1 ካቲ ሰደቅያስ ማልክያ ናኣ ፓሽሁራነ ማእሴያ ናኣ ቄስያ ሶፎናሳ ሀ ኦሻ ኦቻና ማላ፥ መꬍና ጎዳይ ኤርማሳኮ ኪቴዳ። 2 ኡንቱንቱ፥ “ባብሎነ ካቲ ናቡካዳናጾር ባረ ኦላንቻቱዋና ሀ ካታማ ዩይ አꬊደ ዶዴዳ ድራዉ፥ አነ ኑዉ መꬍና ጎዳ ኦቻ። ኦን ኤሪ፥ መꬍና ጎዳይ በንዋዳን፥ ማላልስያ ኦሱዋ ኑ ድራዉ ኦꬂደ፥ አ ጉየ ዛራነንቶነ” ያጌድኖ። 2 ካታ. 25:1-11፤ 2 ኦዱዋ 36:17-21

3 ኤርማስ ኡንቱንቶ ዛሪደ፥ ሀዋዳን ያጌዳ፤ “ቢደ ሰደቅያሳዉ ያግተ፤ 4 መꬍና ጎዳይ እስራኤልያ ጾሳይ ሀዋዳን ያጌ፤ ‘ኔን ባብሎነ ካትያናነ ግምቢያፐ ካረና ነ ካታማ ዶድያ አ ኦላንቻቱዋና ኦለትያ፥ ነ ኩሽያን ደእያ ኦላ ሚሻ ታን ጉየ ነ ቦላ ዛራና። ቃይ ኡንቱንታ ኡባካ ሀ ካታማትዉ ግዶ ገልሳና። 5 ታን ታ ሁጲያን የዴዳ ኩሽያን፥ ዎልቃማ ቀስያን፥ ይሉዋን፥ ሀንቁዋንነ ዎልቃማ ሴራን ኔና ኦላና። 6 ታን ሀ ካታማን ደእያዋንታ፥ አሳካ መህያካ ሾጫና። ኡንቱንቱ ኢታ ሀርግያን ዉራና። 7 ሄዋፐ ጉይያን፥ ይሁዳ ካትያ ሰደቅያሳ፥ አ ኦሳንቻቱዋነ ኢታ ሀርግያፐ፥ ማሻፐነ ኮሻፐ ፓላሄዳ፥ ሀ ካታማ አሳ ኡባ፥ ባብሎነ ካትያ ናቡካዳናጾራዉነ ኡንቱንታ ዎꬋናዉ ኮይያ ሞርከቶ ታን መꬍና ጎዳይ አꬃደ እማና። እ ኡንቱንቱ ቃራ ማሻን ሲፋና። እ ኡንቱንቶ ቃረተና፥ ዎይ ሳሊደ አገና፥ ዎይ ማረና’ ያጌ ያግተ” ያጌዳ።

8 መꬍና ጎዳይ ኤርማሳ፥ “ጉጃደካ አሳዉ ሀዋዳን ያጋደ ኦዳ፤ ጾሳይ ሀዋዳን ያጌ፤ ‘በእተ፥ ታን ህንተ ስንꬃን ደኡዋ ኦግያነ ሀይቁዋ ኦግያ ዎꬃድ። 9 ሀ ካታማ ግዶን ታክያ አሳይ ኦንነ ማሻን፥ ኮሻን ዎይ ኢታ ሀርግያን ሀይቃና። ሽን ካታማፐ ከሲደ ቢደ፥ ካታማ ዶዲደ ኦይቄዳ ባብሎነቶ ባረ ኩሽያ እምያ አሳይ ኦንነ ፓጻ አታናዋ፤ ሄ ኡራይ ባረ ሸምፑዋ ጻላላ አሻና። 10 አያዉ ጎፐ፥ ታን ሀ ካታማዉ ኬካናዉ ግደናን ኢታናዉ ታ ቆፋ ቃቻድ። ባብሎነ ካትያዉ አ አꬃደ እማና፤ እካ ሀ ካታማ ታማን ጹጋና። ታን መꬍና ጎዳይ ሀዋ ኦዳድ’ ያጌ” ያጋ።

11 ቃይካ ይሁዳ ካትያ ጎልያ አሳዉ ሀዋዳን ያጋ፤ መꬍና ጎዳ ቃላ ስስተ! 12 ህንተኖ፥ ዳዊታ ዛረቶ፥ መꬍና ጎዳይ ህንተና ሀዋዳን ያጌ፤ “ዎንትና ዎንትና ሱረ ፕርድተ፤ ቦንቀቴዳዋንታ ኡቁንያዋንቱ ኩሽያፐ አሽተ። ሄዌ ꬋዮፐ፥ ህንተ ኢታ ኦሱዋ ጋሱዋን ታ ሀንቁ ታማዳን ኤጽ ከሳና፤ ኦንነ አ ቶይሰና ያጌ ያጋ” ያጌዳ።

13 መꬍና ጎዳይ ሀዋዳን ያጌ፤ “ኔኖ፥ የሩሳላመ፥ ኔን ደምባን ደእያ ዛላዳን፥ ዛንጋራፐ ፑደ ꬎቁ ጋደ ቤታሳ፤ ሽን ታን ኔናና ኦለታና። ኔን፥ ‘ኦንነ ታ ቦላ ጻለና ዎይ ታ ደኢያሳ ገለና’ ያጋሳ፤ 14 ሽን ታን መꬍና ጎዳይ ኔና ነ ኦሱዋዳን ሙራና። ታን ነ ካተ ጎልያን ታማ ኦይꬃና፤ ነ ዩሹዋን ደእያዋ ኡባ ም ꬋይሳና” ያጌ።