1 መꬍና ጎዳይ ሀዋዳን ያጌ፤ “ሄ ዎድያን ይሁዳ ካተቱዋ መቀꬃይ፥ ካፖቱዋ መቀꬃይ፥ ቄሳቱ ዋ መቀꬃይ፥ ትምቢትያ ኦድያዋንቱ መቀꬃይነ የሩሳላመን ደእያ አሳቱዋ መቀꬃይ ኡባይ ዱፉዋፐ ማጸቲደ ከሳና። 2 ኡንቱንቱ ሲቄዳ፥ ኪተቴዳ፥ ካሌዳ፥ ዞርያ ኦቼዳነ ጎይኔዳ አዋዉ፥ አግናዉነ ሳሉዋ ጾልንትያ ኡባዉ ምጨታና። ኡንቱንቱ መቀꬃይ ሺቀና ዎይ ሞገተና፤ ሽን ቢታ ቦላን ፕቱዋ ማላ ግዳናዋ። 3 ላሌዳ ሳአቱዋን ደእያ፥ ሀ ኢታ ካዉተꬃፐ አቴዳ አሳቱ ኡባይ ደኡዋፐ ሀይቁዋ ዶራና። ታን ኡባፐ ዎልቃማ መꬍና ጎዳይ ሀዋ ኦዳይ” ያጌ።

4 መꬍና ጎዳይ ታና ሀዋዳን ያጌዳ፤ “አሳቶ ያጋ፤ ጾሳይ ሀዋዳን ያጌ፤ እት አሳይ ኩንዶፐ፥ ስሚደ ደንደኔየ? ዎይ እት አሳይ ዎራ ቦፐ፥ ጉየ ስመኔየ? 5 ያትና፥ ሀ አሳይ አያዉ ዎራ ቤዴ? የሩሳላመ አያዉ ኡባ ገደ ዎራ ቤዴ? ኡንቱንቱ ጭሙዋ ባቂ ኦይቄድኖ፤ ሃ ስመናን እጼድኖ። 6 ታን ምንሳደ ሀይዛድ፤ ሽን ኡንቱንቱ ቱሙዋ ሃሳይክኖ። ታ አያ ኦꬃድታሻ? ጊደ ባረ ኢታ ኦሱዋ ፓጽያዌ እቱነ ባዋ። ኡባይካ ኦላዉ ፕሪጽያ ፓራዳን ባረዉ ባረዉ ዎጼ። 7 ሀራይ አቶ፥ ሽማላ ግያ ካፎቱ ባረንቱ ዎድያ ኤሪኖ፤ ሀራጰቱ፥ ዳግጨቱነ ዋልያ ግያ ካፎቱ ባረንቱ ስምያ ዎድያ ናጊኖ፤ ሽን ታ አሳይ መꬍና ጎዳ ዎጋ ኤረና።

8 “ያትና፥ ዋኒደ፥ ‘ኑን አꬌዳ ኤራንቻ፤ አያዉ ጎፐ፥ መꬍና ጎዳ ህጊ ኑናና ደኤ’ ጋናዉ ዳንዳየቲ? ዎርዳንቻ ጻፈቱ ባረንቱ ቢርያን ታ ህግያ ዎርዱዋ ከሴዳዋ በእክቴየ? 9 አꬌዳ ኤራንቻቱ ዬላታና፤ ኡንቱንቱ ካዉሻናነ ኦይቀታና። ኡንቱንቱ መꬍና ጎዳ ቃላ ኦል አግና፥ ኡንቱንቶ አይ ጭንጫተꬃይ ደኢ? 10 ሄዋ ድራዉ፥ ታን ኡንቱንቱ ማቼቱዋ ሀራቶ፥ ኡንቱንቱ ጋድያካ ኡንቱንታ ጾኔዳዋንቶ እማና። አያዉ ጎፐ፥ ጉꬃይካ ዳሩካ ኡባይ ዎꬍያ ማናዉ ይርገቲኖ። ትምቢትያ ኦድያዋንቱካ ቄሳቱ ካ ኡባይ አሳ ጭሚኖ። ኤር. 6:12-15 11 ኡንቱንቱ ታ አሳ ማዱꬃ ሳከናባ ጊደ፥ ጉꬃ ꬋልያ ዎꬂኖ። ሳሩ ባይናን፥ ‘ሳሮ፥ ሳራ!’ ያጊኖ። ህዝ. 13:10 12 ሀ ሸነይያ ኦሱዋ ኦꬂደ፥ ኡንቱንቱ ዬላቴድኖ? ቱይት፥ ኡንቱንቱ ሙለካ ዬላትበይክኖ። ኡንቱንቱ ዬላይ አየንቶካ ኤርክኖ። ሄዋ ድራዉ፥ ኡንቱንቱካ ኩንዴዳዋንቱ ግዶን ኩንዳና፤ ኡንቱንቱ ቃጻየትያ ዎደ ካዉሻና። መꬍና ጎዳይ ሀዋ ኦዳድ” ያጌ ያጋ ያጌዳ።

13 መꬍና ጎዳይ ሀዋዳን ያጌ፤ “ታን ኡንቱንቱ ቱሙዋፐ ዳፋ አካና። ኡንቱንቱ ዎይንያ ቱራን አይፊ ꬋያና፤ ባላስያ ግያ ምꬃንካ አይፊ ꬋያና። አዉ ቦንጪካ ሹላና፤ ታን ኡንቱንቶ እሜዳባይ ኡንቱንቱፐ አከት ክቻና” ያጌ።

14 አሳቱ ሀዋዳን ያጊኖ፤ “ኑን ጮኡ ጊደ አያዉ ኡቲኖ? አነ እትፐ ሺቅተ፤ ህን ግምበቴዳ ካታማቱዋ ገሊደ፥ ያን ሀይቄቶ። መꬍና ጎዳይ ኑ ጾሳይ ኑና ሀይቆ ፕርድ ድጌዳ፤ ኑን አ ቦላ ናጋራ ኦꬄዳ ድራዉ፥ ኑዉ ኡሻናዉ ዎꬍያ ሃꬃ እም ድጌዳ። 15 ‘ሳአይ ሳሮ ግዳና’ ጊደ ናሸቻን ናጌዶ፤ ሽን ሎኦባይ ይቤና። ‘ኑን ፓጻና’ ጊደ ናጌዶ፤ ሽን ዳጋማ ግዴዳ። 16 ኑ ሞርከቱ ፓራ ዳረꬃይ ዳና ግያ ካታማን ስሰቴ፤ ኡንቱንቱ ዎታራ ፓራቱዋ ጫገꬃን ቢታይ ኡባይ ቃጼ። ቢታነ ቢታን ደእያዋ ኡባ፥ ካታማነ ካታማን አሳ ኡባ ም ꬋይሳናዉ ዬድኖ” ያጊኖ።

17 መꬍና ጎዳይ ሀዋዳን ያጌ፤ “በእተ፥ ታን ሾሻቱዋ ህንተ ግዶ የዳና። ሙሩንያዋንቱ ሙሩኑ ተአናዉ ዳንዳየና ሀሶቱዋ ህንተ ግዶ የዳና፤ ኡንቱንቱ ህንተና ዱካና” ያጌ።

18 ፓጻናዉ ዳንዳየና ኬሻ ታን ካዮታድ፤ ታ ዎዛናይካ ታ ግዶን ሴሬ። 19 ታ አሳይ ሃኮ ቢታን ዋስያ ዋሱዋ ስስተ። ኡንቱንቱ፥ “መꬍና ጎዳይ ጽዮነን ባዌ? ሀ ጽዮነ ካቲ ላኤንꬆ ያን ደኤኔ?” ያጊደ ዋሲኖ።

ጾሳይ ኡንቱንቱ ካቲ፥ “ኡንቱንቱ ባረንቱ ማሴዳ ምስለቱዋን፥ ባረንቱ ፓና አላጋ ኤቃቱዋን ዎን ታና አያዉ ይሎዬድኖ?” ያጌ።

20 አሳይ፥ “ሄኮ ጫካ ዎዲነ አꬌዳ፤ ቦኒነ ዉሬዳ፤ ኑንነ አትቦኮ” ያጊደ ዋሲኖ።

21 ስም ታ አሳይ ማዱንጼዳ ድራዉ፥ ታ ዎዛናይካ ማዱንጼዳ። ታን ካዮታይ፤ ያሻይ ታና ኦይቄዳ። 22 ጋላኣደን ትግያ ꬋሊ ባዌየ? ያን አክሚ ደኤኔ? ያትና፥ ታ አሳ መኡ አያዉ ፓጸኔ?