1 መꬍና ጎዳይ ሀዋዳን ያጌ፤ “ባ፤ ዱገ ይሁዳ ካትያ ጎለ ባደ፥ ያን ሀ ቃላ ኦዳ። 2 ‘ኔኖ ይሁዳ ካትያዉ፥ ዳዊታ ካዉተꬃ አራታን ኡትያዎ፥ ኔንካ ነ ቆማቱካ ሀ ፐንግያና ገልያ ነ አሳይ ኡባይካ መꬍና ጎዳ ቃላ ስስተ! 3 መꬍና ጎዳይ ሀዋዳን ያጌ፤ “ሱረ ፕርዳነ ጽሎባ ኦꬅተ። ቦንቀቴዳዋንታ ኡቁንያዋንቱ ኩሽያፐ አሽተ። በተቱዋ ቦላ፥ አዉ ባይና ናናቱዋ ቦላነ አስናቱ ሀይቄዳ ማጫ አሳቱዋ ቦላ ገንያባ ዎይ ማካላባ ኦꬆፕተ። ቃይ ጽሎ አሳ ሱꬃ ሀ ሳኣን ጉሶፕተ። 4 ህንተ ታን ጌዳዋዳን ቱሙ አዛዘቶፐ፥ ዳዊታ ካዉተꬃ አራታን ኡትያ ካተቱ ፓራነ ፓራ ጋርያ ቶጊደ፥ ባረንቱ ኦሳንቻቱዋናነ ባረንቱ አሳና ሀ ካትያ ጎልያ ፐንገቱዋና ገላና። 5 ሽን ህንተ አዛዘተናን እጾፐ፥ ሀ ካትያ ጎሊ ኦና ግዳና ያጋደ ታን መꬍና ጎዳይ ታ ሁጲያን ጫቃይ” ያጌ’ ያጋ” ያጌ። ማቶሳ 23:38፤ ሉቃሳ 13:35

6 መꬍና ጎዳይ ይሁዳ ካትያ ጎልያባ ሀዋዳን ያጌ፤ “ኔን ታዉ ጋላኣደ ቢታነ ሊባኖሳ አሳ ጼራ ማላ ግዶፐካ፥ ታን ኔና ባዙዋነ አሳይ ደኤና ካታማ ኦꬃና። 7 ታን ኔና ኮልያዋንታ ሁጲያን ሁጲያን ኦላ ሚሻ ኦይꬃደ፥ ነዉ ኪታና። ኡንቱንቱ ዝጋፐ ማሰቴዳ ነ ቱቀቱዋ ቃንጸሬꬂደ፥ ታማን ኦላና።

8 “ጮራ ካዉተꬃፐ አሳይ ሄ ካታማ ላንቂያና አꬋና። እቱ እቱዋ፥ ‘መꬍና ጎዳይ አያዉ ሀ ዎልቃማ ካታማ ሀዋዳን ኦꬄዴ?’ ያጊደ ኦቻና። 9 ኡንቱንቱ፥ ‘ኡንቱንቱ መꬍና ጎዳ ባረንቱ ጾሳና ጫቀቴዳ ጫቁዋ አጌዳ ግሻሳነ ሀራ ጾሳቶ ጎይኔዳነ ኦꬄዳ ግሻሳ’ ያጋና” ያጌ።

10 ሀይቂዳ ካትያ እዮስያሳዉ ዬኮፕተ ዎይ ካዮቶፕተ። ሄዋ አጊደ፥ ኦሞደቲደ ቤዳ ሻሉማዉ *ሻሉማ፦ ሀ ሱንꬃይ ሀራ ሳኣን፥ “እዮአካዛ” ጌተቴዳ። ሴለቲደ ዬክተ። አያዉ ጎፐ፥ እ ኡባካ ጉየ ስመና፤ ባረ የለቴዳ ቢታ ላኤንꬆ በኤና።

11 ባረ አዉዋ ድራዉ ይሁዳን ካተቲደ ደኢድ፥ ሀ ሳኣፐ ቤዳ እዮስያሳ ናኣ ሻሉማባ መꬍና ጎዳይ ሀዋዳን ያጌ፤ “እ ኡባካ ጉየ ስመና። 2 ካታ. 23:31-34፤ 2 ኦዱዋ 36:1-4 12 እ ኦሞደቲደ ቤዳ ቢታን ሀይቃና። ኡባካ ሀ ቢታ በኤና” ያጌ።

13 ባረ ጎልያ ናቁዋን ኬጽያዎ፥ ጽሎ ግደና ኦግያን ፖቅያ ቦላ ፖቅያ ጉጅያዎ፥ ባረ ጋድያ አሳዉ አይነ እመናንነ ዎልቃ ጋትያ ጭገናን ኦስስያዎ፥ አዉ አየ! 14 እ፥ “ታን ታዉ አኮ ፖቅያና ደእያ ዎልቃማ ጎልያ ኬጻና” ያጌ። ባረ ጎልያዉ ዎልቃማ ማስኮተቱዋ፤ ከሲደ ዝጋ ማሰꬃን ቦላ ካሚደ፥ ዞኦ ቃላምያ ኦኬ።

15 ባረዉ ኔን ዳሮ ዝጋን ኬጼዳዌ ኔና ሎኦ ካትያ ከሴ ጋደ ቆፓዲ? ነ አዉዋ እዮስያሳዉ ምያዌነ ኡሽያዌ ꬋዬዴ? እ ሱረ ፕርዳነ ጽሎባ ኦꬄዳ። ሄዋ ድራዉ፥ አዉ ኡባባይካ እንጀቴዳ። 16 እ ህዬሳቶነ መቶታንቻቶ ሱረ ፕርድያ ድራዉ፥ አዉ ኡባባይካ ሀኔዳ። መꬍና ጎዳ ኤሬ ያግያዌ ሀዋ። 17 ሽን ሀራባ አጊደ፥ ነ አይፊነ ነ ዎዛናይ ጃምያዌ ነ ጎኣ ደማናሳነ ጽሎ ሱꬃ ጉሳናሳ፥ አሳ ናቃናሳነ ኡቁናናሳ።

18 ሄዋ ድራዉ፥ መꬍና ጎዳይ እዮስያሳ ናኣ፥ ይሁዳ ካትያ እዮአቄማባ ሀዋዳን ያጌ፤ 2 ካታ. 23:36—24:6፤ 2 ኦዱዋ 36:5-7 “እ ሀይቂያ ዎደ ኡንቱንቱ አዉ፥ ‘አዬ! አየ! ታ እሻዉ!’ ያጊደ ዬክክኖ። ቃይ፥ ‘ታ ጎዳዉ፥ አየ! ታ ካትያዉ፥ አየ!’ ያጊደ ዝላልክኖ። 19 አ ሞጉካ ሀርያ ሞጉዋ ማላ ግዳናዋ። አ አሃይ ጎሸቲደ፥ የሩሳላመ ፐንገቱዋፐ ያ ባጋን ኦለታና” ያጌ።

20 ጾሳይ የሩሳላመባ ሀዋዳን ያጌ፤ “ባ፤ ፑደ ሊባኖሳ ባደ፥ ያን ዋሳ። ባሳነ ቢታን ዋሱዋ ጹልሳ። አባርማ ደርያንካ ዋሳ። አያዉ ጎፐ፥ ኦላዉ ኔናና ዙፐትያዋንቱ ኡባይ ጾነቴድኖ። 21 ኔን ሳሮ ደእሺና፥ ታን ነዉ ኦዳድ፤ ሽን ኔን፥ ‘ታን ስስከ’ ያጋዳ። ነ ያላጋተꬃደፐ ዶሚደካ ነ ሀኑ ሀዋ፤ ኔን ታዉ አዛዘተናን እጻዳ። 22 ነ ሄንꬃንቻቱዋ ኡባ ጫርኩ አፋና፤ ኦላዉ ኔናና ዙፐትያዋንቱካ ኦሞደቲደ ባና። ሄ ዎደ ነ ኢታተꬃ ኡባ ድራዉ፥ ዬላታናነ ካዉሻና። 23 ህንተኖ፥ ሊባኖሳ ዝጋን ኬጸቴዳ ጎልያን ደእያዋንቶ፥ ኦይꬃይ ኦይቄዳ ማጫ ምሽራትዋ ማላ ኡንኡ ህንተ ቦላ ፑቱ ግንቶ፥ ዋን ኦላንድቴሻ!” ያጌ።

24 መꬍና ጎዳይ ሀዋዳን ያጌ፤ “ታ ደኡ ኤሮ! ኔን እዮአቄማ ናአይ፥ ይሁዳ ካቲ ዮኣኪን፥ ታ ኡሸቻ ኩሽያን ደእያ ታ አታምያ ምግዱዋ ግድንቶካ ታ ኔና ከሳ የጋና። 2 ካታ. 24:8-15፤ 2 ኦዱዋ 36:9-10 25 ኔና ዎꬋናዉ ኮይያዋንቶ፥ ኔን ያይያ ባብሎነ ካትያ ናቡካዳናጾራዉነ አ ኦላንቻቶ ታን ኔና አꬃደ እማና። 26 ታን ኔናካ ኔና የሌዳ ነ አቶካ ህንተ የለታ ቢታ ግደና ሀራ ቢታዉ ኦላና፤ ህንተ ላኡካ ያን ሀይቃና። 27 ህንተ ስማናዉ ላሞትያ ቢታ ኡባካ ስምክታ” ያጌ።

28 ባረዉ ሀ ብታኒ ዮኣኪን፥ ካꬌዳነ መኤዳ ባረቴ? እ ኦንነ ኮየና ሚሼ? አያዉ እነ አ ናናቱ የደርሰቲደ፥ ባረንቱ ኤረና ቢታን ኦለቲደ አቴድኖ? 29 ሀነ ቢታቴ፥ ቢታቴ፥ ቢታቴ! መꬍና ጎዳ ቃላ ስሳ! 30 መꬍና ጎዳይ ሀዋዳን ያጌ፤ “ሀ ብታንያ፥ ‘ናአይ ባይና አሳ፥ ባረ ላይꬃ ኡባን ደኡ እንጀተና አሳ’ ጋደ ጻፋ። አያዉ ጎፐ፥ አ ዘረꬃፐ እቶነ እንጀተና፤ ዳዊታ ካዉተꬃ አራታን ኡትያዌ ዎይ ይሁዳን ካተትያዌ ኡንቱንቱፐ እቱነ ደኤና” ያጌ።