1 እስራኤልያ ጋድያን ካቲ ባይና ዎደ፥ ኤፍሬማ ገዝያን፥ ሃኮ ሳኣን ሌዊያ ዛረ ግድያ እት ብታኒ ደኤ። ሄ ብታኒ ይሁዳ ጋድያን ቤተሌመ ካታማፐ እት ናቶ ቆማቶ አሄዳ። 2 ሽን አዉ አማነተናን እጻደ፥ ይሁዳ ጋድያን ቤተሌመ ካታማን ደእያ ባረ አዉዋ ሶይ ባዱ፤ ያን ኦይዱ አገና ኡታዱ። 3 እ ጎዳይ እዝዉ ኦድ አማንꬃናዉነ፥ ሶይ ዛራናዉ ደንዲደ፥ ባረ ቆማነ ላኡ ሀረቱዋ አኪደ ቤዳ፤ አ ሞካ አካደ፥ ባረ አዉዋ ሶይ ገልሳዱ። እዝ አዉ አ በኤዳ ዎደ፥ ናሸቲደ ሞኬዳ። 4 ናት አዉ ብታንያ የደናን ድግና፥ ያን አናና ሚድነ ኡሺደ ሄዙ ጋላሳ ታኬዳ። 5 ኦይደንꬆ ጋላስ ዎንታ ጉራን ደንዲደ፥ ባናዉ ጊጌድኖ። ሽን ናት አዉ ባረ ናት ጎዳ፥ “ጉꬃ ቁማ ማደ፥ ምኔዳዋፐ ጉይያን ባሳ” ያጌዳ።

6 ሄዋፐ ጉየ ላኡ አቱማ አሳቱካ ኡቲደ፥ እትፐ ሜድኖነ ኡሼድኖነ። ሄዋፐ ጉይያን ናት አዉ አ፥ “ሀያና፥ ሀቼ ናሸታደ ሀዋን አቃ” ያጌዳ። 7 ሌዊያ ዛሪ ባናዉ ደንድና፥ ቤናን አቃና ማላ ዎሴዳ፤ እ አኪያ ቆማት አዉ አ ዎስና፥ ቃይካ ያን አቄዳ።

8 እቼሻንꬆ ጋላስ ባናዉ ዎንታ ጉራን ደንድና፥ ናት አዉ፥ “ሀያና፥ ምነታ ታካደ፥ ኦማርስ ባሳ” ያጌዳ። ሄዋፐ ጉየ ኡንቱንቱ ላአቱካ ቁማ እትፐ ሜድኖ።

9 ብታኒ ባረ አኪያ ቆማትናነ ባረ ቆማና ባናዉ ከስና፥ ናት አዉ ሀዋዳን ያጌዳ፤ “በእተ፥ ሳአይ ቃም ድጌዳ! ናሸቲደ ሀዋን አቅ አግተ። ዎንታ ጉራና ደንዲደ፥ ህንተንቱ ሶይ ቢታ” ያጌዳ።

10 ሽን እ ሄ ጋላስ ያን አቃናዉ ኮይቤና። ሄዋ ድራዉ፥ ደንዲደ ቤዳ፤ ያቡሳ ጌተትያ የሩሳላመ ካታማ ማታ ጋኬዳ፤ እ አኪያ ቆማታነ ላኡ ጫኔዳ ሀረቱ አናና ደኢኖ። 11 ኡንቱንቱ ያቡሳ ማትና፥ ሳአይ ሎይꬅ ኦማርሴዳ፤ ያትና፥ ቆማይ ባረ ጎዳ፥ “ብያዋ አጊደ አያዉ ሀ ያቡሳዋናቱዋ ካታማን አቆኮ?” ያጌዳ።

12 ሄዋፐ ጉየ አ ጎዳይ አዉ ዛሪደ፥ “ሀዋ እስራኤልያ አሳይ ባይና አላጋ ካታማ ቦኮ። ግብኣ ካታማ ጋካናዉ ኑን ባና” ያጌዳ። 13 ቃይ ዛረꬂደ ባረ ቆማ፥ “ሃያ፥ ኑን ግብኣ ካታማን ዎይ ራማ ካታማን አቅያ ሳኣ ደማና” ያጌዳ። 14 ያቲደ ባረንቱ ኦግያ ኦይቂደ ቤድኖ። ቢንያማ ጋድያን ደእያ ግብኣ ካታማ ማትና፥ አዋይ ኡንቱንቶ ዉሌዳ። 15 ኡንቱንቱ ግብኣ ካታማ ገሊደ አቃናዉ፥ ያ ቤድኖ፤ ካታማ አሳይ ሽቁዋ ኡትያ ሳኣን ኡቴድኖ፤ ሽን ያፐ ኡንቱንታ ባረ ሶይ አፊደ አይስያ አሳይ ቤትቤና።

16 ኡንቱንቱ ሄዋን ኡት ደእሽን፥ ጋደን ኦꬅያ ሳፐ ሳአይ ኦማርስና፥ ባረ ሶይ ስምያ እት ጭማ ብታኒ ኡንቱንቱ ማታና አꬌዳ። ሀ ብታኒ ካሰ ኤፍሬማ ገዝያፐ ዬዳ አሳ፤ ሽን ሀእ እ ደእያዌ ግብኣ ግያ ካታማና፤ ሄ ጋድያን ቢንያማ ዛርያፐ የለቴዳ አሳቱ ደኢኖ። 17 ሄ ጭማ ብታኒ ካታማ አሳይ ሽቁዋ ኡትያ ሳኣን ኡቴዳ ብታንያ በኢደ፥ “ሀቃፐ ያድ? ሀቃ ባይ?” ያጊደ ኦቼዳ።

18 ሌዊያ ዛሪ ዛሪድ፥ “ኑን ይሁዳ ጋድያን ደእያ ቤተሌመ ካታማፐ ዬዶ። ሀእ ኤፍሬማ ገዝያፐ ሄፍንꬃ ባጋን ደእያ ኑ ሶይ ቦይተ፤ ቃይ መꬍና ጎዳ ጎለካ ቦይተ። ያኔዳዋንቱ ኑና ባረ ሶይ አፊደ አይስያ አሳ ደምበይኮ። 19 ኑ ሀረቶ ኡቱላይነ ዳላይ ደኤ፤ ታዉ፥ ታ አኪያ ቆማትዉነ ታ ቆማዉ ግድያ ኡክꬃይነ ዎይንያ ኤሳይ ደኤ፤ ኑ ኮሽያዋ ኡባ ኦይቄዶ” ያጌዳ።

20 ሄዋፐ ጉየ ጭማ ብታኒ፥ “ሳሩ ህንተንቶ ግዶ፤ ህንተንቱ ኮይያዋ ኡባ ታን ህንተንቶ እማና፤ አያ ግዶፐነ፥ ሀ ካታማ አሳይ ሽቁዋ ኡትያ ሳኣን አቃናዉ ኮሸና” ያጌዳ። 21 ኡንቱንታ ባረ ሶይ አፌዳ፤ ኡንቱንቱ ሀረቶካ ምያባ የጌዳ። ሄዋፐ ጉይያን፥ እማꬃቱ ባረንቱ ገድያ ሜጨቲድ፥ ካዉዋ ሜድኖ።

22 ኡንቱንቱ ናሸትሽን፥ ካታማፐ ሹፉሮ አሳቱ ዪደ፥ ጎልያ ዩሹዋን ዶዲደ፥ ፐንግያ ቆጸꬃ ዶሜድኖ፤ ኡንቱንቱ ሄ ጎልያ ጎዳ፥ ሄ ጭማ ብታንያ፥ “ሄ ነ ሶ ገሌዳ ብታንያ ሃ ኬሳ፤ ኑን አናና ግሳናዉ ኮዬቶ!” ያጌድኖ። ዶመꬃ 19:5-8

23 ሄዋፐ ጉየ ጎልያ ጎዳይ ካረ ከሲደ ኡንቱንታ፥ “ሀይ ታ እሻቶ፥ ሄዋ ማላ ፓላባ ኦꬆፕተ፤ ሀ ብታኒ ታ እማꬃ። 24 በእተ፥ ታ ዎዶሮ ናታነ እ አኪያ ቆማታ ሀዋን ደኢኖ። ታን ኡንቱንታ ህንተንቶ ካረ ኬሳና፤ ያቶፐ ኡንቱንታ ህንተንቱ ኮዬዳዋ ኦꬅተ፤ ሽን ሀ ብታንያ ቦላ ሄዋ ማላ ኢታባ ኦꬆፕተ” ያጌዳ።

25 ሽን አሳቱ እ ጌዳዋ ስሰናን እጼድኖ። ያትና፥ ቢታኒ ባረ አኪያ ቆማቶ ካረ ኬሲደ፥ ኡንቱንቶ እሜዳ፤ ሳአይ ዎንታና ጋካናዉ፥ ቃማ ኡባ ካላን ካላን እዝና ዎልቃን ግሲደ፥ እዞ ፓጻ ካኢዴ አቄድኖ፤ ያቲደ ሳአይ ዎንታና ሀንሽን፥ እዞ የዴድኖ። 26 ሳአይ ዎንታናዉ ሆልጆጅ ዞእያ ዎደ ሄ ምሽራታ ያደ፥ እዝ ጎዳይ አቄዳ ጭማ ብታንያ ጎልያ ፐንግያን ኩንዳዱ፤ ጻልቂ ዶላና ጋካናዉ ሄዋን ግሳዱ።

27 ሄ ጋላስ ጉራ እ ጎዳይ ደንዲደ፥ ባረ ኦግያ ባናዉ ጎልያ ፐንግያ ዶዪደ ከሴዳ ዎደ፥ እ ማችያ ቆማታ ጎልያ ፐንግያን ባረ ኩሽያ ፐንገ ጎጭላ ቦላ ምጫደ፥ ግሴዳውኖ በኤዳ። 28 እዞ፥ “አነ ደንዳ፤ ቦይተ” ያጌዳ፤ ሽን እዛ አዉ አይነ ዛራበይኩ። ሄዋፐ ጉይያን፥ እዚ አሃ ሀርያን ጫኒደ፥ ባረ ሶይ ቤዳ። 29 ሶይ ጋኪደ፥ ማሻ አኪደ፥ ባረ አኪያ ቆማት አሃ ታማነ ላኡዋ ከሲደ ቃንጸሬꬄዳ። እት እት ግሹዋ እት ዛረዉ፥ ኡባና ታማነ ላኡ እስራኤልያ ዛረቶ የደዳ። 1 ሳሜላ 11:7

30 ሄዋ በኤዳ ኡባይ፥ “እስራኤልያ አሳይ ግብጼ ጋድያፔ ከሰዳሳፐ ሀቼ ጋካናዉ፥ ሀዋ ማላትያባይ ኡባካ ሀንቤና፤ ኑንካ በእበይኮ። አነ ሀዋ እትፐ አኬክ ዞረቶይቴ፥ እትባ ኦꬆይተ” ያጌድኖ።