1 ላፑንꬃ አግናን ካትያ ዛረ ግዲደ፥ ካትያና ኦꬅያ ካፓቱዋፐ እቱ፥ ኤልሻማአ ናኣ ናአይ፥ ናታንያ ናአይ እስማኤል ታሙ አሳቱዋና እትፐ ቢታ ሞድያ ጋዳልያና ጋከታናዉ ምጽጳ ቤዳ። ኡባይካ እትፐ ኡቲደ ቁማ ሚሽን፥ 2 ካታ. 25:25 2 ናታንያ ናአይ እስማኤልነ አናና ደእያ ታሙ አሳቱ ባረንቱ ማሻ ማሻ ከሲደ፥ ባብሎነ ካቲ ይሁዳ ሞድያዋ ኦꬂደ ሱንꬄዳ አህካማ ናኣ ጋዳልያ ዎꬌድኖ። 3 ሄዋ ቦላካ ቃይ እስማኤል ምጽጳን ጋዳልያና ደእያ አይሁዳቱዋነ ባብሎነ ኦላንቻቱዋ ኡባ ዎꬌዳ።

4 ጋዳሊ ሀይቄዳ ዎንተꬃ ጋላስ፥ አ ሀይቁዋ ኦንነ ኤራናፐ ካሰቲደ፥ 5 ሰኬማፐ፥ ሴሎፐነ ሳማርያፐ ሆስፑን ታሙ አሳቱ ካዮቲደ፥ ባረንቱ ቡቻ ሜዲደ፥ ባረንቱ ማዩዋ ፔꬊደነ ባረንቱ ቦላካ ፑዚደ ዬድኖ። ኡንቱንቱ መꬍና ጎዳ ጎልያዉ እምያ ካꬃ ያርሹዋነ እጻና እሞታ አሄድኖ። 6 እስማኤል ምጽጳፐ ከሲደ፥ ዬኪደ ኡንቱንቱና ጋከታናዉ ቤዳ፤ ኡንቱንቱና ጋከቴዳ ዎደ፥ “አህቃማ ናኣ ጋዳልያኮ ሃ ዪተ፤ አ በእተ” ያጌዳ። 7 ኡንቱንቱ ካታማ ግዶ ገልያንን፥ እስማኤልነ አናና ደእያ አሳቱ ሄ አሳቱዋ ዎꬊደ፥ ሃꬃ ዳጋይያ ኦላን ኦል አጌድኖ።

8 ሽን ሄ ሆስፑን ታሙ አሳቱዋፐ ታማቱ እስማኤላ ሀዋዳን ያጊደ ዎሴድኖ፤ “ሀእ ኑና ዎꬎፓ! ኑን ኑ ሾይቃን ቆሴዳ ዳሮ ዛርጋይ፥ ባንጋይ፥ ዎጋራ ዛይቲነ ኤሳይ ደኤ” ያጌድኖ። እ ኡንቱንቱ ዎናን የድ አጌዳ። 9 እስማኤል ዎꬌዳ አሳ ኡባ ኦሌዳ ሃꬃ ዳጋይያ ኦላይ፥ እስራኤልያ ካቲ ባእሽ ኦላናዉ ዬዳ ዎደ፥ ካቲ አሳ ቦክሴዳ ዎልቃማ ሃꬃ ዳጋያናዉ ግምቤዳ ኦላ። ናታንያ ናአይ እስማኤል ሄ ኦላ አሃን ኩንꬄዳ። 10 እስማኤል ካትያ ማጫ ናናቱዋነ ምጽጳን አቴዳ አሳ ኡባ ኦሞዴዳ። ሄዋንቱ ካትያ ናግያዋንቱ ካፑ ናቡዛራዳን አህቃማ ናኣ ጋዳልያና እትፐ ምጽጳን ዎꬄዳዋንታ። እ ኡንቱንታ ኦሞዲደ፥ ባረናና አኪደ፥ አሞና ቢታ ባናዉ ደንዴ።

11 ቃሬሀ ናአይ ዮሀናንነ አናና እትፐ ደእያ ኦላ ጋዳዋቱ እስማኤል ኦꬄዳ ኢታባ ኡባ ስሴድኖ። 12 ባረንቱ አሳ አኪደ፥ አናና ኦለታናዉ ቤድኖ፤ እስማኤላካ ጋባኦናን ደእያ ዎልቃማ ደልእያ ማታን ጋኪደ ኦይቄድኖ። 13 እስማኤል ኦሞዲደ ባረናና አፌዳ አሳይ ኡባይ ቃሬሀ ናኣ ዮሀናናነ አናና ደእያ ኦላ ጋዳዋቱዋ በኤዳ ዎደ፥ ሎይꬅ ናሸቴድኖ። 14 ሄ ኦሞደቴዳዋንቱ ኡባይ ጉየ ስሚደ ቢደ፥ ቃሬሀ ናኣ ዮሀናናን ጋከቴድኖ። 15 ሽን እስማኤልነ ሀራ ሆስፑን አሳቱ እትፐ ዮሀናናፐ ከስ አኪደ፥ አሞና ቢታ ባቃቴድኖ።

16 ሄዋፐ ጉይያን፥ እስማኤል ጋዳልያ ዎꬍ ስሚደ፥ ምጽጳፐ ኦሞዲደ አሄዳ ኦላንቻቱ፥ ማጫ አሳቱ፥ ናናቱነ ሙሬሳቱ ኡባይ ቃሬሀ ናኣ ዮሀናናነ ሀራ ኦላ ጋዳዋቱዋና ደንዲደ ቤድኖ። 17 ኡንቱንቱ ያፐ ደንዲደ፥ ግብጼ ባናዉ ቤተሌመ ማታን ደእያ ጌሩታ-ክምሃማ ግያ ሳኣን ሸምፔድኖ። 18 ኡንቱንቱ ግብጼ ቤዳዌ ባብሎና ካቲ ሱንꬄዳ አክቃማ ናኣ ጎዶልያ እስማኤሊ ዎꬌዳ ድራዉ ባብሎናቶ ያዪደ ባብሎናፐ ባቃቲደ፥ ግብጼ ባናዉ ዳንዳዬድኖ።