1 መꬍና ጎዳይ ሀዋዳን ያጌ፤ “ባ፤ ኡርቃ መꬍያዋፐ ባሬታ ሻማ። ኔናና አማሬዳ ጋድያ ጭማቱዋነ አማሬዳ ቄስያ ጭማቱዋ አካደ፥ 2 ኮንኣ መኡዋ ፐንግያ ግያ ፐንግያ ላንቂያና አꬋአደ፥ ህኖማ ዛንጋራ ባ፤ ያን ታን ነዉ ኦድያ ቃላ አዋያ። 2 ካታ. 23:10፤ ኤር. 7:30-32፤ 32:34-35 3 ሀዋዳን ያጋ፤ ‘ህንተኖ ይሁዳ ካተቶ፥ ህንተኖ የሩሳላመ ካታማ አሳቶ፥ መꬍና ጎዳ ቃላ ስስተ! ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “በእተ፥ ስስያ ኡባዉ ሀይꬃዉ ኢትያ ፓላባ ሀ ቢታ ቦላ ታን አሀና። 4 አያዉ ጎፐ፥ አሳቱ ታና አጌድኖ፤ ኡንቱንቱ ዎይ ኡንቱንቱ አዎቱ፥ ዎይ ይሁዳ ካተቱ ኤረና ሀራ ጾሳቶ እጻና ጩዋዪደ ያርሽያዋን ሀ ሳኣ ቱንሴድኖ። ኡንቱንቱ ጽሎ አሳቱዋ ሱꬃ ሀ ሳኣን ኩንꬄድኖ። 5 ቃይ ታን ኡንቱንታ አዛዛቤናባ፥ ዎይ ኦዳቤናባ፥ ዎይ ታ ዎዛናን ቆፓቤናባ ኦꬄድኖ፤ ኡንቱንቱ ባረንቱ አቱማ ናናቱዋ ባኣላዉ ታማን ጹግያ ያርሹዋ ኦꬂደ ያርሻናዉ፥ ጎይንያ ꬎቃ ሳአቱዋን ያርሽያ ሳ ግምቤድኖ። ዎጋ 18:21 6 ሄዋ ድራዉ፥ ሀ ሳአይ ቶፌታ ዎይ ህኖማ ዛንጋራ ጌተትያዌ አቲደ፥ ሹካ ዛንጋራ ያገቲደ ጼገታና ጋላሳቱ ዪኖ ያጌ መꬍና ጎዳይ።

7 “ ‘ “ይሁዳነ የሩሳላመ አሳ ሀልቹዋ ታን ሀ ሳኣን ፖለተናዳን ኦꬃና። ኡንቱንቱ ባረንቱ ሞርከቱዋ ማሻንነ ባረንታ ዎꬋናዉ ኮይያዋንቱ ኩሽያን ሀይቃናዳን ታን ኦꬃና። ኡንቱንቱ አሃ ሳሉዋ ካፎቶነ ሳኣ ዶአቶ ቁማ ኦꬃደ እማና። 8 ሀ ካታማ ባዙዋነ ቅሊጭያዋ ከሳና። ሄዋና አꬍያ ኡባይ አ ባሻን ማላለቲደ፥ ፖራ! ያጋና። 9 ኡንቱንቱ ባረንቱ ማጫ ናናቱነ አቱማ ናናቱዋ አሹዋ ማናዳን ታን ኦꬃና። ኡንቱንቱ ዎꬋናዉ ኮይያ ሞርከቱ ኡንቱንታ ዋይስያ ዋይያንነ ዶድያ ዶዳን፥ ኡንቱንቱ ኡባይ እቱ እቱዋ አሹዋ ማና” ያጌ’ ያጋ።

10 “ሄዋፐ ጉይያን፥ ኔናና እትፐ ቤዳ አሳቱዋ ስንꬃን ሄ ባረታ መንꬃ። 11 ኡንቱንታ ሀዋዳን ያጋ፤ ‘ኡባፐ ዎልቃማ መꬍና ጎዳይ ሀዋዳን ያጌ፤ “ዛሪደ ኮልና ኦይቀናዳን ኦꬂደ፥ እት አሳይ ባረታ መንꬅያዋዳን፥ ታን ሀ ካዉተꬃነ ሀ ካታማ መንሬꬃና። አሳቱ አሃ ሞግያ ሳአይ ባይና ድራዉ፥ ቶፌታን ሞጋና። 12 ታን ሀ ሳኣነ አን ደእያ አሳ ኦꬃናዌ ሀዋ፤ ታን መꬍና ጎዳይ ሀ ካታማ ቶፌታዳን ኦꬃና። 13 የሩሳላመ አሳ ጎለቱነ ይሁዳ ካተቱዋ ጎለቱ፥ ጎልያ ቦላን ደምባዪደ ኦꬄድኖ ሳሉዋ ጾልንተቶ እጻና ጩዋዬዳነ ሀራ ጾሳቶ ኡሻ ያርሹዋ ጉሴዳ ጎለቱ ኡባይ ቶፌታ ግያ ሳኣዳን ቱኔዳዋንታ ግዳና” ያጌ’ ያጋ” ያጌ።

14 ሄዋፐ ጉይያን፥ ኤርማስ መꬍና ጎዳይ ትምቢትያ ኦዳናዉ ኪቴዳ ቶፌታፐ ስሚደ ዪደ፥ መꬍና ጎዳ ጌሻ ጎልያ ግዶን ደእያ ዳባባን ኤቄዳ። አሳ ኡባዉ ሀዋዳን ያጌዳ፤ 15 “ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ስስተ፥ ታን ሀ ካታማ ቦላነ አ ሄራን ደእያ ሞꬃቱ ኡባ ቦላ አሀና ጌዳ ኢታባ ኡባ ኡንቱንቱ ቦላ አሀና ሀናይ። አያዉ ጎፐ፥ ኡንቱንቱ ሞርጊ ማካላ ግዲደ፥ ታን ኦዴዳባ ስሰናን እጼድኖ’ ያጌ” ያጌዳ።