1 ትምቢትያ ኦድያ ኤርማስ ኦሞደቴዳዋንቱ ግዶን ደእያ አቴዳ ጭማቶ፥ ቄሳቶ፥ ትምቢትያ ኦድያዋንቶነ ናቡካዳናጾር የሩሳላመፐ ኦሞዲደ፥ ባብሎነ አፌዳ ሀራ አሳቶ ኡባዉ የሩሳላመፐ የዴዳ ዳብዳቢ ሀዋፐ ካሊደ ጻፈቴዳዋ። 2 ካታ. 24:12-16፤ 2 ኦዱዋ 36:10 2 ሀዌ ሀኔዳዌ፥ ካቲ ዮኣኪን፥ ካታታ አ አታ፥ አ ኦሳንቻቱ፥ ይሁዳነ የሩሳላመ ካፓቱ፥ ኩሽያ ኦሱዋ ሂላንቻቱነ ብራታ ቆጽያዋንቱ የሩሳላመፐ ከስ ስምና። 3 ኤርማስ ይሁዳ ካቲ ሰደቅያስ ባብሎነ ካትያ ናቡካዳናጾራዉ ኪትያ ሳፋና ናኣ ኤልኣሳነ ህልቂያ ናኣ ጋማርያ ቦላን ሄ ዳብዳቢያ ኪቴዳ።

ዳብዳቢ ሀዋዳን ያጌዳ፤ 4 “ኡባፐ ዎልቃማ መꬍና ጎዳይ፥ እስራኤልያ ጾሳይ፥ ታን የሩሳላመፐ ባብሎነ ኦሞድሳደ የዴዳ አሳዉ ኡባዉ ሀዋዳን ያጋይ፤ 5 ጎለቱዋ ኬጺደ፥ ኡንቱንቱን ደእተ። ካꬃ ዘሪደ፥ አይፍያ ሚተ። 6 ማጫ አሳ አክተ፤ አኪደ ማጫዋ አቱማዋ የልተ። ህንተ ናናቶካ ማጫ አሳ ጊግሲደ እምተ፤ ህንተ ማጫ ናናቱዋካ አስናዉ እምተ። ኡንቱንቱካ ማጫዋ አቱማዋ የልኖ። ያን ፓይዱዋ ጮራትተ፤ ጉጾፕተ። 7 ቃይ ታን ህንተና ኦሞዶ የዴዳ ካታማዉ ሳሩ ደአናዳን ኮይተ። ሄ ካታማዉ መꬍና ጎዳ ዎስተ። አያዉ ጎፐ፥ ‘አዉ ሳሩ ደኦፐ፥ ህንተዉካ ሳሩ ደአና’ ያጋይ።

8 “ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ህንተ ግዶን ህንተ ትምቢትያ ኦድያዋንቱነ ሻሬቾቱ ኦድያባን ጭመቶፕተ። ኡንቱንቱ አኩመትያ አኩሙዋካ ስሶፕተ። 9 አያዉ ጎፐ፥ ኡንቱንቱ ታ ሱንꬃን “ትምቢትያ” ጊደ ዎርዶባ ኦዲኖ፤ ታን ኡንቱንታ ኪታበይከ’ ያጌ መꬍና ጎዳይ።

10 “መꬍና ጎዳይ ሀዋዳን ያጌ፤ ‘ባብሎነ ላይꬃይ ላፑን ታሙ ፖለትያ ዎደ፥ ታን ህንተ ድራዉ ያና፤ ታን ህንተና ህንተ ቢታ ዛራደ አሀና ጌዳ ሎኦ ቃላ ፖላና። 2 ኦዱዋ 36:21፤ ኤር. 25:11፤ ዳኔላ 9:2 11 አያዉ ጎፐ፥ ታን ህንተዉ ሀልችያ ሀልቹዋ ታን መꬍና ጎዳይ ኤራይ፤ ሄዌካ፥ ህንተዉ ስንꬃ ህዶታነ ናሸቻ እማና ማላ፥ ሳሮ ሀልቹዋፐ አትና፥ ኢታ ሀልቹዋ ግደና። 12 ሄዋፐ ጉይያን፥ ህንተ ታና ጼሳና፤ ታኮ ያናነ ታና ዎሳና፤ ታንካ ህንተዉ ስሳና። 13 ህንተ ታና ኮያና፤ ህንተ ታና ህንተ ፖሎ ዎዛናፐ ኮዬዳ ዎደ ደማና። ዛረ. 4:29 14 ታን ህንተዉ ቤታና። ታን ህንተና ኦሞዱዋፐ ዛራና። ታን ህንተና ላሌዳ ካዉተꬃቱዋ ኡባፐነ ሳኣ ኡባፐ ሺሻና ያጌ መꬍና ጎዳይ። ታን ህንተና ኦሞዶ የዳናፐ ካሰ ህንተ ደኤዳ ሳኣ ጉየ ዛራደ አሀና። ታን መꬍና ጎዳይ ሀዋ ኦዳድ’ ያጌ።”

15 ህንተ፥ “መꬍና ጎዳይ ትምቢትያ ኦድያባ ኑዉ ባብሎነን ደንꬄዳ ያጌድታ። 16 ሄዋ ድራዉ፥ ዳዊታ ካዉተꬃ አራታን ኡትያ ካትያባ፥ ሀ ካታማን ደእያ አሳ ኡባባነ ህንተናና ኦሞዱዋን ከስቤና ህንተ ዳቦቱዋባ መꬍና ጎዳይ ሀዋዳን ያጌ። 17 ኤ፥ ኡባፐ ዎልቃማ መꬍና ጎዳይ ሀዋዳን ያጌ፤ ‘ታን ኡንቱንቱ ቦላ ማሻ፥ ኮሻነ ኢታ ሀርግያ አሀና። ቃይ ታን ኡንቱንታ ማናዉ ጊገና ዎቄዳ ባላስያ ቴራ ማላ ኦꬃና። 18 ታን ኡንቱንታ ማሻን፥ ኮሻንነ ኢታ ሀርግያን የደርሳና፤ ታን ኡንቱንቱ ሳኣን ደእያ ካዉተꬃ ኡባዉ ዳጋማ ኦꬃና። ቃይ ታን ኡንቱንታ ከሳደ የዴዳ ቢታ ኡባን ቃንገꬃ፥ ዳጋማ፥ ቦርያነ ሸቃ ኦꬃና። 19 አያዉ ጎፐ፥ ትምቢትያ ኦድያ ታ ቆማቱዋ ቦላ ታን ኡንቱንቶ ዛራ ዛራደ ኪቴዳ ታ ቃላ ኡንቱንቱ ስሰናን እጼድኖ ያጌ መꬍና ጎዳይ። ህንተካ ኦሞደት ቤዳዋንቱ ስሰናን እጼድታ ያጌ መꬍና ጎዳይ። 20 ታን የሩሳላመፐ ባብሎነ ኦሞድሳደ የዴዳ አሳቶ፥ ህንተ ኡባይካ ታ ቃላ፥ መꬍና ጎዳ ቃላ ስስተ’ ያጌ።

21 “ሀናናዋ ጊደ ህንተዉ ታ ሱንꬃን ዎርዶባ ኦድያ ቆላያ ናኣ አካባባነ ማእሴያ ናኣ ጽድቅያባ ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ታን ኡንቱንታ ባብሎነ ካትያ ናቡካዳናጾራዉ አꬃደ እማና። ህንተ ጼልሽን፥ እ ኡንቱንታ ዎꬋና። 22 ሄዋፐ ጉይያን፥ ይሁዳፐ ኦሞደቲደ፥ ባብሎነ ቤዳ አሳይ እት ኡራ ሸቃናዉ ኮዮፐ፥ “መꬍና ጎዳይ ኔና ባብሎነ ካቲ ታማን ጹጌዳ ጽድቅያዳንነ አካባዳን ኦꬆ” ያጋና። 23 አያዉ ጎፐ፥ ኡንቱንቱ እስራኤልያን ሎይꬅ ናጋራ ኦꬄድኖ። ኡንቱንቱ ባረንቱ ሾሮቱዋ ማጫ አሳ ዎሹሜድኖ፤ ያቲደ ታን ኡንቱንታ አዛዛቤና ዎርዶባ ታ ሱንꬃን ሃሳዪኖ። ሄዋ ኤርያዌ ታና፤ ሄዎ ታን ማርካ። ታን መꬍና ጎዳይ ሀዋ ኦዳድ’ ያጌ” ያጌዳ።

24 ጾሳይ ነሄላምያ ሻማእያዉ ሀ ኪታ ኪታና ማላ፥ ኤርማሳዉ ኦዴዳ። 25 “ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ኔን ነ ሱንꬃን ዳብዳቢያ የሩሳላመን ደእያ አሳዉ ኡባዉ፥ ማእሴያ ናኣ ቄስያ ጻፋንያዉነ ሀራ ቄሳቱ ዋ ኡባዉ የዳዳ። ኔን ጻፋንያ ሀዋዳን ያጋዳ፤ 26 “መꬍና ጎዳ ጎልያን ካፑዋ ግዳና ማላ፥ ኔና መꬍና ጎዳይ ዮዳሄ ድራዉ ቄስያ ኦꬂደ ሱንꬄዳ። ትምቢትያ ኦዴቶ ግያ ጎይያ አሳቱዋ፥ ቃጲያንነ ቶላን ገልሳናዉ በሴ። 27 ሄዋ ድራዉ፥ ህንተ ግዶን ትምቢትያ ኦድያ አናቶታፐ ዬዳ ኤርማሳ አያዉ ሄዋዳን ኦꬃበይኪ?” 28 ኑን ባብሎነን ደእሺና፥ ኤርማስ ጻፊደ፥ ኑዉ ሀዋዳን ያጊደ ኪቴዳ፤ ያን ህንተ ጋምአና። ጎለቱዋ ኬጺደ፥ ደእተ። ካꬃ ዘሪደ፥ አይፍያ ሚተ’ ያጌዳ።”

29 ቄስያ ጻፋኒ ትምቢትያ ኦድያ ኤርማሳዉ ሀ ዳብዳቢያ ናባቤዳ። 30 መꬍና ጎዳ ቃላይ ኤርማሳዉ ሀዋዳን ያጊደ ዬዳ፤ 31 “ኪታ ኦሞዱዋን አሳዉ ኡባዉ ሀዋዳን ያጋደ ኪታ፤ ‘ነሄላምያ ሻማእያባ መꬍና ጎዳይ ሀዋዳን ያጌ፤ “ታን ኪተናን ሻማኢ ህንተዉ፥ ሀናናዋ ጊደ ኦዴዳ ድራዉነ ህንተና ዎርዱዋ አማንꬄዳ ድራዉ፥ 32 ታን መꬍና ጎዳይ ነሄላምያ ሻማእያነ አ ሶ አሳ ሙራና። ታ ቦላ እ ማካላባ ሃሳዬዳ ድራዉ፥ ሀ አሳ ግዶን አዉ እት ኡራይነ ፓጻ ደኤና። ቃይ እ ባረ ሁጲያንካ ታን ታ አሳዉ ኦꬃና ኬካተꬃ በኤና። ታን መꬍና ጎዳይ ሀዋ ኦዳድ” ያጌ’ ያጋ” ያጌዳ።