1 መꬍና ጎዳይ ኡንቱንቱ ጾሳይ ኪቴዳ ቃላ ኡባ ኤርማስ ኡንቱንቶ ኦዲደ ዉርሴዳዋፐ ጉይያን፥ 2 ሆሻያ ናአይ አዛርያስ፥ ቃሬሀ ናኣ ዮሀናንነ ኦቶራንቻ አሳይ ኡባይ ኤርማሳ ሀዋዳን ያጌድኖ፤ “ኔን ዎርዱዋ ኦዳሳ! መꬍና ጎዳይ ኑ ጾሳይ ኑን ግብጼ ቢደ ኡተና ማላ ኦዳናዉ፥ ኔና ኑኮ ሙለ ኪትቤና። 3 ሽን ባብሎነ ቢታ አሳይ ኑና ዎꬋናዳን ዎይ ኦሞዲደ ባረንቱ ቢታ አፋናዳን፥ ኔን ኑና ኡንቱንቱ ኩሽያን አꬃደ እማና ማላ፥ ኔና ኑ ቦላን ደንꬄዳዌ ኔርያ ናኣ ባሮካ” ያጌድኖ።

4 ሄዋ ድራዉ፥ ቃሬሀ ናአይ ዮሀናን፥ ኦላ ጋዳዋቱ ኡባይነ አሳይ ኡባይ ይሁዳ ቢታን ደአናዉ፥ መꬍና ጎዳይ ኡንቱንታ አዛዜዳ አዛዙዋ ፖለናን እጼድኖ። 5 ቃሬሀ ናአይ ዮሀናንነ ኦላ ጋዳዋቱ ኡባይ ባረንቱ ላለቴዳ ካዉተꬃቱዋ ኡባፐ ይሁዳን ደአናዉ ስሜዳ ይሁዳ አሳ ባረንቱና አኪደ፥ ግብጼ ቤድኖ። 2 ካታ. 25:26 6 ቃይ ካትያ ናግያዋንቱ ካፑ ናቡዛራዳን ሳፋና ናኣ፥ አህቃማ ናኣ ጋዳልያና እትፐ ደአና ማላ አሼዳ አቱማ አሳቱዋ፥ ማጫ አሳቱዋ፥ ናናቱዋነ ካትያ ማጫ ናናቱዋ ኡባ አፌድኖ። ቃይካ ትምቢትያ ኦድያ ኤርማሳነ ኔርያ ናኣ ባሮካካ አፌድኖ። 7 ሄዋዳን ሀኒደ፥ መꬍና ጎዳይ አዛዜዳዋ እጺደ፥ ግብጼ ቢታ ገሊደ፥ ጻፍናሳ ግያ ካታማ ጋካናዉ ቤድኖ።

8 ጻፍናሳን መꬍና ጎዳ ቃላይ ኤርማሳኮ ሀዋዳን ያጊደ ዬዳ፤ 9 “ዎልቃማ ሹቻቱዋ ነ ኩሽያን ኦይቃ አካደ፥ ይሁዳ አሳይ በእሽና፥ ጻፍናሳን ደእያ ግብጼ ካትያ ጎልያ ገልያ ሳፐ ስንꬃ ባጋና ደእያ ባሱዋን ሞጋ። 10 ኡንቱንታ ሀዋዳን ያጋ፤ ‘ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “ታን ኪታደ፥ ታ ቆማ ባብሎነ ካትያ ናቡካዳናጾራ አህሳና፤ ሀ ሞገቴዳ ሹቻቱዋ ቦላን አ ካዉተꬃ አራታ ዎꬃና። ያቶፐ እ ባረ ካዉተꬃ ዱንካንያ አ ቦላን ኤሳና። 11 እ ዪደ ግብጼ ቢታ ኦላና። ሀይቆ ደእያዋንቱ ሀይቃና፤ ኦሞዶ ደእያዋንቱካ ኦሞደታና፤ ቃይ ኦላን ሀይቃናዉ ደእያዋንቱካ ኦላን ሀይቃና። 12 ግብጼ ጾሳቱዋ ኬꬃቱዋ እ ታማን ኦይꬃና፤ ኤቃቱዋካ ጹጋና፥ ዎይ ኦሞዶ አኪደ አፋና። ሄንꬃንቻይ ባረ ጫላ ማይያዋዳን፥ እ ግብጼ ቢታ ማያና። ያቲደ ሄዋፐ ሳሮ ባና። 13 ግብጼ ቢታን ሄልዮፖልሳ ግያ ካታማን ደእያ ሀዉልትያ እ መንሬꬃና፤ ግብጼ ጾሳቱዋ ጎለቱዋካ ታማን ጹጋና” ያጌ’ ያጋ” ያጌዳ።