1 ኤርማስ ብሮ ናግያዋንቱ ዳባባን ደእሺና፥ መꬍና ጎዳ ቃላይ ላኤንꬁዋካ ዬዳ። 2 ሳኣ መꬌዳ መꬍና ጎዳይ፥ ጊግሲደ አ ሳኣን ዎꬄዳ መꬍና ጎዳይ፥ አ ሱንꬃይካ መꬍና ጎዳ ጌተትያዌ ታና ሀዋዳን ያጌ፤ 3 “ኔን ታና ጼሳ፤ ታን ነዉ ኮያና፤ ኔን ኤረና ዎጋባነ ዎልቃማባ ታን ነዉ ኦዳና። 4 ባብሎናቱዋ ቢታ ዶሪታ፥ ዶደꬃነ ማሻ ድጋና ማላ፥ ድርሳ ግምቢያ ምንሳናዉ ኮሌዳ ሀ ካታማ ጎለቱዋባነ ይሁዳ ካተቱዋ ጎለቱዋባ ታን መꬍና ጎዳይ፥ እስራኤልያ ጾሳይ ኦዳይ። 5 ህንተናና ኦለታናዉነ ታን ታ ሀንቁዋንነ ይሉዋን ሾጫና አሳቱዋ አሃ ሄ ሳአቱዋን ኩንꬃናዉ ባብሎነቱ ገሊኖ። አያዉ ጎፐ፥ ኡንቱንቱ ኢታተꬃ ኡባ ድራዉ፥ ታን ሀ ካታማፐ ታ ሶምኡዋ ገንꬃድ።

6 “ግዶፐነ፥ ታን ሀ ካታማነ አን ደእያ አሳ ዛራደ ፓꬃና፤ ኡንቱንቱ ፓጻተꬃካ ዛራና፤ ሎይꬅ ዳሮ ሳሩዋነ ዎፓ ደኡዋ ታን ኡንቱንቶ እማና። 7 ይሁዳ አሳነ እስራኤልያ አሳ ኦሞዱዋፐ ዛራደ እሻልሳና፤ ኡንቱንቱ ካሰ ደኤዳዋዳን ኦꬃደ ታን ኡንቱንታ ግምባና። 8 ኡንቱንቱ ታና ናቄዳ ናጋራ ኡባፐ ታን ኡንቱንታ ጌሻና፤ ጌሻደ ኡንቱንቱ ታና ናቄዳ ናቁዋነ ማካሌዳ ማካላ ኡባ አቶ ያጋና። 9 ሄዋፐ ጉይያን፥ የሩሳላመ ካታማይ ታዉ ናሸቻ፥ ቦንቹዋነ ጋላታ ሳኣን ደእያ ካዉተꬃቱዋ ኡባ ስንꬃን አሀና። ታን የሩሳላመ አሳዉ ኦꬅያ ሎኦባነ ሄ ካታማዉ አህያ ዱረተꬃነ ሳሮተꬃ ስሲደ፥ ካዉተꬃቱ ኡባይ ያሻን ኮኮራና” ያጌ።

10 መꬍና ጎዳይ ሀዋዳን ያጌ፤ “ህንተ፥ ‘አሳይነ መሂ ባይና መላ ቢታ’ ጌዳ ሀ ሳአቱዋን፥ አሳይነ መሂ ባይና ይሁዳ ካታማቱዋንነ የሩሳላመ ኦገቱዋን፥ ናሸቻነ እልልሳ ኮሻይ፥ 11 ቡላችያዋነ ቡላቼትያን ኮሻይነ መꬍና ጎዳ ጌሻ ጎልያ ጋላታ ያርሹዋ አሂደ፥ ሀዋዳን ያጊደ የጽያ አሳ ኮሻይ ስሰታና። 1 ኦዱዋ 16:34፤ 2 ኦዱዋ 5:13፤ 7:3፤ እዝራ 3:11፤ ማዝ. 100:5፤ 106:1፤ 107:1፤ 118:1፤ 136:1

12 ኡባፐ ዎልቃማ መꬍና ጎዳይ ሀዋዳን ያጌ፤ “ሀ አሳይነ መሂ ባይና አይነ ባይና ቢታንነ አን ደእያ ካታማቱዋን ሄንꬃንቻቱ ባረንቱ ዶርሳ ዉድያ አላጽስያ ጋዲ ደአና። 13 ገዝያን ደእያ ካታማቱዋን፥ ዞዝያፐ ጋርሳና ደእያ ካታማቱዋን፥ ኔጌባ መላ ቢታን ደእያ ካታማቱዋን፥ ቢንያማ ቢታን፥ የሩሳላመ ዩሹዋን ደእያ ሄራቱዋንነ ይሁዳ ካታማቱዋን ሄንꬃንቻቱ ባረንቱ ዶርሳ ዛረꬂደ ፓይዱዋን። ታን መꬍና ጎዳይ ሀዋ ኦዳይ” ያጌ።

14 መꬍና ጎዳይ ሀዋዳን ያጌ፤ “ታን እስራኤልያ አሳዉነ ይሁዳ አሳዉ ኦꬃና ጌዳ ሎኦ ቃላ ፖልያ ጋላሳቱ ያና፤ ኤር. 23:5-6 15 ሄ ጋላሳትዋንነ ሄ ዎደቱዋን ታን ዳዊታ ዛርያፐ እት ጽሎ አጫ ደንꬃና፤ እ ሄ ቢታን ሱረ ፕርዳነ ጽሎተꬃ ኦꬃና። 16 ሄ ዎደ ይሁዳ አሳይ አታና፤ የሩሳላመ አሳይካ ዎፑ ጊደ ደአና፤ ሀ ካታማይካ መꬍና ጎዳ፥ ኑ ጽሎተꬃ ያገት ጼሰታና። 17 ዳዊታ ዘረꬃፐ እስራኤልያ ካዉተꬃ አራታን ኡትያ አሳይ ኡባካ ꬋየና። 18 ሄዋዳንካ፥ ጹግያ ያርሹዋ፥ ካꬃ ያርሾነ ሀራ ያርሹዋ ኡባ ገደ ያርሻናዉ ሌዊያ ዛርያፐ ቄስያ ግድያ አሳይ መꬍናዉካ ታ ስንꬃን ꬋየና። ታን መꬍና ጎዳይ ሀዋ ኦዳይ” ያጌ። 2 ሳሜላ 7:12-16፤ 1 ካታ. 2:4፤ 1 ኦዱዋ 17:11-14

19 መꬍና ጎዳ ቃላይ ኤርማሳኮ ዬዳ። 20 መꬍና ጎዳይ ሀዋዳን ያጌ፤ “ታን ጋላሳናነ ቃማና ቃላ ጫቁዋ ጫቀታድ፤ ሄ ጫቁዋን ኡንቱንቱ ባረንቶ ኬረቴዳ ዎድያን ስመረቴድኖ። ሄ ጋላሳነ ቃማ ጫቁዋ ህንተ ላማናዉ ዳንዳዮፐ፥ 21 ታን አ ዛርያፐ ካዉተꬃ አራታን ኡታና አሳይ ኡባካ ꬋየናዳን፥ ታ ቆማ ዳዊተና ጫቀቴዳ ጫቁዋ ላማና፤ ቃይ ኡባቶ ታዉ ኦꬅያ፥ ሌዊያ ዛረ ግድያ ቄሳቱ ዋና ጫቀቴዳ ጫቁዋካ ላማና። 22 ታን ታ ቆማ ዳዊታ ዘረꬃቱዋነ ታ ስንꬃን ኦꬅያ ሌዊያ ዛረ ቄሳቱ ዋ ፓይዳናዉ ዳንዳየተና ሳሉዋ ጾልንተቱዋዳንነ ማክና ዉረና አባ ሻፍያዳን ጮራያና” ያጌ።

23 መꬍና ጎዳ ቃላይ ቃይካ ኤርማሳኮ ሀዋዳን ያጊደ ዬዳ፤ 24 “ሀ አሳይ፥ ‘መꬍና ጎዳይ ባረ ዶሬዳ ላኡ ካዉተꬃቱዋ፥ እስራኤልያነ ይሁዳ አግ ባሼዳ’ ያጊደ ሃሳይያዋ ኔን አኬካበይኪ? ኡንቱንቱ ታ አሳ ካꬊደ፥ ባረና ዳንዳዬዳ ካዉተꬃ ከስክኖ ጊደ ቆፒኖ። 25 ታን መꬍና ጎዳይ ጋላሳናነ ቃማና ጫቀቴዳ ጫቁዋነ ሳሉዋነ ሳኣ ህግያ ምንꬃቤናባ ግድንቶ፥ 26 ታን ያቆባ ዘረꬃቱዋነ ታ ቆማ ዳዊታ ዘረꬃቱዋ አጋ ባሻና፤ ያታቤናዋ ግድንቶ፥ አብራሃማ፥ ይሳቃነ ያቆባ ዛራቱዋ ቦላ ካተያናዉ ዳዊታ ዘረꬃ ዶረናን አጋና። ታን ታ አሳ ማራና፤ ታን ኡንቱንታ ዛራደ እሻልሳና” ያጌዳ።