1 እዮስያሳ ናኣ ይሁዳ ካትያ እዮአቄማ ላይꬃን፥ ኤርማሳዉ መꬍና ጎዳፐ ቃላይ ሀዋዳን ያጊደ ዬዳ፤ 2 ካታ. 23:36—24:6፤ 2 ኦዱዋ 36:5-7 2 “ረካባ ያራ ግድያ አሳኮ ባደ፥ ኡንቱንቱና ሃሳያ። ጌሻ ጎልያ ክፍለቱዋፐ እቱዋ ግዶ ገልሳደ ዎይንያ ኤሳ ኡንቱንቶ እማ” ያጌዳ። 3 ባደ፥ ሀባዲንያ ናኣ ናኣ፥ ኤርማሳ ናኣ ያአዛንያ፥ አ እሻቱዋነ አ አቱማ ናናቱዋ ኡባ፥ ሄዋ ግያዌ ረካባ ያራ ሙልያ አካደ፥ 4 መꬍና ጎዳ ጎልያ አሃድ። ይግዳልያ ናኣ፥ ትምቢትያ ኦድያ ሀናና ኤርስያ ቆማቱዋ ክፍልያ ኡንቱንታ ገልሳድ። ሄ ክፍሊ ፐንግያ ናግያ ሻሉማ ናኣ ማእሴያ ክፍልያፐ ቦላ ባጋና፥ ካፖቱዋ ክፍልያ ማታን ደኤ። 5 ሄዋፐ ጉይያን፥ ታን ረካባ ያራቱዋ ስንꬃን ዎይንያ ኤሳይ ኩሜዳ ጹጋቱዋነ ጹአቱዋ ዎꬃደ፥ “ዎይንያ ኤሳ ኡሽተ” ያጋድ።

6 ሽን ኡንቱንቱ ዛሪደ፥ “ኑን ዎይንያ ኤሳ ኡሾኮ፤ አያዉ ጎፐ፥ ኑ ማይዛ አዉዋ ረካባ ናአይ ዮናዳብ ኑና፥ ‘ህንተካ ህንተ ናናቱካ ዎይንያ ኤሳ መꬍናዉ ኡሾፕተ። 7 ቃይ ጎልያ ኬጾፕተ፤ ዘረꬃ ዘሮፕተ፤ ዎይንያ ቱራካ ቶኮፕተ። ሄዋ አጊደ፥ ዱንካነ ግዶን ደእተ። ያቶፐ ህንተ አዱሳ ላይꬃ ሀ ቢታን ደአና’ ያጌዳ። 8 ኑ ማይዛ አዉዋ ረካባ ናአይ ዮናዳብ ኑና አዛዜዳ ኡባዉ ኑን አዛዘቴዶ። ኑን፥ ዎይ ኑ ማጫ አሳቱ፥ ዎይ ኑ አቱማ ናናቱ፥ ዎይ ኑ ማጫ ናናቱ ኑ ደኡዋ ላይꬃ ኡባን ዎይንያ ኤሳ ኡሽበይኮ፤ 9 ደእያ ጎልያካ ኬጽበይኮ፤ ዎይንያ ቱራ ሳአይ፥ ዎይ ጎሻይ፥ ዎይ ዘረꬃይካ ኑዉ ባዋ። 10 ኑን ዱንካነ ግዶን ደኤዶ፤ ኑ ማይዛ አዉ ዮናዳብ አዛዜዳ ኡባዉካ አዛዘቴዶ። 11 ሽን ባብሎነ ካቲ ናቡካዳናጾር ኑ ቢታ ቦላ ዎራጄዳ ዎደ፥ ‘ባብሎነቱዋነ ሶረቱዋ ኦላንቻቱዋፐ አታናዉ፥ ሃ የሩሳላመ አነ ቦይተ’ ያጌዳ። ሀእ ኑን የሩሳላመን ደእያዌ ሄዋሳ” ያጌድኖ።

12 ሄዋፐ ጉይያን፥ መꬍና ጎዳ ቃላይ ኤርማሳዉ ዬዳ። 13 ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “ባ፤ ባደ ይሁዳ አሳነ የሩሳላመ አሳ ሀዋዳን ያጋ፤ ‘ታ ቃላ ስስያዋነ ታን ታማርሴዳዎ አዛዘትያዋ አያዉ እጼድቴ? ታን መꬍና ጎዳይ ሀዋ ኦዳይ። 14 ረካባ ናአይ ዮናዳብ ባረ አቱማ ናናቱዋ ዎይንያ ኤሳ ኡሸናዳን አዛዜዳ አዛዙዋ ኡንቱንቱ ናጌድኖ፤ ኡንቱንቱ ባረንቱ ማይዛ አዉዋ አዛዞ አዛዘቴዳ ድራዉ፥ ሀች ጋካናዉ ዎይንያ ኤሳ ኡሾኮ። ህንተዉ ዛራ ዛራደ ኦዳይ፤ ሽን ህንተ ታን ኦድያዋ ስስበይክታ። 15 ቃይ ታን ዛራ ዛራደ ትምቢትያ ኦድያ ታ ቆማቱዋ ኡባ ህንተኮ የዳድ፤ ኡንቱንቱ፥ “ህንተ ኡባይካ ህንተ ኢታ ኦግያፐ ሀእ ስምተ፤ ህንተ ኦሱዋካ ሎይꬅተ፤ ሀራ ጾሳቶ ጎይኖፕተነ ኦꬆፕተ። ያቶፐ፥ ታን ጾሳይ ህንተዉነ ህንተ ማይዛ አዋቶ እሜዳ ቢታን ህንተ ደአና” ያጌድኖ። ሽን ህንተ ታን ኦድያዋ ስሳናዉ ህንተ ሀይꬃ ታኮ የግክታ። 16 ረካባ ናኣ ዮናዳባ ዘረꬃቱ ኡንቱንቱ ማይዛ አዉ ኡንቱንታ አዛዜዳ አዛዙዋ ፖሌድኖ፤ ሽን ሀ አሳይ ታዉ አዛዘትቤና’ ያጋ” ያጌ።

17 ሄዋ ድራዉ፥ መꬍና ጎዳይ ጾሳይ፥ ኡባፐ ዎልቃማይ፥ እስራኤልያ ጾሳይ ሀዋዳን ያጌ፤ “ስስተ፥ ታን ይሁዳ አሳ ቦላነ የሩሳላመን ደእያዋንቱ ቦላ አሀና ጌዳ ኢታባ አሀና። አያዉ ጎፐ፥ ታን ኡንቱንቶ ኦዳድ፤ ኡንቱንቱ ስሰናን እጼድኖ። ታን ኡንቱንታ ጼሳድ፤ ጼስና ኡንቱንቱ ኮየናን እጼድኖ” ያጌ።

18 ሄዋፐ ጉይያን፥ ኤርማስ ረካባ ያራቱዋ ሀዋዳን ያጌዳ፤ “ኡባፐ ዎልቃማ መꬍና ጎዳይ፥ እስራኤልያ ጾሳይ ህንተና ሀዋዳን ያጌ፤ ‘ህንተ ህንተ ማይዛ አዉዋ ዮናዳባዉ አዛዘቴዳ ድራዉ፥ አ ዎጋ ካሌዳ ድራዉነ እ አዛዜዳዋ ኡባካ ፖሌዳ ድራዉ፥ 19 ረካባ ናአይ ዮናዳብ ታዉ ኡባፐ ዎልቃማ መꬍና ጎዳዉ እስራኤልያ ጾሳዉ ኦꬅያ አቱማ አሳ አዉደነ ꬋየና’ ያጌ” ያጌዳ።