1 ሄ ላይꬅ፥ ይሁዳ ካቲ ሰደቅያስ ካዉተꬃ ዶሜዳ ሄራን፥ ኦይደንꬆ ላይꬃን፥ እቼሸንꬆ አግናን ጋባኦናፐ ዬዳ አዙራ ናአይ ትምቢትያ ኦድያ ሀናኒ፥ መꬍና ጎዳ ጎልያን ቄሳቱ ዋነ አሳቱዋ ኡባ ስንꬃን ታዉ ሀዋዳን ያጊደ ሃሳዬዳ፤ 2 ካታ. 24:18-20፤ 2 ኦዱዋ 36:11-13 2 “ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ታን ባብሎነ ካትያ ሞርገ ምꬃ መንꬃና። 3 ባብሎነ ካቲ ናቡካዳናጾር ሀዋፐ ደንꬂደ፥ ባብሎነ አፌዳ፥ መꬍና ጎዳ ጎልያ ሚሻ ኡባ ታን ላኡ ላይꬃ ግዶን ዛራደ፥ ሀ ሳኣ አሀና። 4 ቃይ ታን እዮአቄማ ናኣ ይሁዳ ካትያ እዮኣኪናካ፥ ይሁዳፐ ኦሞደቲደ፥ ባብሎነ ቤዳ አሳ ኡባ ዛራደ ሀ ሳኣ አሀና። አያዉ ጎፐ፥ ታን ባብሎነ ካትያ ሞርገ ምꬃ መንꬃና። መꬍና ጎዳይ ሀዋ ኦዳድ’ ያጌ” ያጌዳ።

5 መꬍና ጎዳ ጎልያ ግዶን ኤቄዳ ቄሳቱ ዋነ አሳቱዋ ኡባቱዋ ስንꬃን ትምቢትያ ኦድያ ኤርማስ ትምቢትያ ኦድያ ሀናንያዉ 6 ሀዋዳን ያጌዳ፤ “አመንእ! መꬍና ጎዳይ ያቶ! መꬍና ጎዳ ጎልያ ሚሻቱዋነ ኦሞደቲደ ቤዳ አሳ ኡባ ባብሎነፐ ዛሪደ፥ ሀ ሳኣ አሂደ፥ ኔን ኦዴዳ ቃላ መꬍና ጎዳይ ፖሎ! 7 ግዶፐነ፥ አነ ታን ነዉካ ሀ አሳ ኡባዉካ ኦድያዋ ስሳ። 8 በን ኔፐነ ታፐ ካሰ ደኤዳ ትምቢትያ ኦድያዋንቱ ኦላይ፥ ኢታባይነ ኢታ ሀርግያ ዳሮ ቢታቱዋ ቦላነ ዎልቃማ ካዉተꬃቱዋ ቦላ ሀናናዋ ኦዴድኖ። 9 ሽን፥ ‘ሳሮባይ ሀናና’ ጊደ ኦድያ ትምቢትያ ኦድያዋባ ግዶፐ፥ ሄ ኦድያዋ ቃላይ ፖለትያ ዎደ፥ ሄ ዎደ ቱሙዋፐ መꬍና ጎዳይ አ ኪቴዳዋ ኤረታና” ያጌዳ።

10 ሄዋፐ ጉይያን፥ ትምቢትያ ኦድያ ሀናኒ ትምቢትያ ኦድያ ኤርማሳ ሞርግያፐ ሞርገ ምꬃ አኪደ መንꬄዳ። 11 ሀናኒ አሳ ኡባ ስንꬃን ሀዋዳን ያጊደ ሃሳዬዳ፤ “መꬍና ጎዳይ ሀዋዳን ያጌ፤ ‘ታን ላኡ ላይꬃቱ ግዶን ባብሎነ ካትያ ናቡካዳናጾራ ሞርገ ምꬃ ካዉተꬃቱዋ ኡባ ሞርግያፐ ደንꬃደ ሀዋዳን መንꬃና’ ያጌ” ያጌዳ። ያትና፥ ትምቢትያ ኦድያ ኤርማስ ደንዲደ፥ ባረ ብያሳ ቤዳ።

12 ትምቢትያ ኦድያ ሀናኒ ትምቢትያ ኦድያ ኤርማሳ ሞርግያፐ ሞርገ ምꬃ መንꬄዳዋፐ ጉይያን፥ መꬍና ጎዳ ቃላይ ትምቢትያ ኦድያ ኤርማሳዉ ዬዳ፤ 13 “ባ፤ ባደ ሀናንያዉ ኦዳ፤ መꬍና ጎዳይ ሀዋዳን ያጌ፤ ‘ኔን ምꬃ ሞርገ ምꬃ መንꬃዳ፤ ሽን ኔን አ ድራዉ ብራታ ሞርገ ምꬃ መꬋና’ ያጌ። 14 ቃይካ ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ኡንቱንቱ ባብሎነ ካትያ ናቡካዳናጾራዉ ሞደታና ማላ፥ ታን ሀ ካዉተꬃቱዋ ኡባ ሞርግያን ብራታ ሞርገ ምꬃ ዎꬃና፤ ኡንቱንቱካ አዉ ሞደታና። ሀራይ አትና፥ ባዞ ዶአቱዋካ አዉ እማድ’ ያጌ ያጋ” ያጌዳ።

15 ሄዋፐ ጉይያን፥ ትምቢትያ ኦድያ ኤርማስ ትምቢትያ ኦድያ ሀናንያ ሀዋዳን ያጌዳ፤ “ሀናንያዉ፥ ስሳ! መꬍና ጎዳይ ኔና ኪትቤና፤ ሽን ኔን ሀ አሳይ ዎርዶባን አማነታና ማላ ኦꬃዳ። 16 ሄዋ ድራዉ፥ መꬍና ጎዳይ ሀዋዳን ያጌ፤ ‘ታን ኔና ሀ ሳኣ ቦላፐ ድጋና። ኔን ሀ አሳይ ታ ቦላን ማካላናዳን ዞሬዳ ድራዉ፥ ኔን ሀ ላይꬅ ሀይቃና’ ያጌ” ያጌዳ መꬍና ጎዳይ።

17 ሄ ላይꬅካ ላፑንꬃ አግናን ትምቢትያ ኦድያ ሀናኒ ሀይቄዳ።