1 እዮስያሳ ናአይ ይሁዳ ካቲ እዮአቄም ካተቴዳ ኦይደንꬆ ላይꬃን፥ መꬍና ጎዳይ ኤርማሳ ሀዋዳን ያጌዳ፤ 2 ካታ. 24:1፤ 2 ኦዱዋ 36:5-7፤ ዳኔላ 1:1-2 2 “እት ጻꬃ ማጻፋ አካደ፥ ታን እዮስያሳ ዎድያን ኮይሮ ነዉ ኦዴዳ ጋላሳፐ ዶማደ፥ ሀች ጋካናዉ እስራኤልያ ቦላ፥ ይሁዳ ቦላነ ሀራ ካዉተꬃቱዋ ኡባ ቦላ ሃሳዬዳ ቃላ ኡባ ጻፋ። 3 ታን ይሁዳ አሳ ቦላ አሀና ጋደ ሀልቼዳ ቦሻ ኡባ ስሲደ፥ ኦን ኤሪ፥ ኡንቱንቱ ባረንቱ ኢታ ኦሱዋፐ ስማነንቶነ። ታን ኡንቱንቱ ናቁዋነ ኡንቱንቱ ናጋራ አቶ ጋና” ያጌዳ።

4 ሄዋ ድራዉ፥ ኤርማስ ኔርያ ናኣ ባሮካ ጼሴዳ፤ መꬍና ጎዳይ አዉ ኦዴዳባ ኡባ ባሮካዉ ኦድና፥ እ ጻꬃ ማጻፋን ጻፌዳ። 5 ሄዋፐ ጉይያን፥ ኤርማስ ባሮካ፥ “ታን ቃሾ ጎልያን ደእያ ድራዉ፥ መꬍና ጎዳ ጌሻ ጎልያ ገላናዉ ዳንዳይከ። 6 ሄዋ ድራዉ፥ ኔን አሳይ ጾምያ ጋላስ መꬍና ጎዳ ጎልያ ባደ፥ ታን ኦድና፥ ኔን ጻꬃ ማጻፋን ጻፌዳ መꬍና ጎዳ ቃላ ኡንቱንቶ ናባባ፤ ባረንቱ ካታማቱዋፐ ዬዳ ይሁዳ አሳዉ ኡባዉካ ናባባ። 7 ሀ አሳ ቦላ መꬍና ጎዳይ አዋዬዳ ሀንቁነ ይሉ ኢታ ግድያ ድራዉ፥ ኦን ኤሪ፥ ኡንቱንቱ ባረንቱ ኢታ ኦሱዋፐ ስሚደ፥ መꬍና ጎዳ ዎሳነንቶነ” ያጌዳ። 8 ኔርያ ናአይ ባሩክ ትምቢትያ ኦድያ ኤርማስ አዛዜዳዋዳን፥ መꬍና ጎዳ ጎልያን መꬍና ጎዳ ቃላ ኡባ ናባቤዳ።

9 እዮስያሳ ናአይ ይሁዳ ካቲ እዮአቄም ካተቴዳ እቼሸንꬆ ላይꬃን፥ ኡዱፑንꬃ አግናን፥ የሩሳላመን ደእያ አሳዉነ ይሁዳ ካታማቱዋፐ ዬዳ አሳዉ ኡባዉ መꬍና ጎዳ ስንꬃን ጾማናዳን አዋዬድኖ። 10 ባሩክ መꬍና ጎዳ ጌሻ ጎልያን፥ ቆሞ ባጋ ዳባባን፥ ኦራꬃ ፐንግያ ግያ ሳን ደእያ፥ ጻፍያ ሳፋና ናኣ፥ ጋማርያ ክፍልያን ኤቂደ፥ ኤርማሳ ቃላይ ጻፈቲደ ጻꬃ ማጻፋ አሳዉ ኡባዉ ናባቤዳ።

11 ሳፋና ናኣ ናአይ፥ ጋማርያ ናአይ ምካይ ማጻፋፐ መꬍና ጎዳ ቃላ ባሩክ ናባብሽና ስሴዳ ዎደ፥ 12 ካትያ ጎልያን ጻፊ ኡትያ ክፍልያ ቤዳ። እ ብያ ዎደ፥ ጻፊ ኤልሻማእ፥ ሻማእያ ናአይ ዳላይ፥ አክቦራ ናአይ ኤልናታን፥ ሳፋና ናአይ ጋማሪ፥ ሀናንያ ናአይ ጽድቄነ ሀራ ካፓቱ ሄዋን ኡቴድኖ። 13 ባሩክ አሳዉ ማጻፋፐ ናባብሽና ስሴዳ ቃላ ኡባ ምካይ ኡንቱንቶ ኦዴዳ። 14 ካፓቱ ናታንያ ናኣ ይሁዳ ባሩካኮ ኪቲደ፥ “አሳዉ ኔን ናባቤዳ ማጻፋ አካደ ሃያ” ያጌድኖ። ናታኒ ሸሌምያ ናኣ፤ ሸሌም ኩሻ ናኣ። ያግና ባሩክ ማጻፋ አኪደ፥ ኡንቱንቱኮ ዬዳ። 15 ኡንቱንቱካ አ፥ “አነ ኡታደ፥ ኑዉ ማጻፋ ናባባ” ያጌድኖ።

ባሩክ ማጻፋ ናባቤዳ። 16 እ ናባቤዳ ቃላ ኡባ ስሴድኖ፤ ኡባይካ ያዪደ፥ እቱ እቱዋ ጼሊደ፥ ባሮካ፥ “ሀ ቃላ ኡባ ኑን ካትያዉ ኦዳናዉ ኮሼ” ያጌድኖ። 17 ቃይካ ዛሪደ፥ “ኔን ሀ ቃላ ኡባ ዎታደ ጻፌደንቶ ኑዉ ኦዳ። ሀዋ ነዉ ኤርማስ ባረ ዶናፐ ኦድና ጻፋዲ?” ያጌድኖ።

18 ባሩክ፥ “ኤ፥ ሀ ቃላ ኡባ ኤርማስ ባረ ዶናፐ ታዉ ኦዴዳ፤ ታን ቃላምያን ሀ ጻꬃ ማጻፋን ጻፋድ” ያጌዳ።

19 ኡንቱንቱ ባሮካ፥ “ኔንነ ኤርማስ ቢደ ቆሰትተ፤ ህንተ ደእያ ሳኣካ ኦንነ ኤሮፖ” ያጌድኖ።

20 ካፓቱ ማጻፋ ጻፍያ ኤልሻማአ ክፍልያን ዎꬆዋፐ ጉይያን፥ ካቲ ደእያ ዳባባ ቢደ፥ ሀኔዳዋ ኡባ ካትያዉ ኦዴድኖ። 21 ሄ ማጻፋ አሀና ማላ፥ ካቲ ይሁዳ ኪቴዳ፤ ይሁዳይ ጻꬃ ማጻፋ ኤልሻማአ ክፍልያፐ አሂደ፥ ካትያዉነ አ ዩሹዋን ኤቄዳ ካፓቶ ናባቤዳ። 22 ኡዱፑንꬃ አግናን ሳአይ ባልጉዋ ግድያ ድራዉ፥ ካቲ ባልጉዋ አꬅያ ጎልያን ኡቴዳ። ሄ ዎደ ካትያ ስንꬃን ደእያ ጮጭያን ታማይ ኤጼ። 23 ይሁዳይ ሄዙ ዎይ ኦይዱ ሳአቱዋ ናባቤዳዋፐ ጉይያን፥ ካቲ ሄ ሳአቱዋ ጻꬃ ማጻፋፐ ሳንጽያን ቃንጽ ቃንጺደ፥ ታማን ኦሌዳ፤ ሄዋዳን ኦꬂደ፥ ሄ ማጻፋ ሙለናካ ጹግ አጌዳ። 24 ሀ ቃላ ኡባ ስሲደካ ካዉነ አናና ኦꬅያ ካፓቱ አይነ ያይበይክኖ፤ ዎይ ካዮቲደ፥ ባረንቱ ማዩዋ ፔꬍበይክኖ። 25 ሀራይ አቶ ኤልናታን፥ ዳላይነ ጋማሪ ካቲ ሄ ማጻፋ ጹገናዳን ዎስናካ፥ ኡንቱንቱ ዎሳ ስሰናን እጼዳ። 26 ካትያ ናኣ ይራህማኤላ፥ አዝርኤላ ናኣ ሳራያነ አብድኤላ ናኣ ሸሌምያ፥ ጻፍያ ባሮካነ ትምቢትያ ኦድያ ኤርማሳ ኦይቃና ማላ ካቲ አዛዜዳ። ሽን መꬍና ጎዳይ ኡንቱንታ ቆሴዳ።

27 ኤርማስ ኦድና፥ ባሩክ ጻፌዳ ቃላይ ደእያ ማጻፋ ካቲ ጹግ ስምና፥ መꬍና ጎዳ ቃላይ ኤርማሳኮ ሀዋዳን ያጊደ ዬዳ፤ 28 “ሀእካ ሀራ ጻꬃ ማጻፋ አካደ፥ ይሁዳ ካቲ እዮአቄም ካሰ ጹጌዳ ጻꬃ ማጻፋ ግዶን ደእያ ቃላ ኡባ ጻፋ። 29 ቃይ ይሁዳ ካትያ እዮአቄማ ሀዋዳን ያጋ፦ ‘መꬍና ጎዳይ ሀዋዳን ያጌ፤ “ኔን፥ ባብሎነ ካቲ ቱሙዋፐ ዪደ፥ ሀ ቢታ ባይዛና፤ ቃይ እዝ ግዶን ደእያ አሳነ መህያካ ዉርሳና” ጋደ አያዉ ጻፋዲ?’ ያጋደ ማጻፋ ጹጋዳ። 30 ሄዋ ድራዉ፥ ታን መꬍና ጎዳይ ነዉ ይሁዳ ካትያ ዮአቄማዉ ሀዋ ኦዳይ: ዳዊታ ካዉተꬃ አራታን ኡትያ ዛሪ ነዉ ኡባካ ደኤና። ነ አሃይካ ጮ ኦለቲደ፥ ጋላስ አዋ ሱሉዋንነ ቃማ ሜጉዋን ሾጨታና። 31 ህንተ ናጋራ ድራዉ ኔና፥ ነ ዛርያነ ኔናና ኦꬅያ ኡባ ታን ሙራና። ህንተ ታን ኦዴዳዋ ስሰናን እጼዳ ድራዉ፥ ታን ኦዴዳ ኢታባ ኡባ ህንተ ቦላነ ይሁዳንነ የሩሳላመን ደእያ አሳ ቦላ አሀና ያጌ ያጋ” ያጌዳ።

32 ሄዋፐ ጉይያን፥ ኤርማስ ሀራ ጻꬃ ማጻፋ አኪደ፥ ኔርያ ናኣ ጻፍያ ባሮካዉ እሜዳ። ባሩክ ይሁዳ ካቲ እዮአቄም ታማን ጹጌዳ ጻꬃ ማጻፋ ቃላ ኡባ ኤርማስ አዉ ዶናን ኦድና ጻፌዳ። ቃይ ኤርማስ ሄዋ ማላትያ ሀራ ቃላካ ጉጅን፥ ኡባካ ባሩክ ጻፌዳ።