1 ባብሎነ ካቲ ናቡካዳናጾር፥ አ ኦላንቻቱ ኡባይነ እ ሞድያ ካዉተꬃቱዋን አሳይ ኡባይ፥ የሩሳላመነ የሩሳላመ ዩሹዋን ደእያ ካታማቱዋ ኡባ ኦልያ ዎደ፥ ሀ ቃላይ መꬍና ጎዳፐ ኤርማሳዉ ዬዳ፤ 2 ካታ. 25:1-11፤ 2 ኦዱዋ 36:17-21 2 መꬍና ጎዳይ እስራኤልያ ጾሳይ ሀዋዳን ያጌዳ፤ “ባ፤ ባደ ይሁዳ ካትያ ሰደቅያሳ ሀዋዳን ያጋ፤ መꬍና ጎዳይ ሀዋዳን ያጌ፤ ‘በአ፥ ታን ሀ ካታማ ባብሎነ ካትያ ኩሽያን አꬃደ እማና፤ እ ሀ ካታማ ታማን ጹጋና። 3 ኔን አ ኩሽያፐ ከሳ አካካ፤ ኔን ኦሞደታናነ አዉ አꬋ እመታና። ኔን ነ አይፍያን ባብሎነ ካትያ በአና፤ እካ ኔናና ሃሳያና። ሄዋፐ ጉይያን፥ ኔን ባብሎነ ቢታ ባና ያጌ።

4 “ ‘ግዶፐነ፥ ይሁዳ ካትያዉ ሰደቅያሳ፥ መꬍና ጎዳይ ግያዋ ስሳ! ነዋ መꬍና ጎዳይ ሀዋዳን ያጌ፤ “ኔን ኦላን ሀይቃካ፤ 5 ኔን ሳሮ ሀይቁዋ ሀይቃና። ኔፐ ካሰ ደኤዳ ካተቱዋ ቦንቾ፥ ነ ማይዛ አዋቶ እጻና ጩዋዬዳዋዳን፥ አሳይ ነ ቦንቾካ እጻና ጩውሳና። ያቲደ፥ አዬ ኑ ካትያዉ ያጊደ ነዉ ዬካና። ታን መꬍና ጎዳይ ሀዋ ኦዳይ” ያጌ’ ያጋደ ኦዳ” ያጌዳ።

6 ሄዋፐ ጉይያን፥ ትምቢትያ ኦድያ ኤርማስ ሀ ትምቢትያ ኡባ ይሁዳ ካትያ ሰደቅያሳዉ የሩሳላመን ኦዴዳ። 7 ሄ ዎደ ባብሎነ ካትያ ኦላንቻቱ የሩሳላመ ካታማነ ይሁዳን አቴዳ ካታማቱዋ ኦሌድኖ። ላክሻነ አዜቃ ጌተትያ ካታማቱዋ ጻላላይ ይሁዳን አቴዳ ግምበቴዳ ካታማቱዋ።

8 ካቲ ሰደቅያስ አይለቱዋ አይለተꬃፐ ከስያ አዋዩዋ አዋያናዉ የሩሳላመን አሳ ኡባና ቃላ ጫቁዋ ጫቀቴዳዋፐ ጉይያን፥ ኤርማሳዉ መꬍና ጎዳፐ ቃላይ ዬዳ። ሄ አዋዩ፥ 9 “አሳይ ኡባይ ባረ እብራዌ አቱማ አሳቱዋነ ማጫ አሳቱዋ አይለተꬃፐ ከሶ፤ ኦንነ አይሁዳ አሳ ግዴዳ ባረ እሻ አይለ ኦꬆፖ” ያጌ። 10 ሄዋ ድራዉ፥ አሳይ ኡባይነ ካፓቱ ኡባይ ጫቀቴዳ ጫቁዋዳን፥ ባረንቱ አቱማነ ማጫ አይለቱዋ አይለተꬃፐ ከሳናዉነ ላኤንꬆ ዛሪደ አይለየናን አጋናዉ ማዬድኖ፤ ኡንቱንታ አይለተꬃፐ ከሴድኖ። 11 ሽን ባረንቱ ቆፋ ላሚደ፥ አይለተꬃፐ ከሴዳ ባረንቱ አቱማነ ማጫ አይለቱዋ ዛሪደ አይለዬድኖ።

12 ሄዋፐ ጉይያን፥ መꬍና ጎዳ ቃላይ ኤርማሳኮ ዬዳ። 13 መꬍና ጎዳይ እስራኤልያ ጾሳይ ሀዋዳን ያጌ፤ “ታን ህንተ ማይዛ አዎቱዋ ግብጼፐ፥ አይለተꬃ ቢታፐ ከሴዳ ዎደ፥ ኡንቱንቱና ቃላ ጫቁዋ ጫቃ ኡታድ። 14 ሄ ቃላ ጫቁዋ ማራን፥ ‘እብራዌ አይሊ ደእያ አሳይ ኡባይ፥ አይለቱዋ ኡሱፑን ላይꬃ ኦስስ ስሚደ፥ ላፑንꬃ ላይꬅ አይለተꬃፐ ከስ የድተ’ ያጋደ አዛዛድ። ሽን ህንተ ማይዛ አዎቱ ታን ኦድያዋ ስሰናን እጼድኖ ታዉ አዛዘትበይክኖ። ዶመꬃ 21:2፤ ዛረ. 15:12 15 ህንተካ ማታ ዎድያፐ ካሰ ህንተ ናጋራ አጊደ፥ አይለቱዋ አይለተꬃፐ ከሳናዉ አዋዬድታ፤ ታ ስንꬃን ልከባ ኦꬄድታ። ቃይ ሄዋ ኦꬃናዉ ታ ስንꬃን፥ ታ ሱንꬃይ ጼሰትያ ታ ጌሻ ጎልያን ጫቁዋ ጫቀቴድታ። 16 ሽን ሀእካ ህንተ ህንተ ቆፋ ላሚደ፥ ታ ሱንꬃ ቱንሴድታ። ዎቲደ ጎፐ፥ ኡንቱንቱ ኮዬዳዋዳን፥ አይለተꬃፐ ከሴዳ ህንተ አቱማነ ማጫ አይለቱዋ ዛሪደ አይለዬድታ።

17 “ሄዋ ድራዉ፥ ታን መꬍና ጎዳይ ኦድያዌ ሀዋ: ህንተ ታዉ አዛዘተናን እጺደ፥ ህንተ እሻ ዎይ ህንተ ሾሩዋ አይለተꬃፐ ከስያ አዋዩዋ አዋይበይክታ። በእተ፥ ህንተ ቦላ ኦላይ ኢታ ሀርጊነ ኮሻይ ከሳና ማላ፥ ታን አዋያይ። ታን ህንተና ሳኣ ቦላ ደእያ ካዉተꬃቶ ዳጋማ ኦꬃና። 18 ታ ቃላ ጫቁዋ መንꬄዳ አሳ፥ ታ ስንꬃን ቃላ ጫቀቴዳ ጫቁዋ ቃላቱዋ ናገናን እጼዳ አሳ፥ ኡንቱንቱ ጫቆ ሹኪደ፥ ባጋ ባጋ ከስ ማራን ዎꬂደ፥ ላኡ ባጋፐ ግዱዋና አꬊደ፥ ሄ ማራዳን ታን ኡንቱንታ ኦꬃና። 19 ሄ አሳቱካ ይሁዳ ካፓቱዋ፥ የሩሳላመ ካፓቱዋ፥ ቢታ ሞድያዋንታ፥ ቄሳቱ ዋነ ማራን ዎꬄዳ ማራ አሹዋ ግዱዋና መንꬄዳ አሳ ኡባ። 20 ታን ኡንቱንታ ኡንቱንቱ ሞርከቱዋ ኩሽያንነ ኡንቱንታ ዎꬋናዉ ኮይያ አሳቱዋ ኩሽያን አꬃደ እማና፤ ኡንቱንቱ አሃይ ሳሉዋ ካፎቶነ ሳኣ ዶአቶ ቁማ ግዳናዋ።

21 “ታን ይሁዳ ካትያ ሰደቅያሳነ አ ካፓቱዋካ ኡንቱንቱ ሞርከቱዋ ኩሽያን፥ ኡንቱንታ ዎꬋናዉ ኮይያዋንቱ ኩሽያንነ ህንተና ኦልያዋ አጌዳ ባብሎነ ካትያ ኦላንቻቱዋ ኩሽያን አꬃደ እማና። 22 ታን መꬍና ጎዳይ ባብሎነ ኦላንቻቱዋ አዛዛና፤ ኡንቱንቱ ሀ ካታማ ስማና። ኡንቱንቱ ሀ ካታማ ኦላና፥ ኦሞዳናነ ታማን ጹጋና። ይሁዳን ደእያ ካታማቱዋካ አሳይ ደኤና አይነ ባይና ሳኣ ኦꬃና” ያጌ።