1 እዮስያሳ ናአይ፥ ይሁዳ ካቲ እዮአቄም ካተቴዳ ኦይደንꬆ ላይꬃን፥ ባብሎነ ካቲ ናቡካዳናጾር ካተቴዳ ኮይሮ ላይꬃን፥ ይሁዳ አሳ ኡባ ጼልያዋን ኤርማሳኮ ዬዳ ቃላይ ሀዋ። 2 ካታ. 24:1፤ 2 ኦዱዋ 36:5-7፤ ዳኔላ 1:1-2 2 ትምቢትያ ኦድያ ኤርማስ ይሁዳ አሳ ኡባዉነ የሩሳላመን ደእያ ኡባቶ ሀዋዳን ያጌዳ፤ 3 “አሞጻ ናአይ፥ ይሁዳ ካቲ እዮስያስ ካተቴዳ ታማነ ሄዘንꬆ ላይꬃፐ ዶሚደ፥ ሀች ጋካናዉ፥ ላታማነ ሄዙ ላይꬃ መꬍና ጎዳ ቃላይ ታኮ ዬዳ። ታንካ ዛራ ዛራደ ህንተዉ ኦዳድ፤ ሽን ህንተ ስሰናን እጼድታ።

4 “መꬍና ጎዳይ ባረ ቆማቱዋ፥ ትምቢትያ ኦድያዋንታ ኡባ ዛር ዛሪደካ ህንተዉ ኪቴዳ፤ ሽን ህንተ ሀይዚደ ስሰናን እጼድታ። 5 ኡንቱንቱ ሀዋዳን ያጌድኖ፤ ‘ህንተ ኡባይካ ህንተ ኢታ ኦግያፐነ ህንተ ኢታ ኦሱዋፐ ሀእ ስምተ። ስሞፐ፥ መꬍና ጎዳይ ህንተዉነ ህንተ ማይዛ አዋቶ መꬍ መꬍናዉ እሜዳ ቢታን ህንተ ደአና። 6 ሀራ ጾሳቶ ኦꬃናዉነ ጎይናናዉ ካሎፕተ። ቃይ ህንተ ኩሺ ኦꬄዳባን ጾሳ ይሎዮፕተ። ያቶፐ ጾሳይ ህንተና ቆሄና’ ያጌድኖ።

7 “መꬍና ጎዳይ ሀዋዳን ያጌ፤ ‘ህንተ ታን ኦድያዋ ስሳናዋ አጊደ፥ ህንተ ኩሺ ኦꬄዳባን ታና ይሎዬድታ፤ ያቲደ ህንተና ቆህያዋ ህንተ ሁጲያን አሄድታ’ ያጌ።

8 “ሄዋ ድራዉ፥ ኡባፐ ዎልቃማ መꬍና ጎዳይ ሀዋዳን ያጌ፤ ‘ህንተ ታ ቃላዉ አዛዘተናን እጼዳ ድራዉ፥ 9 ታን ሁጲሳ ባጋ አሳ ኡባነ ታ ቆማ፥ ባብሎነ ካትያ ናቡካዳናጾራ ጼሳና። ኡንቱንታ ሀ ቢታ ቦላ፥ ሀ ቢታን ደእያ አሳ ቦላነ ሀዋ ሄራን ደእያ ካዉተꬃቱዋ ኡባ ቦላ አሀና። ታን ሀ ቢታቱዋ ኡባና ꬋይሳና፤ ቃይ በኤዳዌ ዳጋምያባ፥ “ፖራ!” ግያባነ መꬍናዉ አይነ ባይናዋ ኦꬃና። ታን መꬍና ጎዳይ ሀዋ ኦዳድ። 10 ታን ኡንቱንቱፐ እልልሳነ ናሸቻ ኮሻ፥ ቡላችያዋነ ቡላቼትያን ኮሻ፥ ዎጻን ጋጭያ ኮሻነ ጾምፕያ ፖኡዋ ꬋይሳና።ኤር. 7:34፤ 16:9፤ ሳፃ 18:22-23 11 ሀ ቢታይ ኡባና ባሻ አይነ ባይና ቢታ ግዳናዋ፤ ሀ ካዉተꬃቱካ ባብሎነ ካትያዉ ላፑን ታሙ ላይꬃ ሞደታና። 2 ኦዱዋ 36:21፤ ኤር. 29:10፤ ዳኔላ 9:2

12 “ ‘ላፑን ታሙ ላይꬃይ ፖለት ስምና፥ ታን መꬍና ጎዳይ ባብሎነ ካትያነ አ ካዉተꬃ አሳ ኡንቱንቱ ባይዙዋ ድራዉ ሙራና፤ ኡንቱንቱ ቢታካ መꬍናዉ አይነ ባይናዋ ኦꬃና። 13 ታን ሄ ቢታ ቦላን ሃሳዬዳዋ ኡባ፥ ኤርማስ ካዉተꬃቱዋ ኡባ ቦላ፥ “ሀናና” ጊደ ኦዴዳ፥ ሀ ማጻፋን ጻፈቴዳዋ ኡባ ሄ ቢታ ቦላን አሀና። 14 ዳሮ ካዉተꬃቱነ ዎልቃማ ካተቱ ባብሎነቱዋ አይለዪደ ሞዳና። ታን ኡንቱንቶ ኡንቱንቱ ሀኑዋዳንነ ኡንቱንቱ ኩሽያ ኦሱዋዳን ቃንጻና’ ያጌ” ያጌዳ።

15 መꬍና ጎዳይ፥ እስራኤልያ ጾሳይ ታዉ ሀዋዳን ያጌዳ፤ “ሀዋ ታ ሀንቁዋ ዎይንያ ኤሳይ ኩሜዳ ዋንጫ ሄይ። አፋደ ታን ኔና ኪትያ ካዉተꬃቱዋ ኡባ ኡሻ። 16 ኡንቱንቱ ኡሺደ፥ ታን ኡንቱንቱ ግዶ የድያ ማሻ ጋሱዋን ጋንድጋራናነ ጎያና” ያጌዳ።

17 ታን መꬍና ጎዳ ኩሽያፐ ዋንጫ አካደ፥ እ ታና ኪቴዳ ካዉተꬃቱዋ ኡባ ኡሻድ። 18 ሀች ሀኔዳዋዳንካ ኡንቱንቱ ኡባ ባሻነ ዳጋማ፥ ጫሻነ ቃንገꬃ ኦꬃና ማላ፥ የሩሳላመነ ይሁዳ ካታማቱዋ፥ አ ካተቱዋነ አ ካፓቱዋ ኡባ ኡሻድ። 19 ግብጼ ቢታ ካትያ፥ አ ቆማቱዋ፥ አ ካፓቱዋ፥ አ ቢታ አሳ ኡባነ 20 ያን ደእያ አላጋ አሳቱዋ ኡባ ኡሻድ። ኡጻ ቢታ ካተቱዋ ኡባ ኡሻድ። ፕልስጼማ ቢታን ደእያ አስቃሎና፥ ጋዛ፥ ኤቅሮናነ አሽዶዳፐ አቴዳ ባጋ ካተቱዋ ኡባ ኡሻድ። 21 ኤዶማ፥ ሞኣባነ አሞና ኡሻድ። 22 ጺሮሳ ካተቱዋ ኡባ፥ ሲዶና ካተቱዋ ኡባነ ሜድተራነ አባፐ ሄፍንꬃ ጋጻን ደእያ ቢታ ካተቱዋካ ኡሻድ። 23 ዳዳና፥ ተማና፥ ቡዛነ ባረንቱ ሁጲያ ሹፌርያ ሜድያ አሳቱዋ ኡባቱዋ ኡሻድ። 24 አራባ ቢታ ካተቱዋ ኡባነ ባዙዋን ደእያ ዛራቱዋ ካተቱዋ ኡባ ኡሻድ። 25 ዝምራ፥ ኤላማነ ሜዶና ካተቱዋ ኡባ ኡሻድ። 26 ሁጲሳ ባጋ ቢታ ካተቱዋ ኡባ፥ ሃኩዋንነ ማታን ደእያ ካተቱዋ ኡባ ኡንቱንቱ ካል ካል፥ ሳኣ ቦላን ደእያ ካዉተꬃቱዋ ኡባ ኡሻድ። ኡንቱንቱ ኡባፐ ጉይያን፥ ባብሎነ ካዉካ ኡሻና።

27 ጾሳይ፤ “ሄዋ ድራዉ፥ ኡንቱንቶ ኦዳ፤ ‘ኡባፐ ዎልቃማ መꬍና ጎዳይ፥ እስራኤልያ ጾሳይ ህንተና፥ “ኡሽተነ ማꬆትተ። ጮሽተነ ኩንድተ። ታን ህንተ ግዶ የድያ ማሻ ጋሱዋን ላኤንꬆ ደንዶፕተ” ያጌ’ ያጋ። 28 ሽን ኡንቱንቱ ነ ኩሽያፐ ዋንጫ አከናንነ ኡሸናን እጾፐ፥ ኡንቱንቶ ሀዋዳን ያጋደ ኦዳ፤ ‘ኡባፐ ዎልቃማ መꬍና ጎዳይ ህንተና፥ “ህንተ ኡሻናዉ ኮሼ! 29 በእተ፥ ታን ታ ሱንꬃን ጼሰቴዳ ካታማ ቦላ ኢታባ ኦꬃናዉ ዶማይ። ያንና ህንተ ሙረተናን አቲደ ቢቴ? ህንተ ሙረተናን አቲደ ቢክታ! አያዉ ጎፐ፥ ታን ሳኣን ኡባ ቦላ ማሻ ጼሳይ። ታን ኡባፐ ዎልቃማ መꬍና ጎዳይ ሀዋ ኦዳድ” ያጌ’ ያጋ።

30 “ሄዋ ድራዉ፥ ኤርማሳ፥ ሀ ቃላይ ኡባይ ኡንቱንቱ ቦላ ሀናናዋ ኡንቱንቶ ኦዳ። ጾሳይ ቦላ ꬎቃን ጉማና። መꬍና ጎዳይ ባረ ደእያ ጌሻ ሳኣፐ ባረ ጉንꬃ ስሳና። እ ባረ ሄንꬃ ጋድያ ቦላን ዎልቃፐ ጉማና። እ ዎይንያ ቴራ የꬊደ፥ ጉምእያዋንቱ ዋስያዋዳን፥ ሳኣን ደእያ ኡባ ቦላ ዋሳና። 31 አ ጫቡ ሳኣ ጋጻ ጋኪደ ስሰቴ። አያዉ ጎፐ፥ መꬍና ጎዳዉ ካዉተꬃቱዋና ሞቱ ደኤ። ጾሳይ አሳ ኡባና ፕርደታና፤ እ ኢታቱዋ ማሻዉ አꬂደ እማና። ታን መꬍና ጎዳይ ሀዋ ኦዳድ ያጋ” ያጌዳ።

32 ኡባፐ ዎልቃማ መꬍና ጎዳይ፥ “በአ፥ ኢታባይ ካዉተꬃፐ ካዉተꬃዉ ላለቴ፤ ሳኣ ጋጻፐ ጎትያ ጫርኩ ደንዴ” ያጌ።

33 ሄ ዎድያን ጾሳይ ዎꬌዳዋንቱ አሃይ፥ ቢታ ቦላን ሀ ጋጻፐ ህን ጋጻ ጋካናዉ ላለታና። ኡንቱንቶ ዬከተና፥ ኡንቱንቱ አሃይ ሺቀና ዎይ ሞገተና። ኡንቱንቱ ቢታን ፕቱዋ ማላ ግዳናዋ።

34 ህንተኖ፥ ሄንꬃንቻቶ፥ ዬክተነ ዋስተ። ህንተኖ፥ ዉድያ ካለꬅያዋንቱ፥ ብድንꬃን ጎንዶረትተ። አያዉ ጎፐ፥ ህንተ ሹከትያ ዎዲ ጋኬዳ፤ ህንተ ኩንዳናነ ሎኦ ኡርቃ ሚሻዳን መኤረታና። 35 ሄንꬃንቻቱ ባቃቲደ ብያሳአይ ባዋ፤ ዉድያ ካለꬅያዋንቱካ ከስ አክያ ሳአይ ባዋ። 36 መꬍና ጎዳይ ኡንቱንቱ ሄንꬃ ጋድያ ꬋይስያ ድራዉ፥ ሄንꬃንቻቱ ዋስያ ዋሱዋነ ዉድያ ካለꬅያዋንቱ ዬክያ ዬኩዋ ስስተ። 37 መꬍና ጎዳ ሱሎ ሀንቁዋ ጋሱዋን ሳሮ ደእያ ሄንꬃ ጋዲ ኦናና። 38 ጋሙ ባረ ደእያ ዎራፐ ከስያዋዳን፥ ጾሳይካ ባረ ደኢያሳፐ ከሳና። ኡንቱንቱ ቢታይካ ናቂያዋንቱ ማሻንነ መꬍና ጎዳ ሱሎ ሀንቁዋን አይነ ባይናዋ ቢታ ግዳናዋ።