1 መꬍና ጎዳይ ሀዋዳን ያጌ፤ “እስራኤልያ አሳዉ፥ ስሞፐ፥ ሃ ታኮ ስምተ። ህንተ ታን ሸነትያ ህንተ ኤቃቱዋ ታ ስንꬃፐ ድጎፐ፥ ታፐ ዎራ ባና ꬋዮፐነ 2 ህንተ ቱሙዋን፥ ሱረተꬃንነ ጽሎተꬃን፥ ‘መꬍና ጎዳይ ኤሮ!’ ጊደ ጫቆፐ፥ ሄ ዎደ ካዉተꬃቱ አን አንጀታናነ አን ጬቃና” ያጌ።

3 መꬍና ጎዳይ ይሁዳ አሳዉነ የሩሳላመን ደእያዋንቶ ሀዋዳን ያጌ፤ “ህንተ ኦꬃ ቢታ ጎሽተ፤ አጉንꬃ ቦላ ዘሮፕተ። ሆሰ 10:12 4 ህንተኖ፥ ይሁዳ አሳቶ፥ የሩሳላመን ደእያዋንቶ፥ ህንተ ህንተ ሁጲያ መꬍና ጎዳዉ ቃጻርተ፤ ህንተ ዎዛና ሾኩዋ ድግተ። ሄዌ ꬋዮፐ፥ ህንተ ኦꬄዳ ኢታተꬃ ድራዉ፥ ታ ሀንቁ ታማዳን ኤጽ ከሳና። አ ኦንነ ቶይሳናዉ ዳንዳየና” ያጌ።

5 ጾሳይ ሀዋዳን ያጌ፤ “ይሁዳን ኦድተ። የሩሳላመን፥ ‘ቢታ ኡባን ማላካታ ፑንተ!’ ያጊደ አዋይተ። ህንተ ቃላ ꬎቂሲደ፥ ሀዋዳን ጊደ ዋስተ! ‘እትፐ ሺቅተ! አነ ግምቢ ዩይ አꬌዳ ካታማ ደንድተ!’ ያግተ። 6 አሳይ ጽዮነ ባና ማላ ማላትተ! ህንተዉ ሳሮ አታናዉ ባቃትተ! ጋምኦፕተ! አያዉ ጎፐ፥ ታን ሁጲሳ ባጋ ቢታፐ ኢታባነ ዎልቃማ ባሻ አሀና ሀናይ። 7 ጋሙ ባረ ደእያ ቡራፐ ከስያዋዳን፥ ካዉተꬃቱዋ ꬋይስያዌ ባረ ሳኣፐ ደንዴ። ህንተ ቢታ ꬋይሳናዉ ዬዳ። ህንተ ካታማቱ ባዪደ ኦና ግዳናዋ። 8 ሄዋ ድራዉ፥ ማቃ ማዪደ፥ ‘አዬ! አየ!’ ያጊደ ዝላልተነ ዬክተ። አያዉ ጎፐ፥ መꬍና ጎዳ ሀንቁ ሱልያዌ ኑ ቦላፐ ክችቤና” ያጌ።

9 ቃይካ መꬍና ጎዳይ፥ “ሄ ጋላስ፥ ካትያ ዎዛናይነ ካፖቱዋ ዎዛናይ ያያና። ቄሳቱ ካ ዳጋማና። ትምቢትያ ኦድያዋንቱካ፥ ‘ፖራ!’ ጊደ ዶና ኦይቃና” ያጌ።

10 ታን፥ “ሀእ ኡባ ሞድያ መꬍና ጎዳዉ፥ ማሻይ ኡንቱንቱ ቆꬍያን ዎꬍያ ዎደ፥ ‘ህንተዉ ሳአይ ሳሮ ግዳና’ ያጋደ፥ ሀ አሳነ የሩሳላመ ሎይꬅ ጭሙዋ ጭማዳ” ያጋድ።

11 ሄ ዎድያን ሀ አሳስነ የሩሳላመዉ፥ መꬍና ጎዳይ ሀዋዳን ያጌ ጌተታና፤ “ባዙዋን አያይነ ባይና ꬎቃ ደረቱዋፐ ምችያ ጫርኩ ታ አሳ ቦላ ጫርካና፤ ሽን ሄዌ ካꬃ ሰጻናዉነ ጌሻናሳ ግደና። 12 ሄዋፐ ሎይꬅ ዎልቃምያ ጫርኩ ታ አዛዙዋን ጫርካና፤ ሀእ ታን ኡንቱንቱ ቦላ ፕርዳና” ጌ ጌተታና።

13 በእተ፥ ሞርኪ ሻርያዳን ከሴ። አ ፓራ ጋረቱካ ጎትያ ማላ፤ አ ፓራቱ አርጋንꬃፐካ አꬍ ኤሌሊኖ። አየ አና ኑኖ! ባዋ ꬋዬዶ!

14 ኔኖ የሩሳላመ፥ አታና ማላ፥ ነ ዎዛና ሜጫደ ኢታተꬃፐ ጌሻ ድጋ! ኢታ ቆፋይ ነ ዎዛናን አዉደ ጋካናዉ ጋምአኔ? 15 ዳና ካታማፐነ ኤፍሬማ ደርያፐ ዬዳዋንቱ ኢታባ አዋዪኖ። 16 መꬍና ጎዳይ ሀዋዳን ያጌ፤ “ካዉተꬃቶ ኦድተ፤ የሩሳላምዉካ ሀዋዳን ያጊደ አዋይተ፤ ይሁዳ ካታማቱዋ ቦላን፥ ‘ሃኮ ቢታፐ ኦላ አዋይያ ኦላንቻቱ ይ ደኢኖ፤ 17 እ ታ ቦላ ማካሌዳ ድራዉ፥ ጋደን ደእያ ካꬃ ናግያዋንቱዳን፥ ሄ ኦላንቻቱ ይሁዳ ዩሹዋን ዩይ አꬊኖ’ ያግተ” ያጌ።

18 ይሁዳ አሳቶ፥ ህንተ ሀኑነ ህንተ ኦሱ ሀዋ ኡባ ህንተ ቦላ አሄዳ። ሀዌ ህንተዉ ሙሮ። እ አይ ኬሻ ጫምያቤ! ህንተ ዎዛና አይ ኬሻ ጫድያቤ!

19 አየ ታኖ! ታን ሀዋ ዎታ ዳንዳያኔ! አየ ታ ዎዛናዉ! ታ ዎዛናይ ድድቄ፤ ታን ጮኡ ጋናዉ ዳንዳይከ። አያዉ ጎፐ፥ ታን ማላካታ ፑኑዋነ ኦላ ዋሱዋ ስሳድ። 20 ኢታባይ ኢታባ ካሌ፤ ሙለ ቢታይ ባዬዳ። ታ ዱንካነቱነ ጋርዳቱ ኤለካ ꬋዬድኖ። 21 አዉደ ጋካናዉ ኦላ ማላታ ጼላኔነ ማላካታ ፑኑሳ ስሳኔ?

22 ጾሳይ ሀዋዳን ያጌ፤ “ታ አሳይ ቦዛ፤ ኡንቱንቱ ታና ኤርክኖ። ኡንቱንቱ ቆፍ ባይና ናናቱዋ፤ ኡንቱንቶ አኬክ ባዋ። ኡንቱንቱ ኢታባ ኦꬃናዉ ኤራንቻ፤ ሽን ሎኦባ ኦꬃናዉ ኤርክኖ” ያጌ።

23 ታን ሳኣ ጼላድ፤ ሳአይ ጊግቤናዋነ አያይነ ባይና መላ ግድያዋ በኣድ። ቃይ ሳሎቱዋ ጼላድ፤ ኡንቱንቱን ፖኡ ባይናዋ በኣድ። 24 ደረቱዋ ጼላድ፤ ኡንቱንቱ ቃጽያዋነ ዞዘቱ ኡባይ ጉየነ ስንꬃዉ ጋጅ ጋጅያዋ በኣድ። 25 ታን ጼላድ፤ ሽን አይ አሳነ በአበይከ፤ ሳሉዋ ካፎቱካ ኡባይ ፓሊደ ባቃቴድኖ። 26 ጼላድ፤ አራዳ ቢታይ መላ ግዴዳዋ በኣድ፤ መꬍና ጎዳ ስንꬃን፥ አ ሱሎ ሀንቁዋ ስንꬃን ሄ ቢታ ካታማቱካ ዮደቴድኖ።

27 መꬍና ጎዳይ ሀዋዳን ያጌ፤ “ሙለ ቢታይ ባያና፤ ሽን ታን አ ዉርሳ ꬋይስከ። 28 ሄዋ ድራዉ፥ ሳአይ ዬካና፤ ሳሎቱካ ቦላን ꬉማና። አያዉ ጎፐ፥ ታን ጋ ድጋድ፤ ማርሰትከ። ታን ቆፋ ቃቻ ክቻድ፤ አግከ” ያጌ።

29 ፓራ አሳቱነ ዎንዳፍያ አሳቱ ጋርማሙዋን፥ አሳይ ካታማ ኡባፐ ባቃታና። ባጋቱ ዎጺደ ዎራ ጋርሳ ገልና፥ ባጋቱ ቃይ ዛላ ሽቢኖ። ካታማይ ኡባይ ኦኒደ፥ ደእያ አሳ ꬋዬዳ።

30 ኔኖ፥ ባያ ክቼዳኔ፥ ኔን አይ ኦꬃይ? ነ ዞኦ ማዩዋ አያዉ ማያይ? ዎርቃ አሌቁዋ አያዉ ዎꬃይ? ነ አይፍያ ስጲንꬃ አያዉ ኦካይ? ኔን ጮ መላ ኔና ሎይꬃዳ። ነ ላገꬃቱ ኔና ካꬌድኖ፤ ኡንቱንቱ ኔና ዎꬋናዉ ኮዪኖ። 31 ታን የሉዋ ኦይቀቴዳ ምሽራታ ዋስያዋ ማላ ዋሱዋ ስሳድ። እ ዋሱ ኮይሮ ናኣ የልያ ማጫ ምሽራት ኦልያ ማላ። ሄ ዋሱ፥ የሩሳላማ ሸምፑዋ ተኤታደ፥ ባረ ኩሽያ ምጫደ፥ “አየ ታኖ! ሄኮ ታና ዎꬋናዉ ሀኒኖ!” ያጋደ ዋስያ ዋሱዋ።