1 ሄ ዎደ እስራኤልያ ጋድያን ካቲ ባዋ። ሄ ዎደ ጋካናዉ ዳና ዛረቶ እስራኤልያ ዛራቱዋ ግዱዋን ላቴዳ ጋዲ ባዋ። ሄዋ ድራዉ፥ ኡንቱንቱ ባረንቱ ደእያ ጋድያ ኮዪደ ደኢኖ። 2 ሄዋ ድራዉ፥ ዳና ዛራቱ ባረንቱ ዛራቱዋፐ እቼሹ ምኖ አሳቱዋ ዶሪደ፥ ጋድያ ዎቺደነ አኬኪደ ስማናዳን፥ ጾርአነ ኤሽታኦላ ጌተትያ ካታማቱዋፐ ኡንቱንታ ኪቴድኖ።

ኡንቱንቱ ኤፍሬማ ገዝያ ጋኪደ፥ ምካ ሶን አቄድኖ። 3 ኡንቱንቱ ምካ ሶን ደኤዳ ዎደ፥ ሌዊያ ዛረ ግዴዳ ያላጋ አ ሃሳያን ኤሬድኖ። ኡንቱንቱ አኮ ሺቂደ፥ “ኔና ሀዋ አሄዳዌ ኦኔ? ሀዋ አያዉ ያድ? ሀዋን አያ ኦꬃይ?” ያጊደ ኦቼድኖ።

4 እ፥ “ምክ ታዉ ሀዋ ሀዋ ኦꬄዳ፤ እ ታዉ ድርጉዋ ጭግና፥ ታን አዉ ቄሰ ግዳደ ኦꬃይ” ያጊደ ኡንቱንቶ ዛሬዳ።

5 “ኑን ብያ ኦጊ ኑዉ ጊገናን አጋነንቶነ ሀያና አነ ኑዉ ጾሳ ኦቻርክ” ያጌድኖ።

6 ሄዋፐ ጉየ ቄሲ ኡንቱንቶ፥ “ሳሮ ጋክተ፤ ህንተንቱ ብያ ኦግያን መꬍና ጎዳይ ህንተናና ግዳናዋ” ያጊደ ዛሬዳ።

7 ሄዋፐ ጉይያን፥ እቼሹ አሳቱ ያፐ ደንዲደ፥ ላይሻ ጌተትያ ካታማ ቤድኖ፤ ያን ደእያ አሳይ ሲዶና ጋድያ አሳዳን ሳሩዋን ደእያዋ በኤድኖ፤ አሳቱ ኦናነ ስና ዎፓ አሳ፤ ኡንቱንቱ አያይነ ፓጨናን፥ ኡባባይ ኩሜዳ አሳ። ኦናናነ ጋከተናን ሲዶና ጋድያ አሳፐ ሃኪደ፥ ባረካ ዱማ ደኢኖ።

8 እቼሹ አሳቱ ጾርአነ ኤሽታኦላ ካታማቱዋን ደእያ ባረንቱ እሻቱዋኮ ስሜድኖ፤ ኡንቱንቱ እሻቱ፥ “አያ ኦዱዋ አኪደ ዬድቴ?” ያጌድኖ።

9 ሄዋፐ ጉየ ኡንቱንቱ ዛሪደ፥ “ቢታይ ሎይꬅ አራዳ ግድያዋ ኑን በኤዶ። ሄዋ ድራዉ ደንዲደ፥ ላይሻ ካታማን ደእያ አሳ ኦሌቶ! ሃዋን ኦሱዋ ꬋዪደ ጮ ኡቶፕተ፤ ኤለካ ቢደ ኦይቂተ። 10 ህንተንቱ ያ ቢደ፥ ኦናነ ስናን ሳሮ ኡቴዳ አሳኮ ጋካኒታ። አሳዉ ኮሽያ ኡባባይ ሄ ጋድያን ደኤ። ጾሳይ ሄ ጋድያ ህንተንቶ እሜዳ” ያጌድኖ።

11 ያትና፥ ዳና ዛራቱዋፐ ኡሱፑን ጼቱ አሳቱ ኦላ ሚሻ ኦይቂደ፥ ጾርአነ ኤሽታኦላ ካታማቱዋፐ ደንዲደ ቤድኖ። 12 ይሁዳ ጋድያን ደእያ ቅርያት-ይኣሪማ ጌተትያ ካታማፐ አዋይ ዉልያ ባጋና ኡቴድኖ። ሄዋ ድራዉ፥ ሄ ሳአይ ሀቼ ጋካናዉ ዳና ሞꬃ ጌተቲደ ሱንቴዳ። 13 ሄዋፐ ደንዲደ፥ ኤፍሬማ ገዝያን ደእያ ምካ ሶ ዬድኖ።

14 ላይሻ ጋድያ ዎቻናዉ ቤዳ እቼሹ አሳቱ ባረንቱ እሻቱዋ፥ “ሀ ሳኣን፥ ሀ ኬꬃቱዋፐ እቱዋን ኤፉዲ፥ ሶ ግዶ ኤቃ ምስለቱነ ምꬃፐ ማሰቲደ ብራን ሼሸቴዳ ምስሊ ደእያዋ ኤሪቴ? አነ አይ ኦꬃናዉ ኮሽንቶ ቆፕተ” ያጌድኖ። 15 ሄዋፐ ጉየ ኦግያፐ ስሚደ፥ ሌዊያ ዛረ ግዴዳ ያላጋ ቄሲ ደእያ ምካ ሶ ቢደ፥ አ ሳሮቴድኖ። 16 ሄ ዎደ ኡሱፑን ጼቱ ዳና አሳቱ ኦላ ሚሻ ኦይቂደ፥ ገልያ ፐንግያን ኤቄድኖ። 17 ኡንቱንቱ ሄ ቄስያና ያን ኤቂደእሽን፥ ጋድያ ዎቼዳ እቼሹ አሳቱ ምካ ሶ ገሊደ፥ ምꬃፐ ማሰቲደ ብራን ሼሸቴዳ ምስልያ፥ ኤፉድያነ ሶ ግዶ ኤቃ ምስለቱዋ አኬድኖ።

18 ሄ ዎደ ቄሲ ኡንቱንታ፥ “ዋቲቴ?” ያጌዳ።

19 ሄዋፐ ጉየ ኡንቱንቱ አ፥ “ሀይዛ! እት ቃላነ ቃቶፓ! ኑናና ባደ ኑዉ አዉዋነ ቄሰ ግዳ። እት ጎልያ አሳዉ ቄሰ ግድያዋፐ እስራኤልያ ግድያ እት ዛረ አሳዉ ቄሰ ግድያዌ ነዉ ኬከኔ?” ያጌድኖ። 20 ሄዋፐ ጉየ ቄሲ ናሸቲደ ኤፉድያ፥ ሶ ግዶ ኤቃ ምስለቱዋነ ምꬃፐ ማሰቴዳ ምስልያ አኪደ፥ አሳቱዋና እትፐ ቤዳ።

21 ሄዋፐ ደንዲደ፥ ባረንቱ ናና፥ ባረንቱ መህያነ ባረንቶ ደእያዋ ስንꬃን ዎꬂደ ቤድኖ። 22 ኡንቱንቱ ምካ ጎልያፐ ሃኪደ ቤዳዋፐ ጉይያን፥ ምክ ባረ ሾሩዋን ደእያ አሳቱዋ ጼስና፥ ኦላዉ ከሴድኖ፤ ዳና አሳቱዋ ካሊደ ጋኬድኖ። 23 ዋስና፥ ዳና አሳቱ ጉየ ስሚደ ምካ፥ “ዋናዲ? ሀ አሳ ኡባ አያዉ ሺሻዲ?” ያጊደ ኦቼድኖ።

24 ሽን ምክ ዛሪደ፥ “ታን መꬌዳ ታ ጾሳቱዋነ ታዉ ኦꬅያ ቄስያ አኪደ ይክቼድታ። ታዉ ሀራይ አዬ አቴዳዌ? ህንተንቱ ታና አያዉ፥ ‘ዋናዲ?’ ጊቴ?” ያጌዳ።

25 ዳና አሳቱ፥ “እት ቃላ ቃታደ ኔና ኤራ! ሀ ይሉዋና ደእያ አሳ ኔን ደንꬆፐ፥ ኡንቱንቱ ነ ቦላ ደንዳናነ ነ ሶ አሳ ኡባ ዉርሳና” ያጌድኖ። 26 ዳና አሳቱ ባረንቱ ኦግያ ቤድኖ። ምክካ ኡንቱንቱ ባረፐ ሎይꬅ ዎልቃምያዋ በኢደ፥ ባረ ሶ ስሚደ ቤዳ።

27 ዳና አሳቱ ምክ መꬌዳ ጾሳቱዋነ አ ቄስያ አኪደ፥ ላይሻ ካታማን ኦናነ ስናን ሳሮ ደእያ አሳቱዋኮ ቤድኖ፤ ካታማን ደእያ ኡባ ቃራ ማሻን ዎꬊደ፥ ካታማ ታማን ጹጌድኖ። 28 ላይሻ ካታማይ ሲዶና ካታማፐ ሃኪደ ደእያ ድራዉነ አሳይ ሀራ አሳና ጋከት ኤረና ድራዉ፥ ኡንቱንታ አሻናዉ ኦንነ ዳንዳይቤና። ላይሻ ካታማይ ቤት-ራሆባ ግያ ሳኣ ማታን ደእያ ዎምባ ግዶን ደኤ።

ዳና አሳቱ ካታማ ዎꬅ የግ ኬጺደ፥ ያን ደኤድኖ። 29 ካታማ ሱንꬃካ በን ባረንቱ ማይዛ አዉዋ፥ ያቆባ ናኣ ዳና ሱንꬃን ላሚደ፥ ዳና ያጊደ ሱንꬄድኖ፤ ሽን ኮይሮ ሄ ካታማይ ላይሻ ጌተቴ።

30 ዳና አሳቱ ባረንቶ ሄ ማሰቴዳ ምስልያ ዎꬂደ፥ ሙሴ ናኣ ገርሾማፐ የለቴዳ ዮናታና ባረንቱ ቄሳቱዋ ኦꬄድኖ። አ ዛራቱ አሳይ ኦሞደቲደ ቤዳ ዎዲ ጋካናዉ፥ ያን ቄሳቱዋ ግዴድኖ። 31 ሄዋዳን ሀኒደ፥ ጾሳ ዱንካኒ ሴሎን ደኤዳ ላይꬃቱዋን ኡባን ምክ ማስሴዳ ምስለቱ ያን ጋምኤድኖ።