1 ጾሳይ ሀዋዳን ያጌ፤ “ይሁዳ ናጋራይ ብራታ ቢርያን ጻፈቴዳ፤ ኡንቱንቱ ዎዛና ቦላነ ኡንቱንቱ ያርሽያሳን ደእያ ካጭያ ቦላ አልማዝያ ግያ ሹቻ ጼራን ቃጨቲደ ጻፈቴዳ። 2 ኡንቱንቱ ናናቱ እርጻ ምꬃ ኡባ ጋርሳን፥ ꬎቃ ዞዘቱዋ ቦላንነ ቢታን ደእያ ደረቱዋ ቦላን፥ ጊግሴዳ ያርሽያ ሳአቱዋን አሼሮ ግያ ጾሳትዉ ኤሴዳ ምስልያዉ ጎይኒኖ። 3 ህንተ ቢታ ኡባ ቦላን ኦꬄዳ ናጋራ አጮ ጭጋ ኦꬃደ፥ ህንተ ሚሻነ ህንተ አቆቱዋ ኡባ ታን ህንተ ሞርከቶ እማና። 4 ታን ህንተና ላትሴዳ ቢታፐ ህንተ ባና፤ ታን ህንተና ህንተ ኤረና ቢታን ህንተ ሞርከቶ አይለያና። አያዉ ጎፐ፥ ህንተ ታ ሀንቁዋ ኦይሰꬄድታ፤ እ መꬍናዉ ኤጻና” ያጌ።

5 መꬍና ጎዳይ ሀዋዳን ያጌ፤ “አሳን፥ ሀይቂያ አሳ ዎልቃን አማነትያዌነ ባረ ዎዛና መꬍና ጎዳፐ ዎራ ዛርያዌ ሸቀቴዳዋ። 6 ሄ አሳይ ባዙዋን ዶሌዳ ሱፓ ምꬃ ማላ። ኬካባይ ይያ ዎደ በኤና። እ ባዙዋን፥ መላ ሳኣን፥ አሳይ ደኤና ማጽነ ቢታን ደአና።

7 “መꬍና ጎዳን አማነትያ አሳይ፥ እ አማነትያዌ ጾሳ ግድያ አሳይ አንጀቴዳዋ። 8 እ ሃꬃ ማታን ቶከቲደ፥ ባረ ጻጱዋ ጎግያ ሃꬃዉ የዴዳ ምꬃ ማላ። ማዝ. 1:3 አዋ ሱሎካ እ ያየና። አያዉ ጎፐ፥ ሄ ምꬃ ሀይꬃይ እርጽ እርጻሽን ደኤ። እራይ ቡከና ላይꬃንካ ህርገና፤ አይፍያ አይፍያዋካ ቃንጸና።

9 “አሳ ዎዛናይ ኡባባፐ አꬍ ጭምያዋነ ሎይꬅ ኢታ። አ ኦን ኤራናዉ ዳንዳዪ? 10 መꬍና ጎዳይ አሳዉ ኡባዉ አ ኦግያዳንነ አ ኦሱዋዳን ዛራናዉ፥ አሳ ዎዛና ብዳይነ አ ካሃ ፓጫይ” ያጌ። ማዝ. 62:12፤ ሳፃ 2:23

11 ጽለና ኦግያና ዱረትያ አሳይ ባረዋ ግደና ቁቁልያ ቆጽያ አካት ማላ። እ ባረ ላይꬃ ብሮ ባጋዪደ፥ አ አጊደ ꬋያና፤ ዉርሰꬃን እ ቦዛ ግዳናዋ።

12 ኑ ጌሻ ጎሊ ኮይሮፐ ዶሚደ፥ ቦንቾ ካተቱዋ አራታዳን፥ ꬎቃ ደርያ ሁጲያን ቤቴ። 13 አቤት መꬍና ጎዳዉ፥ እስራኤሊ ህዶታን ናግያዎ፥ ኔና አጌዳ ኡባቱ ዬላታና። ኔና አጊደ ዎራ ብያዋንቱ፥ ኔና መꬍና ጎዳ፥ ደኡዋ ሃꬃ ፑልቱዋ አጌዳ ድራዉ፥ ኡንቱንቱ ባና ቦላ ጻፈታና።

14 አቤት መꬍና ጎዳዉ፥ ታና ፓꬃ፤ ታን ፓጻና። ታና አሻ፤ ታን አታና። አያዉ ጎፐ፥ ኔን ታን ጋላትያዋ።

15 አሳቱ ታና፥ “መꬍና ጎዳይ ኑና ናሴዳ ናሲ ሀቃን ደኢ? አነ ፖሎ!” ያጊኖ።

16 ሄንꬃንቻ ግዳደ ነዉ ኦꬅያዋ አጋበይከ፤ ኡንቱንቱ መቶታና ጋላሳ ታን አሞታበይከ። ታ ዶናፐ ከሴዳ ቃላ ኔን ኤራሳ። 17 ታና ዳጋንꬆፓ። ኔን መቱዋ ጋላስ ታዉ ባቃታ አትያ ሳኣ። 18 ታና የደርስያዋንታ ዬላያ፤ ሽን ታና ዬላዮፓ። ኡንቱንታ ዳጋንꬃ፤ ሽን ታና ዳጋንꬆፓ። ኡንቱንቱ ቦላ መቶ ጋላሳ አያ፤ ኡንቱንታ ላኡ ኩሽያ ሙሩዋ ሙራ።

19 መꬍና ጎዳይ ታና ሀዋዳን ያጌዳ፤ “ባ፥ ይሁዳ ካተቱ ካታማ ገልያነ ከስያ አሳይ ገልያ ፐንግያንነ ሀራ የሩሳላመ ፐንገቱዋ ኡባን ባደ ኤቃ። 20 ኡንቱንታ ሀዋዳን ያጋ፤ ‘ህንተኖ ይሁዳ ካተቶ፥ ህንተኖ ይሁዳ አሳቶ፥ ህንተኖ የሩሳላመ አሳቶ፥ ህንተኖ ሀ ፐንገቱዋና ገልያ አሳቶ፥ ኡባይካ መꬍና ጎዳ ቃላ ስስተ! 21 መꬍና ጎዳይ ሀዋዳን ያጌ፤ “ሳምባታ ጋላሳን ቶኩዋ ቶከና ማላነ አያነ ቶኪደ፥ የሩሳላመ ፐንግያና ገለና ማላ፥ ህንተዉ ናገትተ!ናህ. 13:15-22 22 ሳምባታ ጋላሳን ህንተ ጎልያፐ ቶኩዋ ቶኪደ ከሶፕተ፥ ዎይ አይ ኦሱዋነ ኦꬆፕተ። ካሰ ህንተ አዎቱዋ ታን አዛዜዳዋዳን፥ ሳምባታ ጋላሳ ዱማዪደ ቦንችተ። ከሳ 20:8-10፤ ዛረ. 5:12-14 23 ግዶፐነ፥ ኡንቱንቱ ስስበይክኖ፤ ባረንቱ ሀይꬃካ ታኮ የግበይክኖ። ኡንቱንቱ ስሰናንነ ታፐ ታማረናን እጼድኖ።

24 “ ‘ “ሽን ህንተ ታን መꬍና ጎዳይ ኦድያዋ ስሶፐ፥ ሳምባታ ጋላሳን አይ ቶኩዋነ ቶኪደ፥ ሀ ካታማ ፐንገቱዋና ገለናን አጎፐ፥ ሳምባታ ጋላሳ ዱማዪደ፥ አን አይ ኦሱዋነ ኦናን ቦንቾፐ፥ 25 ዳዊታ ካተቱዋ አራታን ኡትያ ካተቱ ባረንቱ ሞድያዋንቱና ፓራቱዋነ ፓራ ጋረቱዋ ቶጊደ፥ ሄ ፐንገቱዋና ገላና። ኡንቱንቱ ይሁዳ አሳናነ የሩሳላመ ካታማን ደእያ አሳና ገላና፤ ሀ ካታማይ መꬍናዉ አሳይ ደእያ ካታማ ግዳናዋ።

26 “ ‘ “አሳይ ጹግያ ያርሹዋነ ሀራ ያርሹዋ፥ ካꬃ ያርሹዋ፥ እጻናነ ጋላታ ያርሹዋ አኪደ፥ ይሁዳ ካታማቱዋፐ፥ የሩሳላመ ዩሹዋን ደእያ ሞꬃቱዋፐ፥ ቢንያማ ቢታፐ፥ ጋꬋፐ፥ ገዝያፐነ ኔጌባፐ መꬍና ጎዳ ጌሻ ጎልያ ያና።

27 “ ‘ “ሽን ህንተ ሳምባታ ጋላሳቱዋ ዱማዪደ ቦንቻናዳንነ ሳምባታ ጋላሳቱዋን ቶኩዋ ቶኪደ፥ የሩሳላመ ፐንገቱዋና ገለናዳን፥ ታን ኦዴዳዋ ስሰናን እጾፐ፥ ታን ሄ ፐንገቱዋን ታማ ኦይꬃና። የሩሳላመ ካትያ ጎለቱዋ ማና። ሄ ታማይ ቶኤና” ያጌ’ ያጋ” ያጌዳ።