1 ሄ ዎደ መꬍና ጎዳ ጌሻ ጎልያን ካፑዋ ግድያ፥ እሜራ ናኣ ፓሽሁራ ግያ ቄሲ፥ ኤርማስ ሀ የዎቱ ትምቢትያ ኦድሽን ስሴዳ። 2 ፓሽሁር ትምቢትያ ኦድያ ኤርማሳ ደሽሴዳ፤ ቆሞ ቢንያማ ፐንግያ ግያ መꬍና ጎዳ ጌሻ ጎልያ ገልያሳን ደእያ ዱꬃ ሉኩዋን ቃሽሴዳ። 3 ዎንተꬃ ጋላስ ፓሽሁር ኤርማሳ ቃሹዋፐ ብልና፥ ኤርማስ አዉ ሀዋዳን ያጌዳ፤ “ሀችፐ ዶምና፥ መꬍና ጎዳይ ነ ሱንꬃ ፓሽሁራ ያገና፤ እ ነ ሱንꬃ ያን ሃን ዳጋማ ያጋና። 4 አያዉ ጎፐ፥ መꬍና ጎዳይ ሀዋዳን ያጌ፤ ‘ታን ኔና ነ ሁጲያዉነ ነ ላገቱዋ ኡባዉ ዳጋማ ከሳና። ኡንቱንቱ ኔን ጼልሽን፥ ባረንቱ ሞርከቱዋ ማሻን ዉራና። ይሁዳ አሳ ኡባ ባብሎነ ካትያ ኩሽያን አꬃደ እማና። እ ኡንቱንታ ኦሞዲደ፥ ባብሎነ አፋና፤ አፊደ ያን ማሻን ኡንቱንታ ዎꬋና። 5 ሄዋዳንካ፥ ሀ ካታማ አቁዋ ፔሻ ኡባ፥ ኦꬅ ከሴዳባ ኡባ፥ ዱረተꬃ ኡባነ ይሁዳ ካተቱዋ ሚሻ ኡባ ታን ኡንቱንቱ ሞርከቶ አꬃደ እማና። ኡንቱንቱ ኡንቱንታ ቦንቂ ኦይቂደ፥ ባብሎነ አፋና። 6 ቃይ ኔን ፓሽሁርካ ነ ሶን ደእያ አሳይ ኡባይ ኦሞደቲደ፥ ባብሎነ ባና። ኔን ትምቢትያ ኦዴዳ ነ ላገቱዋ ኡባናካ ያን ሀይቃናነ ያን ሞገታና’ ያጌ” ያጌዳ።

7 አቤት መꬍና ጎዳዉ፥ ኔን ታና ጭማዳ፤ ታንካ ጭመታድ። ኔን ታፐ ምናደ፥ ታና ጾናዳ። ጋላሳ ኩመንꬃ ታን አሳይ ሚጭያዋ ከሳድ፤ ኡባይ ታና ቅሊጬ። 8 ታን ሃሳይያ ዎድያን ኡባን ꬎቂሳደ፥ “ማካላባይነ ባሻይ ጋኬዳ” ያጋደ ዋሳይ። መꬍና ጎዳ ቃላይ ታዉ ጋላሳ ኩመንꬃን ካꬍያነ ቅሊጩዋ አሄዳ። 9 ታን፥ “ታን ጾሳባ ደንꬃደ ሃሳይከ” ዎይ፥ “አ ሱንꬃን ላኤንꬆ ኦድከ” ጎፐ፥ ጾሳ ቃላይ ታ መቀꬃ ግዶን ቁምኤቲደ፥ ኤጽያ ታማ ማላ ግዲደ፥ ታ ዎዛናን ምቼ። ታን ግዶን ኦይቃደ አሻና ጋደ ዳቡራድ፤ ሽን ተአናዉ ዳንዳያበይከ። 10 ታን ዳሮ ሳሱከꬃ ስሳድ፤ “ያን ሃን ዳጋማይ ደኤ! አነ አ ሞትተ! ኑንካ አ ሞቶይተ” ያጊኖ። ታዉ ማታ ላገቱ ኡባይ ታ ኩንደꬃ ናጊደ፥ “ኦን ኤሪ፥ ኑን አ ኦይቃና ማላነ ኑ ሀሉዋ ከሳና ማላ፥ እ ጭመታናዉ ዳንዳዬ” ያጊኖ።

11 ሽን መꬍና ጎዳይ ያሽስያ ቶራንቻዳን ታናና ደኤ። ሄዋ ድራዉ፥ ታና የደርስያዋንቱ ꬉበታና፤ ኡንቱንቱ ታና ጾንክኖ። ኡንቱንቶ ጊገና ድራዉ፥ ኡንቱንቱ ዎልቃማ ዬላ ዬላታና። ኡንቱንቱ ካዉሻይ ሙለካ ዶገተና። 12 አቤት ኡባፐ ዎልቃማ መꬍና ጎዳዉ፥ ጽሎቱዋ ፓጭያዎ፥ ዎዛና ካሃ በእያዎ፥ ኔን ታ ሞርከቱዋ ቦላን ታ ሀሉዋ ከሳደ ታና በሳ። አያዉ ጎፐ፥ ታን ታ ሞቱዋ ነዉ አꬃድ።

13 መꬍና ጎዳዉ የጽተ! መꬍና ጎዳ ጋላትተ! አያዉ ጎፐ፥ እ ህዬሳቱዋ ኢታቱዋ ኩሽያፐ አሼ።

14 ታን የለቴዳ ጋላሳይ ሸቀቴዳዋ ግዶ!ኢዮባ 3:1-19 ታ አታ ታና የሌዳ ጋላሳይ አንጀቶፖ! 15 ታ አዎ፥ “ነዉ ምሽራቾ፤ ነዉ አቱማ ናአይ የለቴዳ!” ያግ ኦዲደ፥ ዳሮ ናሸቼዳ ብታኒካ ሸቀቴዳዋ ግዶ! 16 ሄ ብታኒ መꬍና ጎዳይ ቃረተናን አꬅ የጊደ ꬋይሴዳ ካታማቱዋዳን ሀኖ። ሄ ብታኒ ዎንታ ዋሱዋ፥ ጋላሳ ሴታን፥ “ኦላይ ጋኬዳ!” ግያ ኦዱዋ ስሶ። 17 አያዉ ጎፐ፥ ታ አታ ታዉ ዱፎ ግዳና ማላነ እ ኡሉካ ታና ዎጋ ኦይቂ ኡታና ማላ፥ ታና ኡሉዋን ዎꬍቤና። 18 ታን መቱዋነ ካዩዋ በአናዉነ ላይꬃ ኡባ ዬላታደ ዉርሳናዉ፥ አያዉ ታ አት ኡሉዋፐ ከሳድታሻ?