1 ጾሳይ ሀዋዳን ያጌ፤ “አነ የሩሳላመ ኦግያ ፑደነ ዱገ ሀመትተ፤ አነ ዩይ አꬊደ ጼልተነ አኬክተ፤ አ ጉታራንካ ኮይተ። ጽሉዋ ፕርድያነ ቱሙዋ ኮይያ እት አሳ ህንተ ደሞፐ፥ ታን የሩሳላመ ማራና። 2 ሽን ኡንቱንቱ፥ ‘መꬍና ጎዳይ ኤሮ’ ጎፐካ፥ ኡንቱንቱ ቱሙዋፐ ዎርዱዋን ጫቂኖ” ያጌ።

3 አቤት መꬍና ጎዳዉ፥ ነ አይፈቱ ቱሙዋ ጼልክኖየ? ኔን ኡንቱንታ ደቻዳ፥ ሽን ኡንቱንታ ሳክቤና። ኔን ኡንቱንታ ክንቼሬꬃዳ፥ ሽን ኡንቱንቱ ሴራ አከናን እጼድኖ። ኡንቱንቱ ባረንቱ ሶምኡዋ ዛላፐ አꬅ ምንሲደ፥ ባረንቱ ናጋራፐ ስመናን እጼድኖ።

4 ሄዋፐ ጉይያን፥ ታን ሀዋዳን ያጋደ ቆፓድ፤ “ሀዋንቱ ህዬሳ ጻላላ፤ ሀዋንቱ ቦዛ። አያዉ ጎፐ፥ ኡንቱንቱ መꬍና ጎዳ ኦግያ፥ ባረንቱ ጾሳ ህግያ ኤርክኖ። 5 ስም ታን ዎልቃማ አሳቱዋኮ ባናነ ኡንቱንቶ ኦዳና። አያዉ ጎፐ፥ ኡንቱንቱ መꬍና ጎዳ ኦግያ፥ ባረንቱ ጾሳ ህግያ ኤሪኖ” ያጋደ ቆፓድ። ሽን ኡንቱንቱ ኡባይካ እትፐ አ ሞርገ ምꬃ መንꬄድኖነ ቃሹዋካ ዱꬄድኖ። 6 ሄዋ ድራዉ፥ ጋሙ ባረ ዎራፐ ከሲደ፥ ኡንቱንታ ዎꬋና። ጄሪ ባዙዋፐ ከሲደ፥ ኡንቱንቱ ም ꬋይሳና። ማሂ ኡንቱንቱ ካታማቱዋ ዙጊደ ናጋና። ሄ ካታማቱዋፐ ከስያ ኡባይ ፑዘት ዉራና። አያዉ ጎፐ፥ ኡንቱንቱ ማካላይ ዳልጌዳ፤ ኡንቱንቱ ቶሺካ ዳሬዳ።

7 ጾሳይ ሀዋዳን ያጌ፤ “ታን ህንተ ናጋራ አያዉ አቶ ጎ? ህንተ ናናቱ ታና አጊደ፥ ዎርዶ ጾሳቱዋን ጫቄድኖ። ታን ኡንቱንታ ምዛደ ካልሳድ፤ ሽን ኡንቱንቱ ሻርሙጼድኖነ ሻርሙጻቱዋ ጎልያ ሲሬድኖ። 8 ኡንቱንቱ ꬊከቴዳ ኮሩማ ፓራዳን ዚቲደ፥ ሀራ አሳ ማቻቶ ዎሹማናዉ አሞቲኖ። 9 ቱሙ ታን ሀ የዎቱዋ ድራዉ፥ ኡንቱንታ ሙራናዉ በስክታ? ሀዋ ማላ ካዉተꬃዉ ታ ሀሉዋ ከስክታ?” ያጌ መꬍና ጎዳይ።

10 ቃይካ መꬍና ጎዳይ ሀዋዳን ያጌ፤ “እ ዎይንያ ቱራ ማራ ግዱዋና ቢደ ባይዝተ፤ ሽን ዉርስ ꬋይሶፕተ። እ ታሸቱዋ ፐንጊ ኦልተ፤ አያዉ ጎፐ፥ ኡንቱንቱ መꬍና ጎዳሳ ግድክኖ። 11 እስራኤልያ አሳቱነ ይሁዳ አሳቱ ሙለካ አማነትበይክኖ” ያጌ።

12 ኡንቱንቱ ሀዋዳን ጊደ፥ መꬍና ጎዳ ቦላ ዎርዱዋን ሃሳዬድኖ፤ “እ አይነ ኦና፤ ቆህያባይ አያይነ ኑ ቦላ ዬና። ሞርክያ ማሻ ዎይ ኮሻ ኑን ሙለካ በኦኮ። 13 ትምቢትያ ኦድያዋንቱ ጫርኩዋ ማላ፤ ኡንቱንቱን ጾሳ ቃላይ ባዋ። ሄዋ ድራዉ፥ ኡንቱንቱ ግያዌ ኡባይ ኡንቱንታ ጋኮ” ያጊኖ።

14 ሄዋ ድራዉ፥ መꬍና ጎዳይ፥ ኡባፐ ዎልቃማ ጾሳይ እስራኤልያ አሳ ሀዋዳን ያጌ፤ “ኡንቱንቱ ሀ ቃላ ሃሳዬዳ ድራዉ፥ ታን ታ ቃላ ነ ዶናን ታማ ከሳና። ሀ አሳካ ምꬃ ከሳና፤ ሄ ታማይ ኡንቱንታ ም ꬋይሳና” ያጌ።

15 መꬍና ጎዳይ ህንተና ሀዋዳን ያጌ፤ “ህንተኖ፥ እስራኤልያ አሳቶ፥ ታን ህንተ ቦላ ሃኮ ቢታፐ እት ካዉተꬃ አሀና። እነ ዎልቃማነ በን ካዉተꬃ። ኡንቱንቱ ቃላ ህንተ ኤረና፥ ኡንቱንቱ ሃሳያይካ ህንተዉ ገለና ካዉተꬃ። 16 ኡንቱንቱ ጩብያ ሾኩ ዶያ ዱፎ ማላ። ኡንቱንቱ ኡባይካ ዎልቃማ አሳ። 17 ኡንቱንቱ ህንተ ካꬃነ ቁማ ቦንቂደ ማና። ህንተ አቱማ ናናቱዋካ ማጫ ናናቱዋካ ዎꬋና። ህንተ ዶርሳካ ሚዛካ ቦንቂደ ማና። ህንተ ዎይንያ ቱራ ቴራካ ባላስያ ግያ ምꬃ ቴራካ ቦንቂደ ማና። ህንተ አማነትያ፥ ግምበቴዳ ካታማቱዋካ ኡንቱንቱ ባረንቱ ማሻን ኦሊደ ባይዛና” ያጌ።

18 መꬍና ጎዳይ ኤርማሳ ሀዋዳን ያጌ፤ “ሽን ሄ ጋላሳቱዋን ግዶፐካ፥ ታን ታ አሳ ኡባና ዉርሳ ꬋይስከ። 19 አሳይ ኔና፥ ‘መꬍና ጎዳይ ኑ ጾሳይ ኑ ቦላ ሀዋ ኡባ አያዉ ኦꬄዴ?’ ጊደ ኦችያ ዎደ፥ ኔን ኡንቱንቶ፥ ‘ህንተ ታና፥ ጾሳ አጊደ፥ ህንተ ማታን እማꬃ ጾሳቶ ኦꬄዳዋዳን፥ ሄዋዳን ህንተካ አሳ ማታን እማꬃ አሳቶ ኦꬃና’ ያጋ” ያጌዳ።

20 ቃይካ ጾሳይ፥ “ሀዋ ያቆባ አሳቶ ኦዳ፤ ይሁዳ ቢታንካ ሀዋዳን ያጋደ አዋያ፤ 21 ‘ህንተኖ፥ አይፊ ደእሺና ጼለናዋንቶ፥ ሀይꬃይ ደእሺና ስሰናዋንቶ፥ ኤያነ ዶንጭሎዋንታ አሳቶ፥ ሀዋ ስስተ!ኢሳ. 6:9-10፤ ህዝ. 12:2፤ ማር. 8:18 22 ላ ህንተ ታዉ አያዉ ያይክቴ? ያጌ መꬍና ጎዳይ። ህንተ ታ ስንꬃን አያዉ ኮኮርክቴ? አያዉ ጎፐ፥ ታን ሻፈቱዋ አባዉ ዛዋ፥ መꬍናዉ አ ፕንና ድርሳ ኦꬃድ። ቤታቱ ፑሻከቶፐካ ጾናናዉ ዳንዳይክኖ። ኡንቱንቱ ጉሞፐካ ፕናናዉ ዳንዳይክኖ። ኢዮባ 38:8-11 23 ሽን ሀ አሳቶ ሙመነ ማካላ ዎዛናይ ደኤ። ኡንቱንቱ እት ባጋ ስሚደ፥ ዎራ ቤድኖ። 24 ኡንቱንቱ ባረንቱ ዎዛናን፥ “ኑዉ አድልያ እራነ አሱራ እራና ዎድያን ዎድያን እምያ፥ ኑና ኑ ካꬃ ዳቡርስሰናን ሺሽስያ መꬍና ጎዳዉ፥ ኑ ጾሳዉ፥ አነ ያዬቶ” ግበይክኖ። 25 ህንተ ኢታ ኦሱ ሀዋንታ ተኤዳ። ህንተ ናጋራይ ህንተና ሎኦባፐ አሼዳ’ ያጋ” ያጌ።

26 ጾሳይ ሀዋዳን ያጌ፤ “ታ አሳ ግዶን ኢታ አሳቱ ደኢኖ። ካፎቱዋ ኦይቃናዉ ናግያ አሳቱዋዳን ዙጊደ ናጊኖ። ኡንቱንቱ ግትያ የጊኖ፤ አሳቱዋ ኦይቂኖ። 27 ኮꬃን ካፉ ኩሜዳዋዳን፥ ኡንቱንቱ ጎልያን ጭሙ ኩሜዳ። ሄዋ ድራዉ፥ ኡንቱንቱ ዎልቃማነ ዱረ ግዴድኖ። 28 ኡንቱንቱ ኦርደነ ሞꬎ ግዲደ ድጬድኖ። ኡንቱንቱ ኢታ ኦሶ ዛዋይ ባዋ። ኡንቱንቱ አዉ ባይና ናናቱዋ ሻትንꬃናዉ ኡንቱንቱ ድራዉ ሞተትክኖ፤ ህዬሳቱዋ ማታካ ናግበይክኖ። 29 ያትና፥ ታን መꬍና ጎዳይ ኡንቱንታ ሄዋ ድራዉ፥ ሙራናዉ በስክታ? ሀዋ ማላ ካዉተꬃ ቦላ ታ ሀሉዋ ከሳናዉ በስክታ?” ያጌ።

30 ቃይካ ጾሳይ ሀዋዳን ያጌ፤ “ዳሮ ኢታባይነ ዳጋንꬅያባይ ቢታ ቦላን ሀኔዳ። 31 ትምቢትያ ኦድያዋንቱ ዎርዱዋ ኦዲኖ፤ ቄሳቱ ካ ኡንቱንቱ ዞርያን አይሲኖ። ታ አሳይካ ሄዋ ማላባ ዶሴ! ሽን ዉርሰꬃን ዋኒቴ?” ያጌ።