1 ህንተኖ፥ እስራኤልያ አሳቶ፥ መꬍና ጎዳይ ህንተዉ ኦድያ ቃላ ስስተ! 2 መꬍና ጎዳይ ሀዋዳን ያጌ፤ “ደረቱዋ ኦግያ ህንተ ታማሮፕተ። ደረቱ ሳሉዋ ቦላ ማላታ በኢደ ዳጋሞፐካ፥ ህንተ ዳጋሞፕተ። 3 አያዉ ጎፐ፥ ደረቱዋ ዎጋይ መላ። ኡንቱንቱ ምꬃ ዎራፐ ቃንጺኖ፤ ማስያዌ ካልታን ማሴ። 4 ኡንቱንቱ ብራንነ ዎርቃን አሌቂሲኖ፤ ቃጸናዳን ማዶሻን ምስማርያ ꬍሺደ ኦይꬂኖ። 5 ኡንቱንቱ ኤቃቱ ኡንቱንቱ ሌክያ ጋርሳን ካፉዋ ዳጋንꬃናዉ ኤስያ ምስልያ ማላ። ሃሳያናዉ ዳንዳይክኖ። ሀመታናዉ ዳንዳየና ድራዉ፥ አሳይ ኡንቱንታ ቶኬ። ኡንቱንቶ ሙለካ ያዮፕተ። አያዉ ጎፐ፥ ኡንቱንቱ ህንተና ቆሀናዉ ዳንዳይክኖ፤ ቃይ ማዳናዉካ ዳንዳይክኖ” ያጌ።

6 አቤት መꬍና ጎዳዉ፥ ነ ማላይ ኦንነ ባዋ። ኔን ዎልቃማ፤ ነ ሱንꬃይካ ዎልቃማነ ዎልቃማ። 7 አቤት ካዉተꬃቱዋ ካትያዉ፥ ኔና ቦንቼናን አጋናዌ ኦኔ?ሳፃ 15:4 ኔና ቦንቻናዉ በሴ፤ አያዉ ጎፐ፥ አꬌዳ ኤራንቻ አሳ ግዶንነ ኡንቱንቱ ካዉተꬃ ኡባ ግዶን ነ ማል ባዋ። 8 ኡንቱንቱ ኤያነ ዶንጭሎዋንታ፤ ኡንቱንቱ ምꬃፐ ማሴዳ፥ ፓና ኤቃቱዋፐ አያ ታማሪኖ? 9 ሄ ኤቃቱ ታርሴሳፐ ዬዳ ብራንነ ኡፋዘፐ ዬዳ ዎርቃን አሌቀቴድኖ። ኡንቱንቱ ዎይንያ ኤሳነ ሳሉዋ ማላትያ መꬉዋና ማዩዋን ካመቴድኖ። ኡንቱንቱ ኡባይ ኩሽያ ኦሱዋ ሂላቱዋን ኦሰቴድኖ። 10 ሽን መꬍና ጎዳይ ቱሙ ጾሳ፤ እ ደኡዋ ጾሳነ መꬍና ካትያ። አ ሀንቁዋን ቢታይ ቃጼ፤ ካዉተꬃቱካ አ ሀንቁዋ ዳንዳይክኖ።

11 ጾሳይ ሀዋዳን ያጌ፤ “ኡንቱንቶ ሀዋዳን ያጋደ ኦዳ፤ ‘ሄዋንቱ ሳሉዋነ ሳኣ መꬍቤና ጾሳቱ ሳኣፐነ ሳሉዋ ጋርሳፐ ꬋያና’ ያጋ” ያጌ።

17 ህንተኖ፥ ሞርኪ ዶዴዳዋንቶ፥ ቢታፐ ከሳናዉ ህንተዉ ደእያዋ ቆሪደ ሺሽተ። 18 አያዉ ጎፐ፥ መꬍና ጎዳይ ሀዋዳን ያጌ፤ “ታን ሀ ዎድያን ሀ ቢታን ደእያ አሳቱዋ ከሳደ ያምባራና። ህንተ ኦሞደታና ማላ፥ ታን ህንተ ቦላ ኢታባ አሀና” ያጌ።

19 አየ ታ ማዱꬃዉ! ታ ማዱꬃይ ፓጸናዋ። ሽን ታን፥ “ሀዌ ታ ሀርግያ፤ ታን ዳንዳያናዉ በሴ” ያጋድ።

20 ታ ዱንካኒ ኮለት ꬋዬዳ፤ አ ዎዶሩ ኡባይ ዱጸረቴዳ። ታ ናናቱ ኡባይ ታፐ ሻከቲደ ብ ክቼድኖ፤ ኡንቱንቱ ባዋ። ታ ዱንካንያ ዛሪደ ቶላናዉ ዎይ ታ ጋርዱዋ ካቃናዉ ሀእ እት አሳይነ አትቤና።

21 ሄንꬃንቻቱ ዳሜድኖ፤ ኡንቱንቱ መꬍና ጎዳ ኦችበይክኖ። ሄዋ ድራዉ፥ ኡንቱንቶ እንጀተናን እጼዳነ ኡንቱንቱ ዉዲ ኡባይ ላለቴዳ። 22 ስስተ! ኦራꬃ ኦዱ ዬዳ፤ ሄዌነ፥ “ሁጲሳ ባጋና ደእያ ካዉተꬃን ዎልቃማ ድርባይ ደንዴ” ያግያዋ። አ ኦላንቻቱ ዪደ፥ ይሁዳ ካታማቱዋ ባዙዋነ ዎራካናቱ ጌሶይያሳ ከሳና።

23 አቤት መꬍና ጎዳዉ፥ አሳ ደኡ ሄ አዎ ቡዞ ግደናዋነ ባረ ሄመታ ሱርሳናዌ አዉ ሸነ ግደናዋ ታን ኤራይ። 24 አቤት መꬍና ጎዳዉ፥ ታና ሴራ፤ ሽን ልክያን ግዶ። ነ ሀንቁዋን ግዶፖ፤ ሄዌ ꬋዮፐ ኔን ታና ጉꬃደ ꬋይሳና። 25 ነ ሀንቁዋ ኔና ኤረና ካዉተꬃቱዋ ቦላነ ነ ሱንꬃ ጼሰና አሳቱዋ ቦላ ትጋ። አያዉ ጎፐ፥ ኡንቱንቱ ያቆባ አሳ ሜድኖ፤ ኡንቱንቱ ኡንቱንታ አሸናን ም ድጌድኖነ ኡንቱንቱ አዉዋ ቢታ ꬋይሴድኖ።