1 ባብሎነ ካቲ ናቡካዳናጾር እዮአቄማ ናኣ ዮኣኪና ሳኣን እዮስያሳ ናኣ ሰደቅያሳ ይሁዳ ቢታን ካዉꬄዳ።2 ካታ. 24:17፤ 2 ኦዱዋ 36:10 2 ሰደቅያስ፥ አናና ኦꬅያ ካፓቱነ ሄ ቢታን ደእያ አሳይ ኡባይካ መꬍና ጎዳይ ትምቢትያ ኦድያ ኤርማሳ ባጋና ኦዴዳ ቃላዉ አዛዘትበይክኖ። 3 ሽን ካቲ ሰደቅያስ ሸሌምያ ናኣ የሁካላነ ማእሴያ ናኣ ቄስያ ጻፋንያ ሀዋዳን ያጊደ፥ ኤርማሳኮ ኪቴዳ፤ “ሀያና ኑ ድራዉ መꬍና ጎዳ ኑ ጾሳ ዎሳ” ያጌዳ።

4 ሄ ዎደ ኤርማስ ብሮ ቃሸት ቤና ድራዉ፥ አሳ ግዶን ስመረቴ። 5 ግብጼ ካትያ ኦላንቻቱ፥ ግብጼፐ ከሲደ ይያዋ የሩሳላመ ዶዴዳ ባብሎነ ኦላንቻቱ ስሴዳ ዎደ፥ ኡንቱንቱ የሩሳላመፐ አጊደ፥ ጉየ ስሜድኖ።

6 ሄዋፐ ጉይያን፥ መꬍና ጎዳ ቃላይ ትምቢትያ ኦድያ ኤርማሳኮ ዬዳ። 7 መꬍና ጎዳይ እስራኤልያ ጾሳይ ሀዋዳን ያጌ፤ “ታና ህንተ ኦቻና ማላ፥ ህንተና ኪቴዳ ይሁዳ ካትያዉ ሀዋዳን ያግተ፤ ‘በእተ፥ ህንተና ማዳናዉ ከሴዳ ግብጼ ካትያ ኦላንቻቱ ባረንቱ ቢታ ስሚደ ባና። 8 ቃይ ባብሎነ ኦላንቻቱ ስሚደ ያና፤ ኦለቲደ፥ ሀ ካታማ ኦይቃና፤ ታማንካ አ ጹጋና’ ያግተ” ያጌ።

9 መꬍና ጎዳይ ሀዋዳን ያጌ፤ “ ‘ባብሎነ ኦላንቻቱ ላኤንꬆ ስሚደ ዪክኖ’ ያጊደ ህንተና ህንተረካ ጭሞፕተ። አያዉ ጎፐ፥ ኡንቱንቱ ስሚደ ያናዌ ደኤና! 10 ህንተ ባብሎነ ኦላንቻቱዋ ሙልያ ጾንንቶነ ኡንቱንቱፐ አቲደ፥ ኦላን ማዱጺደ፥ ዱንካንያ ግዶን ግሴዳዋንቱካ ደንዲደ፥ ሀ ካታማ ታማን ጹጋና” ያጌ።

11 ግብጼ ካትያ ኦላንቻቱ ማቴዳ ድራዉ፥ ባብሎነ ኦላንቻቱ የሩሳላመ አጊደ፥ ባረንቱ ደእያ ሳኣፐ ጉየ ስሜድኖ። 12 ሄ ዎደ ኤርማስ ባረና ጋክያ ጋድያ አካናዉ ቢንያማ ቢታ ባናዉ የሩሳላመፐ ደንዴ። 13 ግዶ ሽን፥ እ ቢደ፥ ቢንያማ ፐንግያ ግያ ፐንግያ ጋክሽና፥ ፐንግያ ናግያዋንቱፐ እቱ፥ ሀናንያ ናኣ ሸሌምያ ናአይ፥ ዪርያ ግያዌ አ፥ “ነ ኑና ካዳደ ባብሎነ ባሳ ግድኪ?” ያጊደ ኦይቄዳ።

14 ኤርማስ ዛሪደ፥ ሀዋዳን ያጌዳ፤ “ኔን ግያዌ ዎርዱዋ፤ ታን ባብሎነ ብያ አሳ ግድከ” ያጌዳ። ሽን ዪሪ እ ግያዋ ስሰናን እጼዳ፤ ኤርማሳ ኦይቂ አኪደ፥ ካፓቱዋኮ አፌዳ። 15 ካፓቱካ ሎይꬅ ሀንቀቲደ፥ ኤርማሳ ዋꬌድኖ፤ ኡንቱንቱ ቃሾ ጎልያ ከሴዳ፥ ጻፍያ ዮናታና ጎልያን አፊደ ዎꬄድኖ። 16 ኤርማስ ሄዋን ቢታ ግዶን ደእያ ክፍልያን ዳሮ ዎድያ ጋምኤዳ።

17 ሄዋፐ ጉይያን፥ ካቲ ሰደቅያስ አሳ ኪቲደ፥ ኤርማሳ ባረ ደኢያሳ ካትያ ጎልያ ጼስሴዳ፤ አሳይ ኤረናን አ፥ “መꬍና ጎዳይ ነዉ ኦዴዳዌ አየንቶ ደኢ?” ያጊደ ኦቼዳ።

ኤርማስ ዛሪደ፥ “ኤ ደኤ፤ ኔን ባብሎነ ካትያ ኩሽያን አꬋአደ እመታና” ያጌዳ። 18 ቃይካ ኤርማስ ካትያ ሰደቅያሳ ሀዋዳን ያጊደ ኦቼዳ፤ “ታና ህንተ ቃሾ ጎልያን የጋናዉ ታን ነ ቦላን፥ ነዉ ኦꬅያ ካፖቱዋ ቦላን ዎይ ሀ አሳ ቦላን አያ ባይዙዋ ኦꬃድታ? 19 ቃይ፥ ‘ባብሎነ ካቲ ህንተ ቦላንነ ሀ ቢታ ቦላን ዪደ ኦለና’ ያጊደ ነዉ ትምቢትያ ኦዴዳ ነ ናባቱ ሀእ ሀቃን ደእኖ? 20 ሄዋ ድራዉ፥ ታ ጎዳዉ ካትያዉ፥ ስሳ! ታን ኦችያዋ ኔን ፖላና ማላ፥ ኔና ዎሳይ። ታን ሄ ሳኣን ሀይቀናዳን፥ ቃሾ ጎልያ ግድያ ጻፍያ ዮናታና ጎልያዉ ታና ጉየ ዛሮፓ” ያጌዳ።

21 ሄዋ ድራዉ፥ ካቲ ሰደቅያስ ናግያዋንቱ ዳባባን ኤርማሳ ዎꬃና ማላ አዛዜዳ። ሄዋን አ ዎꬅ ደእሽን፥ ካታማፐ ዳቡ ꬋያና ጋካናዉ፥ ሀች ሀች እት እት ዳቡዋ ኡክያሳፐ አይ አሂደ፥ አዉ እሜድኖ። ሄዋ ድራዉ ኤርማስ ካትያ ዛባን ናጉዋን ጋምኤዳ።