1 ታ ሁጲ ሃꬃ ኦላ ግዴረኔሻ! ታ አይፈቱካ አፎꬃ ፑልቶ ግዴርክኖሻ! ያትንቶ ታን ታ አሳቱዋፐ ሞርከቱ ኩሽያን ሀይቄዳዋንቶ ቃማነ ጋላስ ዬካና ሽን! 2 ታ አሳፐ ሻከታደ ባና ማላ፥ ታዉ ባዙዋን ሲራይ አቅያ ሳአይ ደኤረኔሻ! አያዉ ጎፐ፥ ኡንቱንቱ ኡባይ ሻርሙጻ፤ ኡንቱንቱ ማካልያ አሳ ዛታ።

3 መꬍና ጎዳይ ሀዋዳን ያጌ፤ “ታ አሳቱ ባረንቱ እንጻርሳን ኦዳናዉ ኡባ ዎደ ጊግ ኡቴድኖ፤ ኡንቱንቱ ቢታን ቱሙዋ ድራዉ ዎርዱ ምኔዳ። ኡንቱንቱ ኢታፐ ኢታዉ አꬊኖ፤ ታና ኤርክኖ” ያጌ።

4 ቃይካ ጾሳይ ሀዋዳን ያጌ፤ “ሾሩ ሾሩዋፐ ናገትተ፤ ህንተ እሻቱዋካ አማነቶፕተ። አያዉ ጎፐ፥ እሻይ ኡባይ ጭምያዋነ ሾሮ ኡባይ ዝግርያዋ። 5 ሾሩ ሾሩዋ ጭሜ፤ እቱነ ቱሙዋ ሃሳየና። ኡንቱንቱ ባረንቱ እንጻርሳ ሃሳያናዉ ታማርስ ዎꬄድኖ። ኡንቱንቱ ናጋራ ኦꬂደ ዳቡሪኖ። 6 ኔን ጭሙዋ ግዶን ደኣሳ። ኡንቱንቱ ባረንቱ ጭሙዋን ታና ኤረናን እጼድኖ” ያጌ መꬍና ጎዳይ።

7 ሄዋ ድራዉ፥ ኡባፐ ዎልቃማ መꬍና ጎዳይ ሀዋዳን ያጌ፤ “ታን ኡንቱንታ ሴርሳደ ፓጫና። ታ አሳ ድራዉ፥ ስም ታን ሀራባ አያ ኦꬃናዉ ዳንዳያይታ? 8 ኡንቱንቱ እንጻርሳይ ዎꬍያ ዎንዳፍያ ማላ፤ ኡንቱንቱ አን ጭሙዋ ሃሳዪኖ። ባረንቱ ዶናን እቱ እቶ ሳሮ ቃላን ሃሳዪኖ፤ ሽን ባረንቱ ዎዛናን ጲርያ ዎꬂኖ። 9 ያትና፥ ታን ሀ የዎ ኡንቱንታ ሙራናዉ በስክታ? ታን ታ ሁጲያዉ ሀዋ ማላ ካዉተꬃ ቦላ ሀሉዋ ከስክታ?” ያጌ መꬍና ጎዳይ። 10 ታን ꬎቃ ደረቶ ዬካናነ ዋሳና፤ ባዞ ሄንꬃ ጋደቱዋ ዝላላና። አያዉ ጎፐ፥ ኡንቱንቱ ባሼድኖ፤ ያና እት አሳይነ አና። መህያ ጻጉነ ስሰተና፤ ሳሉዋ ካፎቱነ ዶአቱ ባቃቲደ ብ ክቼድኖ።

11 ጾሳይ ሀዋዳን ያጌ፤ “የሩሳላመ ካታማ ታን ኮለቴዳ ኬላነ ዎራካናቱ ጌሱ ኦና ኦꬃና። ይሁዳ ካታማቱዋካ ኦንነ ደኤና መላ ሳኣ ኦꬃና” ያጌ።

12 ሀዋ አኬካናዉ አꬌዳ ኤራንቻይ ኦኔ? እ ሀራ አሳዉ ኦዳና ማላ፥ መꬍና ጎዳይ ባረ እንጻርሳን ኦስ ኦዴዴ? እት አሳይነ አ ግዱዋና አና ማላ፥ ቢታይ ባዪደ፥ ባዙዋዳን ኦኔዳዌ አያሴ?

13 መꬍና ጎዳይ ያጌዳ፤ “ሀዌ ሀኔዳዌ፥ ኡንቱንቶ ታን እሜዳ ህግያ ኡንቱንቱ አጌዳ ድራሳ። ኡንቱንቱ ታዉ አዛዘተናንነ ሀ ህግያ ካለናን እጼዳ ድራሳ። 14 ሄዋ አጊደ፥ ኡንቱንቱ ባረንቱ ዎዛና ሙመተꬃ ካሌድኖ፤ ኡንቱንቱ ባረንቱ አዎቱዋ ታማርሴዳዋዳንካ ባኣላ ግያ ኤቃቶ ጎይኔድኖ” ያጌዳ።

15 ሄዋ ድራዉ፥ ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “በእተ፥ ታን ሀ አሳ ጫምያ ቁማ ሚዛናነ ዎꬍያ ሃꬃ ኡሻና። 16 ኡንቱንቱ ዎይ ኡንቱንቱ አዎቱ ኤረና ካዉተꬃቱዋ ግዶን ታን ኡንቱንታ ላላና። ታን ኡንቱንታ ꬋይሳና ጋካናዉ፥ ማሻን የደርሳና” ያጌ።

17 ቃይካ ኡባፐ ዎልቃማ መꬍና ጎዳይ ሀዋዳን ያጌ፤ “አነ ቆፕተ። ዬኩዋ ዬክያ ማጫ አሳቱዋ ጼሲደ አይስተ፤ ዝላሳ ዝላልያ ኤራንቻ ማጫ አሳቶ ኪትተ። 18 ኡንቱንቱ ኤለካ ዪደ፥ ኑ አይፊ አፎꬃ ጽሉዋ ጾካና ጋካናስነ ኑ አይፍያ ጭሩ ሃꬃ ፑልታና ጋካናዉ ኑ ቦላ ዝላልኖ። 19 ጽዮነን ሀዋዳን ግያ ዝላሳ ኮሻይ ስሰቴ፤ ‘አዬሮ! ኑን ባዬዶ! ኑን ሙለካ ካዉሼዶ! ኑ ጎሊ ኮለት ክቼዳ ድራዉ፥ ኑን ቢታ አጊደ ባናዉ ኮሼ’ ያጊኖ” ያጌ።

20 ህንተኖ፥ ማጫ አሳቶ፥ መꬍና ጎዳ ቃላ ስስተ! ህንተ ሀይꬃይ አ ዶናፐ ከስያ ቃላ ሀይዞ። ህንተ ማጫ ናናቱዋ ዝላሳ ታማርስተ፤ ሾራታ ሾራቶ ኮይሱዋ ታማርሱ። 21 አያዉ ጎፐ፥ ሀይቁ ናናቱዋ ኦግያን፥ ዎዳላቱዋካ ጉታራን ቄጺደ ዪደ፥ ኑ ማስኮተቱዋ ጋኬዳ፤ ኑ ካተ ጎለቱዋንካ ገሌዳ።

22 መꬍና ጎዳይ ታና ሀዋዳን ያጊደ አዛዜዳ፤ “ጾሳይ ሀዋዳን ያጌ፤ ‘አሳ አሃይ ፕቱዋዳን ደምባን ላለታና፤ ኡንቱንቱ ጫክያዋንቱ ጫኪደ ኦሌዳ ካꬃ ማላ፤ ኡንቱንታ ኦንነ ሺሸና’ ያጋ” ያጊደ አዛዜዳ።

23 መꬍና ጎዳይ ሀዋዳን ያጌ፤ “አꬌዳ ኤራንቻይ ባረ ኤራን ጬቆፖ፤ ዎልቃማይ ባረ ዎልቃን ጬቆፖ፤ ዎይ ዱሪ ባረ ዱረተꬃን ጬቆፖ። 24 ሽን ጬቂያ ኡራይ ኦንነ ታና ኤርያዋንነ አኬክያዋን ጬቆ። 1 ቆሮ. 1:31፤ 2 ቆሮ. 10:17 አገና ሲቁዋ፥ ሱረ ፕርዳነ ጽሎተꬃ ሳኣ ቦላን ኦꬅያ መꬍና ጎዳ፥ ታና ኤርያዋን ጬቆ። አያዉ ጎፐ፥ ታን ሀዋንቱን ናሸታይ። ታን መꬍና ጎዳይ ሀዋ ኦዳድ” ያጌ።

25 ቃይካ መꬍና ጎዳይ ሀዋዳን ያጌ፤ “በእተ፥ ባረንቱ አሹዋ ጻላላ ቃጻረቴዳ አሳቱዋ ታን ሙራና ጋላሳቱ ዪኖ። 26 ሄዋንቱካ ግብጼ፥ ይሁዳ፥ ኤዶማ፥ አሞናነ ሞኣባ ቢታ አሳቱዋነ ባረንቱ ሁጲያ ሹፌርያ ሜዲደ፥ ባዙዋን ደእያ አሳቱዋ ኡባቱዋ። አያዉ ጎፐ፥ ሀ ካዉተꬃቱዋ ኡባ አሳይ ቱሙዋፐ ቃጻረትቤና፤ እስራኤልያ አሳይ ኡባይካ ባረ ዎዛናን ቃጻረትቤና” ያጌ።