1 ግብጼ ቢታን ምግዶላ፥ ጻፍናሳነ መምፒሳ ጌተትያ ካታማቱዋንነ ገድሳ ባጋና ደእያ ፓትሮሳ ቢታን ደእያ አይሁዳቱዋ ጼልያዋን ጾሳ ቃላይ ኤርማሳኮ ሀዋዳን ያጊደ ዬዳ፤ 2 “ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ ‘የሩሳላመ ቦላንነ ይሁዳ ካታማቱዋ ኡባ ቦላን ታን አሄዳ ባየꬃ ኡባ ህንተ ህንተ ሁጲያን በኤድታ። ኡንቱንቱ ሀች ጋካናዉ፥ ኮለት ኡቴድኖ፤ ኦንነ ያን ደኤና። 3 ሄዌ ሀኔዳዌ ኡንቱንቱ ኢታ ኦሱዋ ኦꬂደ፥ ታና ሀንቀꬅሲደ ድራሳ። ኡንቱንቱ ግድና፥ ህንተና ግድና፥ ዎይ ህንተ ማይዛ አዎቱዋ ግድና፥ ኦንነ ኤረና ሀራ ጾሳዉ እጻና ጩዋዪደ፥ አዉ ጎይኔድኖ። 4 “ሀዋ ማላ ታን ጾሳይ እጽያ ሸነይያባቱዋ ኦꬆፕተ!” ያጊደ ኦዳና ማላ፥ ዛራ ዛራደ ታ ቆማቱዋ፥ ትምቢትያ ኦድያዋንታ፥ ኪታድ። 5 ሽን ኦድያዋ ኡንቱንቱ ስሰናን ዎይ ሀይዘናን እጼድኖ። ኡንቱንቱ ሀራ ጾሳቶ እጻና ጩዋይያ ኢታ ኦሱዋ አገናን እጼድኖ። 6 ሄዋ ጋሱዋን ታ ሱልያ ሀንቁነ ይሉ ትገቴዳ፤ ይሁዳ ካታማቱዋንነ የሩሳላመ ኦገቱዋን ኤጼዳ። ኡንቱንቱካ ሀች ህንተ በእያዋዳን፥ ኮለቴዳዋንታነ አይነ ባይናዋንታ ግዴድኖ’ ያጌ።

7 “ሀእካ መꬍና ጎዳይ፥ ኡባፐ ዎልቃማ ጾሳይ፥ እስራኤልያ ጾሳይ፥ ሀዋዳን ያጌ፤ ‘ህንተዉ ዘረꬃይ ደኤና ማላ፥ ማጫ አሳ፥ አቱማ አሳ፥ ናናቱዋነ ዘረꬃ ይሁዳ ቢታፐ ꬋይሳናዳን፥ ሀ ሎይꬅ ኢታባ ህንተ ህንተ ቦላ አያዉ ኦꬂቴ? 8 ህንተ ደአናዉ ገሌዳ ሀ ግብጼ ቢታን ሀራ ጾሳቶ እጻና ጩዋይያዋን ታና አያዉ ሀንቀꬂቴ? ዎይ ሳኣን ደእያ ካዉተꬃቱዋ ኡባ ግዶን ሸቃነ ቦረ ግዲደ፥ ህንተ ሁጲያ ባይዛናዉ አያዉ ኮዪቴ? 9 ካሰ ህንተ አዎቱ፥ ይሁዳ ካተቱነ ኡንቱንቱ ማቼቱ፥ ቃይ ህንተነ ህንተ ማቼቱ ይሁዳ ካታማቱዋንነ የሩሳላመ ኦገቱዋን ኦꬄዳ ኢታተꬃ ኡባ ዶጌድቴየ? 10 ህንተ ሀች ጋካናዉ፥ ህንተናተꬃ ሆክስበይክታ፤ ታዉካ ያይበይክታ። ቃይ ታን ህንተዉነ ህንተ ማይዛ አዋቶ እሜዳ ህግያንነ ዎጋን ብበይክታ’ ያጌ።

11 “ሄዋ ድራዉ፥ ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ ታን ህንተና ይሁዳ ዘረꬃ ኡባ፥ ꬋይሳናዉ ቆፋ ቃቻድ። 12 ይሁዳን አቴዳዋንቱ ግዶፐ፥ ግብጼ ቢደ፥ ያን ደአናዉ ቆፋ ቃቼዳዋንታ ታን ꬋይሳና። ኡንቱንቱ ኡባይ ግብጼን ዉራና፤ ኦላንነ ኮሻን ሀይቃና። ዎጋፐ ጉꬃ ጋካናዉ ደእያ ኡባይ ኦላንነ ኮሻን ዉራና። ኡንቱንቱ ዳጋማ፥ ሸቃ፥ ቶሽያነ ቅሊጭያዋ ግዳናዋንታ። 13 ታን የሩሳላመ ኦላን፥ ኮሻንነ ኢታ ሀርግያን ሙሬዳዋዳን፥ ግብጼ ቢታን ደእያዋንታካ ሙራና። 14 አቴዳ ይሁዳ አሳቱዋፐ ግብጼን ደአናዉ ዬዳዋንቱ ግብጼቱዋ ኩሽያፐ ከስ አክክኖ። ኡንቱንቱ ስም ዪደ ደአና ጊደ አሞትያ ይሁዳ ቢታ አይ አሳይነ ስመና፤ ሀይቁዋፐ ፓላሄዳ እት አማራ አሳፐ አትና፥ ስሚደ ያና ሀራ አሳይ ደኤና ያጌ” ያጌዳ።

15 ባረንቱ ማጫ አሳቱ ሀራ ጾሳቶ እጻና ጩዋይያዋ ኤርያ አቱማ አሳቱ ኡባይነ ሄዋን ኤቄዳ ማጫ አሳቱ ኡባይ ዎልቃማ ማባራ ግዲደ፥ ግብጼን ገድሳ ባጋና ፓትሮሳ ግያ ሳን ደእያ አሳይ ኡባይ ኤርማሳ ሀዋዳን ያጌድኖ፤ 16 “ኔን መꬍና ጎዳ ሱንꬃን ኑዉ ኦድያባ ኡባ ኑን ስሶኮ። 17 ኑን ኦꬃና ጌዳዋ ኡባ ኦꬃና። ኑን፥ ኑ ማይዛ አዎቱ፥ ኑ ካተቱነ ኑ ካፓቱ ይሁዳ ካታማቱዋንነ የሩሳላመ ኦገቱዋን ካሰ ኦꬄዳዋዳን፥ ሳሉዋ ካታቶ ጌተትያ ኑ ጾሳትዉ እጻና ጩዊሳና፤ ኡሻ ያርሹዋካ እዉ ጉሳና። አያዉ ጎፐ፥ ኑን ካሰ ሄዋ ኦꬅያ ዎደ፥ ኑዉ ዳሮ ቁማይ ደኤ፤ ሄ ዎደ ኑዉ ሳአይ ኬካ፤ ኑና አያይነ መትቤና። 18 ሽን ሳሉዋ ካታትዉ እጻና ጩዋይያዋነ ኡሻ ያርሹዋ ጉስያዋ አጎደፐ ሃ ስምና፥ ኑዉ ኡባባይካ ፓጬዳ፤ ኑን ኦላንነ ኮሻን ዉሬዶ” ያጌድኖ።

19 ማጫ አሳቱ ጉጂደካ ሀዋዳን ያጌድኖ፤ “ኑን ሳሉዋ ካታቶ ማላትያ ኡክꬃ ኡክያ ዎደ፥ እጻና ጩዋይያ ዎደነ ኡሻ ያርሹዋ እዉ ጉስያ ዎደ ኡባን፥ ኑ አስናቱ ኤረናን ደእሺና፥ ኑን ኦꬄዳዌ አያይነ ባዋ” ያጌድኖ።

20 አዉ ሄዋዳን ጊደ ዛሬዳ አሳዉ ኡባዉ፥ ማጫነ አቱማዎ፥ ኤርማስ ሀዋዳን ያጌዳ፤ 21 “ህንተነ ህንተ ማይዛ አዎቱ፥ ህንተ ካተቱነ ህንተ ካፓቱ፥ ቃይ ቢታን ደእያ አሳይ ኡባይ ይሁዳ ካታማቱዋንነ የሩሳላመ ኦገቱዋን እጻና ጩዋዬዳዋ መꬍና ጎዳይ ኤረና ዎይ ዶጌዳ ጊደ ቆፒቴ? 22 ህንተ ኦꬅያ ኢታነ ሸነይያ ኦሱዋ መꬍና ጎዳይ ጮኡ ጋናዉ ዳንዳይቤና ድራዉ፥ ህንተ ቢታይ ባዬዳ፥ ባዙዋነ ሸቀቴዳ ቢታ ኦꬄዳ። ሀች ህንተ በእያዋዳን፥ ህንተ ቢታይ አሳይ ደኤና ቢታ ግዴዳ። 23 ሀ ባሻይ ኡባይ ህንተና ጋኬዳዌ ህንተ ሀራ ጾሳቶ እጻና ጩዋዬዳ ድራሳ፥ መꬍና ጎዳ ናቄዳ ድራሳ፥ መꬍና ጎዳ ቃላ ስሰናን እጼዳ ግሻሳነ አ ህግያዉነ አ ዎጋዉ አዛዘተናን እጼዳ ድራሳ” ያጌዳ።

24 ሄዋፐ ጉይያን፥ ኤርማስ አሳዉ ኡባዉ፥ ማጫነ አቱማዎ ሀዋዳን ያጌዳ፤ “ህንተኖ፥ ይሁዳፐ ዪደ፥ ግብጼ ቢታን ደእያ አሳቶ፥ ኡባይካ መꬍና ጎዳይ ግያዋ ስስተ! 25 ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ ‘ህንተነ ህንተ ማቼቱ፥ “ኑን ሳሉዋ ካታትዉ እጻና ጩዊሳና፤ ኡሻ ያርሹዋካ እዉ ጉሳና” ጊደ ጫቄዳ ጫቁዋ ፖሊደ፥ ኦሱዋን በሴድታ። ሀእካ ግዶፐ፥ ህንተ ጫቁዋ ምንስተነ ፖልተ’ ያጌ።

26 “ግዶፐነ፥ ህንተኖ፥ ግብጼ ቢታን ደእያ ይሁዳ አሳቶ፥ መꬍና ጎዳይ ግያዋ ስስተ! መꬍና ጎዳይ ሀዋዳን ያጌ፤ ‘ሀዋፐ ህን ባጋን ግብጼ ቢታን ደእያ ይሁዳ አሳፐ እቱነ ታ ሱንꬃን፥ “ኡባ ሞድያ መꬍና ጎዳይ ኤሮ!” ጊደ ጫቀና ማላ፥ ታን ታ ዎልቃማ ሱንꬃን ጫቃድ። 27 ታን ኡንቱንቱ ቦላ ሎኦባ አሀናዉ ግደናን፥ ኢታባ አሀናዉ ጼላይ። ግብጼን ደእያ ይሁዳ አሳይ ኡባና ዉራና ጋካናዉ፥ ኦላንነ ኮሻን ሀይቃና። 28 ሽን ኦላፐ አቴዳ እት አማሬዳዋንቱ ግብጼፐ ይሁዳ ስማና። ሄ ዎደ ግብጼን ደእያ ይሁዳ አሳይ ታ ቃላፐነ ኡንቱንቱ ቃላፐ ኦግ ቱማቴደንቶነ አኬኪደ ኤራና።

29 “ ‘ታን ህንተና ሀ ሳኣን ሙራናነ፥ “ታን ህንተ ቦላ ኢታባ አሀና” ጌዳዌ ቱማታናዎ፥ ታን መꬍና ጎዳይ ህንተዉ ማላ እማይ: 30 ታን ይሁዳ ካትያ ሰደቅያሳ አዉ ሞርከ ግዲደ፥ አ ዎꬋናዉ ኮይያ ባብሎነ ካትያ ናቡካዳናጾራዉ አꬃደ እሜዳዋዳን፥ ግብጼ ካትያ ሆፍራካ አ ዎꬋናዉ ኮይያ አ ሞርከቶ አꬃደ እማና። መꬍና ጎዳይ ሀዋ ኦዳይ’ ያጌ” ያጌዳ። 2 ካታ. 25:1-7