1 አቤት መꬍና ጎዳዉ፥ ታን ኔናና ሞተትያ ዎደ፥ ኡባባንካ ኔን ጽሉዋ። ግዶፐነ፥ ታን ጽሎ ፕርዳባ ኔናና ሃሳያናዉ ኮሼ። ኢታ አሳቱ ኦꬅያዌ ኡንቱንቶ አያዉ እንጀቲ? አማነተናዋንቱ አያዉ እሻሊደ ደእኖ? 2 ኔን ኡንቱንታ ቶክና፤ ጻጱዋ የዴድኖ፤ ድጪደ አይፍያ አይፌድኖ። ኡንቱንቱ ኔና ዶናፐ የግክኖ፤ ሽን ኡንቱንቱ ዎዛናፐ ኔን ሃኩዋን ደኣሳ። 3 ሽን አቤት መꬍና ጎዳዉ፥ ኔን ታና ኤራሳ። ታና በኣሳ፤ ታን ነዉ አያ ቆፕንቶ ፓጫሳ። ሹክያ ዶርሳቱዋዳን፥ ኔን ሄ ኢታ አሳቱዋ ጎቻደ ከሳ! ሹካ ጋላሳዉ ኡንቱንታ ዱማያደ ዎꬃ! 4 ቢታይ መላናዌነ ደምባ ኡባን ዶሌዳ ማታይ ሹላናዌ አዉደ ጋካናሴ? ቢታን ደእያ አሳ ኢታተꬃ ድራዉ፥ ዶአይነ ካፉ ዉሬዳ። ሄዋ ቦላካ አሳቱ፥ “ጾሳይ ኑን ኦꬅያዋ ደመና” ያጊኖ።

5 ጾሳይ ኤርማሳዉ ሀዋዳን ጊደ ዛሬዳ፤ “ኔን ገድያን ዎጽያ አሳቱዋና ዎꬃ ናሰታደ ዳቡሮፐ፥ ፓራና ዋና ናሰታይ? ኔን ሳሮ ቢታን ꬉበቶፐ፥ ዮርዳኖሳ ዎራ ጋርሳን ዋና ሀመታይ? 6 ነ እሻቱ፥ ህንተ ሶ አሳቱ ኔና አꬂደ እሜድኖ፤ ኡንቱንቱ ነ ቦላ ደንዴድኖ። ሄዋ ድራዉ፥ ኡንቱንቱ ነዉ ሎኦባ ሃሳዮፐነ፥ ኡንቱንቱን አማነቶፓ።

7 “ታን እስራኤልያ አጋድ፤ ታን ታ ዶረቴዳ ካዉተꬃ ኦላድ። ታን ታ ሲቅያ አሳ አ ሞርከቱ ኩሽያን አꬃደ እማድ። 8 ታ ዶረቴዳ አሳይ ታዉ ባዙዋን ጋሙዋ ማላ ግዴዳ። እ ታ ቦላ ጉዴዳ፤ ሄዋ ድራዉ፥ ታን አ እጻድ። 9 ታ ዶረቴዳ አሳይ ታዉ ሀራ ጋጨቱ ዶዲደ ዱክያ ሻቻ ጋጫት ማላ ግዴዴ? ቢተ፤ ዶአቱዋ ኡባ ሺሽተ፤ አ ማና ማላ አህተ።

10 “ዳሮ አላጋ ካተቱ ታ ዎይንያ ቱራ ሳኣ ባይዜድኖ፤ ታ ጋድያ የꬌድኖ፤ ታ ሎኦ ቢታ ባዞ ኦꬄድኖ። 11 ሄ ቢታይ ባዪደ ኦጼዳ፤ ታ ስንꬃን መላነ አይነ ባይናዋ ግዴዳ። ቃረትያዌ ባይና ድራዉ፥ ሙለ ቢታይካ ባዬዳ። 12 ባዙዋን አያይነ ባይና ꬎቃ ደረቱዋ ኡባ አꬊደ፥ ቦንቂያዋንቱ ዬድኖ፤ አያዉ ጎፐ፥ መꬍና ጎዳ ማሻይ ቢታ ሀ ጋጻፐ ህን ጋጻ ጋካናዉ ሜዳ። ሄዋ ድራዉ፥ ኦንነ ሳሮ አታናዉ ዳንዳየና። 13 ኡንቱንቱ ዛርጋ ዘሪደ፥ አጉንꬃ ጫኬድኖ። ኡንቱንቱ ዳሮ ዳቡሬድኖ፤ ሽን አይነ ዎꬍስበይክኖ። መꬍና ጎዳ ሀንቁዋ ቦሻነ ጋሱዋን ኡንቱንቱ ካꬃይ ꬋዬዳ” ያጌዳ።

14 መꬍና ጎዳይ ሀዋዳን ያጌ፤ “ታን ታ አሳቶ እስራኤላቶ እሜዳ ቢታ ኦይቄዳ፥ ታ ኢታ ሾሮ ካዉተꬃቱዋ ግዶፐ፥ ታን ኡንቱንታ ኡንቱንቱ ቢታፐ ꬎቆላና። ቃይ ይሁዳ አሳቱዋካ ኡንቱንቱ ግዶፐ አሻና። 15 ሽን ኡንቱንቱ ቢታፐ ꬎቆሌዳዋፐ ጉይያን፥ ዛረꬃደ ታን ኡንቱንቶ ቃረታና፤ ታን ኡንቱንቱ ሁጲያን ሁጲያን ኡንቱንቱ ላታ ጋድያ፥ ኡንቱንቱ ካዉተꬃ ቢታ ዛራደ አሀና። 16 ካሰ ታ አሳ ባኣላ ሱንꬃን ጫቃናዳን ታማርሴዳዋዳን፥ ኡንቱንቱ ታ አሳ ኦግያ ሎይꬅ ታማሮፐነ ታ ሱንꬃን፥ ‘መꬍና ጎዳይ ኤሮ!’ ያጊደ ጫቆፐ፥ ኡንቱንቱ ታ አሳ ግዶን ምኒደ ደአና። 17 ሽን አይ ካዉተꬃይነ አዛዘተናን እጾፐ፥ ታን አ ኡባና ꬎቆላደ ꬋይሳና። ታን መꬍና ጎዳይ ሀዋ ኦዳድ” ያጌ።