1 እስራኤልያ ጋደ ዳናቱ ሞድያ ዎደ፥ ሄ ጋድያን ኮሻይ ደንዴዳ። እት ብታንያ ባረ ማቻትናነ ባረ ላኡ ናናነ ይሁዳ ጋድያን ቤተሌመ ካታማፐ ደንዲደ፥ ሞኣበ ጋድያ በቴዳ። 2 ሄ ብታንያ ሱንꬃይ ኤልመሌካ፤ አ ማቻት ሱንꬃይ ኑሃሞ፤ አ ላኡ ናና ሱንꬃይ ማህሎናነ ኬልዎናነ። ኡንቱንቱ ይሁዳ ቤተሌመን ደእያ ኤፍራታ ያራ። ሄዋንቱ ሞኣበ ቢደ ያን ደኤድኖ።

3 ኑሃም አስናይ ኤልመሌክ ሀይቄዳ። እዛ ባረ ላኡ ናናቱዋን አታዱ። 4 ሄ ናናይ ሞኣበ ጋደ ማጫ ናናቱዋፐ ኦርፖነ ኡሩቶነ ጌተትያ ማቻቱዋ አኬድኖ። ሄዋን ታሙ ላይꬃ ግድያዋ ኡቲደ፥ 5 ማህሎንነ ኬልዎንነ ላአቱካ ሀይቄድኖ። ኑሃማ ባረ አስናይካ ባረ ላኡ ናናይካ ሀይቅና ባረካ አታዱ።

6 አ ሞኣበን ደኣደ፥ መꬍና ጎዳይ ባረ አሳ እስራኤልያ ማሪደ፥ ካꬃ ኡንቱንቶ ጋꬄዳዋ ስሳዱ። ሞኣበ ጋድያፐ ስማናዉ ባረ ናና ማቻቱዋ ላአቱዋና ደንዳዱ፤ 7 ባረ ናና ማቻቱዋ ላአቱዋና እትፐ ባረ ደኢያሳፐ ከሳዱ። ኡንቱንቱ ጉየ ይሁዳ ጋድያ አፍያ ኦግያን ገሌድኖ።

8 ኑሃማ ባረ ናና ማቻቱዋ፥ “ስምተ፤ ህንተንቱ ኡባይካ ህንተንቱ አት ሶ አት ሶ ቢተ። ህንተንቱ ሀይቄዳዋንቶነ ታዉነ ኬከዳዋዳን፥ መꬍና ጎዳይ ህንተንቶ ኬኮ። 9 ህንተንቱ ሁጲያን ሁጲያን ገልያ ሀራ አስናቱ ሶን መꬍና ጎዳይ ዎፓ እሞ” ያጋደ ኡንቱንታ የራዱ።

ሽን ኡንቱንቱ ባረንቱ ቃላ ꬎቁ ኦꬂደ ዬኪደ፥ 10 “ኑን ኔናና ነ አሳኮ ባና” ያጌድኖ።

11 ሽን ኑሃማ ኡንቱንታ፥ “ሀይ ታ ናቶ፥ ስምተ። ህንተንቱ ታናና አያዉ ቢቴ? ህንተንቶ አስና ግዳናዉ አቱማ ናና ታን ሀዋፐ ጉየ የላንታየ? 12 ታ ናቶ፥ ስምተ፤ ታን ሀራ አስና ገለናዳን ኤጫክቻድ። ዎን ታን የላና ጋይታንቶነ፥ ሀቼ ቃማ ኡባ አስና ገላደ፥ አቱማ ናና የላይታንቶነ፥ 13 ሄዋንቱ ድጭ ጋካናዉ ናጋኒቴየ? ኡንቱንቱ ድራዉ ጊደ፥ አስና ገለናን አት አጋንቴየ? ታ ናቶ፥ ሄዌ ሀነናዋ ግድያዋ ህንተንቱ ኤሪታ። መꬍና ጎዳይ ታና መቶꬄዳዋ ድራዉ፥ ህንተንታ ጋኬዳባይ ታና ሎይꬅ ሴሌ” ያጋዱ።

14 ሄዋን ኡንቱንቱ ባረንቱ ቃላ ꬎቁ ኦꬂደ፥ ዬኬድኖ። ያትና ኦርፓ ባረ ቦሎታቶ የራ አካደ፥ ስማ አጋዱ። ሽን ኡሩታ ኦ ባቃ ኦይቃደ እጻዱ። 15 ኑሃማ ኦ፥ “በአ፥ ነ አስና እሻ ማቻታ ባረ አሳኮነ ባረ ጾሳኮነ ስማዱ። ኔንካ እዝና ስማደ ባ” ያጋዱ።

16 ኡሩታ ዛራደ፥ “ታን ኔፐ ሻከታናዳን ዎይ ኔና አጋደ ጉየ ስማናዳን ታና መቶꬆፓ። ኔን ብያሳኣ ሀቃነ ታን ባና፤ ኔን ደእያ ሳኣን ሀቃንነ ታን ደአና። ነ አሳይ ታ አሳ ግዳና፤ ነ ጾሳይ ታ ጾሳ ግዳና። 17 ኔን ሀይቂያ ሳኣን ታን ሀይቃና፤ ሄዋን ሞገታ አጋና። ሀይቆፐ አትን፥ ሀራባይ ታና ኔፐ ሻኮፐ፥ መꬍና ጎዳይ ታና ዎꬎ” ያጋዱ።

18 ኡሩታ እዝና ባናዉ ባረ ቆፋ ቃቼዳዋ ኑሃማ ኤራደ፥ ጮኡ ጋደ አጋ ባሻዱ። 19 ሄዋ ድራዉ፥ ላኡ ማጫ አሳቱ ቤተሌመ ጋካናዉ ቤድኖ። ኡንቱንቱ ቤተሌመ ጋክያ ዎደ፥ ሄ ካታማ አሳይ ኡባይ ኡንቱንቱባን ማላሌቴዳ። ቃይ ማጫ አሳቱ፥ “ሀና ኑሃሚ?” ያጌድኖ።

20 አ ዛራደ ኡንቱንታ፥ “ታና፥ ኑሃሞ *ኑሃሞ፦ ሀ ሱንꬃ ብለꬃይ፥ “ጫመቴዳኖ” ግያዋ። ጎፕተ፤ ‘ጫመቴዳነ’ ጊተ። አያዉ ጎፐ፥ ኡባ ዳንዳይያ ጾሳይ ታ ደኡዋ ዳርስ ጫምሴዳ። 21 ታን ኩመንꬃን ከሳደ ባድ፤ ሽን መꬍና ጎዳይ ታና መላ ዛሬዳ። መꬍና ጎዳይ ታና ቱጋዪደ ኡባ ዳንዳይያ ጾሳይ ታናን ፓላባ ጋꬄዳ። ያትና፥ ታና አያዉ ኑሃመ ጊደ ጼሲቴ?” ያጋዱ።

22 ሄዋዳን ሀናደ፥ ኑሃማ ባረ ናኣ ማቻት ሞኣበ ኡሩትና ስማዱ። ኡንቱንቱ ቤተሌመ ጋኬዳዌ ባንጋ ጫካይ ዶመትያ ዎድያና።