1 ይሁዳ ካቲ ሰደቅያስ ካተቴዳ ታማንꬃ ላይꬃን፥ ባብሎነ ካቲ ናቡካዳናጾር ካተቴዳ ታማነ ሆስፑንꬃ ላይꬃን መꬍና ጎዳፐ ኤርማሳዉ ካላይ ዬዳ። 2 ካታ. 25:1-7 2 ሄ ዎደ ባብሎነ ካትያ ኦላንቻቱ የሩሳላመ ዶዴድኖ፤ ትምቢትያ ኦድያ ኤርማስ ይሁዳ ካትያ ጎልያን ደእያ፥ ናግያዋንቱ ዳባባን ጎርደት ኡቴዳ።

3 ይሁዳ ካቲ ሰደቅያስ አ ሄዋን ቃቺደ፥ ሀዋዳን ያጌዳ፤ “ኔን አያዉ ሀዋዳን ያጋደ ትምቢትያ ኦዳይ? መꬍና ጎዳይ ሀዋዳን ያጌ፤ ‘በአ፥ ታን ሀ ካታማ ባብሎነ ካትያ ኩሽያን አꬃደ እማና ሀናይ፤ እምና እ ኦሞዳና። 4 ይሁዳ ካቲ ሰደቅያሳዉ ባብሎናቱዋ ኩሽያፐ ከስ አከና፤ እ ቱሙዋፐ ባብሎነ ካትያ ኩሽያን ገላና። እ አ ስንꬃን ኤቂደ፥ አናና ሃሳያና፤ እ አ ባረ አይፍያን በአና። 5 ሄዋፐ ጉይያን፥ ናቡካዳናጾር ሰደቅያሳ ባብሎነ አፋና፤ ታን አባ በአና ጋካናዉ፥ እ ያን ደአና። ታን መꬍና ጎዳይ ሀዋ ኦዳይ። ኔን ባብሎነቱዋና ኦለትያዋ ግዶፐ፥ ሄዌ ኔና ከሰና ያጌ’ ያጋዳ” ያጌዳ።

6 ኤርማስ፥ “መꬍና ጎዳ ቃላይ ሄ ዎደ ታኮ ሀዋዳን ያጊደ ዬዳ፤ 7 ‘ነ አዉዋ እሻ ሻሉማ ናአይ፥ ሀናምኤል ኔኮ ዪደ፥ “አናቶታ ካታማን ደእያ ታ ጋድያ ሻማ፤ አያዉ ጎፐ፥ ዎዛናዉ ዳቦታይ ጋꬅያዌ ኔና” ያጋናዋ’ ያጌዳ።

8 “መꬍና ጎዳይ ጌዳዋዳን፥ ታ አዉዋ እሻ ናአይ ሀናምኤል ታኮ ናግያዋንቱ ዳባባ ዪደ፥ ‘ቢንያማ ቢታን አናቶታን ደእያ ታ ጋድያ ሻማ፤ ጋድያ ዎዛናዉነ ቡዞታናዉ በስያዌ ኔና’ ያጌዳ። ታን ሄዋን መꬍና ጎዳ ቃላ ግድያዋ ኤራድ። 9 ያታደ አናቶታ ካታማን ደእያ ጋድያ ታ አዉዋ እሻ ናኣ ሀናምኤላፐ፤ ሻማደ እ አክያ ጋትያ አዉ ሚዛናን ልካድ፤ ታማነ ላፑን ጻጋራ ብራ ግዴዳ። 10 ሻማ ፓራማ ማርካቱ ደእያ ሳን ፓራማደ፥ አሻጋደ ማታፋ አን ዎꬃድ፤ ሚሻካ ሚዛናን ልካደ እማድ።

11 “ሄዋፐ ጉይያን፥ ታን አሻገቲደ አታመቴዳ ሻማ ሀኖታ ቆንጭስያ ፓራማነ አታመትቤና ሻማ ሀኖታ ቆንጭስያ ፓራማ አካድ። 12 ታ አዉዋ እሻ ናአይ ሀናምኤል፥ ሻማ ፓራማ ፓራሜዳ ማርካቱነ ናግያዋንቱ ዳባባን ኡቴዳ አይሁዳቱ ኡባይ ጼልሽን፥ ሄ ሻማ ፓራማ ማህሴያ ናኣ ናኣ፥ ኔርያ ናኣ ባሮካዉ እማድ። 13 ኡንቱንታ ስንꬃን ታን ባሮካ ሀዋዳን ያጋደ አዛዛድ፤ 14 ‘ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ “ዳሮ ዎድያ ጋምአና ማላ፥ ሀ ሻማ ሀኖታ ቆንጭስያ አሻገቲደ አታመቴዳ ፓራማነ ሻማ ሀኖታ ቆንጭስያ አታመትቤና ፓራማ አካ አፋደ፥ ኡርቃፐ መቴዳ ኦቱዋን ዎꬃ” ያጌ። 15 አያዉ ጎፐ፥ ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ “ሀ ቢታን አሳይ ዛሪደካ ጎልያ፥ ጋድያነ ዎይንያ ቱራ ቶክያ ሳኣ ሻማና” ያጌ’ ያጋድ” ያጌዳ።

16 ታን ኔርያ ናኣ ባሮካዉ ሻማ ፓራማ ዋራቃታ እሜዳዋፐ ጉይያን፥ መꬍና ጎዳ ሀዋዳን ያጋደ ዎሳድ፤ 17 “አቤት ኡባ ሞድያ መꬍና ጎዳዉ፥ ኔን ሳሎቱዋነ ሳኣ ነ ዎልቃማ ዎልቃንነ ነ ምጨቴዳ ኩሽያን መꬋዳ! ነዉ ዳንዳየተናዌ ኡባካ ባዋ። 18 ኔን ሻአቶ አገና ሲቁዋ በሳሳ፤ ሽን አዎቱዋ ባይዙዋ ኡንቱንቱ ናናቱዋ ቦላ ዛራሳ። አቤት ꬎቃነ ዎልቃማ ጾሳዉ፥ ነ ሱንꬃይ ኡባፐ ዎልቃማ መꬍና ጎዳ ጌተቴ። 19 ነ ዞሪ ዎልቃማ፤ ነ ኦꬅያ ኦሱካ ዎልቃማ። አሳ ኦግያ ኡባ ኔን በኣሳ፤ አሳዉ ኡባዉካ አ ኦግያዳንነ አ ኦሱዋዳን ዛራሳ።

20 “ኔን ግብጼን ማላታነ ኦራꬃባ ኦꬃዳ፤ ሀች ጋካናዉካ ሀ ኦራꬃ ኦሶቱዋ እስራኤልያ አሳ ግዶንነ ሀራ ካዉተꬃቱዋ ኡባ ግዶን ኦꬅያዋ አጋ በይካ። ሄዋፐ ደንዴዳዋን ነ ሱንꬃይ ኡባ ሳን ኤረቴዳ። 21 ኔን ነ አሳ እስራኤልያ ግብጼፐ ማላታንነ ኦራꬃባን፥ ነ ምኖ ቀስያንነ ነ የዴዳ ኩሽያን፥ ቃይ ዎልቃማ ዳጋማን ከሳዳ። 22 ኡንቱንቱ ማይዛ አዋቶ ኔን እማናዉ ጫቄዳ ቢታ፥ ማꬃይነ ኤሳይ ጎግያ ሀ ቢታ ኡንቱንቶ እማዳ፤ 23 ኡንቱንቱ ሀ ቢታ ገሊደ ላቴድኖ። ሽን ኡንቱንቱ ነዉ አዛዘትበይክኖ፤ ነ ህግያካ ካልበይክኖ፤ ኡንቱንቱ ኦꬃናዳን ኔን አዛዜዳዋ ኡባካ ኦꬅበይክኖ። ሄዋ ድራዉ፥ ኔን ኡንቱንቱ ቦላ ሀ ባሻ ኡባ አሃዳ።

24 “በአ፥ ባብሎነቱ ካታማ ኦይቃናዉ ግምቢያ ዩሹዋን ቢታ ዶሪደ ዶድ ደኢኖ፤ ኦላፐ፥ ኮሻፐነ ኢታ ሀርግያፐ ደንዴዳዋን፥ ካታማይ ኡንቱንቱና ኦለትያ ባብሎናቱዋ ኩሽያን አꬊደ እመት ደኤ። ኔን ሀእ በእያዋዳን፥ ነ ጌዳዌ ኡባይ ፖለቴዳ። 25 አቤት ኡባ ሞድያ መꬍና ጎዳዉ፥ ካታማይ ባብሎነቶ እመታናዉ ሀኖደካ፥ ኔን ታና፥ ‘ማርካቱዋ ጼሳደ፥ ሻሉዋን ሀ ጋድያ ሻማ’ ያጋዳ” ያጋደ ዎሳድ።

26 ሄዋፐ ጉይያን፥ መꬍና ጎዳ ቃላይ ኤርማሳዉ ሀዋዳን ያጊደ ዬዳ፤ 27 “ታን መꬍና ጎዳ፥ አሳ ኡባ ጾሳ። ታዉ ዳንዳየተናዌ ደኢ?” ያጌዳ። 28 ሄዋ ድራዉ፥ መꬍና ጎዳይ ሀዋዳን ያጌ፤ “ታን ሀ ካታማ ባብሎነቶነ ባብሎነ ካትያ ናቡካዳናጾራዉ አꬃደ እማና፤ ኡንቱንቱ አ ኦይቃና። 2 ካታ. 25:1-11፤ 2 ኦዱዋ 36:17-21 29 ሀ ካታማ ቦላ ኦላዉ ከሴዳ ባብሎነቱ ዪደ፥ ካታማ ታማን ጹጋና፤ ጎልያ ቦላን ደምባዪደ ኦꬄድኖ ባኣላዉ እጻና ጩዋይሲድነ ሀራ ጾሳቶ ኡሻ ያርሹዋ ጉሲደ፥ ታና ሀንቀꬄዳ አሳቱ ደኤዳ ጎለቱዋካ ጹጋና።

30 “እስራኤልያ አሳይነ ይሁዳ አሳይ ባረንቱ ያላጋተꬃፐ ዶሚደ፥ ታ ስንꬃን ኢታባ ኦꬄድኖፐ አትና፥ ሀራባ ኦꬅበይክኖ፤ ኡንቱንቱ ባረንቱ ኩሽያን ኦꬄዳ ኦሱዋን ታና ሀንቀꬄድኖ ያጌ መꬍና ጎዳይ። 31 ኬጸቴዳ ዎድያፐ ሀች ጋካናዉ፥ ሀ ካታማ አሳቱ ታና ሀንቀꬄድኖነ ይሎዬድኖ፤ ሄዋ ድራዉ፥ ታን ሀ ካታማ ታ ስንꬃፐ ꬋይሳና። 32 እስራኤልያ አሳይነ ይሁዳ አሳይ፥ ኡንቱንቱ ካተቱነ ካፓቱ፥ ኡንቱንቱ ቄሳቱ ነ ትምቢትያ ኦድያዋንቱ ኦꬄዳ ኢታ ኦሱዋ ኡባን ታና ሀንቀꬄድኖ። 33 ኡንቱንቱ ባረንቱ ሶምኡዋ አጊደ፥ ባረንቱ ዞክያ ታዉ ዛሬድኖ። ታን ኡንቱንታ ዛራ ዛራደ ታማርስንቶካ፥ ኡንቱንቱ ስስበይክኖነ ሴራካ አክበይክኖ። 34 ኡንቱንቱ ሸነይያ ባረንቱ ኤቃቱዋ ታ ሱንꬃን ጼሰቴዳ ጌሻ ጎልያ ግዶን ኤሲደ ቱንሴድኖ። 2 ካታ. 23:10፤ ኤር. 7:30-31፤ 19:1-6 35 ኡንቱንቱ ባረንቱ አቱማ ናናቱዋነ ማጫ ናናቱዋ ሞሎካ ኤቃዉ ያርሻናዉ ህኖማ ዛንጋራን ባኣላዉ ያርሽያ ꬎቃ ሳአቱዋ ጊግሴድኖ። ኡንቱንቱ ሄዋ ኦꬃና ማላ፥ ታን ኡንቱንታ አዛዛበይከ፤ ይሁዳ አሳ ኡንቱንቱ ናጋራ ኦስሳናዉ ሄዋ ማላ ሸነይያዋ ኦꬃናዌ ታ ዎዛናን ኡባካ አꬍቤና” ያጌዳ። ዎጋ 18:21፤ 2 ካታ. 23:10፤ ኤር. 7:31

36 ህንተ የሩሳላመ አሳይ፥ “ሀ ካታማይ ኦላን፥ ኮሻንነ ኢታ ሀርግያን ባብሎነ ካትያ ኩሽያን አꬊደ እመታና” ያጌዳ ሀ ካታማባ መꬍና ጎዳይ እስራኤልያ ጾሳይ ሀዋዳን ያጌ፤ 37 “በእተ፥ ታን ታ ሱሎ ሀንቁዋንነ ታ ዎልቃማ ይሉዋን ኡንቱንታ ላሌዳ ቢታ ኡባፐ ሺሻና፤ ሀ ሳኣ ዛራደ አሃደ፥ ኡንቱንቱ ሳሮተꬃን ደአናዳን ኦꬃና። 38 ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና። 39 ኡንቱንቱ ታዉ መꬍናዉ ያያና ማላ፥ ታን ኡንቱንቶ እት ዎዛናነ እት ኦግያ እማና፤ ሄዌ ኡንቱንቶነ ኡንቱንቱፐ ጉይያን፥ ኡንቱንቱ ናናቶ ሎአ ግዳናዋ። 40 ታን ኡንቱንቱና መꬍናዉ ቃላ ጫቁዋ ጫቀታና። ሄ ጫቁዋን ታን ኡንቱንቶ ሎኦባ ኦꬅያዋ አግከ፤ ኡንቱንቱ ታፐ ዎራ ስመና ማላ፥ ታን ኡንቱንቱ ታዉ ያያናዳን ኦꬃና። 41 ታን ኡንቱንቶ ሎኦባ ኦꬅያዋዳን ናሸታና፤ ቃይ ታን ታ ኩመንꬃ ዎዛናፐነ ታ ኩመንꬃ ሸምፑዋፐ ሀ ቢታን ኡንቱንታ ቱሙዋፐ ቶካና” ያጌ።

42 ቃይካ መꬍና ጎዳይ ሀዋዳን ያጌ፤ “ታን ሀ አሳ ቦላ ሀ ኢታ ባየꬃ ኡባ አሄዳዋዳን፥ ሄዋዳንካ ታን ኡንቱንቶ እማና ጌዳ ሎኦባ ኡባ እማና። 43 ህንተ፥ ‘ሀ ቢታይ አሳይካ መሂካ ደኤና፥ አይነ ባይና ቢታ ግዳናዋ፤ እ ባብሎነቶ እመት ክቼዳ’ ያጌዳ ቢታን አሳይ ዛረꬂደ፥ ጋድያ ሻማና። 44 አሳይ ጋድያ ሻሉዋን ሻማና፤ ማርካ ስንꬃን ፓራማ ፓራሚደ፥ ማታፋ ዎꬃና። ሀዌ ኡባይ ቢንያማ ቢታን፥ የሩሳላመ ዩሹዋን ደእያ ሄራቱዋን፥ ይሁዳ ካታማቱዋን፥ ገዝያን ደእያ ካታማቱዋን፥ ዞዝያፐ ጋርሳና ደእያ ካታማቱዋንነ ኔጌባ መላ ቢታ ካታማቱዋ ኡባን ሀናና። አያዉ ጎፐ፥ ታን ኡንቱንቱ ዛራደ እሻልሳና። መꬍና ጎዳይ ሀዋ ኦዳይ” ያጌ።