1 እዮአቄማ ናኣ፥ ይሁዳ ካትያ ዮኣኪና ይሁዳ ሞድያዋንቱና፥ ኩሽያ ኦሱዋ ሂላቱዋናነ ብራታ ቆጽያዋንቱና የሩሳላመፐ ባብሎነ ካቲ ናቡካዳናጾር ኦሞዲደ፥ ባብሎነ አፋ ስምና፥ መꬍና ጎዳይ ታና ሳፃ በሴዳ፤ ታን መꬍና ጎዳ ጌሻ ጎልያዉ ስንꬃ ባጋና ባላስያ ቴራ ኦይኬዳ ላኡ ኬሻቱዋ በኣድ። 2 ካታ. 24:12-16፤ 2 ኦዱዋ 36:10 2 እት ኬሻን ኮይሮ ቴሬዳዋ ማላትያ ዳሮ ሎኦ ባላስያ ቴራይ ደኤ። ላኤንꬆ ኬሻን ቃይ ማናዉ ጊገና ዳሮፐ ኢታ ባላስያ ቴራይ ደኤ። 3 መꬍና ጎዳይ ታና፥ “ኤርማሳ፥ ሄዌ ኔን በእያዌ አዬ?” ያጊደ ኦቼዳ።

ታን፥ “ባላስያ ቴራ በአይ። ሎኦ ቴራይ ሎይꬅ ሎአ፤ ኢታ ቴራይ ቃይ ማናዉ ጊገና ሎይꬅ ኢታ” ያጋደ ኦዳድ።

4 ሄዋፐ ጉይያን፥ መꬍና ጎዳ ቃላይ ታኮ ዬዳ፤ 5 “መꬍና ጎዳይ እስራኤልያ ጾሳይ ሀዋዳን ያጌ፤ ‘ታን ይሁዳ ቢታፐ ኦሞዱዋን ባብሎነ ቢታ የዴዳ አሳቱዋ፥ ሀ ሎኦ ባላስያ ቴራዳን ሎአ ጋና። 6 ታን ኬካ አይፍያን ኡንቱንታ ጼላና፤ ቃይ ታን ኡንቱንታ ዛራደ ሀ ቢታ አሀና። ታን ኡንቱንታ ኬጻናፐ አትና ኮልከ። ታን ኡንቱንታ ቶካናፐ አትና ሾድከ። 7 ታን መꬍና ጎዳ ግድያዋ ኡንቱንቱ ኤራናዳን፥ ታን ኡንቱንቶ ዎዛና እማና። ኡንቱንቱ ባረንቱ ኩመንꬃ ዎዛናፐ ታኮ ስማናዉ ደእያ ድራዉ፥ ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና’ ያጌ።

8 “ቃይ መꬍና ጎዳይ ሀዋዳን ያጌ፤ ‘ይሁዳ ካትያ ሰደቅያሳ፥ አ ካፓቱዋ፥ ሀ ቢታን አቴዳ የሩሳላመ አሳ አቴዳዋንታነ ግብጼ ቢታን ደእያዋንታ፥ ማናዉ ጊገና ሄ ሎይꬅ ኢታ ባላስያ ቴራዳን ኢታ ጋና። 9 ላላደ የድያ ቢታ ኡባን ታን ኡንቱንታ ሀ ሳኣ ካዉተꬃቱዋን ኡንቱንታ በእያ ኡባዉ ዳጋማነ ሸቃ፥ ቦርያነ ሌምሱዋ፥ ቅሊጩዋነ ቦሄቴዳዋ ኦꬃና። 10 ታን ኡንቱንቶነ ኡንቱንቱ ማይዛ አዋቶ እሜዳ ቢታፐ ኡንቱንቱ ኡባና ꬋያና ጋካናዉ፥ ማሻ፥ ኮሻነ ኢታ ሀርግያ ኡንቱንቱ ቦላ የዳና’ ያጌ” ያጌዳ።