1 ኦላ ጋዳዋቱ ኡባይ፥ ቃሬሀ ናአይ ዮሀናን፥ ሆሻያ ናአይ አዛርያስነ አሳይ ኡባይ፥ ጉꬃፐ ዎጋ ጋካናዉ ዪደ፥ 2 ትምቢትያ ኦድያ ኤርማሳ ሀዋዳን ያጌድኖ፤ “ኑን ኔና ኦችያዋ ኑዉ ኦꬃርኪ! ሀ አቴዳ ኑ ድራዉ መꬍና ጎዳ ነ ጾሳ ዎሳርኪ! ኑን ካሰ ዳራ፤ ሽን ሀእ ኔን በእያዋዳን፥ ጉꬃቱዋ ጻላላይ አቴዶ። 3 ኑን ብያ ኦግያነ ኑን ኦꬃናባ እ ኑና በሳናዳን፥ መꬍና ጎዳ ነ ጾሳ ኑ ድራዉ ዎሳ” ያጌድኖ።

4 ትምቢትያ ኦድያ ኤርማስ ዛሪደ፥ “ሎአ። ህንተ ጌዳዋዳንካ፥ መꬍና ጎዳ ህንተ ጾሳ ታን ዎሳና፤ ቃይ ህንተፐ አያነ ቆሰናን፥ መꬍና ጎዳይ ኦድያባ ኡባካ ህንተዉ ኦዳና” ያጌዳ።

5 ኡንቱንቱ ዛሪደ፥ ኤርማሳዉ ሀዋዳን ያጌድኖ፤ “መꬍና ጎዳይ ነ ጾሳይ ነ ባጋና ኑዉ ኪትያዋ ኡባ ኑን ፖላና ꬋዮፐ፥ ጾሳይ ባረ ሁጲያን ኑ ቦላ ቱሙነ አማነቴዳ ማርካ ግዶ። 6 ኑን ዶስያዋ ግድና፥ እጽያዋ ግድናካ፥ ኑን ኔና አኮ ኪትያ መꬍና ጎዳይ ኑ ጾሳይ አዛዝያዋ ኑን ኦꬃና። አያዉ ጎፐ፥ መꬍና ጎዳዉ አዛዘቶፐ፥ ኑዉ ኡባባይ ሎአ ግዳናዋ” ያጌድኖ።

7 ታሙ ጋላሳፐ ጉይያን፥ መꬍና ጎዳ ቃላይ ኤርማሳኮ ዬዳ። 8 ያትና፥ እ ቃሬሀ ናኣ ዮሀናና፥ አናና ደእያ ኦላ ጋዳዋቱዋነ አሳ ኡባ፥ ጉꬃፐ ዎጋ ጋካናዉ ጼጊደ፥ 9 ሀዋዳን ያጌዳ፤ “ህንተ ዎሳ ታን አኮ ሺሻና ማላ፥ ህንተ ታና ኪቴዳ መꬍና ጎዳይ እስራኤልያ ጾሳይ ሀዋዳን ያጌ፤ 10 ‘ህንተ ሀእ ሀ ቢታን ኡቶፐ፥ ታን ህንተና ኬጻናፐ አትና ኮልከ፤ ቶካናፐ አትና፥ ሾድከ። አያዉ ጎፐ፥ ታን ካሰ ህንተ ቦላን አሄዳ ኢታባይ ታና ካዮዬዳ። 11 ህንተ ሀእ ያይያ ባብሎነ ካትያዉ አይነ ያዮፕተ! ህንተና አ ኩሽያፐ አሻናዉ ታን ህንተናና ደእያ ድራዉ ያዮፕተ! ታን መꬍና ጎዳይ ሀዋ ኦዳይ። 12 ታን ህንተዉ ቃረታና፤ ያታደ እ ህንተዉ ቃረቲደ፥ ህንተና ህንተ ቢታዉ ዛራናዳን ኦꬃና’ ያጌ።

13 “ሽን ህንተ መꬍና ጎዳዉ፥ ህንተ ጾሳዉ፥ አዛዘተናን እጺደ፥ ‘ሀ ቢታን ኡቶኮ’ ጎፐ፥ 14 ቃይ ህንተ፥ ‘ኦላ ዎርያነ ኦላዉ ፑንያ ማላካታ ስሰናሳንነ ኮሻይ ባይናሳ ግብጼ ቢደ፥ ያን ደአና’ ጎፐ፥ 15 ህንተኖ ይሁዳን አቴዳዋንቶ፥ መꬍና ጎዳይ ህንተና ግያዋ ስስተ። ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ህንተ ግብጼ ቢደ፥ ያን ደአናዉ ቆፋ ቃቾፐ፥ 16 ሄ ህንተ ያዬዳ ኦላይ ግብጼን ህንተና ኦይቃና፤ ህንተ ህርጌዳ ኮሻይካ ህንተና ካሊደ ባና፤ ህንተካ ያን ግብጼን ሀይቃና። 17 ግብጼ ቢታ ቢደ ደአናዉ ቆፋ ቃቼዳ አሳይ ኡባይ ኦላን፥ ዎይ ኮሻን ዎይ ኢታ ሀርግያን ሀይቃና። ታን ኡንቱንቱ ቦላን አህያ ኢታባፐ እቱነ ከስ አከና፤ እቱነ አተና’ ያጌ።

18 “ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘የሩሳላመን ደእያዋንቱ ቦላን ታ ሀንቁነ ታ ይሉ ጉኬዳዋዳን፥ ህንተ ግብጼ ገልያ ዎደ ህንተ ቦላንካ ታ ሀንቁ ሄዋዳን ጉካና። ህንተ ዳጋማ፥ ሸቃ፥ ቶሽያነ ቅሊጭያዋ ግዳንታ፤ ሀ ሳኣ ላኤንꬆ ኡባካ በእክታ’ ያጌ።

19 “ይሁዳን አቴዳዋንቶ፥ መꬍና ጎዳይ ህንተና፥ ‘ግብጼ ቦፕተ!’ ያጌዳ። ታን ሀች ህንተና፥ ‘የኤ!’ ጌዳዋ ኤርተ። 20 ህንተ ታና፥ ‘ኑ ድራዉ መꬍና ጎዳ ኑ ጾሳ ዎሳ፤ እ ነዉ ኦድያባ ኡባካ ኑዉ ኦዳ፤ ኑን ኦꬃና’ ያጊደ፥ ታና መꬍና ጎዳኮ፥ ህንተ ጾሳኮ፥ ኪቴድታ፤ ሄዋን ዎልቃማ ባላ ባሌድታ። 21 እ ጌዳዋ ኡባ ሀች ህንተዉ ኦዳድ። ሽን መꬍና ጎዳይ ህንተ ጾሳይ ታ ባጋና ህንተዉ ኪቴዳ ቃላዉ ህንተ አዛዘተናን እጼድታ። 22 ስም ሀዋ ኤርተ: ህንተ ቢደ ደአናዉ ኮይያ ቢታን ህንተ ኦላን፥ ኮሻንነ ኢታ ሀርግያን ሀይቂደ ዉራና” ያጌዳ።