1 መꬍና ጎዳይ ታና፥ “ባ፤ ባደ ላይኑዋ ግያ ቃጭናፐ ዳደቴዳ ዳንጩዋ ሻማደ፥ ነ ጼሳን ዳንጫ፤ ሽን ሃꬃን ቦሽሶፓ” ያጌዳ። 2 ሄዋ ድራዉ፥ ታን መꬍና ጎዳይ አዛዜዳዋዳን ዳንጩዋ ሻማደ፥ ታ ጼሳን ዳንጫድ።

3 መꬍና ጎዳ ቃላይ ላኤንꬆ ታኮ ዬዳ፤ ዪደ፥ 4 “ኔን ሻሜዳ ዳንጩዋ፥ ነ ጼሳን ኔን ዳንጬዳዋ አካደ፥ ኤፍራጺሳ ሻፋ አፋ። ሹቻ ጎንጎሉዋን ቆሳ” ያጌዳ። 5 ታን መꬍና ጎዳይ ታዉ ኦዴዳዋዳን አፋደ፥ ኤፍራጺሳ ሻፋ ማታን ቆሳድ።

6 ዳሮ ጋላሳፐ ጉይያን መꬍና ጎዳይ፥ “ደንዳ፤ ኤፍራጺሳ ሻፋ ባደ፥ ታን ኔና፥ ‘ያን ቆሳ’ ጌዳ ዳንጩዋ አካ” ያጌዳ። 7 ታን ኤፍራጺሳ ሻፋ ባደ፥ ቦካደ፥ ዳንጩዋ ታ ቆሴዳሳፐ ከሳደ አካድ። ሽን ሄ ዳንጩ ሀእ ባዪደ፥ ኡባና አይነ ጎኤናባ ግዴዳ።

8 ሄዋፐ ጉይያን፥ መꬍና ጎዳ ቃላይ ታኮ ዬዳ፤ 9 “መꬍና ጎዳይ ሀዋዳን ያጌ፤ ‘ታን ሄዋዳን ይሁዳ አሳ አዩዋነ የሩሳላመ ዎልቃማ ኦቶሩዋ ጊሻና። 10 ታ ቃላ ስሰናን እጺደ፥ ባረንቱ ዎዛና ሙመተꬃ ካሊደ፥ ሀራ ጾሳቶ ኦꬃናዉነ ጎይናናዉ ብያ ሀ ኢታ አሳቱ፥ ሀ ዳንጩዋዳን ሙለካ ጎኤናባ ግዳናዋ። 11 ዳንጩ አሳ ጼሳ ባቂ ኦይቂያዋዳን፥ ይሁዳ አሳይ ኡባይነ እስራኤልያ አሳይ ኡባይ ታ አሳ ግዳና ማላነ ታ ሱንꬃዉ ጋላታነ ቦንቾ ግዳና ማላ፥ ኡንቱንቱ ታና ባቂ ኦይቃናዳን ኦꬃድ። ሽን ኡንቱንቱ ስሰናን እጼድኖ’ ያጌ መꬍና ጎዳይ” ያጌዳ።

12 ቃይካ እ፥ “ኤርማሳ፥ አሳዉ ሀዋዳን ያጋ፤ መꬍና ጎዳይ እስራኤልያ ጾሳይ፥ ‘እት እት ጹጋን ዎይንያ ኤሳይ ኩማና’ ያጌዳ ያጋ። ኡንቱንቱ ኔና፥ ‘ዎን ኑን እት እት ጹጋን ዎይንያ ኤሳይ ኩማናዋ ኤሮኮየ?’ ያጎፐ፥ 13 ኔን ኡንቱንቶ ያጋደ ኦዳ፥ መꬍና ጎዳይ ያጌ፤ ‘ታን ሀ ቢታን ደእያ አሳ ኡባ፥ ሀራይ አቶ ዳዊታ ካተቱዋ አራታን ኡትያ ካተቱዋ፥ ቄሳቱ ዋ፥ ትምቢትያ ኦድያዋንታነ የሩሳላመን ደእያ አሳ ኡባ፥ ኡንቱንቱ ማꬆታና ጋካናዉ፥ ዎይንያ ኤሳን ኩንꬃና። 14 ታን ኡንቱንታ፥ አሳ አሳና፥ አዉዋ ናኣና ዶምእሳና። ታን ኡንቱንታ ꬋይሳናፐ አትና፥ ኡንቱንቶ ኬክከ፥ ቃረትከነ ማርከ’ ያጌ መꬍና ጎዳይ ያጋ” ያጌዳ።

15 ስስተነ ሀይዝተ፤ አግተ ኦቶረቶፕተ። አያዉ ጎፐ፥ ሀዋ መꬍና ጎዳይ ኦዴዳ።

16 መꬍና ጎዳይ ህንተ ጾሳይ ꬉምሳናፐ ካሰቲደ፥ ህንተ ገዲካ ꬉምያ ደርያን ꬉበታናፐ ካሰቲደ፥ አ ቦንችተ። ህንተ፥ “ፖኡ ያና” ጊደ ናጊታ፤ ሽን እ ꬍጵ ጎ ꬉማዉ ላማና።

17 ሽን ህንተ ስሰናን እጾፐ፥ ህንተ ኦቶሩዋ ድራዉ፥ ታን ጌማን ዬካይ። መꬍና ጎዳ ዉዲ ኦሞደቲደ ብ ክቼዳ ድራዉ፥ ታን ዬካይ፤ ታ አይፊካ አፎꬃ ሆልሳዬ።

18 ጾሳይ ታና፥ “ካትያዉነ ካትያ አትዉ፥ ካታትዉ ሀዋዳን ያጋደ ኦዳ፤ ‘ህንተ ቦንቾ አሌቆ ካላቻይ ህንተ ሁጲያፐ ኩንዴዳ ድራዉ፥ ህንተ ካተቱዋ አራታፐ ዱገ ዎꬍተ። 19 ኔጌባ ቢታን ደእያ ካታማቱ ኡባይ ጎርደት ክቼድኖ። ኡንቱንቱ ዶያናዉ እት አሳይካ ያን ባዋ። ይሁዳ አሳይ ኡባና በቲደ ብ ክቼዳ’ ያጋ” ያጌዳ።

20 ቃይካ ጾሳይ፥ “አነ ꬎቁ ጋደ፥ ሁጲሳ ባጋፐ ይያዋንታ ጼላ። ነዉ እመቴዳ ዉዲ፥ ኔን ጬቀቴዳ ዶርሳቱ ሀቃን ደእኖ? 21 ኔን ነዉ ላገ ግዳና ማላ፥ ኮዬዳዋንቱ ኔና ጾኒደ ሞድያ ዎደ ዋጋይ? የሉዋ ኦይꬃይ ኔና ኦይቀኔ? 22 ኔኖ የሩሳላመ፥ ነ ዎዛናን፥ ‘ሀዌ ኡባይ ታ ቦላ አያዉ ጋኬዴ?’ ጎፐ፥ ነ ማዩ ቃረቴዳዌነ አሳይ ኔና ቦንቄዳዌካ ነ ናጋራይ ዳሬዳ ድራሳ። 23 ቱሙ ቶጵያ አሳይ ባረ ቦላ ማላ፥ ዎይ ማሂ ባረ ሻቻተꬃ ላማናዉ ዳንዳዪ? ዳንዳየና! ሄዋዳንካ፥ ኢታ ኦሱዋ ኦꬅ ሜዘቴዳዋንቱ ህንተ፥ ሎኦ ኦሱዋ ኦꬃናዉ ሙለካ ዳንዳይክታ” ያጌዳ።

24 መꬍና ጎዳይ ሀዋዳን ያጌ፤ “ታን ህንተና ባዞ ጫርኩ አፍያ ሱላዳን ላላና።

25 “ህንተ ሳማይ፥ ታን ህንተዉ እምያ ግሹ ሀዋ። ህንተ ታና ዶጌዳ ድራዉነ ዎርዶ ጾሳቱዋን አማነቴዳ ድራሳ። 26 ህንተ ካሉ ቤታና ማላ፥ ታን ህንተ ቦላፐ ማዩዋ ቃራ የጋና። 27 ኔን ዎሹምያዋ፥ ኔን ዎታራ ፓራዳን፥ ዚታዉ ጫግያዋነ ነ ዬላይ ባይና ሻርሙጻተꬃ፥ ኔን ደርያንነ ደምባን ኦꬅያ ሸነይያ ኦሱዋ ታን በኣድ። የሩሳላመ፥ ነዉ አየ! ኔን አዉደ ጋካናዉ ጌየናን ደአይ?” ያጌ።