1 መꬍና ጎዳይ ሀዋዳን ያጌ፤ “ሄ ዎደ ታን እስራኤልያ ያራቶ ኡባዉ ጾሳ ግዳና፤ ኡንቱንቱካ ታ አሳ ግዳናዋ” ያጌ።

2 መꬍና ጎዳይ ሀዋዳን ያጌ፤ “አዳፐ ፓላሄዳ አሳይ ታፐ አꬎ ኬካተꬃ መላ ቢታን ደሜዳ። እስራኤልያ አሳይ ሸምፕ አካናዉ ኮዬዳ ዎደ፥ 3 ታን መꬍና ጎዳይ ኡንቱንቶ ሃኮ ሳፐ ሀዋዳን ያጋደ ቆንጫድ፤ ‘እስራኤልያ አሳዉ፥ ታን ህንተና መꬍና ሲቁዋን ሲቃይ፤ ታ አገና ሲቁዋን ታን ህንተና ታኮ ሺሻድ። 4 እስራኤልያ አሳዉ፥ ታን ህንተና ዛረꬃደ ኬጻና፤ ህንተካ ኬጸታና። ዛረꬂደካ ካራቡዋ ኦይቂደ፥ ናሸትያዋንቱና የጻናነ ዱራና። 5 ህንተ ዛረꬂደካ ሳማርያ ዞዘቱዋ ቦላ ዎይንያ ቱራቱዋ ቶካና፤ ቶኬዳዋንቱ አ ቴራን ናሸታና። 6 ኤፍሬማ ገዝያን ናግያዋንቱ፥ “ሃይተ፤ መꬍና ጎዳኮ፥ ኑ ጾሳኮ፥ ፑደ ጽዮነ አነ ቦይተ!” ያጊደ ጼስያ ዎዲ ያና’ ያጋድ” ያጌ።

7 መꬍና ጎዳይ ሀዋዳን ያጌ፤ “ያቆባ አሳዉ ናሸቻን የጽተ፤ ካዉተꬃቱዋ ኡባፐ አꬍያ እስራኤልያዉ ሆምቦጭተ። መꬍና ጎዳይ እስራኤልያ አሳፐ አቴዳዋንታ አሼዳ ያጊደ ጋላታ ማዛሙርያ የጽተ። 8 በእተ፥ ታን ኡንቱንቱ ሁጲሳ ባጋ ቢታፐ አሀና፤ ሳኣ ጋጻፐካ ታን ኡንቱንታ ሺሻና። ቆቀቱ፥ ዎባቱ፥ ሻሃራ ማጫ አሳቱነ ኦይꬃይ ኦይቄዳ ማጫ አሳቱ ኡንቱንቱና እትፐ ያና፤ ሎይꬅ ዳሮ አሳይ ባረ ቢታ ስማና። 9 ታን ኡንቱንታ ዛራደ አህያ ዎደ፥ ኡንቱንቱ ናሸቻ ዳሩዋን ዬኪደነ ዎሲደ ያና። ታን ኡንቱንታ ሻፋ ላንቂያና፥ ኡንቱንታ ꬉበና ስታ ኦግያና ካለꬃና። አያዉ ጎፐ፥ ታን እስራኤልያ አሳዉ አዉዋ፤ ኤፍሬምካ ታዉ ባይራ ናኣ።

10 “ህንተኖ፥ ካዉተꬃቶ፥ መꬍና ጎዳ ቃላ ስስተ! ሃኮ ሳን፥ አባ ዶናን ደእያ ቢታቱዋን ሀዋዳን ያጊደ አዋይተ፤ ‘እስራኤላቱዋ ላሌዳዌ እ ኡንቱንታ ሺሻና፤ ቃይ ሄንꬃንቻይ ባረ ዉድያ ዶርሳ ሄምያዋዳን፥ እ ኡንቱንታ ሄማና’ ያግተ። 11 አያዉ ጎፐ፥ መꬍና ጎዳይ ያቆባ ዛራቱዋ ዎዜዳ፤ እ ኡንቱንታ ኡንቱንቱፐ ምንያዋንቱፐ ኩሽያፐ አሼዳ። 12 ኡንቱንቱ ዪደ ጽዮነ ደርያን ናሸቻዉ የጻና፤ ኡንቱንቱ መꬍና ጎዳይ እምያ ኬካተꬃን፥ ካꬃን፥ ዎይንያ ኤሳን፥ ዛይትያን፥ ዶርሳ ማራቱዋንነ ሚዛ ማራቱዋን ናሸታና። ኡንቱንቱ ሃꬃ ሎይꬅ ኡሼዳ አታክልትያ ሳኣ ማላ ግዳናዋ፤ ኡንቱንቱ ላኤንꬆ ሹልክኖ። 13 ሄ ዎደ ጌላዮቱ ናሸቲደ ዱራና፤ ዎዳላቱካ ጭማቱካ ናሸታና። ታን ኡንቱንቱ ዬኩዋ ናሸቻዉ ላማና፤ ታን ኡንቱንታ ምንꬃና፤ ኡንቱንቱ ካዩዋ ድራዉ ታን ኡንቱንታ ናሸቻና። 14 ታን ቄሳቶ ዳሮ ቁማ እማና፤ ታ አሳይካ ታ ኬካተꬃን ካላና። ታን መꬍና ጎዳይ ሀዋ ኦዳይ” ያጌ።

15 መꬍና ጎዳይ ሀዋዳን ያጌ፤ ዶመꬃ 35:16-19፤ ማቶሳ 2:18 “ዬኩነ ዝላሳይ ራማ ግያ ካታማን ስሰቴዳ፤ ራሄላ ባረ ናናቶ ዬካዉ፤ ኡንቱንቱ ꬋዬዳ ድራዉ፥ አጋ ጊና፥ አገናን እጻዱ” ያጌ።

16 መꬍና ጎዳይ ሀዋዳን ያጌ፤ “ዬክያዋ አጊደ፥ ህንተ አይፍያ አፎꬃ ቁጭተ። አያዉ ጎፐ፥ ህንተ ኦꬄዳ ኦሶ ዎይቱዋ ህንተ አካና፤ ሞርክያ ቢታፐ ህንተ ናናቱካ ስማና። ታን መꬍና ጎዳይ ሀዋ ኦዳይ። 17 ህንተ ናናቱ ባረንቱ ቢታ ስማናዉ ደእያ ድራዉ፥ ህንተዉ ስንꬃናዉ ህዶታይ ደኤ። ታን መꬍና ጎዳይ ሀዋ ኦዳይ።

18 “ኤፍሬማ ዛረꬅ ካዮቲደ፥ ሀዋዳን ያጊደ ኦድያዋ ቱሙዋፐ ታን ስሳድ፤ ‘ኔን ኑና ዋትቤና ኮሩማዳን ዋꬋዳ፤ ኑንካ አዛዘትቦኮ። ኔን መꬍና ጎዳ ኑ ጾሳ ግድያ ድራዉ፥ አነ ኑና ዛራ፤ ኑን ኔኮ ስማና። 19 ኑን ካሰ ኔፐ ዎራ ስሚደ ቤዶ፤ ሽን ሀእ ፓጼዶ። ኔን ኑና ሙራ ስምና ዬላቲደ፥ ኑ ትራ ባቄዶ፤ ኑን ኑ ያላጋተꬃ ላይꬃ ናጋራ ድራዉ፥ ካዉሼዶነ ዬላቴዶ’ ያጌድኖ።

20 “ቱሙ ኤፍሬመ ታዉ አልኦ ናኣ ግደኔ? እ ታን ሲቅያ ናኣ ግደኔ? ኤ! ታን ዳሮ ገደ አ ሱንꬃ ደንꬄዳ ዎደ ኡባን፥ አ ሀሳይያዋ አጋበይከ። ሄዋ ድራዉ፥ ታ ዎዛናይ አ ላሞቴ፤ ታን አዉ ሎይꬅ ቃረታይ። ታን መꬍና ጎዳይ ሀዋ ኦዳይ።

21 “ኦግያን ማላ ዎꬅተ፤ ማላ ምꬃቱዋካ ኤስተ። ያቲደ ህንተ ቤዳ ኦግያ አኬክተ። እስራኤልያ አሳዉ፥ ስምተ፤ ህንተ ካታማቱዋኮ ስምተ። 22 ህንተኖ፥ አማኑ ባይና እስራኤላቶ፥ አዉደ ጋካናዉ ቶይላካታንቴ? መꬍና ጎዳይ ሳኣ ቦላን እት ኦራꬃባ መꬋና፤ ሄዌነ፥ ማጫ አሳይ አቱማ አሳ ዩሹዋን ኤቃና።”

23 ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ “ታን እስራኤልያ አሳ ኦሞዱዋፐ ዛራደ አህያ ዎደ፥ ይሁዳ ቢታንነ አ ካታማቱዋን ኡንቱንቱ ላኤንꬁዋ፥ ‘ኔኖ ጽሎተꬃይ ደእያ ሳአዉ፥ ነኖ ጌሻ ደርያዉ፥ መꬍና ጎዳይ ኔና አንጆ’ ያጋና። 24 ይሁዳነ ይሁዳን ደእያ ካታማቱዋን ኡባን አሳይ ደአና፤ ጎሻንቻቱካ ዉድያና ዩይያ ሄንꬃንቻቱካ ያን ደአና። 25 ታን ዳቡራንቻቱዋ ዎልቃ ኦራꬃና፤ ቃይ ኮሻቲደ ግልቄዳዋንታካ ካልሳና” ያጌ።

26 ሄዋን ቤጎታደ ታ ዩሹዋ ጼላድ፤ ታ ገምእሹካ ታዉ ማልኦ ገምእሹዋ ግዴዳ።

27 መꬍና ጎዳይ ሀዋዳን ያጌ፤ “ታን እስራኤልያ ቢታንነ ይሁዳ ቢታን አሳነ መህያ ኩንꬅያ ዎዲ ያና። 28 ኡንቱንቱ ꬎቆላናዉ፥ ኮላናዉ፥ አꬃ አꬃ የጋናዉ፥ ꬋይሳናዉነ ባየꬃ አሀናዉ ዶሳደ ናጌዳዋ ኬሻ፥ ኡንቱንታ ዛራደ ግምባናዉነ ቶካናዉ ዶሳደ ናጋና። ታን መꬍና ጎዳይ ሀዋ ኦዳይ።

29 “ሄ ዎደ አሳይ፥ ‘አዎቱ ጋምኤ ዎይንያ ቴራ ሚና፥ ናናቱዋ አቻይ ዝልኤዳ’ ያጊደ ሃሳይያዋ አጋና። ህዝ. 18:2 30 ሽን አሳይ እቱ እቱ ባረ ናጋራን ናጋራን ሀይቃና፤ ጋምኤ ዎይንያ ቴራ ምያ አሳ ኡባዉ አ አቻይ አቻይ ዝልአና” ያጌ።

31 መꬍና ጎዳይ ሀዋዳን ያጌ፤ “ታን እስራኤልያ አሳናነ ይሁዳ አሳና ኦራꬃ ጫቁዋ ጫቀትያ ጋላሳቱ ያና። ማቶሳ 26:28፤ ማር. 14:24፤ ሉቃሳ 22:20፤ 1 ቆሮ. 11:25፤ 2 ቆሮ. 3:6እብራ. 8:8-12 32 ሄ ጫቁ ታን ኡንቱንታ ግብጼፐ ከሳናዉ ኡንቱንቱ ኩሽያ ኦይቄዳ ዎደ፥ ኡንቱንቱ ማይዛ አዎቱዋና ጫቀቴዳ ጫቁዋ ማላ ግደና፤ ታን ኡንቱንቶ አስና ማላ ግዳ ኡትናካ ኡንቱንቱ ታ ጫቁዋ መንꬄድኖ። ታን መꬍና ጎዳይ ሀዋ ኦዳይ። 33 ሽን ታን መꬍና ጎዳይ ሄ ጋላሳቱዋፐ ጉይያን እስራኤልያ አሳና ጫቀታና ጫቁ ሀዋ: ታን ታ ህግያ ኡንቱንቱ ግዶን ዎꬃና፤ ቃይ ኡንቱንቱ ዎዛናንካ ጻፋና። ታን ኡንቱንቱ ጾሳ ግዳና፤ ቃይ ኡንቱንቱካ ታ አሳ ግዳና። እብራ. 10:16 34 አሳይ ባረ ሾሩዋ ዎይ ባረ እሻ፥ ‘መꬍና ጎዳ ኤራ’ ያጊደ ታማርስያዋ አጋና፤ አያዉ ጎፐ፥ ጉꬃፐ ዶሚደ፥ ዎጋ ጋካናዉ፥ ኡንቱንቱ ኡባይ ታና ኤራና። ታን ኡንቱንቱ ናቁዋ አቶ ጋና፤ ኡንቱንቱ ናጋራካ ላኤንꬆ ሀሳይከ። ታን መꬍና ጎዳይ ሀዋ ኦዳይ” ያጌ። እብራ. 10:17

35 መꬍና ጎዳይ፥ አዋ ጋላሳን ፖእሴዳዌ፥ አግናይነ ጾልንተቱ ቃማን ፖአናዳን ህግያ ዎꬄዳዌ፥ አባካ ቃꬂደ፥ ቤታይ ጉማናዳን ኦꬅያዌ፥ ኡባፐ ዎልቃማ መꬍና ጎዳ ጌተትያዌ፥ ሀዋዳን ያጌ፤ 36 “ሀ ኤቂደ ደእያ መታ ህጊ ታ ስንꬃፐ ክቾፐ፥ ሄ ዎደ እስራኤልያ ዘረꬃቱ ታ ስንꬃን መꬍናዉ ታ አሳ ግዲደ ደእያዌ አታናዋ። መꬍና ጎዳይ ሀዋ ኦዳይ” ያጌ።

37 መꬍና ጎዳይ ሀዋዳን ያጌ፤ “ቦላ ሳሎቱ ልከታናዉ፥ ዎይ ጋርሳ ሳኣ ባሱካ ኤረታናዉ ዳንዳዮፐ፥ ሄ ዎደ ታን እስራኤልያ ዘረꬃቱዋ ኡባ፥ ኡንቱንቱ ኦꬄዳ ባይዙዋ ኡባ ድራዉ፥ ታ ስንꬃፐ ድጋና። ታን መꬍና ጎዳይ ሀዋ ኦዳይ” ያጌ።

38 መꬍና ጎዳይ ሀዋዳን ያጌ፤ “ሀናንኤላ አዱሳ ግምቢያፐ ዶሚደ፥ ዞዝያ ፐንግያ ጋካናዉ፥ የሩሳላመ ካታማይ ታዉ፥ ጾሳዉ፥ ካታማ ግዲደ፥ ስሚደ ኬጸትያ ጋላሳቱ ያና። 39 ሄ ካታማ ዛዋይካ አዋይ ዉልያ ባጋፐ ካል ቢደ፥ ጋሬባ ዞዝያነ ጎአ ዩሹዋ ጋካናዉ አካና። 40 አሃ ሞግያነ ብድንꬃ ኦልያ ዛንጋራይነ ቀድሮና ዛንጋራፐ ቆሞና አዋይ ዶልያ ባጋ ባጋና ቢደ፥ ፓራ ፐንግያ ዞዝያ ጋካናዉ ደእያ ጋድያ ኡባይ መꬍና ጎዳዉ ዱማቲደ፥ ጌሻ ግዳናዋ። ሀዋፐ ስንꬃናዉ ካታማይ መꬍናዉ ሾደተናነ ኮለተና” ያጌ።