1 ኮሻባ መꬍና ጎዳይ ኤርማሳዉ ኦዴዳ ቃላይ ሀዋ፤ 2 “ይሁዳ ቢታይ ካዮቴ፤ አ ካታማቱ ላባኒኖ። አን ደእያ አሳቱ ቢታን ኡቲደ ዬኪኖ፤ የሩሳላመ አሳይ ዋሱዋ ጹልሴ። 3 ዱረ አሳቱ ሃꬃ ትካናዉ ባረንቱ ቆማቱዋ ኪቲኖ። ኡንቱንቱ ሃꬃ ኦላ ቢኖ፤ ሽን ሃꬃ ደምክኖ። ባረንቱ ኦቱዋ መላ ቶክ አኪደ ስሚኖ። ሀንያዋ ꬋይ ዬላቲደ፥ ባረንቱ ሁጲያ ጉለቲኖ። 4 እራይ ቡከና ድራዉ፥ ቢታይ መሊደ ዛኤ። ጎሻንቻቱ ዬላቲደ፥ ባረንቱ ሁጲያ ጉለቲኖ። 5 ማታይ ባይና ድራዉ፥ ዶጋታ ባረ የሌዳ ጋሎ ማራቶ ደምባን ኦላደ ባዉ። 6 ዎራ ሀረቱ አያይነ ባይና ꬎቃ ደረቱዋን ኤቂደ፥ ዎራካናቱዋዳን ያረቲኖ። ኡንቱንቶ ምያባይ ꬋይና፥ ኡንቱንቱ አይፊ ጼላናዉ ዳቡሬዳ” ያጌዳ።

7 አሳይ ሀዋዳን ያጊደ ዎሴዳ፤ “አቤት መꬍና ጎዳዉ፥ ኑ ናጋራይ ኑ ቦላን ማርካቶፐነ፥ ነ ሱንꬃ ድራዉ፥ ኑዉ እትባ ኦꬃ። ኑን ኔፐ ዳሮ ገደ ጉየ ስሜዶ፤ ነ ቦላን ናጋራ ኦꬄዶ። 8 አቤት እስራኤሊ ናግያ ናሸቻዉ፥ መቱዋ ዎድያን አ አሽያዎ፥ ኔን ቢታን እማꬃዳን፥ እት ቃማ አቃናዉ ገሌዳ ኦግያ አሳዳን አያዉ ሀናይ? 9 ኔን ዳጋሜዳ አሳዳን፥ አሻናዉ ዳንዳየና ምኖ አሳዳን አያዉ ሀናይ? አቤት መꬍና ጎዳዉ፥ ኔን ኑ ግዱዋን ደኣሳ! ኑን ነ ሱንꬃን ጼሰቴዳ፤ ኑና ኔን አጎፓ!” ያጌዳ።

10 ሀ አሳቱዋባ መꬍና ጎዳይ ሀዋዳን ያጌ፤ “ኡንቱንቱ ቶይላካትያዋ ሎይꬅ ሲቂኖ፤ ባረንቱ ገድያ ተእክኖ። ሄዋ ድራዉ፥ መꬍና ጎዳይ ኡንቱንቱን ናሸተና። እ ኡንቱንታ ኢታ ኦሱዋ ሀሳዪደ፥ ኡንቱንቱ ናጋራ ድራዉ፥ ኡንቱንታ ሙራና” ያጌ።

11 ሄዋፐ ጉይያን፥ መꬍና ጎዳይ ታና፤ “ሀ አሳቱዋ ሳሮተꬃዉ ታና ዎሶፓ። 12 ኡንቱንቱ ጾሞፐካ፥ ታን ኡንቱንቱ ዋሱዋ ስስከ። ጹግያ ያርሹዋነ ካꬃ ያርሹዋ ኡንቱንቱ ያርሾፐካ፥ ታን ኡንቱንቱ ያርሹዋ አክከ። ታን ኡንቱንቱ ኦላን፥ ኮሻንነ ኢታ ሀርግያን ꬋይሳና” ያጌዳ።

13 ታን ሀዋዳን ያጋድ፤ “አቤት ኡባ ሞድያ መꬍና ጎዳዉ፥ ትምቢትያ ኦድያዋንቱ ኡንቱንቶ፥ ‘ህንተ ኦላ በእክታ ዎይ ኮሻይ ህንተና ኦይቀና። ታን ህንተዉ ሀ ቢታን ፓጨና ሳሮተꬃ እማና’ ያጌ ያጊኖ” ያጋድ።

14 መꬍና ጎዳይ ታዉ ሀዋዳን ያጌዳ፤ “ትምቢትያ ኦድያዋንቱ ታ ሱንꬃን ዎርዱዋ ኦዲኖ። ታን ኡንቱንታ ኪታበይከ፥ ዎይ አዛዛበይከ፥ ዎይ ኡንቱንቶ ኦዳበይከ። ኡንቱንቱ ህንተዉ ትምቢትያ ጊደ ኦድያዌ ዎርዱዋ ሳጻ፥ ፓና ካዩዋነ ቆፕ አኪደ ኦድያ ዎርዶባ። 15 ሄዋ ድራዉ፥ ታ ሱንꬃን ትምቢትያ ኦድያዋንቱባ ግዶፐ፥ ታን ኡንቱንታ ኪታበይከ። ሽን ኡንቱንቱ፥ ‘ኦላይ ዎይ ኮሻይ ሀ ቢታ ቦቼና’ ያጊኖ። ሄ ትምቢትያ ኦድያዋንቱ ባረንቱ ሁጲያዉ ኦላንነ ኮሻን ꬋያና ያጌ መꬍና ጎዳይ! 16 ቃይ ኡንቱንቱ ትምቢትያ ኦድያ አሳይ ኮሻነ ኦላ ጋሱዋን ሀይቃና፤ ኡንቱንቱ አሃይ ካረን የሩሳላመ ኦግያን ኦለታና። ኡንቱንቱ ዎይ ኡንቱንቱ ማጫ አሳ፥ ኡንቱንቱ አቱማ ናናቱዋ ዎይ ኡንቱንቱ ማጫ ናናቱዋ ሞግያዌ ꬋያና። ታን ኡንቱንቶ በስያ ዋይያ ኡንቱንቱ ቦላ ትጋና” ያጌዳ።

17 ታ ካዩዋባ ታን አሳዉ ሀዋዳን ያጋደ ኦዳና ማላ፥ ጾሳይ ታና አዛዜዳ፤ “ ‘ታ አሳይ ዳሮ ደሸቲደ፥ ሎይꬅ ማዱንጼዳ ድራዉ፥ ታ አይፈቱ ቃማነ ጋላስ ሸምፐናን አፎጽኖ። 18 ታን ደምባ ቦፐ፥ ማሻን ሲፈቴዳዋንታ በአይ። ካታማ ገሎፐ፥ ቃይ ኮሻን ግልቄዳዋንታ በአይ። ትምቢትያ ኦድያዋንቱነ ቄሳቱ፥ “ኑን ፓጭ ባይናን ኦꬄቶ” ጊኖ፤ ሽን ኡንቱንቱ ባረንቱ ኦꬅያዋ ኤርክኖ’ ያጋ” ያጌዳ።

19 አቤት ጾሳዉ፥ ኔን ይሁዳ ሙለ አጋዲ? ጽዮነ አሳ እጻዲ? ኔን ኑና ፓጸናዳን ኦꬃደ አያዉ ደቻዲ? “ሳሮ ግዳናዋ” ጊደ ናጌዶ፤ ሽን አያይነ ሎኦባይ ኑዉ ጋክቤና። “ፓጻና ዎዲ ያና” ጊደ ናጌዶ፤ ሽን ዳጋማ ጻላላይ ዬዳ።

20 አቤት መꬍና ጎዳዉ፥ ኑን ኑ ኢታተꬃ ኤሬዶ፤ ኑ አዎቱዋ ባይዙዋካ አኬኬዶ፤ ኑን ቱሙዋፐ ነ ቦላ ናጋራ ኦꬄዶ። 21 ኑና ነ ሱንꬃ ድራዉ ካꬎፓ፤ ነ ቦንቾ አራታይ ደእያ የሩሳላመ ካዉሾፓ። ኔን ኑናና ጫቀቴዳ ጫቁዋ ሀሳያ፤ ነ ጫቁዋ ካንꬆፓ። 22 ዎን ካዉተꬃቱዋ ኤቃቱዋፐ እቱ እራ ቡክሳናዉ ዳንዳዪ? ሳሉ ባረ ሸንያን ፑስያ ዱገ ኪታናዉ ዳንዳዪ? ዳንዳየና! አቤት መꬍና ጎዳዉ፥ ኑ ጾሳዉ፥ ሄዋ ዳንዳይያዌ ኔና! ሀዋ ኡባ ኦꬅያዌ ኔና ግድያ ድራዉ፥ ኑን ኔናን ናሸቻ ኦꬄቶ።