1 መꬍና ጎዳፐ ኤርማሳዉ ዬዳ ቃላይ ሀዋ። 2 መꬍና ጎዳይ እስራኤልያ ጾሳይ ሀዋዳን ያጌ፤ “ኤርማሳ፥ ታን ነዉ ኦዴዳ ቃላ ኡባ ጻꬃ ማጻፋን ጻፋ። 3 ታ አሳ እስራኤልያነ ይሁዳ ኦሞዱዋፐ ጉየ ዛራደ እሻልስያ ጋላሳቱ ያና፤ ታን ኡንቱንቱ ማይዛ አዋቶ እሜዳ ቢታዉ ኡንቱንታ ዛራና ያጌ መꬍና ጎዳይ፤ ኡንቱንቱካ ላታናዋንታ። መꬍና ጎዳይ ሀዋ ኦዳይ” ያጌ።

4 መꬍና ጎዳይ እስራኤልያ አሳባነ ይሁዳ አሳዋ ኦዴዳ ቃላይ ሀዋ። 5 መꬍና ጎዳይ ሀዋዳን ያጌ፤ “ታን አሳይ ያሻዉ ዋስያ ዋሱዋ ስሳድ፤ ዳጋማ ዋሶፐ አትና፥ ሀዌ ሳሮ ዋሶ ግደና። 6 አነ ላልእተነ ዎችተ! አቱማ አስ ባንኪደ፥ ናኣ የላናዉ ዳንዳዪ? ያትና፥ አቱማ አሳይ ኡባይ ኦይꬃይ ኦይቄዳ ማጫ አሳዳን፥ ባረ ኩሽያን ባረ ኡሉዋ ኦይቃ ደእሽን ታን በእያዌ አዬ? አሳ ኡባ ሶምኢ አያዉ ቶሱ ጌዴ? 7 አየ አና! ሄ ጋላሳይ ኢታ ጋላሳ፤ ሄዋ ማላ ጋላስ ኡባካ ባዋ። ሄ ጋላሳይ ያቆባ ዛረቶ መቶ ዎደ ግዳናዋ። ግዶፐነ ኡንቱንቱ ሄዋፐ አታና” ያጌ።

8 ኡባፐ ዎልቃማ መꬍና ጎዳይ ሀዋዳን ያጌ፤ “ሄ ጋላስ ታን ኡንቱንቱ ሞርግያፐ ሞርገ ምꬃ መንꬃና፤ ኡንቱንቱ ቃሸቴዳ ሳንሳላታካ ዱꬃና። ሀዋፐ ስንꬃናዉ አላጋ ቢታ አሳይ ኡንቱንታ አይለየና። 9 ሄዋ አጊደ ኡንቱንቱ መꬍና ጎዳዉ፥ ባረንቱ ጾሳዉ፥ ኦꬃና፤ ታን ኡንቱንቶ ደንꬅያ ካትያ ዳዊተዉ ኡንቱንቱ ሞደታና።

10 “ሄዋ ድራዉ፥ ታ ቆማቶ፥ ያቆባ ዛረቶ፥ ያዮፕተ!ኤር. 46:27-28 ህንተኖ፥ እስራኤላቶ፥ ዳጋሞፕተ! ህንተ ሃኮ ሳን ደእሺና፥ ታን ህንተና አሻና፤ ህንተ ዛራቱዋካ ኡንቱንቱ ኦሞደቲደ ቢታፐ የድሳና። ያቆባ ዛረꬅ ስሚደ፥ አየንቶ ቦቼናን ሳሮ ደአና፤ ኡንቱንታ አይ አሳይነ ያሽሰና። ታን መꬍና ጎዳይ ሀዋ ኦዳይ። 11 ታን ህንተና አሻናዉ ህንተናና ደአይ። ታን መꬍና ጎዳይ ሀዋ ኦዳይ። ታን ህንተና ላሌዳዋ ኡባ ኡባና ꬋይሳና፤ ሽን ህንተና ኡባና ꬋይስከ። ታን ህንተና ልከ ፕርዳን ሙራና፤ ሙሩዋ ባይናን ህንተና ኡባና ጮ የድከ” ያጌ።

12 መꬍና ጎዳይ ሀዋዳን ያጌ፤ “ህንተ ደሸꬃይ ፓጸናዋ፤ ህንተ ማዱꬃይካ ኢታ። 13 ህንተ የዉዋን ህንተና ማድያዌ ባዋ፤ ህንተ ማዱꬃይካ ꬋሊ ባዋ፤ ህንተዉ ፓጹ ባዋ። 14 ህንተ ሲቆቱ ኡባቱ ህንተና ዶጌድኖ፤ ኡንቱንቱ ህንተባ ግድክኖ። ህንተና ሞርክያዳን ሾጫድ፤ መቀꬅ ባይና አሳይ ሙሪያዋዳን ሙራድ። አያዉ ጎፐ፥ ህንተ ባይዙ ዳልጌዳ፤ ህንተ ናጋራይካ ዳሬዳ። 15 ሀ ፓጸና ህንተ ደሸꬃዉ አያዉ ዋሲቴ? ህንተ ባይዙ ዳልጊደ ድራዉነ ህንተ ናጋራይ ዳሪደ ድራዉ፥ ሀዋ ህንተ ቦላ ታን ኦꬃይ።

16 “ሽን ህንተና ቢታ ከስ ሜዳ ኡባቱ ሜተታና፤ ህንተ ሞርከቱ ኡባቱካ ኦሞዶ ባና። ህንተና ቦንቄዳዋንቱ ቦንቀታና፤ ህንተባ ኦላን አኬዳዋንቱባካ ኦላን አካና። 17 ታን ህንተዉ ኬክሳና፤ ህንተ ማዱꬃካ ፓꬃና። አያዉ ጎፐ፥ ኡንቱንቱ ህንተና፥ ‘ሀዋንቱ ኦለቴዳዋንታ፤ ጽዮኖ ጊደ ኮይያዌ ባዋ’ ያጊኖ። ታን መꬍና ጎዳይ ሀዋ ኦዳይ” ያጌ።

18 መꬍና ጎዳይ ሀዋዳን ያጌ፤ “ታን ያቆባ ዛራቱዋ ጎልያ ኦሞደቶደፐ ጉየ ዛራደ፥ እሻልሳና፤ ኡንቱንቱ ደእያ ሳአዉካ ቃረታና። የሩሳላመ ካታማይካ ካሰ ባረ ኮለቴድኖ፥ ካትያ ጎሊካ ካሰ ባረ ሳኣን ስሚደ ኬጸታና። 19 ያን ደእያ አሳይ ኡባይ ጋላታ ማዝሙርያነ ናሸቻ የꬃ የጻና። ታን ኡንቱንቱ ፓይዱዋ ዳርሳና፤ ኡንቱንቱ ፓይዱ ላኤንꬆ ጉጸና። ታን ኡንቱንቱ ቦንቼቴዳ ደርያ ኦꬃና፤ ኡንቱንቱ ካትክኖ። 20 ኡንቱንቱ ዘረꬃይ በን ዎደ ደኡዋዳን ደአና፤ ኡንቱንቱ ማባራይካ ታ ስንꬃን ምን ኤቃና። ኡንቱንታ ኡንኤꬅያዋንታ ኡባካ ታን ሙራና። 21 ኡንቱንቱ ካፑ ኡንቱንቱ አሳፐ እቱዋ ግዳናዋ፤ ኡንቱንታ ሞድያዌ ኡንቱንቱ ግዶፐ ከሳና። ታን አ ታ ማታ አሀና፤ እ ታኮ ሺቃና። ታን ሺሸናን ደእሺና፥ ጻሊደ ታኮ ሺቃናዉ ዳንዳይያዌ ኦኔ? ታን መꬍና ጎዳይ ሀዋ ኦዳይ። 22 ሄዋ ድራዉ፥ ህንተ ታ አሳ ግዳና፤ ታንካ ህንተ ጾሳ ግዳናዋ” ያጌ።

23 በእተ፥ መꬍና ጎዳ ሀንቁ ጎትያዳን ሀኔ፤ እካ ስርመቲደ፥ ኢታቱዋ ሁጲያን ያና። 24 መꬍና ጎዳይ ባረ ዎዛና ሀልቹዋ ዉርሲደ ፖላና ጋካናዉ፥ አ ኤጽያ ሀንቁ ጉየ ስመና። ሄዋ ጉየፐ ይያ ዎደቱዋን ህንተ አኬካና።