1 ካትያ ናግያዋንቱ ካፑ ናቡዛራዳን ኤርማሳ ራማን ብል ስምና፥ መꬍና ጎዳ ቃላይ ኤርማሳኮ ዬዳ። ኤርማስ ካሰ ናቡዛራዳን የሩሳላመፐነ ይሁዳፐ ኦሞዲደ፥ ባብሎነ ቢታ አፋናዉ ሳንሳላታን ቃቼዳ አሳ ግዶን ደኤ።

2 ካትያ ናግያዋንቱ ካፑ ኤርማሳ ዱማ ከሲደ፥ ሀዋዳን ያጌዳ፤ “መꬍና ጎዳይ ነ ጾሳይ ሀ ባየꬃ ሀ ቢታ ቦላን አሀና ጌዳ። 3 ጌዳዋዳን ሀእ መꬍና ጎዳይ አሄዳ፤ መꬍና ጎዳ ቦላን ህንተ ናጋራ ኦꬄዳ ድራዉነ አዉ አዛዘተናን እጼዳ ድራዉ፥ ሀዌ ኡባይ ሀኔዳ። 4 በአ፥ ሀእ ታን ነ ኩሽያን ደእያ ሳንሳላታ ብላደ ኔና የዳድ። ታናና ባብሎነ ቢታ ባና ጎፐ ደንዳ፤ ታን ነዉ ኮሽያባ ኡባ ኩንꬃና። ባብሎነ ቢታ ባናዉ ኮያና ꬋዮፐ ቦፓ። ቢታይ ኡባይ ነ ስንꬃን ደኤ፤ ኔና ሎኤዳ ሳኣ ሀቃነ ባ” ያጌዳ።

5 ኤርማስ አ ማታፐ ቤናን ደእሺና፥ ናቡዛራዳን ጉጂደካ ያጌዳ፤ “ሳፋና ናኣ ናኣ፥ አህቃማ ናኣ ጋዳልያኮ ባ፤ አያዉ ጎፐ፥ ባብሎነ ካቲ ናቡካዳናጾር አ ይሁዳ ካታማቱዋ ሞድያዋ ኦꬂደ ሱንꬄዳ። ሄዋ ድራዉ፥ አናና እትፐ ግዳደ፥ ሄዋን አሳና ደአ። ዎይ ኔና ሎኤዳ ሳኣ ሀቃነ ባ” ያጌዳ። ሄዋፐ ጉይያን፥ ካትያ ናግያዋንቱ ካፑ አዉ ቁማነ ሀራ ሽንቃ እሚደ የዴዳ። 6 ኤርማስ ምጽጳን ደእያ አህቃማ ናኣ ጋዳልያኮ ቤዳ። እ ሄዋን አቴዳ አሳና እትፐ ደኤዳ።

7 ይሁዳ ኦላ ጋዳዋቱዋፐነ ኦላንቻቱዋፐ አማሬዳዋንቱ ባረንቱ ኩሽያ ባብሎነ ካትያዉ ብሮ እምበይክኖ። ኡንቱንቱ ባብሎነ ካቲ ጋዳልያ ሄ ቢታ ሞድያዋ ኦꬂደ ሱንꬄዳዋነ ባብሎነ ቢታ ኦሞደቲደ ቤናን ይሁዳን አቴዳ ህዬሳቶ ካፑዋ ኦꬄዳዋ ስሴድኖ። 2 ካታ. 25:22-24 8 ናታንያ ናአይ እስማኤል፥ ቃሬሀ ናናቱ ዮሀናንነ ዮናታን፥ ታንሁሜታ ናአይ ሳራይ፥ ናጾፋ ካታማፐ ዬዳ ኤፋያ ናናቱነ ማእካ ካታማፐ ዬዳ እት ብታንያ ናአይ ያዛኒ ባረንቱ ኦላንቻቱዋ ኡባና ጋዳልያኮ ምጽጳ ዬድኖ። 9 ሳፋና ናኣ ናአይ፥ አህቃማ ናአይ ጋዳሊ ኡንቱንቶ ሀዋዳን ያጊደ ጫቄዳ፤ “ባብሎነቶ ኩሽያ እማናዉ ያዮፕተ፤ ሀ ቢታን ኡቲደ ደእተ፤ ባብሎነ ካትያዉካ ሞደትተ። ያቶፐ፥ ኡባባይ ህንተዉ ሎአ ግዳናዋ። 10 ታን ምጽጳን ኡታደ፥ ባብሎነ ቢታፐ ህንተናና ጋከታናዉ ይያ ኡባና ህንተ ዶና ግዳደ ሃሳያና። ሽን ህንተ ህንተ ደእያ ሄራን ሄራን ዎይንያ፥ ዎጋራ ዛይትያነ ሀራ ኦፍንꬃ ካꬃ አይፍያ ኡባ ሺሺደ ዳጋይተ” ያጌዳ።

11 ሄ ዎደ ሞኣባ ቢታን፥ አሞና ቢታን፥ ኤዶማ ቢታንነ ሀራ ቢታቱዋን አይሁዳ ኡባይ ባብሎነ ካቲ አማሬዳ ይሁዳ አሳቱ ይሁዳን አታና ማላ ኦꬄዳዋነ ኡንቱንታ ሞድያዋ ኦꬂደ፥ ሻፋና ናኣ አህቃማ ናኣ ጋዳልያ ሱንꬄዳዋ ስሴድኖ። 12 ባረንቱ ላለቲደ ደእያ ቢታቱዋፐ ይሁዳ ስሚደ፥ ጋዳሊ ደኢያሳ ምጽጳ ዬድኖ። ሄዋን ኡንቱንቱ ዳሮ ዎይንያነ ሀራ ኦፍንꬃ ካꬃ አይፍያ ሺሺደ ዳጋዬድኖ።

13 ሄዋፐ ጉይያን፥ ቃሬሀ ናአይ ዮሀናንነ ኩሽያ እምቤና ኦላ ጋዳዋቱ ኡባይ ጋዳልያኮ ምጽጳ ዪደ፥ 14 “አሞና ካቲ ባአሊስ ናታንያ ናኣ እስማኤላ ኔና ዎꬋና ማላ የዴዳዋ ኤራይ?” ያጌድኖ። ሽን እ ኡንቱንቱ ግያዋ አማነናን እጼዳ።

15 ሄዋፐ ጉይያን፥ ቃሬሀ ናአይ ዮሀናን ምጽጳን ደእያ ጋዳልያኮ ዪደ፥ ጹራን ሀዋዳን ያጌዳ፤ “ኦንነ ኤረናን ደእሺና ባደ፥ ናታንያ ናኣ እስማኤላ ታን ዎꬋና። አያዉ ጎፐ፥ እ ኔና ዎꬍያዋ ግዶፐ፥ ነ ማታን ሺቄዳ አይሁዳ ኡባይ ላለታና፤ ቃይ ይሁዳን አቴዳ አሳይ ኡባይካ ዉራና” ያጌዳ።

16 ሽን አህቃማ ናአይ ጋዳሌ ዛሪደ፥ ሀዋዳን ያጌዳ፤ “እስማኤላባ ኔን ኦድያባይ ኡባይ ዎርዱዋ ግድያ ድራዉ፥ ሄዋ ማላባ ኦꬆፓ” ያጌዳ።