1 ሰደቅያስ ይሁዳን ካተቴዳ ኡዱፑንꬃ ላይꬃን፥ ታማንꬃ አግናን፥ ባብሎነ ካቲ ናቡካዳናጾርነ አ ኦላንቻቱ ኡባይ ዪደ፥ የሩሳላመ ዶዴድኖ። 2 ሰደቅያስ ካተቴዳ ታማነ እተንꬃ ላይꬃን፥ ኦይደንꬆ አግናን፥ ኡዱፑንꬃ ጋላሳን ባብሎነ ኦላንቻቱ ካታማ ግምቢያ መንꬄድኖ። 3 ሄ ዎደ ባብሎነ ካትያ ካፓቱ፥ ነርጋል-ሻሬጸራ፥ ሳምጋር-ነባ፥ ሳርሰኪማነ ሀራ ነርጋል-ሻሬጸራ ጌተትያዋንቱ፥ ሀራ ጮራ ሞድያዋንቱና እትፐ ዬድኖ፤ ግዶ ፐንግያ ግያ ፐንግያን ኡቴድኖ።

4 ይሁዳ ካቲ ሰደቅያስነ አ ኦላንቻቱ ኡባይ ባብሎነ ኦላንቻቱዋ በኤዳ ዎደ፥ ቃማን ካታማፐ ከሲደ፥ ካትያ አታክልትያ ሳኣ አፍያ ኦግያ ኦይቂደ፥ ላኡ ድርሳ ግምበቱዋ እትፐ ጋꬅያ ፐንግያና ባቃቴድኖ። ኡንቱንቱ ዮርዳኖሳ ድልቡዋኮ ስሚደ ቤድኖ። 5 ሽን ባብሎነ ኦላንቻቱ ኡንቱንታ ጉየና የደርሲደ፥ እያርኮ ደምባ ጋꬂደ፥ ሰደቅያሳ ኦይቄድኖ። ሀማታ ቢታን፥ ርብላ ካታማን ደእያ ካትያ ናቡካዳናጾራኮ አፌድኖ። ካቲ ናቡካዳናጾር ያን ሰደቅያሳ ቦላ ፕርዴዳ። 6 ቃይ ሰደቅያሳ አቱማ ናናቱዋ ሰደቅያስ ጼልሽን፥ ያን ርብላ ካታማን ዎꬌዳ፤ ይሁዳ ካፓቱዋ ኡባካ ዎꬌዳ። 7 ሄዋፐ ጉይያን፥ ሰደቅያሳ አይፈቱዋ ዎጭ ከሲደ፥ አ ባብሎነ ቢታ አፋናዉ ሳንሳላታን ቃቼዳ።

8 ሄ ዎደ ባብሎነ ኦላንቻቱ ካትያ ጎልያነ አሳይ ደእያ ኬꬃቱዋ ኡባ ታማን ጹጌድኖ፤ የሩሳላመ ግምቢያካ ኮሌድኖ። 9 ካትያ ናግያዋንቱ ካፑ ናቡዛራዳን ካታማን አቴዳ አሳቱዋነ ካዲደ ባረናን ጋከቴዳ አሳቱዋ ኡባ እትፐ ኦሞዱዋን ባብሎነ ቢታ አፌዳ። 10 ሽን ካትያ ናግያዋንቱ ካፑ ናቡዛራዳን አያይነ ኡንቱንቶ ባይና ህዬሳቱዋፐ አማሬዳዋንታ ይሁዳን አጊደ፥ ኡንቱንቶ ዎይንያ ቱራ ሳአቱዋነ ጎሽያ ጋደቱዋ እሜዳ።

11 ናቡካዳናጾር ካትያ ናግያዋንቱ ካፑዋ ናቡዛራዳና ሀዋዳን ያጊደ አዛዜዳ፤ 12 “ባደ ኤርማሳ ኮያ ደማደ፥ አዉ ኮሽያባ ኡባ ኦꬃ፤ አ ቦላ ሀራ ኢታባ አያነ ኦꬆፓ” ያጌዳ። 13 ሄዋ ድራዉ፥ ናቡዛራዳን፥ ናቡሻዝባን፥ ነርጋል-ሻሬጸርነ ባብሎነ ካትያ ካፓቱ ኡባይ እትፐ ግዲደ ኪቲደ፥ 14 ኤርማስ ቃሸት ኡቴዳ፥ ናግያዋንቱ ዳባባፐ ከሴድኖ። ባረ ጎለ አፊደ ዎꬃና ማላ፥ ሳፋና ናኣ ናኣ፥ አህቃማ ናኣ ጋዳልያዉ ሀዳራ እሜድኖ። ሄዋፐ ደንዴዳዋን ኤርማስ ባረ ቢታ አሳና እትፐ ደኤዳ።

15 ኤርማስ ናግያዋንቱ ዳባባን ጎርደት ኡት ደእሽን፥ መꬍና ጎዳ ቃላይ አኮ ሀዋዳን ያጊደ ዬዳ፤ 16 “ባደ ቶጵያ አሳ ግድያ አበድመሌካዉ ሀዋዳን ያጋ፤ ‘ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ “ሀዋፐ ካሰ ታን ኦዴዳዋዳንካ ሀ ካታማ ቦላን ሎኦባ ግደናን፥ ባየꬃ አሀና። ሄዌ ኡባይ ሀንያ ዎደ፥ ኔንካ ሀ ካታማን ኡታደ፥ ነ አይፍያን በአና። 17 ግዶ ሽን፥ ሄ ጋላሳን ታን መꬍና ጎዳይ ኔና ዎꬃ አካና፤ ኔን ያይያ ነ ሞርከቱዋ ኩሽያንካ አꬋአደ እመታካ። 18 ታን ኔና አሻና፤ ኔን ኦላን ሀይቃካ፤ ኔን ታናን አማነቴዳ ድራዉ፥ ሀይቁዋፐ አታናሳ። ታን መꬍና ጎዳይ ሀዋ ኦዳይ” ያጌ’ ያጋ” ያጌዳ።