1 ማታና ናአይ ሻፋጸ፥ ፓሽሁራ ናአይ ጋዳሌ፥ ሸሌምያ ናአይ የሁካልነ ማልክያ ናአይ ፓሽሁር ኤርማስ አሳ ኡባዉ ኦዴዳ ቃላቱዋ ስሴድኖ። 2 ኤርማስ ጊደ፥ “መꬍና ጎዳይ ሀዋዳን ያጌ፤ ‘ሀ ካታማን አትያ ኦንነ ኦላን፥ ኮሻንነ ኢታ ሀርግያን ሀይቃና። ሽን ባብሎነቱዋኮ ብያ ኦንነ ሀይቀና። ባረ ሁጲያ አሻና፤ ፓጻካ ደአና’ ያጌ። 3 ቃይካ መꬍና ጎዳይ፥ ‘ሀዌ የሩሳላመ ካታማይ ቱሙፐ ባብሎነ ካትያ ኦላንቻቱዋ ኩሽያን አꬊደ እመታና፤ ኡንቱንቱካ አ ኦሞዳና’ ያጌ” ያጌዳ።

4 ሄዋፐ ጉይያን፥ ካፓቱ ካትያኮ ቢደ፥ ሀዋዳን ያጌድኖ፤ “ሀ ብታኒ ሀይቃናዉ ኮሼ፤ ሀዋ ማላ ጻላ ቃላ ሃሳዪደ፥ ሀ ካታማን ደእያ ኦላንቻቱነ አሳይ ኡባይ ሹጋናዳን ኦꬄዳ። እ አሳ ቆህያዋ አሞቴፐ አትና፥ ሳሮባ አሞተና” ያጌድኖ።

5 ካቲ ሰደቅያስ ዛሪደ፥ ሀዋዳን ያጌዳ፤ “ህንተ አ ቦላ ኦꬃና ጌዳዋ አያነ ታን ህንተና ድጋናዉ ዳንዳይከ” ያጌዳ። 6 ኡንቱንቱ ኤርማሳ ካትያ ጎልያ ዳባባን ደእያ፥ ካትያ ናኣ ማልክያ ሃꬃ ኦላን የጌድኖ፤ ኡንቱንቱ ዎዶሩዋን አ ዱገ ዎꬄድኖ። ሄ ዎደ ሄ ኦላን ስልሙዋፐ አትና፥ ሃꬅ ባዋ፤ ኤርማስ ሄ ስልሙዋ ግዶ ገሌዳ።

7 ሽን ቶጵያ አሳ ግድያ፥ ካትያ ጎልያን ኦꬅያ፥ አበድመሌካ ግያዌ ኤርማስ ኦላን ኦለቴዳዋ ስሴዳ። ሄ ዎደ ካቲ ቢንያማ ፐንግያን ፕርዳ ችሎታን ኡቴዳ። 8 አበድመሌክ ካትያኮ ቢደ፥ ሀዋዳን ያጌዳ፤ 9 “ታ ጎዳዉ ካትያዉ፥ ሀ አሳቱ ዎልቃማ ኢታባ ኦꬄድኖ፤ ሄዌካ አዬ ጎፐ፥ ትምቢትያ ኦድያ ኤርማሳ ሃꬃ ኦላን የጌድኖ። ቃይ ካታማን ቁም ባይና ድራዉ፥ እ ሄዋን ኮሻን ሀይቄ” ያጌዳ።

10 ካቲ ዛሪደ፥ ቶጵያ አሳ ግድያ አበድመሌካ፥ “ሀዋፐ ሀታሙ አሳ ኔናና አካደ ባደ፥ ኤርማስ ሀይቀናን ደእሺና፥ ሃꬃ ኦላፐ ከስተ” ያጌዳ።

11 አበድመሌክ አሳ አኪደ ቤዳ፤ ካትያ ጎልያን ዱረታ ምንጅያ ክፍልያፐ ጋርሳ ባጋና ደእያ ክፍልያ ገሊደ፥ ኤጫ ማዩዋ ጩርቃ አኬዳ። ሄ ጩርቃ ዎዶሩዋ ጼራን ቃቺደ፥ ኤርማሳዉ ዱገ ኦላ ግዶ የዴዳ። 12 ቶጵያ አሳ ግድያ አበድመሌክ ኤርማሳ ኦላ ግዶ ዱገ ጼጊደ፥ “ሀዋ ማዩዋ ጩርቃ ዎዶሩዋፐ ጋርሳ ባጋና ነ ሾጵያን ዎꬃ” ያጌዳ። ኤርማስካ እ ጌዳዋዳን ኦꬄዳ። 13 ያትና፥ ሄ ዎዶሩዋን ጎቺደ፥ ኤርማሳ ኦላፐ ከሴድኖ። ናግያዋንቱ ዳባባ ገልሲደ ጎርዴድኖ።

14 ሄዋፐ ጉይያን፥ ካቲ ሰደቅያስ ኤርማሳኮ ኪት አህሲደ፥ መꬍና ጎዳይ ጌሻ ጎልያ ገልያ ሄዘንꬆ ፐንግያ ማታን አ፥ “ታን እትባ ኔና ኦቻና። ኔን ታፐ አያነ ቆሶፓ” ያጌዳ።

15 ኤርማስ ዛሪደ ሰደቅያሳዉ፥ “ታን ኦዶፐ፥ ኔን ታና ዎꬍኪ? ታን ዞርናካ፥ ኔን ስሳካ” ያጌዳ።

16 ካቲ ሰደቅያስ ኤርማሳዉ ቆሱዋን ሀዋዳን ያጊደ ጫቄዳ፤ “ታን ኔና ዎናዋነ ቃይ ኔና ዎꬋናዉ ኮይያዋንቶ አꬃደ እመናዋ ኑዉ ደኡዋ እሜዳ መꬍና ጎዳ ሱንꬃን ጫቃይ” ያጌዳ።

17 ኤርማስ ሰደቅያሳዉ ዛሪደ፥ “መꬍና ጎዳይ፥ ኡባፐ ዎልቃማ ጾሳይ፥ እስራኤልያ ጾሳይ ሀዋዳን ያጌ፤ ‘ባብሎነ ካትያ ካፖቶ ኩሽያ እሞፐ፥ ኔን ፓጻ አታና፤ ሀ ካታማይካ ታማን ጹገተና፤ ኔንካ ነ ጎልያ አሳይካ ፓጻ ደአና። 18 ሽን ኔን ኡንቱንቶ ኩሽያ እመናን እጾፐ፥ ሀ ካታማ ባብሎነቱ ኦሞዳና፤ ኡንቱንቱ አ ጹጋና፤ ኔንካ ኡንቱንቱፐ ከሳ አካካ’ ያጌ” ያጌዳ።

19 ቃይካ ካቲ ሰደቅያስ ኤርማሳ፥ “ታን ያይያዌ ሀ ቢታፐ ካዲደ፥ ባብሎነቱዋኮ ቤዳ አይሁዳቱዋሳ። አያዉ ጎፐ፥ ባብሎነቱ ታና ኡንቱንቱ ኩሽያን አꬂደ እሞፐ፥ አይሁዳቱ ታና ቱጋያና” ያጌዳ።

20 ኤርማስ ዛሪደ፥ “አየንቶ ባዋ! ኡንቱንቱ ኔና ኡንቱንቶ አꬂደ እምክኖ። ኦድያ መꬍና ጎዳ ቃላዉ ሀያና አዛዘታ። ሄዌ ነዉ ሎኦ ግዳናዋ፤ ኔንካ ፓጻ አታናሳ። 21 ሽን ኔን ኩሽያ እመናን እጾፐ፥ መꬍና ጎዳይ ታና በሴዳ ሳጻይ ደኤ። 22 ሄዌካ አዬ ጎፐ፥ ይሁዳ ካትያ ጎልያን አቴዳ ማጫ አሳቱ ኡባይ ኦሞደቲደ፥ ባብሎነ ካፓቱዋኮ ባና። ኡንቱንቱ ኔና ሀዋዳን ያጋና፤ ‘ነዉ ማታ ላገ ግድያዋንቱ ኔና ባለꬄድኖ፤ ኡንቱንቱ ኔና ጾኔድኖ። ሽን ሀእ ነ ገዲ ስልሙዋ ግዶ ገልና፥ ሄ ላገቱ ኔና የጊደ ቤድኖ’ ያጋና። 23 ቃይ ነ ማቼቱነ ነ ናናቱ ኡባይ ባብሎነቱዋን ኦሞደቲደ ባና። ኔንካ ኡንቱንቱ ኩሽያፐ ከሳ አካካ፤ ባብሎነ ካቲ ኔና ኦይቃና። ሀ ካታማይካ ታማን ጹገታና” ያጌዳ።

24 ሰደቅያስ ኤርማሳዉ ዛሪደ፥ ሀዋዳን ያጌዳ፤ “ሀዋ ኔን ታዉ ኦዴዳዋ አሳዉ ኦዳና ꬋዮፐ፥ ኔን ሀይቃካ። 25 ካፓቱ ታን ኔናና ሃሳዬዳዋ ስሲደ ዪደ፥ ‘ኔናና ካትያና አያ ሃሳዬደንቶ፥ ኑዉ ኦዳ። ኔን ኑዉ ቆሰናን ኦዶፐ፥ ኑን ኔና ዎꬎኮ’ ያጊደ ኔና ኦቻና። 26 ኔን፥ ‘ታን ሄ ሳኣን ሀይቀናዳን፥ ታና ዛራደ ቃሾ ጎልያ ግድያ ዮናታና ጎልያ የደናዳን፥ ካትያ ዎሳድ’ ያጋደ ዛራ” ያጌዳ።

27 ሄዋፐ ጉይያን፥ ካፓቱ ኡባይ ኤርማሳኮ ዪደ፥ ሄ ኦሻ ኦቼድኖ። ካቲ አ አዛዜዳዋዳን፥ እካ ኡንቱንቶ ኦዴዳ። ኡንቱንቱካ ጮኡ ጊደ ባሽ አጌድኖ፤ አያዉ ጎፐ፥ ኤርማስ ካትያና ሃሳይሽን ስሴዳዌ ኦንነ ባዋ። 28 የሩሳላመ ኦይቀታና ዎዲ ጋካናዉ፥ ኤርማስ ናግያዋንቱ ዳባባን ጎርደቲደ ጋምኤዳ። ህዝ. 33:21