ” ያጊደ አዉ ዛሬድኖ። ሄዋፐ ጉይያን፥ ላኡ ኦራꬃ ዎዶሩዋን ቃቺደ፥ ዛላ ጎንጎሉዋፐ ከሲደ አፌድኖ።

14 ሳምሶን ሌሀ ቤዳ ዎደ፥ ፕልስጼማ አሳቱ ናሸቻን ዋሲደ፥ አናና ጋከታናዉ ዬድኖ። መꬍና ጎዳ አያናይ አ ቦላ ዎልቃፐ ዎꬌዳ፤ አ ኩሽያ ቃች ዎꬄዳ ዎዶሩዋ፥ ሻሉ ታማ በኢደ ዱጽያዋዳን፥ ዱሰረꬅ የጌዳ። 15 ያቲደ ማታ ዎደ ሀይቄዳ እት ሀርያ ጎጎጩዋ ደም አኪደ፥ አን ሻአ አሳ ዎꬌዳ።

16 ሳምሶን ሀዋዳን ያጌዳ፤

17 ሃሳይያዋ ዉርሴዳዋፐ ጉይያን፥ ባረ ኦይቄዳ ጎጎጩዋ ኩሽያፐ ኦሊደ ሄ ሳኣ ራማት-ሌሀ*ራማት-ሌሀ፦ ሀ ሱንꬃ ብለꬃይ እብራዌꬁዋን፥ “ጎጎጩዋ ደርያ” ግያዋ። ያጊደ ሱንꬄዳ።

18 ሄዋፐ ጉይያን፥ ሳምሶን ሎይꬅ ሳመቲደ፥ መꬍና ጎዳዉ ዋሲደ፥ “ኔን ሀዋ ማላ ዎልቃማ ጾኑዋ ታዉ ነ ቆማዉ እማዳ። ያትና፥ ታን ሀእ ሳሙዋን ሀይቆ? ቃይ ሀ ቃጻረትቤናዋንቱ ኩሽያን ኩንዶ?” ያጊደ ዋሴዳ። 19 ያግና ጾሳይ ሌሀን ደእያ ጋድያ ጳልቂና፥ አፐ ሃꬃይ ከሴዳ። ሳምሶን ሄ ሃꬃፐ ኡሺደ አሌዳ ድራዉ፥ አዉ ሸምፑ ስሜዳ። ያትና፥ ሄ ሳኣ አይን-ሀቆረ†አይን-ሀቆረ፦ ሀ ሱንꬃ ብለꬃይ፥ “ዋስያዋ ፑልቱዋ” ግያዋ። ያጊደ ሱንꬄዳ። ሄዌ ሀቼ ጋካናዉ ሌሀን ደኤ።

20 ፕልስጼማ አሳይ ጋድያ ሞዴዳ ዎደ፥ ሳምሶን እስራኤላን ላታሙ ላይꬃዉ ፕርድያ ዳና ግዴዳ።