1 መꬍና ጎዳይ ሀዋዳን ያጌ፤ “ታ ሄንꬃ ጋደን ደእያ ዶርሳቱዋ ባይዝያነ ላልያ ሄንꬃንቻቶ አየ አና!” ያጌ።

2 መꬍና ጎዳይ እስራኤልያ ጾሳይ ባረ አሳ ሄምያ ሄንꬃንቻቱዋባ ሀዋዳን ያጌ፤ “ህንተ ታ ዶርሳቱዋ ላሊደ፥ ዎራ የደርሴድታ። ህንተ ኡንቱንታ ጾሞስቤና ድራዉ፥ ታን ህንተ ኦꬄዳ ኢታተꬃዉ ኡባዉ ህንተና ሙሩዋን ጾሞሳና ያጌ መꬍና ጎዳይ። 3 ሄዋፐ ጉይያን፥ ታ ዉድያፐ አቴዳዋንታ ካሰ ላሌዳ ቢታ ኡባፐ ታን ታ ሁጲያን ሺሻና። ኡንቱንታ ጉየ ኡንቱንታ ሄንꬃ ጋድያ ዛራና። ኡንቱንቱካ ሀዋን የለቲደ ጮራታና። 4 ታን ኡንቱንታ ሎይꬅ ሄምያ ሄንꬃንቻቱዋ ኡንቱንቶ ዎꬃና። ኡንቱንቱ ላኤንꬆ ያይክኖነ ዳጋምክኖ፤ ኡንቱንቱፐ እቱነ ባየና። ታን መꬍና ጎዳይ ሀዋ ኦዳድ” ያጌ።

5 መꬍና ጎዳይ ሀዋዳን ያጌ፤ “ታን ዳዊተዉ ጽሎ አጫ ደንꬃና ጋላሳቱ ያና። እ ካትያዳን ካዉታናነ አꬌዳ ኤራተꬃን ሞዳና፤ ቢታን እ ሱረባነ ጽሎባ ኦꬃና።ኤር. 33:14-16 6 እ ካተትያ ላይꬃን ይሁዳይ አታና፤ እስራኤሊካ ሳሮ ደአና። እ ጼሰታና ሱንꬃይ መꬍና ጎዳ፥ ኑ ጽሎተꬃ ጌተታና” ያጌ።

7 ሄዋ ድራዉ፥ ጾሳይ ሀዋዳን ያጌ፤ “አሳይ፥ ‘እስራኤልያ አሳ ግብጼ ቢታፐ ከሲደ አሄዳ መꬍና ጎዳይ ኤሮ’ ያጊደ ጫቂያዋ አጋና። 8 ሽን፥ ‘እስራኤልያ ዘረꬃ ሁጲሳ ባጋ ቢታፐነ እ ላሌዳ ቢታቱዋ ኡባፐ አሄዳ መꬍና ጎዳይ ኤሮ’ ያጊደ ጫቃና ጋላሳቱ ያና። ሄዋፐ ጉይያን ኡንቱንቱ ባረንቱ ቡዞ ቢታን ደአና” ያጌ።

9 ትምቢትያ ኦድያዋንቱባ ታን ቆፕያ ዎደ፥ ታ ዎዛናይ ካዩዋን መኤ፤ ታ መቀꬃቱ ኡባይካ ኮኮሪኖ። መꬍና ጎዳ ድራዉነ አ ጌሻ ቃላ ድራዉ፥ ታን ማꬆቴዳ አሳ ማላ፥ ዎይንያ ኤሳይ ዎልቃ ድጌዳ አሳ ማላ ግዳድ። 10 አያዉ ጎፐ፥ ቢታይ ሻርሙጻቱዋን ኩሜዳ። ሸቃ ድራዉ፥ ቢታይ ዬኬ፤ ባዞ ሄንꬃ ጋደቱካ መሌድኖ። ትምቢትያ ኦድያዋንቱ ኢታ ኦግያ ሀመቲኖ፤ ባረንቱ ዎልቃካ ልከ ግደናሳን ጎኤቲኖ።

11 መꬍና ጎዳይ፥ “ትምቢትያ ኦድያዌነ ቄሲነ ላኡካ ቱኔድኖ፤ ሀራይ አትና፥ ታ ጌሻ ጎልያንካ ኡንቱንቱ ኢታተꬃ ታን ደማድ” ያጌ።

12 ቃይካ መꬍና ጎዳይ፥ “ሄዋ ድራዉ፥ ኡንቱንቱ ኦጊ ሀልጻና፤ ኡንቱንቱ ꬉማዉ ላገቲደ፥ አን ኩንዳና። ኡንቱንቱ ቃጻየትያ ላይꬅ ታን ኡንቱንቱ ቦላን ኢታባ አሀና” ያጌ።

13 ቃይካ እ ሀዋዳን ያጌ፤ “ሳማርያን ደእያ ትምቢትያ ኦድያዋንቱ ግዶን ሸነይያዋ በኣድ። ኡንቱንቱ ባኣላ ሱንꬃን ትምቢትያ ኦዲኖነ ታ አሳ እስራኤልያ ዎራ ካለꬂኖ። 14 ቃይ የሩሳላመን ደእያ ትምቢትያ ኦድያዋንቱ ግዶንካ ዳጋንꬅያባ በኣድ። ዶመꬃ 18:20፤ ህዝ. 16:49 ኡንቱንቱ ሻርሙጺኖነ ዎርዶቲደ ሀመቲኖ። ኦንነ ባረ ኢታ ኦሱዋፐ ስመናዳን፥ ኡንቱንቱ ኢታ ኦꬅያዋንታ ገደ ምንꬂኖ። ኡንቱንቱ ኡባይካ ታዉ ሶዶማ ማላ፤ የሩሳላመ አሳይካ ጋሞራ ማላ” ያጌ።

15 ሄዋ ድራዉ፥ ኡባፐ ዎልቃማ መꬍና ጎዳይ ትምቢትያ ኦድያዋንቱባ ሀዋዳን ያጌ፤ “የሩሳላመን ደእያ ትምቢትያ ኦድያዋንቱፐ ቱናባይ ከሲደ፥ ቢታ ኡባን ላለቴዳ ድራዉ፥ ታን ኡንቱንታ ጫምያ ቁማ ምዛና፤ ታን ኡንቱንታ ዎꬍያ ሃꬃ ኡሻና” ያጌ።

16 ኡባፐ ዎልቃማ መꬍና ጎዳይ ሀዋዳን ያጌ፤ “ትምቢትያ ኦድያዋንቱ ኦድያባ ስሶፕተ። ኡንቱንቱ ሀነናባ፥ ሀናና ጊደ፥ ዎርዱዋ ኦዲኖ። መꬍና ጎዳይ ባረ ዶናፐ ኦድና ግደናን፥ ኡንቱንቱ ባረፐ ቆፕ አኪደ፥ ሳፃ ኦዲኖ። 17 ታና ካꬍያዋንታ ኡንቱንቱ፥ ‘መꬍና ጎዳይ፥ ህንተ ሳሮ ደአና’ ያጌ ያጊኖ። ቃይ ባረንቱ ዎዛና ሙመተꬃ ካለꬅያዋንታ ኡባ ኡንቱንቱ፥ ‘ህንተ ቦላ አያ ኢታባይነ ዬና’ ያጊኖ” ያጌ።

18 ሽን በአናዉ ዎይ አ ቃላ ስሳናዉ መꬍና ጎዳይ ዞርያሳን ኡንቱንቱፐ ኦንነ ኤቂቤና። አ ቃላ ሀይዜዳዌ ዎይ ስሴዳዌ ኦንነ ባዋ። 19 መꬍና ጎዳ ጎቲ፥ አꬅ የግያ ቤታይ ሀንቁ ሀዌሾ ከሴዳ! እ ኢታ አሳቱዋ ሁጲያን ኤቃና። 20 አ ዎዛና ቆፋ ኦꬂደ ፖለናን ደኢድ፥ መꬍና ጎዳ ሀንቁ ስመና። ዉርሰꬃ ጋላሳቱዋን ሀዋ ህንተ አኬካና።

21 ጾሳይ ሀዋዳን ያጌ፤ “ታን ትምቢትያ ኦድያዋንታ ኪታበይከ፤ ሽን ኡንቱንቱ ዎጺኖ። ታን ኡንቱንቶ ኦዳበይከ፤ ሽን ኡንቱንቱ ትምቢትያ ኦዲኖ። 22 ኡንቱንቱ ታን ዞርያሳን ኤቄዳዋ ግድንቶ፥ ታ ቃላ ታ አሳዉ ኦዳና ሽን! ኡንቱንቱ ኡንቱንቱ ኢታ ኦግያፐነ ኡንቱንቱ ኢታ ኦሱዋፐ ዛራና ሽን!” ያጌ።

23 ቃይካ መꬍና ጎዳይ፥ “ታን ማታ ጻላላ ጾሴ? ሃኮ ሳን ጾሳ ግድክታ? 24 ታን በኤናዳን፥ ጌማ ሳኣን ባረና ቆሳናዉ አሳይ ዳንዳዪ? ሳሉዋንነ ሳኣን ኩሜዳዌ ታና መꬍና ጎዳ ግድክታ?” ያጌ መꬍና ጎዳይ።

25 ጾሳይ ሀዋዳን ያጌ፤ “ታ ሱንꬃን ዎርዱዋ ትምቢትያ ኦድያዋንቱ ግያዋ ስሳድ። ኡንቱንቱ፥ ‘ታን አኩመታድ፤ ታን አኩመታድ!’ ያጊኖ። 26 ሀ የዉ ባረ ዎዛና ጭሙዋ ትምቢትያ ኦድያ ዎርዶ ናበቱዋ ዎዛናን አዉደ ጋካናዉ ጋምአኔ? 27 ኡንቱንቱ አዎቱ ባኣላ ግያ ኤቃ ጋሱዋን ታ ሱንꬃ ዶጌዳዋዳን፥ ኡንቱንቱ እቱ እቶ ኦድያ አኩሙዋን ታ አሳይ ታ ሱንꬃ ዶጋናዳን ኦꬃናዉ ቆፒኖ። 28 አኩሙዋ አኩመቲደ ትምቢትያ ኦድያዌ ባረ አኩሙዋ ኦዶ። ሽን ታ ቃላ ስሴዳዌ ሄ ቃላ አሸናን ጉጀናን ኦዶ። ዳላይነ ዛርጋይ ሀቃን ጋከቲ? ያጌ መꬍና ጎዳይ። 29 ታ ቃላይ ታማ ማላ ግደኔ? ዛላ መንሬꬅያ ማዶሻ ማላ ግደኔ?” ያጌ መꬍና ጎዳይ።

30 መꬍና ጎዳይ ሀዋዳን ያጌ፤ “ሄዋ ድራዉ፥ ታን ታ ቃላ እቱ እቱዋፐ ዉእያ ትምቢትያ ኦድያዋንቱ ቦላ ደአይ። 31 ሄዋዳንካ፥ ባረንቱ እንጻርሳን ሃሳዪደ፥ መꬍና ጎዳይ ያጌ ያግያ ትምቢትያ ኦድያዋንቱ ቦላ ደአይ ያጌ መꬍና ጎዳይ። 32 ታን መꬍና ጎዳይ ሀዋ ኦዳይ! ዎርዱዋ አኩመቲደ፥ ትምቢትያ ኦድያዋንቱ ቦላ ታን ግዳና። ኡንቱንቱ ሄ አኩሙዋ ኦዲደ፥ ባረንቱ ዎርዱዋንነ ባረንቱ ጬቁዋን ታ አሳ ዎራ ካለꬂኖ። ታን ኡንቱንታ ኪታበይከ ዎይ፥ ኦድተ ጋበይከ። ኡንቱንቱ ሀ አሳ አይነ ማድክኖ። መꬍና ጎዳይ ሀዋ ኦዳድ” ያጌ።

33 መꬍና ጎዳይ ታና ሀዋዳን ያጌዳ፤ “ኤርማሳ፥ ሀ አሳፐ እቱ፥ ዎይ ትምቢትያ ኦድያዌ፥ ዎይ ቄሲ፥ ‘መꬍና ጎዳ ኪታይ አዬ?’ ጊደ ኦቾፐ፥ ኔን ኡንቱንታ፥ ‘መꬍና ጎዳ ኪታይ ህንተና፤ ሄዋ ድራዉ፥ ታ ህንተና አጋ ባሻና’ ያጌ ያጋ። 34 ትምቢትያ ኦድያዌ፥ ዎይ ቄሲ፥ ዎይ አሳፐ እቱ፥ ‘ሀዌ መꬍና ጎዳ ኪታ’ ያጊደ ሃሳዮፐ፥ ታን ሄ ብታንያነ አ ሶ አሳ ሙራና። 35 ሄዋ አጊደ አሳይ፥ ‘መꬍና ጎዳይ ዋጌዴ?’ ዎይ፥ ‘መꬍና ጎዳይ ኦዴዳባይ አዬ?’ ያጊደ ባረ ላገቱዋነ ባረ ዳቦቱዋ ኦቻናዉ በሴ። 36 ሄዋ ድራዉ፥ ኦንነ፥ ‘መꬍና ጎዳ ኪታ’ ያጊደ ላኤንꬆ ሃሳያናዉ በሰና። አያዉ ጎፐ፥ አዉ ዶናፐ ከስያ ቃላይ አዎ ኪታ ግዴ። ሄዋን ደኡዋ ጾሳ፥ ኡባፐ ዎልቃማ መꬍና ጎዳ፥ ኑ ጾሳ ቃላ ህንተ ምርቂታ።

37 “ኔንካ ትምቢትያ ኦድያዋንታ፥ ‘መꬍና ጎዳይ ህንተና ዋጌዴ? ዎይ፥ መꬍና ጎዳይ አያ ኦዴዴ?’ ያጋደ ኦቻናዉ በሴ። 38 ሽን ህንተ፥ ‘ሀዌ መꬍና ጎዳ ኪታ’ ጎፐ፥ መꬍና ጎዳይ ሀዋዳን ያጌ፤ ‘ታን ህንተና፥ ሀዌ መꬍና ጎዳ ኪታ ጎፕተ’ ያግናካ ህንተ፥ ‘ሀዌ መꬍና ጎዳ ኪታ’ ጌድታ። 39 ሄዋ ድራዉ፥ ቱሙዋፐ ታን ህንተና ዶጋና፤ ህንተዉነ ህንተ አዎ እሜዳ ካታማ ታ ስንꬃፐ ዎራ ኦላና። 40 ታን ህንተ ቦላ መꬍና ካዉሻነ መꬍናዉ ዶገተና ዬላ አሀና ያጌ” ያጌዳ።