1 መꬍና ጎዳ ቃላይ፥ ሀዋዳን ያጊደ፥ ታኮ ዬዳ፤ 2 “ኔን ማቻቶ አኮፓ፤ ማጫዋ አቱማዋካ ሀ ሳኣን የሎፓ። 3 ሀ ሳኣን የለቴዳ ማጫ ናናቱነ አቱማ ናናቱ፥ ኡንቱንታ የሌዳ አየቱነ አዎቱ ትምቢትያ ታን መꬍና ጎዳይ ነዉ ሀዋ ኦዳይ። 4 ኡንቱንቱ ኢታ ሀርግያን ሀይቃና፤ ኡንቱንቶ ዬከተና፥ ዎይ ኡንቱንቱ ሞገትክኖ፤ ኡንቱንቱ አሃይ ቢታ ቦላን ፕቱዋ ማላ ግዳናዋ። ኡንቱንቱ ማሻንነ ኮሻን ዉራና፤ ኡንቱንቱ አሹ ሳሉዋ ካፎቶነ ሳኣ ዶአቶ ቁማ ግዳናዋ” ያጌዳ።

5 መꬍና ጎዳይ ታዉ ሀዋዳን ያጌዳ፤ “ዬኮ ጎልያ ገሎፓ፤ ዬካናዉ ዎይ ቃረታናዉ ቦፓ። አያዉ ጎፐ፥ ታን መꬍና ጎዳይ ሀ አሳ ቦላፐ ታ ሳሮተꬃ፥ አገና ታ ሲቁዋነ ታ ማሮታ ድጋ ክቻድ። 6 ዎጋቱካ ጉꬃቱካ ሀ ቢታን ሀይቃና፤ ኡንቱንቱ ሞገትክኖ። አይ አሳይነ ኡንቱንቶ ዬከና፤ አይ አሳይነ ኡንቱንቶ ጎምኦረና ዎይ ሁጲያ ሜድሲደ ካዮተና። 7 ዬክያ አሳዉ ሃꬃ ኡሻዉ አፊደ፥ ቁማ አናና እትፐ ሚድነ ኡሺደ፥ ካዩዋ ባለꬅያዌ እቱነ ደኤና። ሀራይ አቶ አታ ዎይ አዉ ሀይቄዳ ኡራካ ባለꬅያባይ ባዋ።

8 “ግብራይ ደእያ ጎልያካ ገሎፓ፤ ማናዉነ ኡሻናዉ ኡንቱንቱና እትፐ ኡቶፓ። 9 ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋ ኦዳይ። በአ፥ ታን ናሸቻነ እልልሳ ኮሻ፥ ማቻቶ ቡላችያዋነ ቡላቼትያን ኮሻ ሀ ሳኣፐ ድጋና። ሄዋ አሳይ ባረ ላይꬃን ባረ አይፍያን በአና። ኤር. 7:34፤ 25:10፤ ሳፃ 18:23

10 “ኔን ሀ ቃላ ኡባ ሀ አሳዉ ኦድያ ዎደ፥ ኡንቱንቱ ኔና፥ መꬍና ጎዳይ አያዉ ሀዋ ማላ ዎልቃማ ኢታባ ኑ ቦላ አዋዬዴ? ኑን አያ ባይዜዶ? መꬍና ጎዳዉ፥ ኑ ጾሳዉ፥ ‘ኑን ኦꬄዳ ናጋራይ አዬ?’ ያጋና። 11 ሄ ዎደ ኔን ኡንቱንቶ ያጋ፤ ‘ “ታን መꬍና ጎዳይ ሀዋ ኦꬄዳዌ ካሰ ህንተ አዎቱ ታና አጌዳ ድራሳ፥ ኡንቱንቱ ሀራ ጾሳቱዋ ካሌዳ ድራሳ፥ ኡንቱንቶ ኦꬄዳነ ጎይኔዳ ድራሳ፥ ታና አጌዳነ ታ ህግያ ናገናን እጼዳ ድራሳነ 12 ህንተ ካሰ ህንተ አዎቱዋፐካ አꬍ ኢቴዳ ድራሳ። በእተ፥ ህንተ ሁጲያን ሁጲያን ህንተ ኢታ ዎዛና ሙመተꬃ ካሌድታ፤ ታዉ አዛዘተናን እጼድታ። 13 ሄዋ ድራዉ፥ ታን ህንተና ሀ ቢታፐ ደንꬃደ፥ ህንተ ዎይ ህንተ አዎቱ ኤረና ቢታ ኦላና። ያን ህንተ ሀራ ጾሳቶ ጋላስነ ቃማ ሀጋዛና። ሙለካ ህንተዉ ቃረትከ” ያጌ’ ያጋ” ያጌዳ።

14 መꬍና ጎዳይ ሀዋዳን ያጌ፤ “ ‘እስራኤልያ አሳ ግብጼ ቢታፐ ከሴዳ መꬍና ጎዳይ ኤሮ’ ያጊደ ጫቀና ዎዲ ያና። 15 ‘እስራኤልያ አሳ ሁጲሳ ባጋ ቢታፐነ ኡንቱንታ እ ላሌዳ ቢታቱዋ ኡባፐ ዛሪደ አሄዳ መꬍና ጎዳይ ኤሮ’ ያጊደ ጫቃና። አያዉ ጎፐ፥ ታን ኡንቱንቱ ካሰ ኡንቱንቱ አዋቶ እሜዳ ቡዞ ቢታ ዛራደ አሀና” ያጌ።

16 መꬍና ጎዳይ ሀዋዳን ያጌ፤ “በእተ፥ ታን ሞልያ ኦይቂያ ዳሮ አሳቶ ኪታይ፤ ኡንቱንቱ ኡንቱንታ ኦይቃና። ሄዋፐ ጉይያን፥ ታን ዳሮ ሻንካንቻቶ ኪታና፤ ሻንካንቻቱ ደርያ ኡባፐ፥ ዞዝያ ኡባፐነ ሹቻ ኮፖቱዋፐ ኡንቱንታ ሻንካቲደ ከሳና። 17 አያዉ ጎፐ፥ ታን ኡንቱንቱ ኦግያ ኡባ በአይ። ኡንቱንቱ ታፐ ቆሰትበይክኖ፤ ኡንቱንቱ ናጋራይካ ታ አይፍያፐ ጌምቤና። 18 ታን ኡንቱንቱ ኢታተꬃነ ኡንቱንቱ ናጋራ ድራዉ ኡንቱንቶ ላኡ ኩሽያ ዛራና። አያዉ ጎፐ፥ ኡንቱንቱ ባረንቱ እጸቴዳ ኤቃቱዋን፥ ሄ አሃ ማላትያዋንቱን ታ ቢታ ቱንሴድኖነ ባረንቱ ሸነይያ ምስለቱዋን ታ ላታ ኩንꬄድኖ” ያጌ።

19 አቤት መꬍና ጎዳዉ፥ ታ ዎልቃዉ፥ ታ ዎልቃማ ሚጻዉ፥ መቱዋ ጋላሳን ታን ባቃታ አትያ ሳአዉ፥ ካዉተꬃቱ ሳኣ ጋጻፐ ኔኮ ያና። ዪደ ሀዋዳን ያጋና፤ “ኑ አዎቱ ፓናነ ማደና ዎርዶ ጾሳቱዋ ጻላላ ላቴድኖ። 20 ዎን አሳይ ባረዉ ጾሳቱዋ መꬋናዉ ዳንዳዪየ? ዳንዳየና! እ መꬍንቶካ ኡንቱንቱ ቱሙ ጾሳቱዋ ግድክኖ!” ያጋና።

21 ጾሳይ ሀዋዳን ያጌ፤ “ሄዋ ድራዉ፥ ታን ኡንቱንታ ኤርሳና። እት ገደነ ታ ዎልቃነ ታ ምኖተꬃ ኡንቱንታ ኤርሳና፤ ያቶፐ ኡንቱንቱ ታ ሱንꬃይ መꬍና ጎዳ ግድያዋ ኤራና” ያጌ።