1 እስራኤልያ አሳይ ምጽጳ ግያ ሳን ሺቄዳ ዎደ፥ “ኑ ግዶፐ ኦንነ ቢንያማ አሳዉ ባረ ናቶ ማቻቶ ኦꬂደ እመና” ያጊደ ጫቂ ዎꬄዳ። 2 እስራኤላቱ ቤቴለ ካታማ ቢደ፥ ያን ሳአይ ቃማና ጋካናዉ ጾሳ ስንꬃን ኡቲደ፥ ባረንቱ ቃላ ꬎቁ ኦꬂደ፥ ሴላ ዬኩዋ ዬኬድኖ። 3 ሄዋፐ “አቤት መꬍና ጎዳዉ፥ እስራኤልያ ጾሳዉ፥ ሀ የዉ አያዉ እስራኤላን ሀኔዴ? ሀቼ እስራኤልያ አሳ ግዶፐ እት ዛሪ አያዉ ፓጪ?” ያጌድኖ።

4 ዎንተꬃ ጋላስ ዎንታ ጉራና ኡንቱንቱ ደንዲደ፥ ያርሽያ ሳኣ ያን ጊግሲደ ጹግያ ያርሾቱዋነ እትፐተꬃ ያርሾቱዋ ሺሼድኖ። 5 ያቲደ እስራኤላቱ፥ “እስራኤልያ ዛርያ ኡባፐ መꬍና ጎዳ ስንꬃን ሺቅያሳ ይቤና ዛሪ ኦኔ?” ያጊደ ኦቼድኖ። ኡንቱንቱ ሄዋ ኦቼዳ ጋሶታይ፥ ምጽጳ ካታማን መꬍና ጎዳ ስንꬃን ሺቃናዉ ይቤና አሳይ ኦንነ፥ “እ ኡባና ሀይቆ” ያጊደ ካሰ ጫቄዳ ድራሳ።

6 እስራኤልያ አሳቱ ባረንቱ እሻቶ፥ ቢንያማ ዛረቶ ቃረቲደ፥ “ሀቼ እስራኤልያፐ እት ዛሪ ቦሄቴዳ። 7 ኑን ኑ ማጫ ናና ኡንቱንቶ እመናዳን መꬍና ጎዳን ጫቄዳ ድራዉ፥ ሀይቁዋፐ አቴዳ ቢንያማ ዛራቱ ማጫ አሳ አካና ማላ፥ ኑን አይ ኦꬃኔ?” ያጌድኖ።

8 ቃይካ ኡንቱንቱ፥ “እስራኤልያ ዛራቱዋፐ ምጽጳ ካታማን መꬍና ጎዳ ስንꬃ ይቤናዌ ኦኔ?” ያጊደ ኦቼድኖ። ጋላኣደን ደእያ ያቤሻ ግያ ካታማፐ እት አሳይነ ሺቁዋ ይቤናዋ ኤሬድኖ። 9 ኡንቱንቱ አሳ ፓይዴዳ ዎደ፥ ጋላኣደን ደእያ ያቤሻፐ እት አሳይነ ቤትቤና።

10 ሄዋ ድራዉ፥ ማባራይ ታማነ ላኡ ሻአ ምኖ ኦላንቻቱዋ ጋላኣደን ደእያ ያቤሻ ካታማ ኪቲደ፥ “ቢተ፤ ያቤሻን ደእያዋንታ ኡባ ማሻን ቡሳክተ፤ ማጫ አሳካ ጉꬃ ናናካ አሾፕተ። 11 ሀዋዳን ኦꬅተ፤ አቱማ አሳ ኡባነ አቱማ አሳና ግሴዳ ማጫ አሳ ኡባ ዎꬍተ” ያጊደ አዛዜድኖ። 12 ያቤሻ ካታማን ደእያ አሳ ግዶፐ አቱማ አሳና ግስቤና፥ ኦይዱ ጼቱ ዎዶሮ ማጫ ናና ደሚደ ካናነ ጋድያን፥ ሴሎን ደእያ ዱንካኔዳ ሳኣ አኪደ አሄድኖ።

13 ሄዋፐ ጉይያን፥ ኩመንꬃ ማባራይ ርሞና ዛላ ግያ ሳን ደእያ ቢንያማ አሳቱዋኮ ስጋ ኪቴድኖ። 14 ቢንያማ አሳቱ ስሚደ ዬድኖ። እስራኤልያ አሳይ ያቤሻ ካታማፐ ዎናን አሄዳ ዎዶሮ ናና ኡንቱንቶ እሜዳ። ሽን ዎዶሮ ናናይ አቱማ አሳ ኡባ ጋክበይክኖ።

15 እስራኤልያ ዛራቱዋ ግዶን ደእያ እትፐተꬃይ ዱጻናዳን መꬍና ጎዳይ ኦꬄዳ ድራዉ፥ አሳይ ቢንያማ አሳዉ ሎይꬅ ቃረቴዳ። 16 ማባራ ጭማቱ፥ “ቢንያማ ዛራቱዋፐ ማጫ ናናይ ሀይቂ ዉሬዳ ድራዉ፥ ሀይቁዋፐ አቴዳ አቱማ አሳዉ ኑን ማችያ ዎት እማኔ? 17 እስራኤልያ አሳ ግዶፐ ፕተት ባየና ማላ፥ ቢንያማ ዛራቱዋፐ አቴዳዋንቶ ላትያ ናናይ ደአናዉ ኮሼ። 18 ግዶፐነ፥ ኑን ኑ ማጫ ናናቱዋፐ ኡንቱንቶ እማናዉ ዳንዳዮኮ፤ አያዉ ጎፐ፥ እስራኤልያ አሳይ ካሰ፥ ‘ባረ ናቶ ቢንያማ ዛርያዉ እምያ ኡራይ ሸቀቴዳዋ ግዶ’ ያጊደ ጫቀꬅ ዎꬄዳ” ያጌድኖ።

19 ሄዋፐ ጉይያን፥ ማባራ ካለꬅያ ጭማቱ፥ “በእተ፥ ላይꬃን ላይꬃን ሴሎን መꬍና ጎዳ ቦንችያ ባላይ ማቴዳ” ያጌድኖ። ሴሎ ቤቴለፐ ሁጲሳ ባጋና፥ ላቦናፐ ገድሳ ባጋና፥ ቤቴለፐ ሰኬማ አፍያ ኦግያፐ አዋይ ዶልያ ባጋና ደኤ። 20 ሄ ማባራ ካለꬅያ ጭማቱ ቢንያማ አሳቱዋ ሀዋዳን ያጊደ አዛዜድኖ፤ “ቢተ፤ ዎይንያ ቱራ ግዱዋን ሙጊደ፥ 21 ናግተ። ሴሎ ካታማ ማጫ ናናይ ባላ ጋላስ ካባሩዋ ኦይቂደ፥ የጺድነ ዱሪደ ይያ ዎደ፥ ህንተንቱ ዎይንያ ቱራ ግዶፐ ከስተ። ኡባይካ ሴሎ ማጫ ናናቱዋፐ ህንተንቶ ዳፊደ፥ ቢንያማ ጋድያ አኪደ ቢተ። 22 ኡንቱንቱ አዎቱ ዎይ ኡንቱንቱ እሻቱ ኑኮ ማጋናናዉ ይያ ዎደ፥ ኑን ኡንቱንታ፥ ‘ሀይ ሀያና፥ ኡንቱንታ ኑዉ እም አግተ፤ አያዉ ጎፐ፥ ኑን ኡንቱንታ ሁጲያን ሁጲያን ጋክያ ማጫ አሳ ኦላ ሳፐ ደምበይኮ። ህንተንቱ ዶሲደ እምቤና ድራዉ፥ ባይዛንቻ ግድክታ’ ያጋና” ያጌድኖ።

23 ቢንያማ አሳቱካ እስራኤልያ ጭማቱ ጌዳዋዳን ኦꬄድኖ፤ ኡባይካ ሴሎን ዱርያ ማጫ ናናቱዋፐ ባረንቱ ፓይዱዋ ኬሻቱዋ ዳፊደ አፌድኖ። ኡንቱንቱ ባረንቱ ላታ ጋድያ ስሚደ፥ ካታማቱዋ ዎꬅ የግ ኬጺደ፥ ያን ደኤድኖ። 24 ሄ ዎደ እስራኤልያ አሳይ ያፐ ብያ ዎደ፥ ኡባይካ ባረ ዛርያኮ ዛርያኮነ ባረ ሶ አሳኮ አሳኮ ቤዳ።

25 ሄ ዎደ እስራኤልያ ጋድያን ካቲ ባዋ፤ አሳይ ኡባይ ባረዉ ልከ ማላቴዳዋ ጮ ኦꬄ።ዳና. 17:6