1 እዮስያሳ ናአይ ሰደቅያስ፥ ይሁዳን ካዉተꬃ ዶሜዳ ሄራን፥ ሀ ቃላይ መꬍና ጎዳፐ ኤርማሳኮ ዬዳ። 2 ካታ. 24:18-20፤ 2 ኦዱዋ 36:11-13 2 መꬍና ጎዳይ ታዉ ኦዴዳዌ ሀዋ፤ “ነዉ ሞርገ ምꬃነ ጎንያ ዳፉዋ ዎዶሩዋና ደእያ ቅንቂሪትያ መꬋ፤ ነ ሞርግያን ዎꬃ። 3 ይሁዳ ካትያ ሰደቅያሳኮ የሩሳላመ ኪተቴዳ አሳቱዋ ቦላ፥ ኤዶማ ካትያዉ፥ ሞኣባ ካትያዉ፥ አሞና አሳቱዋ ካትያዉ፥ ጺሮሳ ካትያዉነ ሲዶና ካትያዉ ኪታ። 4 ኡንቱንቱ ባረንቱ ጎዳቶ ሀዋዳን ያጊደ ኦዳና ማላ፥ ኡንቱንታ አዛዛ፤ ‘ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ 5 “ታ ዎልቃማ ዎልቃንነ ታ የዴዳ ኩሽያን ሀ ሳኣ፥ ሳኣን ደእያ አሳ፥ መህያነ ዶኣ ታን መꬋድ። አ ታን ታ ኮይያ ኡራዉ እማይ። 6 ስም ሀእ ታን ቢታ ኡባ ታ ቆማዉ፥ ባብሎነ ካትያ ናቡካዳናጾራዉ አꬃደ እማድ። ቃይ ታን ባዞ ዶአቱካ አዉ ሞደታና ማላ ኦꬃድ። 7 አ ቢታይ ሞደትያ ዎዲ ጋካናዉ፥ ካዉተꬃቱ ኡባይ አዉ፥ አ ናአዉነ አ ናኣ ናአዉ ሞደታና። ሄዋፐ ጉይያን፥ ዳሮ ካዉተꬃቱነ ዎልቃማ ካተቱ አ ሞዳና።

8 “ ‘ “ሽን አይ ቢታይነ ዎይ አይ ካዉተꬃይነ ሀ ባብሎነ ካትያ ናቡካዳናጾራዉ አዛዘተናን እጾፐ አ ሞርገ ምꬃን ገለናን እጾፐ፥ ታን መꬍና ጎዳይ ሄ ካዉተꬃ አ ኩሽያን ꬋይሳና ጋካናዉ፥ ማሻን፥ ኮሻንነ ኢታ ሀርግያን ሙራና። 9 ሄዋ ድራዉ፥ ህንተና፥ ባብሎነ ካትያዉ ሃረትክታ ያግያ ህንተ ትምቢትያ ኦድያዋንታ፥ ህንተዉ ካይያዋንቱ፥ ህንተ አኩሙዋ ብልያዋንታ፥ ህንተ ሻሬቾቱነ ማልያዋንቱ ኦድያዋ ስሶፕተ። 10 አያዉ ጎፐ፥ ኡንቱንቱ ህንተዉ ዎርዱዋ ኦዲኖ፤ ሄዋ ህንተና ህንተ ቢታፐ ሃሲኖ። ህንተና ላጋደ ከሳና፤ ህንተካ ꬋያና። 11 ሽን አይ ካዉተꬃይነ ባብሎነ ካትያ ሞርገ ምꬃን ገሊደ፥ አዉ ሞደቶፐ፥ ታን መꬍና ጎዳይ ሄ ካዉተꬃ አ ቢታን አሻና፤ ኡንቱንቱ ሄ ቢታ ጎሻናነ ያን ደአና” ያጌ’ ያጋ” ያጌዳ።

12 ታን ይሁዳ ካትያ ሰደቅያሳዉካ ሀዋ ማላትያ ቃላ ኦዳድ፤ “ባብሎነ ካትያ ሞርገ ምꬃን ሆካደ ገላ። አዉነ አ አሳዉ ሞደታ። ያቶፐ፥ ኔን ፓጻ ደአና። 13 መꬍና ጎዳይ ባብሎነ ካትያዉ ሞደተናን እጽያ ካዉተꬃዉ ጌዳዋዳን ማሻን፥ ኮሻንነ ኢታ ሀርግያን ኔንነ ነ አሳይ አያዉ ሀይቂቴ? 14 ‘ህንተ ባብሎነ ካትያዉ ሃረትክታ’ ግያ ትምቢትያ ኦድያዋንቱ ቃላ ስሶፕተ። አያዉ ጎፐ፥ ሄዌ ኡንቱንቱ ህንተዉ ኦድያዌ ዎርዱዋ። 15 መꬍና ጎዳይ ሀዋዳን ያጌ፤ ‘ታን ኡንቱንቱ ኪታበይከ፤ ሽን ኡንቱንቱ ታ ሱንꬃን፥ “ትምቢትያ” ጊደ ኦዲኖ። ሄዋ ድራዉ፥ ታን ህንተና ላጋደ ከሳና፤ ህንተካ ህንተዉ ትምቢትያ ኦድያዋንቱካ ꬋያና’ ያጌ” ያጋድ።

16 ሄዋፐ ጉይያን፥ ታን ቄሳቶነ ሀ አሳ ኡባዉ ሀዋዳን ያጋደ ሃሳያድ፤ “መꬍና ጎዳይ ሀዋዳን ያጌ፤ መꬍና ጎዳ ጎልያ ሚሻይ ባብሎነፐ ሀእ ማታና ስሚደ ያና” ያጊደ ኦድያ ህንተ ትምቢትያ ኦድያዋንቱ ቃላ ስሶፕተ። አያዉ ጎፐ፥ ኡንቱንቱ ህንተዉ ኦድያዌ ዎርዱዋ። 17 ኡንቱንቱ ግያዋ ስሶፕተ፤ ባብሎነ ካትያዉ ሞደትተነ ፓጻ ደእተ! ሀ ካታማይነ አያዉ ኮለት ክቼዳ ሳኣ ግዳኔ? 18 ኡንቱንቱ ትምቢትያ ኦድያዋንታ ግዶፐነ መꬍና ጎዳ ቃላይ ኡንቱንቱን ደኦፐ፥ መꬍና ጎዳ ጎልያን፥ ይሁዳ ካትያ ጎልያንነ የሩሳላመን አቴዳ ኬሻ ሚሻይ ባብሎነ ቤናዳን ታና፥ ኡባፐ ዎልቃማ መꬍና ጎዳ ዎስኖ ያጌ።

19 ኡባፐ ዎልቃማ መꬍና ጎዳይ፥ “ጌሻ ጎልያፐ ስንꬃ ባጋን ኤቄዳ ላኡ ናስያ ቱሳቱዋባ፥ አኮ-ከርያባ፥ ጫና ጋረቱዋባነ ሀራ ሚሻቱዋ ኡባቱዋባ ሀዋዳን ያጌ፥ 20 ባብሎነ ካቲ ናቡካዳናጾር እዮአቄማ ናኣ፥ ይሁዳ ካትያ ዮኣኪናነ ይሁዳንነ የሩሳላመን ደእያ ዎልቃማ አሳ ኡባ ኦሞዲደ አፌዳ ዎዲያና።

21 “ኡባፐ ዎልቃማ መꬍና ጎዳይ፥ እስራኤልያ ጾሳይ መꬍና ጎዳ ጎልያን፥ ይሁዳ ካትያ ጎልያንነ የሩሳላመን አቴዳ ሚሻቱዋባ ሀዋዳን ያጌ፤ 22 ‘ኡንቱንቱ ባብሎነ ቢታዉ ኬዘታና፤ ታን ኡንቱንቱ ድራዉ ያና ጋላሳይ ጋካናዉ፥ ኡንቱንቱ ያን ደአና። ሄ ዎደ ታን ኡንቱንታ ጉየ ዛራደ ኡንቱንቱ ሳኣን ዎꬃና። ታን መꬍና ጎዳይ ሀዋ ኦዳድ’ ያጌ” ያጋድ።