1 ኤፍሬማ ገዝያን ሚካ ግያ እት ብታኒ ደኤ። 2 እት ጋላስ ሚክ ባረ አቶ፥ “ኔፐ እት አሳይ እት ሻአነ እት ጼቱ ጻጋራ ብራ ዉኤዳ ዎደ፥ ኔን ሄ ዉኤዳ ብታንያ ሸቂሽን ታን ስሳድ። በአ፥ ሄ ሚሻይ ታ ማታን ደኤ፤ ታን አካድ” ያጌዳ።

ሄዋፐ ጉየ አ ዳያ፥ “ታ ናአዉ፥ ኔና መꬍና ጎዳይ አንጆ” ያጋዱ። 3 ሄዋፐ ጉየ ናአይ እት ሻአነ እት ጼቱ ጻጋራ ብራ ባረ አትዉ ዛሬዳ፤ አ ዳያ፥ “ሸቃይ ታ ናኣ ጋከናዳን፥ ታን ሀ ሚሻ ታ መꬍና ጎዳዉ ዱማያና። ያቶፐ ብራ ሲልሲደ፥ ምꬃፐ ማሰቲደ ጊጌዳ ኤቃ ምስልያ አን ሼሻናዉ ጎኤታና። ሄዋ ድራዉ፥ ብራ ታን ነዉ ዛራና” ያጋዱ።

4 ናአይ ባረ አትዉ ሻሉዋ ዛርና፥ አ ዳያ ሄ ጻጋራ ብራፐ ላኡ ጼቱዋ አካደ፥ ምꬃ ማሲደ ብራን ሼሽ ሼሺደ ኤቃ ምስልያ መꬍያ እት ሂላንቻዉ እማዱ፤ እ ኦꬄዳ ምስሊ ሚካ ሶን ደኤዳ።

5 ሄ ምካዉ ኤቃዉ ጎይንያ ኬꬃይ ደኤ። እ ኤፉድያነ ሶ ግዶ ኤቃ ምስለቱዋ ጊግሲደ፥ ሄ ጎለን ባረ ናናቱዋፐ እቱዋ ቄሳ ኦꬂደ ሱንꬄዳ። 6 ሄ ዎደ እስራኤልያ ጋድያን ካቲ ባዋ፤ አሳይ ኡባይ ባረዉ ልከ ማላቴዳዋ ጮ ኦꬄዳ።ዳና. 21:25

7 ሄ ዎደ ይሁዳ ጋድያን ቤተሌመ ካታማን እት ዎዳላይ ደኤ፤ እ ሌዊያ ዛረ። 8 ሀ ብታኒ ባረዉ ደእያ ሳኣ ኮያናዉ ቤተሌመ ካታማፐ ደንዲደ ቤዳ፤ ኤፍሬማ ገዝያን ደእያ ሚካ ሶ ጋኬዳ። 9 ሚክ፥ “ሀቃፐ ያድ?” ያጌዳ።

ሄዋፐ ጉየ ብታኒ፥ “ታን ይሁዳ ጋድያን ቤተሌመ ካታማፐ ያድ፤ ታን ሌዊያ ዛረ። ሀእ ታዉ ደእያ ሳኣ ኮያደ ደአይ” ያጊደ አዉ ዛሬዳ።

10 ምክ አ፥ “ታናና ደአ፤ ታዉ አዉዋነ ቄሰ ግዳ። ታን ነዉ ላይꬃን ላይꬃን ታሙ ጻጋራ ብራ፥ ኩመንꬃ ማዩዋነ ምያባ እማና” ያጌዳ። 11 ሌዊያ ዎዳላይ ምካና እትፐ ደአናዉ ጊጌዳ፤ ምካዉ የሌዳ ናኣዳን ሀኔዳ። 12 ምክ አ ባረ ቄሳ ኦꬂደ ሱንꬅና፥ አ ሶን ደኤዳ። 13 ምክ፥ “እት ሌዊ ታዉ ቄሰ ግዴዳ ድራዉ፥ መꬍና ጎዳይ ታዉ ኡባባ ሎይꬃናዋ ኤራይ” ያጌዳ።